"الـذين يُحدِّقون بالأرضِ طويلًا بعدَ كُلِّ خيبـة، إلى أينَ تذهبُ نظراتهم ..؟"
شلونكممم يمعودين مشتاقين 😂❤️
هسه نبلش وبنهاية البارت نسولف
قراءة ممتعة......❤️
______________________________________
: وينج ما سألتي عليه صار 9 سنوات عايفتني بيد وحوش اجه ابويه يمج عاتبتيه حاسبه الله؟
ليش قتلجج اني شذنبي صرت يتيمة شذنبي اتعذبت مو بنته اني ليش حب بنات الغريب اكثر مني اشرت بايدي ع كصتي وطرف عيني وصرخت هذاا دمججج هنااا دمجج انيي العشتت العذاب اني المريت بحالة نفسية اني الي صار بيه توحد 5 سنوات من الوحدة والحالة النفسية 5 سنوات من الدموع والقهر الله يحاسبه راحح يحاسبه الله هزتلي راسها وبدت بدلتها البيضة تتلطخ دم وصوت الطلق يعلى دنكت راسي اباوع ع اديه صافتهن وبيهن ثلث وردات ورديات اجت يمي تمشي بهدوء هي ودموعها الحمر وثوبها الي يتلطخ دم وصوت الصراخ والطلق كل ما تقترب يعلى اكثر اخذت من ايدي ورده وطخت ايدها بوحده من الوردات لوثتهه دم دارت وجهه ومشت وصورتها تتلاشى صرخت وراها جيبيهااا لا تاخذين وردتيي جيبيهااااا
فزيت من النوم جسمي كُله عركان دموعي تجري وحدها
بسم الله الرحمن الرحيم احجي بيني وبين نفسي
امي؟!!
شجابها الي
شذكرها بيه
عاتبتها؟!!
اي عاتبتها
ليش تبجي
حاسبه الله؟
الخمس سنوات
ورد؟!
طلق!
بدون وعي طلعت مني صرخة مكتومة صارلها سنين اجن يركضن على صرختي
سناء: ريممم شبيجج يوومم شكووو شبيج ولج احجي
سحر: ريم شبيج شصار
اسمع صوت بيبي من جوا تصيح ماتكدر تصعد حجيت بكلمات متقطعة: خا خاله شفت شفتها امي هي هي نفسها عاتبتها احجي واشهك ويه كُل شهكة ينعصر گلبي هو "حلم" بس فتح جروح خيطتها بالف يالله او بالاصح دفنتها بداخلي واتناسيتها رجعني سنوات لورا سنوات الفقدان والخسارة راحت سحر للجامعة وخاله كاعدة يمي صافنة ومبين عليها الحزن شوي ونزلت يم بيبي بقيت كاعدة وحدي ودموعي ينزلن عشرة عشرة الدمعة تحرك خدي من تنزل ماجنت متوقعة بيوم من الايام اكمل حياتي طبيعي صح كملتها بس مو طبيعي اني اتناسيت ما نسيت گلشي قديم يمر عليه باليوم الف مرة سنوات من الضياع ما اكدر انساهن بسنتين اني بعد الي خسرته اعتبر انسانة منهارة 18 سنة تشتُت صح خاله كدرت ترمم جزء چبير مني بهاي السنتين لكن الجزء الصغير الي محد يگدر يرممه باقي بداخلي مدفون بيه
نرجع سنة بالزمن :
ريم: كاعدين نتعشى اني وبيبي وخاله مندمجين نسولف ونضحك قاطعنه صوت الباب يندگ وبالعادة محد يجي هيج وقت طلعنه اني وخاله نفتح الباب الي فاجأنه حالة سحر هي ودموعها وشكلها الي مبين عليه التعب دخلناها لجوه رحت كعدت يمها حضنتني بسرعة وتشهك: سحر لتخوفيني شبيج شصاير وياج ابتعدت عني تمسح دموعها ويرجعن يوگعن حجت ببحة من البچي: احتاريت وين اروح مالگيت نفسي الا هنا ماعندي غيرجن ريم كملت كلامها ورجعت تبجي كعدنه نسولف وفهمتني انو بيت عمتها ما يردوها وانو داگهم الفقر ميكدرون يصرفون عليها والي طمأنه قرار خالتي من گالت: سحر تبقى يمنه وتعيش ويانه حالها من حال ريم طبعا جانت سعادة بالنسبة الي بسبب تعلقي بسحر كملنا السادس سوا واجتازيناه سوا معدل سحر كدر يدخلها كُلية هندسة واني رغم معدلي اعلى وجنت اگدر اقدم صيدلة الا اني قررت اروح ويه سحر نفس القسم جانت فرحتنه بالنتائج لا توصف وخاصة فرحة خالتي والحفلات الي سوتهن النا والهداية جانت احلى سنة بحياتنا بس العائق الوحيد جان انو قبولنا طلع ببغداد وجان لازم او نغير محافظتنه او نغير الكُلية بس خاله رفضت لانو جانت حابة انو نروح هندسة لذلك انتقلنا لبغداد ب2015 قبل دوام الكليات رتبنه وضعنا واستقرينه وبلشنا تجهيز للدوام وفجأة رجع ايهاب طلع بطريقنا والي عرفناه انو هو من بغداد اصلا فا صار يطلع بوجهنا بكُل مكان لحد ما كدر ياخذ غايته ويتملك گلب سحر ومن هناك بلشت قصة حبهم وحياتنا الجديدة
أنت تقرأ
رُغم شتات انكساري
Misterio / Suspensoغَزال مُتهالك احتضنتهُ أجنِحةُ نِسرٌ في كتفِ رجُل وَحشٌ غائر شبحٌ مُنتقِم رمى نفسه بين ذراعين يمامةَ سِحرٌ ابيض حَب ليفقد عشِقَ ليخسر حَارب لينهزم شهمٌ شُجاع خُلق مِن القوة خانهُ الوطَن فَ مات على يدِ جبَان ولكُل بطلٍ حكايةَ سيرويها لَنا الزَمن، ي...
