طبعا اني اكتب اهم العلاقات الي مرت بحياتي مو كل العلاقات..لان اكيد ولازم يمرون اشخاص بحياتنه ميستاهلون حته نتركلهم اثر... فراح استمر بذكر القصص المهمه بحياتي ..والي هيه چانت تجربة وان كانت قاسية بس استفاديت منها بحياتي..
ابطال القصة بأسماء مستعاره :-
اكيد اني سالم...
سجواء مواليد ١٩٩٣..
بأخر فتره الي چنت اعاني ويه عبير وبعد مانهيت كلشي واخذت قراري.. وحاولت ارجع لوضعي الطبيعي.. اجيت وفتح حاسبتي وردت اختلط ويه عالم وناس واسولف حته اغير من جوي.. بذاك الوقت چانت اكو منتديات ومواقع دردشة من ضمنهن (دردشة الخليج وبنوته ) وغيرها من المنتديات.. فصرت ادخل للدردشات واسولف ويه العالم..
چان عندي صديق اسمه علاء صارت علاقتي ويا بعد كره.. چان كلش يكرهني وچنت ما احبه لموضوع انطرح بيناتنه.. بس اني ويا كلش نتشابه بهوايه امور .. اهم شغلة چانت انه نحشش عالكلام هوايه وعدنه سعة بديهيه وفطنه.. جنه ننصب عالشباب هوايه وكلش يحبونه.. ويحبون نلتقي اني وعلاء.. وچنه حته نحشش عالاغاني ونألف اغاني.. فبالليل چنه نلتقي اني وعلاء بالمنتديات وندخل دردشة ونسولف ونحشش.. طبعا علاء كلش ساعدني بتقليل الهم العندي..
چان اسمي مميز بالدردشة.. وچنت اتعرف ع هوايه شباب بس اني بطبعي احب صداقات البنات اكثر.. فچنت البنيه گبل اخذ وانطي وياها وحته انطيها ايميلي بس الشباب مو كلش.... صار الي واهس لان الادمنيه صارو يحبوني ومرات يدخلولي تعالي يمنه بفلان روم وهيج وهيج.. اسمي چنت ذاكر بي اسم منطقتي.. يوم من الايام انتبهت ع اسم ويانه بالدردشة بي نفس منطقتي..گلت يجوز هذا علاء جاي يريد يجذب نظري.. فسوالف عادي وتحشيش وهيچ شي.. مدرت بال للموضوع...
صارت انه مرات ادخل بروم عشوائي الكه الاسم گدامي.. من احشش ويصير ضحك وهيج شي يتفاعلون الكل وحته هذا الاسم.. صرنه مجموعه والادمنية ويانه صرنه ع طول بروم واحد.. طبعا عرفت هذا الاسم مو علاء لان وراها صار علاء ويانه يدخل والاسم موجود.. وتحشيش وضحك.. مرات واني بروم يدخلي ادمن تعال بفلان روم ملتمين ومكانك خالي.. واروح يمهم.. صارت سوالف ويه البنيه بس عالعام اي خاص ماكو ... البنيه هم تحشش ومحبوبه وسوالفها جدا محترمه.. تقريبا شهر هيج شي ع هالوضع.. وره الشهر تقريبا اني ضايف كلمه وره اسمي انتبهت هيه هم ضافت نفس الكلمه.. صارت اسمائنه كلش تتشابه.. بس هم ماكو شي.. بس سوالف عاديه.. چان الادمن من ادخل للدردشه يسويلي زغرفة لاسمي يصير تحفه..
فد يوم اول مادخلت.. صار اسمي زغرفه واسم البنيه هم زغرفه نفس الشي.. صارت سوالف حلوه وكلش صار ضحك وونسه.. وصار تعويد.. فقبل لا اطلع اريد اروح تسألني شوكت تفتح؟؟ اكول مثلا فد ساعتين او اكل واجي.. صرنه من اكون موجود هيه موجوده.. واغلب الوقت اكوله لعلاء تعال يجي وهم اسمه شويه قريب ع اسمنه وهم زغرفه.. نصير فريق وابن ابو الي يقاوم ويانه وع تحشيشنه او الي ننصب علي.. كلش صرت اتونس بالدردشه وتعودت..
الى ان يوم من الايام واحنه دنسولف گلتلهم اعذروني.. راح اغيب عنكم اسبوع.. گالو ليش؟؟ گلتلهم راح اسافر لبغداد.. وهناك لا اكو حاسبه ولا اگدر ادخل دردشه اصلا ميصير وقت.. بالسلامه ومن هذا الحچي وراح نشتاقلك.. گلتلهم علاء يكفي ويوفي.. وره شويه #يتبع....
كتبت هذا الپارت الاول مقدمه فصار قليل.. كلش احتاج هدوء وگعده صافيه حته اتذكر واكتب براحتي كل التفاصيل... لان خصوصا هاي القصة من القصص الكلش مهمات بحياتي..شكرا لتشجيعكم الي حته استمر❤️
