ليت الليالي سمحة محيّا

9

السلام عليكم ورحمة الله وبركاته

البارت التاسع :

اليوم الثاني الكل كان بشغله الى العشاء بدوا يرجعون
عند بيت ابو محمد رعد شاف البنات طالعين تكلم : على وين
جوري : رايحين بيت منيره
رعد : شعندكم عمتي فيها شي
جوري ماتبي احد يعرف عن موضوع الحرمه اللي جايه ف قالت  : لا بس نودي لارا بيتهم
رعد : ليه لارا ماعندك رجول
لارا: لا خليتهم بالعرس امس
ليالي بهمس للبنات : ياسخافته
ضحكوا البنات
رعد : وش فيكم تضحكون
ترف : ولاشي
عبير : يلا بنات
رعد : جاي امشي معكم
جوري : خير قاط معنا هذا البيت جمبنا
رعد  بطقطقه : اخاف عليكم لازم اوصلكم يمكن تنسرقون ولا شي
جوري : اي مو هنا حبتين بس ما كننا 6 نص درزن
رعد : خلاص روحوا بوقف هنا انتظركم تدخلون
جاء ابو محمد من بعيد وقف قبالهم : وين رايحات ؟
لارا : نبي بيتنا بنروح كنا
ابو محمد: وليه ماتروحن وش موقفكن
جوري : رعد يبي يجي معنا يقول انه خايف علينا
ابو محمد : هذا بيت ام فجر يارعد وشوله توصلهم
رعد بتصريفه: استهبل وصدقوا
ابو محمد نقد على رعد وقال : امش امش صل العشاء وتعال ابيك بعدها يلا
رعد : ابشر
مشوا البنات وابو محمد ورعد راحوا يصلون
بعد الصلاه رعد دخل غرفته وهو يسحب رجوله ويحس البوم ثقيل على قلبه وضيق العالم كله بصدره وصار على السرير مستلقي و جواله موصول بسماعات لاسلكيه على بطنه جواله يتصل تنهد عشان يرد عليه  رد بكسل . . بعد مارد قال الطرف الثاني، بخيبة أجابه : يوم شفتك طولت قلت أكيد نايم استانست ، ليه مانمت يارعد ؟
رعد بتعب : ماجاني النوم ! تعبت يا راكان حتى عيوني طقت من السهر  ! هذي شكلها من دعوات بعض الناس
راكان ضحك وقال : شكلها دعوة من قلب !! من الي داعي عليك ؟
رعد غمض وهو مرتاح انه يكلم راكان : شكلها ليالي
راكان : وش ليالي من هي؟
رعد جلس يعلم راكان سالفة ليالي بالضبط ووش صار ووش المشاعر اللي يكنها ( راكان صديق رعد المقرب . . سموه اخوه اكثر من انه صديقه ، بتتعرفون عليه مع الايام )
رعد بإبتسامة شارده : وبس هذي لياليي
راكان : وبعد حاط لها ياء الملكيه . . اقول بس تسنع ونام لأنك بديت تهلوس تراك واترك عنك الحب والخرابيط
رعد: وبس والله وجدي موقفني على رجل بالمحل العمال والرواتب والسلع كلهم قطهم علي وانا محتاس هالفتره
راكان : لازم ترتب امورك وتتعدل
رعد : مرهق ذبحني قل النوم كل ماغمضت عيوني تمر علي امي ولايمر علي ابوي ماعاد اقدر انام
راكان : لازم ترتاح اذا ما ارتحت ماشتغلت تراك
رعد :  ومدري كيف ببدأ اركز وأنا مخي موقف و كل خلية بجسمي أحس ودها تنام عقلي فاصل من النوم وروحي ذبلانه من السهر والله مدري وش اسوي
رعد كمل : المهم طيب خلنا مني وش سويت من الصبح ؟ رحت زرت قبورهم اليوم ولالا؟
راكان : لا شوي طالع ازورهم ، وانت وين بتروح
رعد : انا خلاص والله مافيني حيل أتحرك ، بكرا إن شاء الله بروح الدكان واشوف الدنيا
راكان  : إن شاء الله عاد تحجج انك تعبان خل جدك يرحمك تمام
رعد : هو لو يجي النوم بس .. المهم ماطول عليك لا فضيت كلمني ولا تعال لي
راكان : ابشر والله ماطلبت شي
رعد : يلا فمان الله
راكان : الله يحفظك