سَيَهَديهِم وَيُصلِحُ بَالَهُم

تخيل بيوم القيامة..

تخيل بيوم القيامة واگف مرتبك بعد ماچنت بحياتك قوي زمانك ، منتظر الحساب حالك حال البقية ،
تشوف واحد يگلك تتذكرني ، أنت فد يوم گطعت رزقي وجوعتني آني وجهالي وظلمتني بشي تدري بنفسك آني مامسوي ، تگله اَي أتذكر هناك ماكو إنكار لو واحد عرف يطلعك بفلوس الشاهد بس الله .
يگلك رايد حقي ، تتفاجئ زين وآني ؟
فياخذ من حسناتك الحسناته
واگف وتعيد شريط ذكرياتك ،حسناتك وذنوبك ،الدنيا وأفعالك كلها تتلخص گدامك ، تفكر راح تنجح لو تفشل ويجيك غير واحد ، شخص صرت سبب بنهايته ، تتندم وتگله سامحني ،
يجاوبك هناك أسامحك بالدنيا لو بعدني عايش هناك ،هنا وكت استرداد الحقوق
وكل ماتخلص من واحد يجيك غير واحد الحد ماتصفر حسنات يفاجئك يگلك أخذ من سيئاتي
الحوار هذا راح يصير ،

ماكو واحد ظالم يعدي بظلمه ، ماكو جاه وسلطان وفلوس
هناك العملة أعمالك .
لو نفتهم احنه ليش هنا ، وين رايحين ،هواي أمور تتغير بحياتنا .

الله يحسن خاتمتنا وينجينا من ظلم الناس وفِتن الدنيا وعذاب الآخرة .🌿