الثالث عشر والاخير
رجعنة والطريق كلة
صورة صورة مرت علية الذكريات
الجرعات والمها ولعبان النفس الي يصاحبها
العمليات ولي جرى وصار عليه بيهن
الاعراض الي تفاجأنا بسبب التضارب مال الكيمياوي
المعدة والتسمم والطحال
اووووووو ادويه وابر ومغذيات
وفلوووووس دفاتر صرف
تعبان وضعفان
ماعدي قدرة اخوض التجربه من جديد
صافن يمكن قدري اعيش وية المرض
ويمكن اتعالج واطيب مرة ثانيه
ويمكن متعبرلي هالمرة سلامات
افكر وأفكر وافكر
ليش
ليش
- ابراهيم
بابا حر
لا تخاف ماعوفك لو اعرف اسفرك برة بالخارج وعالجك
ماعوفك
باوعت علي
شنو ذنبك يابه
تعيشون المعاناة ويايه
شنو ذنبك كل تعبك وصبرك وفلوسك للطبيب والادويه
انته ابني
وحياتي وهبتها الكم
كلشي اسوي في سبيل تبقه موجود بيناتنة
ونته سبع
قهرت المرض مرة
وراح تقهرة مره ثانية
تعبت يابه
الكيمياوي موت بحد ذاته
استغفر الله ربي واتوب اليك
استغفر الله ربي واتوب اليك
ابراهيم
طلقه صوبها الدكتور بگلبي
من كال المرض رجع اله
اني جنت خايف وحاسس
بس ردت امل او حتى يطلع كذب ظني
بس ارادة الله اقوى
ولا اعتراض على حكمة
بس شسوي العقلي الي ماجاي يصدك
راح نرجع من جديد للخوف
الخوف
شيب كلبي قبل راسي
الخوف من فقدان الامل
وفقدان الصبر
وبالنهاية فقدان فلذة كبدي
ابداً ابداً ما اسمح للمرض يخسرني ابني ابداً
حاولت اظهر القوة وعدم الامبالاة وكأنه الأمر طبيعي
بس هوة اصلاً ماكو شي طبيعي
موعد الكيمياوي بعد يومين
والدكتور طلب انو نحاول نهدأ نفسيته ونلهي باي شي يفرحة حتى ما يفكر
الطلب بسيط بس التنفيذ صعب
وحنه عايشين بوسط ناس ماعدها ذرة مخافه الله
رجعنه للبيت
ماكدرت احجي وابلغهم
وباي شي ابلغهم
شاكوللهم
رجعله المرض
يمكن من القهر والهبطة راح اخسر امة
امة
ااااخ
شكد حاولت تحافظ علي وشكد حاولت وجاهدت في سبيل يبقة بصحة وعافية
باوعت بوجوهنا اول ما دخلنا جانت منتظرتنا اباب المطبخ
ماكدرت انطق وحجيها
ولا هوة الي عدة القدرة ويحجي
ظل ساكت
والكل ظل ساكت منتضر مني احجي
خانتني العبرة
والسكوت هم خاني
وامة واكفه كبالي تنتضر مني جواب
تباوع ابوجهي وبعيني
تبحث وتدور عن شي يطمنها
كتلها
بعد يومين موعد الجرعه
نخبص البيت بالصراخ والبچي
اباوع الة صعد غرفته محني الظهر ماعده قابلية
يباوع على احد
جمانة
امي من حركة كلبة
شالت التلفون وخابرت امة الريم
وكالت اله
بدون لا سلام ولا كلام
دخلتو بخطية ابني
لا محللين ولا موهبين
ولعنة حركة كلب ابني تبقه وراكم
وما تخطيكم
