سألتني تفضل بشنو اگدر اساعدك؟؟؟؟ معرفت اجاوبها!! بديت ارتبك... كلتلها اريد اشوفها.... وهنا سؤال الصدمة اجاني من الموظفة..... منو اگولها؟؟؟؟؟؟؟؟؟؟ هنا حسيت ع نفسي.... اني منو؟؟؟؟؟؟ سالم منو؟؟؟ شنو ليش شلون؟؟؟ زين اذا شافتني وكالت منو انته ؟؟ اني منو؟؟؟؟ لحظة من اللحظات ممكن تكون سجواء كاذبة عليه كذبه بسيطة ممكن حته تحسسني انه هيه مو لحالها.. او حته تبينلي انه متسوي شي بدون علم اهلها... وممكن نطتني كل تفاصيل عمل امها وهيه بغير دولة شيوديني عليها وشلون اسوي هالشي.... وهوايه من هاي الاسئلة الي خلتني ارجف ومدا اكدر اوكف ع رجلي.. وهذا الموقف بكل صدق...
بس خلص خلي اشوف شيصير ولازم اتصرف... وگلتلها كوليلها سالم.... كالتلي استريح واردلك خبر.. وره شويه كالت تفضل بفلان طابق فلان غرفه...
وتوجهتلها وجسمي احسه صار مرررر مو بس حلگي مرمر... كوه امشي احس نفسي بكابوس... مو ع نفسي بالدرجة الاساس.. ع سجواء اكثر شي.. ممكن يصيرلها شي بسببي واخاف ما اعرف اتصرف اذا صار شي مچنت متوقعه..
وبالفعل دخلت للغرفه سلمت گعدت حسيت برهبه وخوووووف بداخلي چانو اكو عالم گاعدين يحجون وياها.. فكرت اطلع من الغرفه وافلت من الشركة بس مجانت عندي هاي الجرئة...وبعدها طلعو بقينه وحدنه.... كالت تفضل... ضليت ساكت شويه وما اعرف شگول.. گلتلها خاله اني سالم... حسيت الف علامة استفهام يم راسها؟؟؟؟ گالت اهلا وسهلا... تفضل....
شلون ادخل بالموضوع وشنو اريده منها؟؟؟ لا جاي اخطب لا جاي بشكل رسمي ولا اي شي... كلت خلص اگوللها... گلتلها خاله طبعا اني كلش فخور بيج والي الشرف انه احجي واتواصل ويه عائلة مثلكم.. احسن تربيه واحسن اخلاق( طبعا هالكلام نصا وما اعرف منين اجاني) بس گوع دا داحچي.. چان تگوم وترگف ع حيلها......
گالتلي انته سالم؟؟؟؟؟؟؟؟؟؟؟ صديق سجواااااء..... وياها ضحكة رجعتلي العافية.... والله العظيم دمعتي بطارف عيني هلكد مرتاحيت.. گلتلها اي خاله... جان تفتر من وره الميز وحظنتني وگالت يووومه فدوه لالله شكد محبوب وشگد تسولفلي عنك... طبعا مدا احجي... گالت تعال تعال.. شجابك لهنا.. شلون اندليت شلون سافرت..حچيتلها بالتفصيل شلون صارت السفره ويه ابويه وشلون كدرت اسافر.. كلتلها اجيتج حته بس اوصلج الامانه الي اريد اوصلها لسجواء.. طبعا جايب علاگة ويايه خال بيها الغراض...
گلتلها خاله صدگ تره سجواء ماعدها اي علم لا عالسفر ولا جيتي يمچ.. تخبلت گالت تعال تعال... كعدت كدام الحاسبه وخابرتها وفتحت كامرا.. واني مواكف كدام الكام بس دا اباوع سجواء.. بالبيت كاعده كدام الحاسبه... كلتلها عندي مفاجئة الچ... كالتلها شنووووو.. جرتني من ايدي كدام الكام... حسيت بدوختها وصدمتها وممصدگة... ولا كلمه بس دموع تنزل...واني هم دمعت عيني.. سلمت عليها بشكل رسمي وكلتلها اجيت حته اشوف امج لان هلگد مسولفتيلي عليها حبيت بس اشوفها ..حجينه شويه وكلتلها لسجواء بعدين نحچي حلي اسولف ويه خالة .. امها ضحكت وجانت كلش فرحانه.. شوفتها الغراض.. ع بساطتها بس كلش تفاجئت وكلش حبت هالشي...وگلتلها خاله اجيت وسافرت ورتبت هالشي حته بس اشوفج وانطيج هاي الغراض حته توصليها لسجواء...
سولفنه اني وياها عن وضعنه وعن اهلي وتفاصيل وهيج شي.. كالت الغراض الي جبتها ترجعها وياك.. وراح ادز وياك غراض هم تاخذها.. بس توصلها لبغداد انطيك رقم شخص هوه يوديها... حسيت نفسي واحد من العائلة...
فرحتي متنوصف حبي لسجواء محد يتخيله.. وحسيت بحب سجواء من موقف امها...وحسيت الله عوضني عن كل لحظة تعبت بيها وتأذيت بكل حياتي مو بس ويه عبير... طلعت من الشركة واني فرحااااان وطاير... طبعا هيه عزمتني ع عشه اعتذرت منها كلتلها ويه ابويه وعنده التزامات.. مو مال اخذ ابويه يمها... محبيت.. لان ابويه ميقتنع بهيج امور...
ورجعت للفندق... ابويه سوالي زفه وطيح حظ حظي .. عاددددي ميهمني.. الي ابالي عائلتي الجديده... وشلون راح نعيش مرتاحين طول العمررررر...فتحت الماسنجر من الفندق.. لكيتها حاركة الماسنجر بالرسائل.. بس تريد تعرف شلون صار هالشي.. سولفنه چانت طايره من الفرح.. وبنفس الوقت مصدومه شلون سويت هيچ شي جبير بدون ما اگوللها.. سفر وجواز ودوله وهاي الامور وهيه مثل الاطرش بالزفه.. گلتلها كله حته اسويلج مفاجئة.. انتي حبيبتي وحبيت افرحج... تدعي وتگولي ربي يحفظك الي... حجيتلها تفاصيل شنو الصار... بس ابد ابد مجبت طاري الغراض ووصيت امها انه هيه متعرف دا اوديلها غراض.. حبيت تكون مفاجئة ثانية... صرت احس بيها ام بيتي وزوجتي...
بذيج اللحظة حسيت اني صرت گد المسؤلية.. وماممكن افكر بتفاهات ثانيه.. والماضي ماعندي ماضي وتأثير الماضي ممكن شي جدا شخصي وميأثر ع علاقتنه اني وياها..(طبعا الي ذكرته بهذا المقطع بي حسچة ما احب اوضحها.. بس ان شاءالله توصل للي يقره هذا المقطع لان كلش مهم بالنسبه الي) ...نمت نومه مرتاح بيها بعد ما رتبت الغراض لان باجر راح نرجع...وثاني يوم من الصبح فزيت........#يتبع
