أنت لي (باللهجة الجزائرية)

❤️❤️

كيما حبسنا فالبارت اللخر . راحو البنات للبزار باش يشرو . دخلو و الحانوت لي يدخلولو يريحو فيه ساعة . و هوما هكاك كانو فالحانوت يستناو في مينا تخرج من الدراسينغ حتى وين صونا تيليفون صوفيا . شافت فيه لقاتو جاد . بعدت على البنات و ريبوندات .
- صوفيا: وي جاد .
- جاد : شريتي لبسة ؟
- صوفيا: لالا مزال . معجبتني حتى عفسة و الله ڨاع ماشي الستيل ديالي .
- جاد: مليح متشريش .
- صوفيا: علاش؟ واش نلبس انا؟
- جاد : منبعد نروح انا و نتي نشرو كيفكيف. قوليلي وين راكم؟
- صوفيا: اممم اوكي . رانا في البزار تاع ### .
- جاد : اوكي . و
- صوفيا: و واش ؟
- جاد : نحبك .
- صوفيا: مام انا .
- جاد : نتي واش ؟
- صوفيا: مام انا .
- جاد: زعما راكي تخلفي فيها .
- صوفيا: لالا . المهم منبعد نحكيو البنات راهم يستناو فيا . نحبك ❣️ .
و كوبات عليه و ولات عند البنات . قعدو هكاك كانو ڨاع شراو . منبعد شافت صوفيا فالساعة لقاتها 12:11 .
- صوفيا: البنات أيا نروحو ناكلو .
- سمية : والله غير صح راني جيعانة .
- مايا : وي امشو .
- مينا: ارواحو انا نعرف ريستورون هنا يبيع ماكلة هايلة. 
- صوفيا: اوكي امشو .
راحو دخلو . صوفيا دوموندات بانيني فرماج و طاكوس و  سمية طاكوس . مايا طاكوس . مينا ماريني . سارة شوارما . و قعدو يستناو وقتاش يحطولهم الماكلة. 
- سارة : راح تاكليهم لزوج ؟
- صوفيا: لالا واحد دوك و واحد منبعد .
- مايا : اوكي .
- صوفيا: ايه لالة  مينا كيفاش راكي مع الحابس ديالك ؟
- مينا: شحال من خطرة نقولك اسمو رؤؤف يا بنتي .
- صوفيا: نرورمال . المفيد وقتاش يجي يخطب . يا بنتي راكي 23 سنة قريب تبوري و زيد عندكم 3 سنين كيف كيف . وقيل راهو يستنا يطيرو بيك ؟
- مينا: لالا.  قالي راح نحكي مع باباك مي ملقاش الوقت بسك راهو يخدم على شركتو .
- سارة : مينا نقولو الصح يعني صوفيا عندها الحق عمبالك راكم عشرة 3 سنين مزال مجاش يخطب يالوكان يحكي مع باباك برك منبعد كي يفرغلو الوقت يجي يخطب .
- مايا : البنات غموه . علاش راكم تعمرولها في راسها شوفو كيفاش راهي ؟ مينا مديريش عليهم . نتي تحبيه و هو يحبك هدا يكفي . عينيا متعمريش راسك بهدرتهم .
- مينا : يعني رؤؤف مالڨري وقتو كومبلي جاي خدمة و دار مي يخصصلي وقت ليا . يعني لوكان نعيطلو في اي وقت يريبوندي عليا . لوكان نغلط في عفسة يوريلي . يخاف عليا . دايرلي وقت في حياتو . يعني ماشي هاملني .
- مايا : هداك هو الصح. 
- سمية : وي هدا هو .
- صوفيا: اووف طولو . وقتاش يجيبو الماكلة ؟
- مينا : صوفيا غير كيما كموندينا . علاش راكي مزروبة ؟
- صوفيا: قالي جاد دوك شوية نجي ليك نروحو للصالة .
- سمية : شوف أصلا كنت حابة نحكي معاك فهاد السوجي . يا بنتي السيد راهو ضاربها بعشقة فيك .
- صوفيا: لالا 😳
- سمية : سي يابنتي لوكان تشوفي كيفاش يخزر فيك كي نكونو ناكلو و نكونو في جماعة و لا كي ماتكونيش فدار يخاه السيد تصيبيه مقلق لوكان نحكيو معاه كلمة يطرطق في وجهنا. 
- صوفيا: لالا بلاك راكم غالطين 😶
- مينا : لالا منغلطوش .
- صوفيا: أصلا يا لالة سمية شوفي نتي اسامة لي قريب يهبل عليك . السيد مسكين ملقاش واش يدير . ولا اونكوبل مع الدزاير كومبلي غير باش تغيري مي نتي والو . سمية رانا بنات هنا قوليلنا ؟ تحبيه؟
- مينا : اخخخ هنا صوفيا عندها الصح . اههه حمد الله جات الماكلة .
بداو ياكلو و يحكو صوفيا كانت دات 3 عضات  حتى وين صونا تيليفونها لقاتو جاد . ريبوندات .
- صوفيا: وي جاد ؟
- جاد : صوفيا وين راكي راني جيت .
- صوفيا: اوكي . وين راك نتا دوك نجي ليك ؟
- جاد : راني فالدخلة تاع البزار .
- صوفيا: اوكي استناني 2 دقائق تلقاني عندك .
و كوبات عليه ناضت حكمت هاداك البانيني رولاتو فالبابي و الطاكوس كان مرولي مالقبل فلاليمينيوم خطتهم فالساك  و رفدت ساكها و سلمت على البنات و راحت دات 2 قرع كوكا  خلصتهم و عيطت تجري  . لحقت للدخلة ولات تمشي بلعقل لقات جماعة تاع بنات قاعدين مقابلينو يخزو فيه عيني عينك . ولات زادت فالفيتاس و راحت عنقاتو و باستو من خدو و قاتلو .
- صوفيا و هي تخزر فالبنات بنص عين : عينيا ستنيت بزاف . 
- جاد : لالا .
- صوفيا بهمس : قولي حبي نحبك و توحشتك و عيط شويا. 
و خزرت فيه بنظرة تقتل .
- جاد عاود حكمها عنقها و قال : حبي . توحشتك .
- صوفيا: مام انا توحشتك و دوك خلينا نروحو .
راحو ركبو فالطونوبيل ديمارا و بدات تحكي. 
- صوفيا: علاش كنت واقف تماك ؟
- جاد : كنت نستنا فيك .
- صوفيا: تستنا فيا و نتا مقابل هدوك الق####  
- جاد: غرتي ؟
- صوفيا: باينة نغير .
- جاد : نحبك ❣️ .
- صوفيا: نعشقك 💋. و دوك وين رانا رايحين ؟
- جاد : نروحو نشرولك روبة مستورة .
- صوفيا: ايواه و انا نقول علاش راهو دايني نشري ؟
- جاد : باينة و لا كنتي حابة تجيبيلي وحدة مفتوحة و كلشي فيك يبان .
- صوفيا: خلاص . متتقلقش .
- جاد : اليوم فليل راح نحكي مع باباك .
- صوفيا: صح 😳؟؟
- جاد : ايه .
- صوفيا: اففف تهنية .
- جاد : باينة . نولي نحكي معاك نورمال قدام ڨاع لافامي و مانخافش كي يشوفوك معايا .
- صوفيا : جاد ..
- جاد: عينين جاد
- صوفيا: فطرت؟
- جاد: لالا
- صوفيا: يسما مالصباح مكليت والو .
- جاد: ايه .
فتحت ساكها جبدت الطاكوس و مدتهولو .
- صوفيا: هاك .
- جاد : واش هدا؟
- صوفيا: ماكلة .
- جاد : منقدرش ناكل راني نسوق .
- صوفيا: حبس الطونوبيل فكاش بلاصة ناكلو و نروحو .
- جاد : منقدرش لازم نوصلو بكري .
- صوفيا: جاد هيا . منطولوش .
- جاد : اوكي .
حبس جاد الطونوبيل فبلاصة مليحة و دار ليها دا منعندها الطاكوس هداك ( اخخخ يالبنات راه في قلبي الطاكوس 💔💔😭😭) و باسلها يدها.  ( خطرات منأمنش روحي كي نكتب لقطات رومنسية 😭) .
- جاد : ونتي ؟
جبدت من الساك البانيني و بدات تاكل و هو ياكل و يحكو منبعد كي كملو نطق .
- جاد : والله خصني ڨازوز . و تخلاص .
- صوفيا: فكرتني .
جبدت الكوكا هديك ( ساكها هدوك لي جايين طوال عراض . فهمتو كيفاش )
- جاد : يسما نتي خممتي فيا انا ؟
- صوفيا: باينة .
- جاد : يازح نحبك .
- صوفيا: عمبالي بلي تحبني . أصلا لوكان متحبنيش انا شكون تحب ؟
- جاد : نتي برك .
- صوفيا: عمبالي . مام انا نحبك .
🎬🎬🎬🎬🎬🎬🎬🎬🎬🎬🎬🎬🎬🎬🎬🎬🎬
آخخخخ يالبنات عن قريب سوف اصاب بالجفاف العاطفي . مزال مأمنتش روحي كيفاش راني نكتب هدوك اللقطات الرومنسية . و نحبك و منا للهيك و انا جامي سمعت واحد قالي نحبك 😭😭😭 . حاسة روحي شجرة فالسما يازح 😭😭😭😭 . جيبولي واحد جاد 😭😭😭
المفيد معمباليش علاش نخدم بكلمة المفيد و لا المهم بزاف . لي روماكا هاد العفسة يقولي اوكي 💋💋 .
و زيد تعيشو فوتيو و الله راني نكتب و نشقا و الله يا هد البارت كتبتو و انا نغسل فالماعن.  نغسل طبسي نكتب كلمة . كتبتو و انا نسيق فالدار كل مانمسح شومبرة تصيبوني قعدة و الله غير راني نعيا علاجالكم باش فاللخر كاش 2 يكومونتيو و يفوتيو .
راني حاسة بلي الكرونيك ديالي معجبكمش . واقيل نحبسو 😭💔😭💔💔😭💔 .
مي مالڨري كلشي مزالني نحبكم و قلبي يخبط علاجالكم نتوما برك 😅🤣🤣❣️ .
فوت و كومنتار بلييززز 😘😘