ငါ့ကိုကျီစားချင်နေတဲ့ တပည့်ကျော်(ဘာသာပြန်)

Episode(10)

အကြံအစည်

ခေါင်းထဲတွင် အကြံတစ်ခုပြီးတစ်ခုပေါ်လာသည့်အတွက် မရည်ရွယ်ပါပဲတိကျိုးဖုန်း၏ပျံသန်းမှုမှာ အရှိန်လျော့ကျသွားခဲ့၏။

ဝေးလံခေါင်သီသည့် ကောင်းကင်ယံတွင်လေတိုးသံတစ်ခုတည်းကသာ သူ့နားနှစ်ဖက်သို့အဆက်မပြတ်ဝင်ရောက်လို့နေသည်။ဝှီးခနဲပွတ်တိုက်သွားသည့်အသံများကြောင့် တိကျိုးဖုန်းမှာ တစ်စထက်တစ်စသည်းမခံနိုင်တော့ပဲ စိတ်ကသိကအောက်ဖြစ်လာလေသည်။မျက်မှောင်ကြုတ်ရင်း စိတ်လိုက်မာန်ပါပြုမူခဲ့မိသည့်အတွက် သူ့ကိုယ်သူအပြစ်တင်မိပေသည်။ဂိုဏ်းခေါင်းဆောင်ရှေ့တွင် ဆူပူကာပုံကြီးချဲ့ဖို့တွေးထားသော်လည်း တောင်မှထွက်လာစဉ်ကတည်းက လူအိုကြီးအားတန်ပြန်အကွက်ဆင်ရမည့် အကြံစည်အားလုံးကိုသူ့ဖက်မှစဉ်းစားထားရတော့မည်မဟုတ်ပါလား အခုတော့ သူမကအလောတကြီးနှင့်ပြုမူခဲ့မိပြီ!

သူမ၏အသုံးမကျမှုအပေါ်ကျိန်ဆဲရင်း တိကျိုးဖုန်းရင်ထဲမှ စိတ်ပျက်မှုတစ်စွန်းတစ်စပေါက်ဖွားလာပြီး လက်သီးနှစ်ဖက်ကို ကျစ်ကျစ်ပါအောင်ဆုပ်လိုက်မိသည်။

ထိုအချိန်မှာပင် သူမအနောက်ရှိလေထုကိုထိုးခွဲလျက် အသံတစ်ခုထွက်ပေါ်လာကြောင်းသိလိုက်ရသည်။ခေါင်းလှည့်ကြည့်လိုက်သည့်အခါ သက်ကျားအိုကြီးချန်းဆွေ့မှ ယုတ်မာသည့်မျက်နှာထားနှင့်သူမအနီးသို့ တိုးကပ်လာသည်ကိုတွေ့ရ၏။သူ၏ကျင့်ကြံဆင့်မှာ တိကျိုးဖုန်းထက်အနည်းဆုံးနှစ်ဆင့်မျှ မြင့်မားသည်ဖြစ်ရာ သူ၏ပျံသန်းနှုန်းမှာလည်း သူမထက်ပိုလျင်မြန်မည်မှာအမှန်ပင်။သူမအမြန်ထွက်လာသည့်အချိန်တွင် သူ့ဖက်မှအချိန်မီမတားဆီးနိုင်ခဲ့သော်လည်း ယခုလိုသူမအနောက်မှဖြည်းညင်းစွာလိုက်လာနိုင်ဆဲပင်ဖြစ်၏။

"စုန်းမ!နင် ရပ်လိုက်စမ်း!"

တိကျိုးဖုန်းအား လက်ငါးချောင်းဖြင့်ကုပ်ကာလှမ်းဆွဲလာခဲ့သည်။ထိုအချင်းအရာကိုမြင်လိုက်သည့်အခါ တိကျိုးဖုန်း၏စိတ်ထဲတွင် အကြံတစ်ချက်လင်းလက်သွားပြီးနောက် ရုတ်တရက်ပင် အစီအစဉ်တစ်ခုအဖြစ်သို့ပြောင်းလဲလိုက်တော့၏။