السلام عليكم ورحمة الله وبركاته
الجزء الثالث :
صحى على ازعاج البيت من كل جهه يسمع اصوات جلس يتامل نفسه والمكان اللي هو فيه طلع جواله شاف الساعه وطلع يتوضى ويصلي الصلوات اللي فاتته
بالمجلس الخارجي جالسين العيال يتساسرون بينهم
فهد : يارجال والله الرجال ماشفته شديد تحسه جدي مره
طلال : اقول بس ماشفت السياره على فخامتها كنها حقت دلوعين
مشعل : دلوعين بعينك متعود على دتسن ابوك كديتوها كد
فارس: فاتكم الديره كلها مجتمعه على سيارته زين ماتنفجر من عيونهم
مشعل : لا ماعليك خليت عمر والورعان يجلسون عندها خفت احد يكسرها ونبلش
طلال : متى يقوم ذا متحمس اشوفه
عبدالرحمن : احس بيصير فلم على كيفك
قاطعهم ابو تركي : ياولد قم انت وياه ديرو القهوه
تفرقت اصواتهم مابين : سم ، ابشر ، يلا
بالمطبخ جالسات يسولفن البنات
جوري : يابنات على وصف فهد تحمست اشوفه يقولكن هيبه
ريما : ماظنتي هيبه احسه ياي
تجرها جوري تبي تضربها : وش قصدك هاه ؟
تسحبها ليالي وراها : وش فيك معنفتنا انتي متى تصيرين انثى بس صادقه احسه دلوع ولد مدينة مايعرف سلومنا واطباعنا
جت جوري تضربها سمعت صوت رعد وهو يقول : ياوووولد
طلعت تركض تبي تشوفه وهي تردد: قام قام اخيرا
ضحكوا البنات على خبالها وركضها
بعد ماخلص رعد صلاته وقف ولبس ثوبه ونسف شماغه زين وراح جمب الباب تنحنح ونادى : ياوووولد
ماكمل ثانيتين اللي جت بنت تركض وقفت قدامه كانت بيضاء وعيونها جميلة مره وهي تقول : اخيرا قمت من اليوم انتظرك متحمسه اشوفك
انصدم رعد وطارت عيونه : نعمم !!!!!!
جوري ضحكت : نسيت اعرفك علي انا عمتك جوري
ابتسم رعد على خبالها قرب باس راسها : تشرفنا
استحت جوري اول مره احد من عيال اخوانها يحترمها وضحكت تضيع السالفه : تبي اشوف لك الدرب ؟
رعد : اي بالله
جوري وهي رايحه : دقيقه
نعرفكم على جوري ( اصغر عيال سالم عمرها 22 ، مدلعه عند اخوانها ، وصديقة عيال اخوانها بحكم انها قريبه من عمرهم ، كانت جوري ناعمه ، وخفيفة دم ، مرحه الكل يحبها ، جميله ، شعرها طويل تحبه ومستحيل تقصه واجمل مافيها عيونها الواسعه ، تتعرفون عليها اكثر مع الاحداث )
نادت جوري امها جت لرعد وهي تقول : قمت ياأمي
رعد : اي ياجده شوفي لي درب بطلع
ام محمد: مالك طلعه اليوم عمامك مجتمعين يبونك
تنهد رعد: اجل بطلع اشوف وش عندهم وبعدها استأذنك بمشي
ام محمد : ماتمشي لين اشوفك
رعد ؛ ابشري
ام محمد : تعال سلم على عمتك منيره وحريم عمامك
رعد هز راسه وهو يقول بقلبه يلييييييل البلشه وش يدخلني على الحريم
دخل بعد ماتغطوا عنه وقال بصوت عالي جهوري : السلام عليكم جميع
اختلفت الاصوات برد السالم
قرب لعمته منيره بعد مادلته ام محمد عليها وباس راسها: شلونك ياعمه
بكت منيرة بدون ماترد
جوري : يوه عاد منيره بتقلبها نكد ردي على الرجال وشوله البكي
قامت منيره وضمته وبكت : هلا بريحة خالد هلا بولد خالد
رعد : هلا باخت خالد
ابعدت منيره وهي تمسح دموعها : بشرني عنك
رعد : الحمدلله
منيره : الله يجعلك
رعد : انا طالع لجدي يلا استأذنكم
أنت تقرأ
ليت الليالي سمحة محيّا
Romanceروايتي ليت الليالي سمحة محيّا ماسمح نقلها بدون ذكر حسابي قراءة ممتعة
