اجتني رساله عالخاص اكيد من سجواء سالم صدگ راح تسافر لبغداد گلتلها اي والله كلش اختنگت واريد اروح كالت زين شوكت ترجع؟؟ گلتلها مقرر فد ٥ ايام بس احتمال تزيد گالت راح نشتاقلك بالدردشه وللسوالف الحلوه..
گلتلها لازم تشتاقون حته من ارجع تصير لهفة.. كالت يموعود ساعه ساعتين من انته ماكو احس بضوجة.. تشكرت منها ... گالتلي صدگ راح تروح لمنطقتنه ؟ گلتلها هوه اني رايح ع مود منطقتنه .. گالتلي بس دير بالك ديكولون بعدها خطره.... گلتلها ليش انتي مو بالمنطقه؟؟؟ گالت لا احنه شايلين منها ورايحين بفلان محافظة(جنوبية). گلتلها لعد انطيني عنوانكم حته امر من يم بيتكم واسولف ويه ذكرياتچ.. گالت والله ما اتذكر بالضبط لان من زمان طلعنه.. بقينه نسولف فتره وراها گلتلها اني حروح اجهز اغراضي وشغلاتي... گالت بس فهمني يعني مراح تگدر تفتح الدردشة.. گلتلها ابد ما اتوقع راح اگدر..
گالت زين انطيني رقمك اخاف يصير ميصيرحته ليضل بالي ممكن اطمن عليك..... ضحكت وگلتلها اني اسمچ ما اعرفه وراح انطيچ رقمي .. ضحكت وگالت اسمي سجواء. گلتلها عاشت الاسامي واني سالم.. گالت مره علاء ذكر اسمك وعرفت هذا اسمك بالدردشة.. عرفت هيه كلش مركزه ويايه
نطيتها الرقم ونطيتها الايميل وگلتلها الايميل ممكن افتحة من يصير عندي مجال بس دردشه ما ادخل.. المهم سافرت للحبيبة بغداد
وبالطريق كلي افكار وشغلات غريبه عجيبه بس اي خوف ماعندي اببببد واجتي سجواء ع بالي وهيج شلون خايفه عليه وشايله همي.... وتذكرت عبير صارت عندي غصه مالمفروض هيچ يصير بيناتنه..
وصلت لمنطقتنه ومن الشارع العام واحس نفسي طاير مدا امشي .. فرحان كلش وحاس نفسي كبرت وصرت اسافر وحدي. رحت لبيت عمي بنفس المنطقه الچنه كاعدين بيها بس همه بالبدايه واحنه چنه بالچعب.. وصلت وطمن اهلي واتذكر هذا الحچي بال٢٠٠٨ واتذكر چانت نهاية الشته يعني بيها گرصة برد..
طلعت افتريت وصلت منطقتنه بس الوضعيه صدك ميطمن يعني الوجوه تعبانه شكولات غريبه عجيبه... فوضى هيج شي.. المهم شفت من شباب منطقتنه تسالمنه وسألوني ع اهلي.. بصراحة من وگفت براس شارعنه الي قريب عالسوگ تذكرت سلمى واللاء ووگفت مردت افوت ولا اشوف حته بيتنه.. ولا اسأل عليهم ماريد اي شي يرجعني لأيام عبرت بسلام .. لان اني ع يقين اذا رجعت مراح تعبر بأي سلام.. خصوصا من صرت شاب و من طبعي عنودي وهوايه امور.. المهم
رحت لبيت خالتي وراها بغير منطقه اخذتلي يومين.. بيت عمتي.. تونست غيرت جو.. ولا دگت عليه سجواء ولا فاتح ايميل.. المهم رجعت لبيت عمي يمكن باليوم الرابع.. طبعا عمي يكولي انته شجابك شلون دزوك اهلك الوضعيه موزينه.. ابن عمي عنده حاسبه وكتله اريد افتح ايميلي.. فتحت لگيت سجواء كاتبتلي هوايه.. وابن خالي هم كاتبلي لازم تجي يمي من توصل لمنطقتنه.. طبعا هم بيتهم بنفس النطقه ومنا شفت عمي گالب وجهة كلت خلي اروح يم ابن خالي..
نزلت من غرفة ابن خالي حته اروح شفت عمي بالهول كتله عمي اني حروح لبيت ابن خالي... گال يابه مغربيه وتخوف وين رايح خلي ابن خالك يجي ياخذك.. كتله عمي اني اعرف من بين الفروع اروح .. المهم شفته ضاج كتله مع السلامه وطفرت.. واني امشي بين الفروع يمكن مسافه بين بيت عمي وابن خالي بيها ربع ساعه مشي.. طبيت بفرع دگ تلفوني جاوبت هلو هلو كالت شلونك سالم .. گلتلها هلو سجواء انتي شلونچ؟ گالت شلون عرفتني.. گلتلها بده الثول يعني كل الي عدهم رقمي خازن ارقامهم ومو اي واحد عنده موبايل.. المهم واحنه دنسولف بالضبط الشوارع شلون برمضان ويه الفطور هيج الدنه مسدده ..
واني وصلت قريب راس الفرع وطبعا جنطتي وملابسي ويايه.. شفت سياره جايه من وره بصراحه خفت گلت اخاف سلابه مسدين الموبايل گبل حطيته بجيبي.. عبرت السياره شويه اخت نفس طويل چان توگف وانفتحت باب السياره الوره نزل واحد من الباب الوره ملثم اجه عليه والباب الگدام هم واحد ملثم بس بقه يم الباب.. اني نشففففففت جرني جر صعدني بالسياره طبعا صارت عندي صدمه لان مشايف هيچ امور الي چان واگف يم باب السياره من وصلت عتني من ياختي باوع عليه ودفعني بالسياره همه ٣ بالسياره.. ملثمين.. فگالو انته منين؟؟ كلتلهم جاي من الشمال ودا اروح لبيت خالي.. واذا تريدون كلشي اخذو وهذا موبايلي.. طلعت الموبايل مفتوح الخط وسجواء دتصيح سالم سالم تسمعني.. الي يمي صار عصبي وگال ويامن تحچي.. فهوه جر الموب وگال منو انتي؟؟ گامت تتوسل تكول اني خطيبته الله يخليكم اخذو الموبايل وعوفو سالم وبچت.. اني هنا حسيت بكبر المصيبه الاني بيها.. سد الموبايل والي ليگدام گاعد اندار عليه و گال انته من فلان محافظه جاي.. گتله اي والله.. حچه بصوت ناصي و........#يتبع
كلش كلش كلش اسف عالتأخير بالنشر
