وعندي كلمة اريد اكولها.. اسمعها زين.. كلتلها كولي.. كالت روحي عايشة بيك ووياك.. لتعوفني... والله حسيت جسمي ارتعش .. وبهاللحظة نسيت كللللشي بس هيه ابالي .. والطريق كله افكر فقط بيها.. نستني القهر الي قبل يوم چان بيه..
وصلت والحمد لله وطبيت للبيت حچيت ويه اهلي ومن هاي الامور( طبعا ماريد اكتب تفاصيل هوايه عن العائلة لان مو محور قصه .. بس الشغلات المهمه احچيها)
المهم بوجهي للحاسبه حسيت اني هسه بالمكان الصحيح لا طلعه ولا سفر اريد ولا اي شي.. فتحت الايميل لگيتها كاتبتلي هوااااايه... جاوبتها حاچيتها.. اطمن بعد مچانت ع نااااار... كلتلها تعاليييي مشتاق اضحك عالعالم بالدردشة.. دخلنه.. سوولي احتفالية وكلش مشتاقيلي وحاسين بفراغ بدوني... چانت التحشيشات كلش سخيفه ( عصفور بالايد حطه بالقفص....لعيون العراق فرچ سنونك....اذا زاد همك اكفخ اليمك...) ومن هاي الامور وچنه كل كلمه نحشش عليها
ضحك وونسه ونشمر عالعالم.. وكل شويه سجواء تدخلي خاص.. وهيج اطلع اسأله او اي شغله حته نسولف..وراها كلتلهم اروح انام شويه لان تعبان ومن اكعد نسولف.. باي باي.. گالتلي مو تتأخر عليه.. كلتلها اول ما اكعد احاچيج.. كمت نمت
گعدت لگيتها دازتلي رساله وينك كافي نوم اگعد.. مرمشتلي.. گمت صحصحت سويتلي كم شغله رجعت وگابلت الحاسبه.. وسوالف وضحك حسيت سجواء حابه نحجي بس اني وياها.. واني كلش حاب اسولف وياها بس بنفس اللحظة ماريد اوصل وياها لعلاقة حب وهاي الامور.. ع اعتبار اني ملچوم واشوف هيج الوضعية احلة... و ع كل حال.. متحملت وگالتلي تعال نسولف عالماسنجر.. كلتلها خو هنا عالخاص.. گالت لا مو تعبت من الحاسبه واريد امدد ونسولف.. گلتلها شلوووون؟؟؟ گالتي ع برنامج اسمه اورنج يفتح الايميل عالموب.. ( من هاي اللحظة دخل الشيطان وگام يوسوس.. ) گلتلها تمام...
وضلينه نسولف عالماسنجر.. وهيه شنو تحب واني شنو احب .. اكو هوايه مشتركات بيناتنه وشغلات حلوه وسوالفها كلش كلش حلوه.. ومن النوع الي تحب تسولف مو بس تسمع .. وتسأل هوايه واني احب الشخص الي يسأل لان يكون ذكي... استمرينه كم يوم وصرنه بالليل مندخل للروم نضل بس نسولف بكل تفاصيل حياتنه.. الى ان وصلنه لموضوع العلاقات...
اني ماريد احچيلها ع عبير لان ماريد اتذكر وانقهر او اريد ابين شگد چنت احبها... بس بنفس الوقت اريد هيچ اسولفلها كلشي وكل تصرفاتي الي اني چنت مسؤل عنها... ضليت متردد.. طبعا هيه اصلا مماره بأي علاقة حب.. دراستها فوگ كلشي....
المهم.. مرت ايام چتي ايام.. گالتلي سالم ليش متنزل الاورنج تره كلش اريحلك من الحاسبه وتگدر تراسل بكل وقت... علمتني علي ونزلته والنت چان كلش رخيص عالموب لان مچان اكو برامج هوايه ولا يوتيوب ولا هاي الشغلات بموبايلاتنه.. نزلته وهذا هوه الي سوه نقطة فارقة بحياتي.....
صرنه نحچي لحد ما نغفه... واول ما واحد يگعد.. يگعد الثاني ونسولف.. من اروح للدوام بالفرصه نسولف وحته مرات بالدرس... صرت ابتعد عن الكل... وقتي كله بالموب.. من ارجع بالطريق نسولف.. طبعا هيه نفس الشي بالفرصه ويايه وبالدرس.. ارجع للبيت.. كأنما يمي... اكل واسولف وياها.. اطلع اجيب صمون تجي ويايه وهم نسولف... مشت الامور ع هذا الشي تقريبا شهر عالاورنج..
فد يوم من الايام طلعت سفره ويه الشباب ونطيتها خبر انه راح اطلع سفره ونكون ع تواصل واصلا تجي ويايه هيه.. والامور طيبه.. وضلينه نسولف لحد ماغفيت وره ساعتين او اقل اجوي الولد وكعدوني وطلعنه ع حب الله وسلام الله... وفرحانين ومتونسين.. مشينه وبدينه نطلع خارج المحافظة.. جانت سفره خياليه واني كل شويه اشوف رمشتلي دزت رساله.. اشوف ماكو شي واضم الموب...
المهم لحد الضهر تقريبا ويه مدا اخذ صوره شفت ماكو شبكة بالموب... عدل بدل الشباب.. طلع المكان مابي شبكة مال هاي الشركة.. افتر راسي اول شي ع سجواء وبعدين ع اهلي... السايق كال اكو ذوله الي يأجرون الگعده خابرو منهم بفلوس.. ركض خابرت امي.. كلتلها تره كلش متونسين بس شبكة ماكو .. شويه مستعجل ورزاله خفيفه من الحجية.. مشت الامور.. بقت ذيج مو مال اخابرها.. واصلا اني كلش نحس بهالسالفه.. عود يطلع الرقم مني او ممكن اسولف بموضوعها.. اببببد.. ضليت احوص لحد مرجعنه بالليل...
هيه جتي الشبكة من دخلنه .. يبوووووو.. الدنيه اشتعلت.. رسائل بال٦٠ رساله... ومكالمات.. فتحت خط صوتها مال وحده بالانعاش.. يمعوووده.. تكولي وينك؟؟؟ ليش ليش ومابيها حيل تحچي... يابه شبكة ماكو صدگيني.. المهم گالتلي الله ينتقم منك وسدته بوجهي!!!!!!!😳 هاي شنو..
المهم گلت هاي خبله بعدين تصحك.. رجعت للبيت تعبان حيييل ومنايم ابببد وممرتاح.. سبحت بدلت نمت.. گعدت ع صوت الموبايل يددگ.. جاوبتها.. والله نفس الصوت مال انعاش.... كالتلي وينك.. كلتلها نمت لان كلش تعبان.. كالت هسه كعدت.. گلتلها لا انتي گعدتيني... سدي بوجهي حته اكمل نومتي.. سكتت شويه وگالتلي تمام اروح بس انته قريت الرسائل.. كلتلها لا كلللشي مقاري.. گالت من تگعد اقراهن واقره الماسنجر هم.. باي باي...
اريد انام صوتها براسي.. فتحت الرسائل.....#يتبع
