ليت الليالي سمحة محيّا

7

السلام عليكم ورحمة الله وبركاته

الجزء السابع :

دخل رعد بيتهم لقى جوري وهي توها تخلص ترتيب نادته / تعال تعال وش مسوي اليوم
رعد : وش سويت ؟
جوري : ليالي ؟
رعد يتغيبى: ليالي؟ وش لياليه
جوري : بلا خبال ليالي بنت ناصر
رعد فهم انها اخت فهد ومشعل وانبسط انه عرف بنت مين بدون مايحتاج يسال احد : من هذي ؟ وش تساليني عنها
جوري : ليالي قالت لي انها شافتك
رعد ويسوي نفسه مو فاهم : من ليالي وين شافتني ؟ وخير واذا شافتني
جوري : لا تستغبي رعد هي قالت انها شايفتك اليوم يعني يوم دخلت غرفتي لقيتها
رعد : مانتبهت لها اصلا بشريها
جوري : لاتكذب واضح اسلوبك اذا كذبت
رعد : ماكذب دخلت من حسيت ان في حركه تنحنحت قبل التفت يوم سمعت شهقت بنت طلعت على طول وطلعت اناديك على طول ( سكت شوي وكمل ) ليه هي قايله لك شي ؟؟؟؟؟
جوري : لا بس قالت انها شافتك وانا عبالي انت شايفها بعد
رعد : لا وين اشوفها مانتبهت مستعجل
جوري / زين اجل صورتلي شي من عزيمة اليوم ؟
رعد : بس شبة الضوء اخر الليل اول اليوم مامداني من جدي وضيوفه
جوري : ارسلها لي هاك رقمي
رعد اخذ الرقم وهو رايح غرفته: ابي اروح ارقد اشوفك بكره
جوري وهي تطفي النور وهي رايحه الغرفه بعد : ان شاء الله
--
رعد بعد مانسدح نام من التعب على طول

في بيت ثاني اول مره نجيه بيت ناصر ابو فهد
الكل نايم الا ليالي تفكر وشلون لو دروا اخوانها ان رعد شايفها وهو ماله اسبوع تفكر يويلي والله عيال عمامي بحياتي كلهم ماشفتهم من تغطيت يعني بدون غطى مستحيل مدري هم متربين ولا هذا قليل ادب على طول درعم شكله متعود قليل ادب انا قايله ولد المدينه هذا سلومه غير عننا كل شي عنه عادي يناظر بنت بدون مايرمش عادي عنده صدق قليل ادب . . يوه بكره شلون اروح بيت جدي ياربي بس لازم احاول انام

بقت ليالي تفكر ولا نامت ابد قامت تصلي الوتر قبل الفجر بعدها راحت المطبخ وقررت تعجن عشان تسوي خبز الفطور بدري تركت العجينه تخمر وسوت لها كاس شاهي وطلعت بشويش الحوش تناظر السماء وتشوف القمر كامل جلست على العتبه حقت الباب بشويش لا يحسون اهلها يقومون تناست رعد وهي تحس بالبرد وصل عظامها مسكت الكاس يدفيها بقت سرحانه باللا شي تناظر الفراغ وتفكر
قطع سرحانه اذان الفجر بعد مارددت مع الاذان قامت تصلي وتبدا عجينه
وهي بنص الخبز شافت اخوانها وابوها
ابو فهد : صباح الخير يالسنعه
ليالي : صباح النور يبه جالسه اجهز لك فطور عشان بعد ماتجي تفطر
ابو فهد : مانمتي ؟
ليالي : لا ماجاني نوم قلت اسوي لكم فطور
مشعل : بنام مابي فطور
ليالي : بكيفك انا مجهزته عاد اذا صحيت كل
فهد : عساك على القوه ، يلا الصلاه بتقيم
ليالي : الله يقويكم ويتقبل منكم
طلعوا صلوا وهم جايين
ناصر : يبه تعال نفطر ليالي خابزه تقول ماجاها نوم وسوت الفطور بدري
ابو محمد : لاوالله بروح ارقد شوي وراي قومه من الجهمه
فهد ناظر رعد وقرر يعزمه بعد مابوه عزم جده : اقلط يارعد
رعد وهو مبسوط من سمع اسم ليالي ومسويه فطور بس ضاق صدره انها مانامت و من رفض جده رد على فهد : لا والله مابي اكلف عليكم
فهد : تعال يارجال مافي كلافه كل شي جاهز
عبدالعزيز جاي من بعيد يركض : فهد فهد فهد
لف فهد : هلا هلا هلا
ابو محمد : شوي شبلاك تباري ظلك
عبدالعزيز: شكلك ماتدري امش يلا ياجدي
ابو محمد : وين ؟
عبدالعزيز: شميت ريحة خبز من بيت عمي ناصرواصله للمسجد
ضحكوا عليه كلهم
فهد : شلون شميته ؟
عبدالعزيز : مع مشعل
مشعل وهو جاي : كذاب ازعجني بسوالفه قلت رح اهلي مسوين فطور وخابزين بدري مامداني خلصت كلامي الا هو سابقني
فهد : تقل كلب تشمشم
عبدالعزيز: بسكت حشمتن لعمي ولخبز ليالي بعد الفطور ارد عليك
دخلوا بيت ابو فهد ورعد يتراقص قلبه فرح
سبقهم فهد يخبر اخته وامه معه رعد وعبدالعزيز واخذ الفطور للمجلس
ابو فهد : يلا اقلطوا ياعيالي
افطروا العيال ورعد معجب بالخبز اللي سوته ليالي مع انه خبز عادي بس يحس ماعمره ذاق مثله
بعد الفطور كل واحد راح بيته يرتاح قبل يروح شغله