ليت الليالي سمحة محيّا

4

السلام عليكم ورحمة الله وبركاته

الجزء الرابع  :

بعد العشاء مشعل وعبدالرحمن يسوون الشاهي
وفهد وفارس يشبون النار
طلال وعبدالعزيز جالسين مع رعد طلال يضحك على وصف عبدالعزيز لرعد
عبدالعزيز يسكته ويكمل وهو يوصف بيدينه : تخيل يارعد ثم يجيني جدي وانا بنص الهوشه قلت لا بس جدي فزاع لي شديت حيلي قدامه اصفق بذا وذا ابيه يشوفني
عاد جا جدي سحبني من فوق الولد ونزل عقاله وقدامهم كلهم جلدني جلد لا تسالني شلون كتمت البكيه
طلال مو قادر يسكت من الضحك : علمه علمه وش سوا بك بعدها
رعد يضحك على خفة دم عبدالعزيز: وش سوا بك
عبدالعزيز يقوم يوصف : تخيل ذا باب محل جدي حق النجار شفته ؟ علقني بالباب تخيل وقال ارفع يدينك ان نزلت يد ماتلوم الا نفسك ( يوصف له ) كذا واقف تخيل رافع يديني وثوبي معلق بالباب
ماتو ضحك طلال ورعد
يكمل عزيز : كل من مرني ضحك علي حتى الورعان يسبوني ويضحكون ماني قادر الحقهم
طلال بكلام متقطع من الضحك : تكفى خلاص تذكرت شكلك
رعد : يليتني حاضرك والله ماانساها كل عمري
عزيز : مايحتاج تحضرها كل الديره يعرفونها اسالهم عن تعليقة جدي لي على باب المحل

ابو محمد وهو يسولف لعياله الكبار حوله : ياحليل عبدالعزيز يسولف مع رعد شوفوا وشلون يضحك من جاني ماشفته يضحك كذا
محمد : اي هذا ولدي لازم يضحك الي معه لو ماعنده سالفه قام يكذب
ضحكو على تعليق محمد

بعد مالتموا على الضوء ويشربون شاهي قال ابو محمد : اسمع يارعد جب عفشك وتعال الديره بيت اهلك وناسك
رعد بيرد قاطعه ابو محمد : ومااقبل اعذار ولا حجج شغلك اختار المحل اللي تبيه واعتبره جاك ومسكنك معي انا وجدتك اعتبرها امك وانا ابوك

رعد كان رافض تماماً : ياجدي مالك لواء بس مقدر وظيفتي هناك وبيتي وحياتي
ابو محمد بصرامه : وش الحياه بدون اهلك وعزوتك
رعد بحده : حياتي 19 سنه بدون اهل وعزوه ابوي بس كان لي اهل وعزوه
ابو محمد بغضب : عشان ماتصير اكثر لين هنا وبس
الكل كان متوتر من عصبية ابو محمد وطبع رعد اللي مايعرف جده زين
رعد : اعذرني ياجدي بزورك بالإجازات
ابو محمد وقف بعصبيه اكبر : تبي الماضي ينعاد يارعد
وقف قدامه رعد وهو يحاول يضبط اعصابه : عمر الماضي مانطوى كل يوم كنت اعيشه واشوفه بعيون ابوي
ابو محمد : عشان ماتخطي خطا ابوك اذا طلعت من بيتي مالك رجعه وانسى اهلك
الكل فز يهدي ابو محمد
ابو تركي ؛ يايبه جرح امس للحين موجود مانبي الجرح يكبر
ابو محمد بعصبيه : وش قصدك انا جارح ؟؟؟
ابو تركي : لا حشاك يابوي اقصد مانبي الماضي ينعاد
حضرت منيره من نص السالفه وفهمت الموضوع قربت لرعد وقالت : تكفى يالغالي لا تغثون امي اكثر لا توجعون قلبي اكثر
رعد : ياعمه انا ولدكم وبالاجازات عندكم بس حياتي هناك
ابو محمد: مالك حياه برى هالديره

طلع ابو محمد رايح لفراشه ينام ويحاول يهدي توتره ويغمض

بالمجلس
كلهم حول رعد
عمه ابو فيصل : يارعد فكر بامي والله لا انعاد الماضي يصير لها شي
عمه ابو فهد : فكر ياوليدي باللي بعدك وش حالهم
منيره : عشاني عشاني يارعد
تنهد رعد : والله انا شاريكم ولا اني بايعكم بس اقدر هنا وهناك اكمل حياتي
فهد : لاتطولها يارعد استهدي بالله واجلس فتره اذا ماعجبك الوضع ساعتها كلنا نقنع جدي بدون قطاعه اما لو طلعت الليله بتصير اشياء كثير بعدك
رعد فكر بكلام فهد وقال بقلة حيلة : طيب عشانكم بس
نط عبدالعزيز يضمه: فدا والله للي يلم الشمل
يدفه مشعل : وخر عنه اغار عليه حبيبي الشهم ابو خالد
ابتسم رعد على خبالهم وهو متضايق من داخله ناظر ابو تركي : عمي محمد لازم اروح اجيب اشيائي الضرورية
ابو تركي : بكره ان شاء الله نقول لابوي وتتيسر تجيبهم
عبدالرحمن: انا مخاوي خط
عبدالعزيز: وانا مع اخوي
ابو تركي : اقضبوا ارضكم يروح هو وفهد يدبرون شغلهم ويجون
عبدالعزيز بخفة دم لرعد: ترى مرسلين فهد ضمان عشان تجي
كلهم ضحكوا على قطته
ابو محمد بضحكه : مالك شغل بس رح قل لاهلك بنمشي
الكل قام بيروح بيته بقى رعد جالس لحاله