أنت لي (باللهجة الجزائرية)

🌺🌺

جازو اليامات نورمال مع ڨاع العائلة غير جاد لي توحش صوفيا و راهو حاب يحكي معاها مي الكبرياء ديالو ميسمحلوش و صوفيا لي كيف كيف توحشاتو بصح محبتش تعترف لروحها بلي توحشاتو . اليوم نهار اللول في لافاك . ناضت صوفيا على صوت الرافاي . طفاتو المرة لولة . دوزيام ... كي لحقت الخامسة ناضت . لقاتها 7:20 دقيقة . ناضت تجري دخلت لدوش دوشت و راحت نشفت شعرها بسيشوار ( انا لوكان نشفو بسيشوار برك يولي منفخ شغول طرطق عليا 🤣🤣) و راحت فتحت الخزانة لبست هكا 👇👇

و راحت دارت غيسيل و غوجالاف. خزرت في المراية و بدات .
- صوفيا مع روحها: ياعمري على الزينة ديالي شحال شابة ،😍 الله يبارك. خمسة و خموس عليك . ( هادي انا نديرها كي نكون خارجة ،🤣🤣 ڨاع تحكو مع رواحكم هكا و لا نروح نداوي على روحي ،🤣🤣) .
خرجت من شومبرة و هي تشوف في لميساج لي جاوها . جات حابطة في الدروج لقات جاد حابط . كانت تستنا فيه يقوللها صباح الخير و لا كاش حاجة مي والو ( واش راكي حاباتو يقولك بعد ما ذليتيه يا بنتي 🤣) المفيد حبطت لقات الجماعة فوق الطابلة من غير جدها ( بيناتنا مزال مفهمتش علاش جدها يحبط روطار .؟ زعما واش راهو يدير الفوق ؟ ) راحت ريحت .
- صوفيا: صباح الخير .
- ڨاع: صباح الخير .
- سامي: راكي شابة 😍
- صوفيا: عمبالي عينيا
- سامي : ليك الحمارة باش تقولي مرسي ...
- أمير : راكي شابة .
- صوفيا: مرسي عينيا .
- اسامة : صوفيا.
- صوفيا: وي.
- اسامة : مزالك سيليباتار؟
- صوفيا: وي .
- اسامة : انا مفهمتش كيفاش الزين هدا ڨاع مزالو سيليباتار .
- صوفيا: واش نقولو . الزهر ديالي عامل كي الخرا حاشاك ( حشاكم) .
خزرت في جاد لقات عينيه حمورة و يخزر فيها بخزرة مفهمتهاش . دورت عينيها كي لقات جدها حابط .... كلات منبعد راحت هي و سارة و 2 من بنات عمها . لحقت راحت جابت الورق ديالها و دخلت للونفي . خزرت مليح لقاتو معمر من القدام و من اللور كاين كاش 10 راحت حكمت بلاصة قدام وحد الطفلة كانت وحدها .
- صوفيا: صباح الخير .
- الطفلة: صباح الخير .
- صوفيا: صوفيا .
- الطفلة : مايا .
- صوفيا: معرفة خير انشاء الله .
- مايا : نشاء الله .
بدات مايا و صوفيا يڨسروا حتى وين خلاص الوقت . بعد ما تبادلو لي نيميرو و الانستا و السنابشات و الفايسبوك و التويتر ( و اليوتيوب و جوجل و ... 🤣🤣 راني نحرش برك ) . ولات حشية  عيانة و هي طالعة فالدروج تلاقات بجدها حابط .
- الجد: صوفيا . راكي مليحة بنتي ؟ راكي تباني عيانة
- صوفيا و هي متفاجئة من جدها بسك جامي ماكان حنين عليهم بزاف . : راني عيانة جدو . جاتني واعرة بزاف . زيد كي قريت حياتي كومبلي فالخارج دوك منفهمش مليح هنا .
- الجد: روحي ريحي . و على القراية طبعي برك 😒
- صوفيا: هاداك واش راني ندير . نطبع برك .
- الجد : هاد الشي ليوم بديتي القراية راكي عيانة . كون تكملي عام كومبلي تكوني متي ،🤣
- صوفيا: وي جدو و لله .
- الجد : سيبون .روحي ريحي .
- صوفيا: اوكي .
طلعت صوفيا لشومبرتها . راحت رقدت ديراكت بلا متبدل لبستها . لحق وقت العشاء كانو ڨاع فوق الطابلة يستناو في لالة صوفيا لي كانت خامرة رقاد و الملك الجد . حبط غير قعد قاللهم.
- الجد: متسناوش صوفيا. راهي راقدة .
- سهام: علاش ؟ وشبيها؟
- الجد: راهي عيانة برك .
- كريم : تكون عيات مالقراية برك .
- أمير : خطرات نحير فيها هاديك الطفلة . القراية متقراش كيما العباد و دايرة لي بروجي يجيبو الدراهم .
- سامي: قول الله يبارك .
- الجد: كيما قال .
- علي( العم 1 ) : الله يبارك على بنت خويا .
- كريم : يبارك فيك خويا ❤️ .
بعد ساعات عديدة و دقائق دقيقة ( التعبير ديالي 🤣🤣) ناضت البطلة ديالنا من الرقاد . كانت 12 تاع الليل . راحت لبست بيجامة غوز سروال و تريكو و نحات هداك المكياج و حبطت للكوزينة كي السراقة شعلت الضو بلعقل و راحت فتحت الفريجيدار لقات البيض . دارت زوج حبات بيض اوبلا و جبدت معاه فرماج شيدار و كاس كوكا و قعدت فوق الطابلة . كلات لقمة لولة . دوزيام خرجلها جاد من حيث لا تدري و قعد قدامها و رفد مورصو خبز ( ياحي كان عمبالي مايكلوش الخبز 🤣🤣)  و بدا ياكل و صوفيا تخزر فيه غايسة حتى وين فاقت بلي راهو ياكل في ماكلتها رفدت الطبسي و خزرت في جاد .
- صوفيا: واش راك دير ؟
- جاد : ناكل. 
- صوفيا: ايه عمبالي . مي علاش راك تاكل في بيضي ؟
- جاد : نورمال
- صوفيا: نو . ماشي نورمال.  حتى زوج حبات بيض و زحمتني فيهم . يا زح .
- جاد : مال نوضي ديريلي ناكل
- صوفيا: منوضش
- جاد: نوضي
- صوفيا: منيش قادرة .
حطت قدامو الطبسي منبعد قاتلو : هاك كول معايا .
ضحك جاد و بدا ياكل معاها و هي تاكل و تخزر فيه. 
- جاد : كيفاش جاز نهارك؟
- صوفيا: نورمال . مي واعرة القراية شوية
- جاد : وي باينة . مي تحملي.
- صوفيا: إيه . و نتا كيفاش جاز نهارك؟
- جاد : نورمال .
كمل البيض ناضت رفدت الطبسي غسلاتو . دارت لقات جاد يخزر فيها بخزرة حنينة . ستغربت صوفيا بسك كان عمبالها راح و زيد الخزرة لي راهو يخزر فيها تخلي اي وحدة تذوب في بلاصتها .
- صوفيا: جاد.. مزالك هنا .... عمبالي رحت .
- جاد: نو ... بقيت نستناك .
- صوفيا: علاش؟
وقف جاد من الكرسي و راح ليها لسقها فالبوطاجي يعني هي بين جاد و البوطاجي .
- صوفيا: جاد .. واش راك دير ؟ بعد عليا .
- جاد و هو يحكي بصوت ذابل : صوفيا ...
- صوفيا: اممم 😳
- جاد: توحشتك .
- صوفيا: جاد بعد عليا .
- جاد: لالا منبعدش . صوفيا افهمي راني نحبك ❣️.
- صوفيا: جاد ...
جات راح تحكي حست بجاد يبوس فيها و يعض في شواربها . كي حس بلي نفس تقطع عليها بعد و راح .
بعد خمس دقائق من الشوك فطنت صوفيا . راحت تجري لشومبرتها . قعدت فوق البونك و بدات تخمم .
- صوفيا مع روحها: علاش قلبي راهو يخبط هكا ؟؟ متقوليليش برك نحبو . لالا منحبوش . سي امبوسيبل نحبو . عندي كاش 4 شهور من لي عرفتو وقتاش حبيتو ؟ صوفيا منكذبوش على رواحنا . نتي كي تشوفيه قلبك يبدا يخبط وحدو . كي يدنا منك . كي يحكي معاك . زيد جاد شباب و الف وحدة تتمناه و هو جا ليك نتي و قالك نحبك .
المهم رقدت صوفيا و هي تحكي مع روحها و تخمم ادا تحب جاد و لا نو .
🎬🎬🎬🎬🎬🎬🎬🎬🎬🎬🎬🎬🎬🎬🎬🎬 هاي البنات .
راكم ملاح؟
حمد الله .
المفيد كتبتلكوم هاد البارت معمباليش ادا مليح . قولولي فالكومونت ادا عجبكوم البارت .
صحا صحوركم ❤️❤️
نحبكم ❣️❣️