البارت التاسع
الحر
حزن والدي على جدي حزن كبير
ما توقعت راح يتأثر بهاي الصورة
ابويه جان كلش متعلق بي
حسيته رجع ولد ويدور ريحة ابو
لان جدي سنينه خلصهة عايش عدنه بعد وفاة بيبيتي
وخاصة بفترة مرضي من واني زغير جدي متعلق بيه
يكلهم الحر احس بي روحي متعلكة بروحة
لان هذا الطفل ما شاف الراحة
الى ان كبرت وهوة حتى مرات يبجي من اغيب بالأسابيع
عن البيت بفترة العلاج
اكله جدي لا تبجي ادعيلي اطيب
الصبح كالمعتاد ابويه من يكعد يروح مباشر على غرفة جدي يصبح علي ويشوف شنو يريد عالريوك
حتى امي تحضرله
ابد ما بيوم شفته تعاجز منه ابد
اجة عليه لكاه بارد
مكعدة ما كاعد
وعلى صوت بجي الوالد نزلنه كلنه من فوك
جدي
الف رحمة على روحك يا نسمة طيبه
العزاء صار ابيتنه
وانتقل جدي الى مثواه
سكينة
شفتي بنين مو كتلج حاسه راح يصير عدنه تجمع حزين
اي والله تحقق
ولا خطر ابالي جدي يتوفة
احس مكانه خالي
مشتاقه الصياحة علينه وعصبيته
خاصه لما يصيح وحدة من عدنه
ونجي ثنينه نوكف گباله
وهوة يظل ميعرف منو من عدنه بنين منو سكينه
ويصير عصبي يكول انتن ناصبات علية
تذكرين سكينة مرة من ماما ضربتج وكمتي تبجين
وجدي صاح عليج
اني سمعته
اجيت عليج لكيتج تبجين
لان ماما ضاربتج
رجعت علي كتله هااا جدو صحتني
كلي انتي منو
كتله اني سكينه
كال اي اني صحت سكينه
بعدين رجع سالني لعد الي داتبجي منو
كتله هاي بنين
كلي صيحيها
رحت عود اصيحج بالجذب
واجيت علي وكتله هاا جدو صحتني
وسالني انتي بنين
كتله اي اني
كلي تعاي داشمج
وشمني من خدي وكلي اي انتي ريحتج طيبه انتي بنين
وطلع فلوس وطاني
وكلي هاي مال دموع الي بجيتيها
وبعد لا تبجين
هواي جدي الله يرحمة جان ميفرق بيني بينج
بس هوة جان حنين علينه كلنه
وخاصه الحر
وشكد ما جان عصبي
بس كلبه طيب
الله يرحمة ترك فراغ جبير ابيتنه
هسة عرسج اكيد راح يتأجل بعد
اكيد منو يكدر بعد يزوج
هم عيب من بابا بعدة ليهسة يدخل غرفة جدو ويبجي علي
ايام الحزن طويله
والفراق صعب
ولكن هذه هي حال الدنيا
فدوام الحال
من المحال
منزعج من تصرفها كلش عاتبتها
ريم ليش ما جيتي بفاتحة جدي ويه اهلج
ماما ما قبلت
كالت الفاتحة مال كبار وانتن البنات اذا التقيتن تخلصنه كله ضحك او ونسة
بس عالاقل جان ساعدتي خواتي
جان اخذتي من خاطر عمج ابوية
ااي يا حر مو كتلك ماما ما قبلت
