ငါ့ကိုကျီစားချင်နေတဲ့ တပည့်ကျော်(ဘာသာပြန်)

Episode(12)

ရုတ်တရက်အပြောင်းအလဲ

တိကျိုးဖုန်း တစိမ့်စိမ့်ချင့်ချိန်တွေးဆလိုက်ပြီးနောက် အချိန်အနည်းငယ်အကြာတွင်ခေါင်းထဲသို့ အတွေးတစ်ချက်ဝင်လာခဲ့သည်။သို့ငြား အကောင်အထည်မဖော်နိုင်သေးခင်မှာပင် ထိုအကြံကိုပယ်ချလိုက်ပြန်သည်။

မည်သည့်ရလဒ်ပင်ထွက်လာပါစေ ထိုနည်းလမ်းတို့မှာအသုံးမဝင်နိုင်တော့။သူမတပည့်ဖြစ်သူအား အန္တရာယ်ပေးလာသည်ကိုသည်းခံမှာ မဟုတ်ပေ။ထိုသို့ အတွေးရထားခုတ်မောင်းနေစဉ် နင်းကွမ်ရှိရာသို့ တိကျိုးဖုန်းလှည့်ကြည့်လိုက်သည်။သူမ၏လိမ္မာယဉ်ကျေးသော တပည့်လေးမှာအဘယ်ကိုမှငေးမနေပါပဲ ဝေဝါးနက်မှောင်သည့်မျက်ဝန်းတို့ဖြင့် တိကျိုးဖုန်းရှိရာသို့စွဲမြဲစွာစိုက်ကြည့်နေခဲ့ပါ၏။အာရုံစူးစိုက်မှုအပြည့်ဖြင့် အဆိုပါအကြည့်အောက်တွင်ပိတ်မိသွားကာ တိကျိုးဖုန်း၏နှလုံးသားမှာ ပူနွေးသည့်စမ်းရေအတွင်း နစ်မြှုပ်သွားသကဲ့သို့ နွေးထွေးကာသက်တောင့်သက်သာဖြစ်သွားပြီး မတတ်နိုင်စွာပင် သူမနှုတ်ခမ်းထောင့်စွန်းတို့ကော့တက်လာရတော့သည်။

ထိုအချိန်မှာပင် တပည့်လေးထံမှမီးခိုးရောင် အခိုးအငွေ့တို့ခပ်ပါးပါးထုတ်လွှတ်လာသည်ကို တွေ့လိုက်ရသည်။ရုတ်ချည်းပင် နင်းကွမ်ဆီသို့ ကြောက်လန့်တကြားနှင့်စူးရှကျယ်လောင်စွာ အော်ဟစ်ပြောဆိုကြတော့၏။

"နတ်ဆိုး ကျင့်ကြံသူလား?"

"ဘုရား..ဘုရား..ဒီကလေးက မှော်နက်လမ်းစဉ်ကိုတကယ်ရောက်သွားပြီပဲ!"

တစ်ခဏအတွင်းမှာပင် အဆိုပါပွဲကြည့်ပရိသတ်တို့မှာ ဓားကိုယ်စီထုတ်လိုက်ကြပြီး နင်းကွမ်ဆီသို့မုန်းတီးစွာစိုက်ကြည့်လာသည်။

"ဒီလိုသမာဓိအပြည့်နဲ့ ဖြောင့်မတ်တဲ့ဂိုဏ်းတစ်ခုမှာ ဘယ်လိုလုပ်ပြီးဒီလိုမကောင်းဆိုးဝါးမျိုးကရှိနေရတာလဲ။ဒီနေ့ သူ့ပုံစံအမှန်ကိုထုတ်ပြလိုက်ပြီဆိုမှတော့ ငါတို့ကလည်းကောင်းကင်အလိုအရ တရားမျှတမှုကိုရှာပေးရတော့မယ်!"

အစွန်းရောက်ဝါဒီသမားတစ်ဦးသည် တိုက်ရိုက်ပင်အရှေ့သို့ပြေးထွက်သွားခဲ့ပြီး ဂိုဏ်းချုပ်၏အမိန့်ကိုပင်စောင့်မနေတော့ပဲ နင်းကွမ်အားသတ်ဖြတ်ရန် သူ့ဓားကိုမြှောက်လိုက်တော့သည်။