My Fond Parijat In past...,Where Are You Now? [Our Missing Fate]

[16].ဧကဝဏ်သို့ ခရီးဆက်ခြင်း...Uni+Zg

အခန်း [၁၆] ဧကဝဏ်သို့ ခရီးဆက်ခြင်း

"ကျန်းမာရေးဂရုစိုက်ပါ ဖွား"

"လူကလေးလည်း အစစအရာရာဂရုစိုက်ပါကွယ်"

"ကျွန်တော် အခွင့်ရတိုင်းပြန်ခဲ့မယ်နော် ဖွား"

"ဟုတ်ပါပြီ လူကလေးရယ်။
တောထဲမှာ သတိကြီးကြီးထားပြီးသွားလာနော်"

"ဟုတ်ကဲ့ပါဖွား...မိဝိုင်း ငါသွားတော့မယ်နော်။
ဖွားကိုသေချာကြည့်ရှူပေးပါဟာ"

"အေးပါ အရိုးရယ်...စိတ်ချလက်ချသာသွား။
မကြာမကြာလည်းပြန်လာခဲ့"

အထုပ်အပိုးအနည်းငယ်သယ်လျက်
တရွေ့ရွေ့ထွက်ခွာသွားသည့်မြေးဖြစ်သူအား
ခြံဝန်းရှေ့၌ရပ်နေသည့်ဒေါ်မေခင်မှာ
မျက်ရည်လေးတစမ်းစမ်းဖြင့် အတန်ကြာအောင်ငေးကြည့်နေခဲ့သည်။

အတူနေလာသည့်၁၈နှစ်တာကာလ၌
မြေးဖြစ်သူနှင့် သူတစ်ရက်ပင်ပြည့်အောင်မခွဲခွာဖူးပေ။
သူ့သဘောအရဆိုလျှင် ဤရွာ၌သာ
အေးအေးချမ်းချမ်းနေစေချင်သော်လည်း မြေးဖြစ်သူကိုယ်တိုင်က စိတ်အားထက်သန်လွန်းနေတော့လည်း မတားမြစ်ရက်ခဲ့ပါ။
ရည်မှန်းချက်တွေ အမြန်ဆုံးပြ​ည့်ဝပြီး
ဘေးအန္တရာယ်ကင်းပါစေဟုသာ ဆန္ဒပြု၍
ချစ်ရတဲ့မြေးကလေး အိမ်ပြန်လာမည့်အချိန်ကိုသာ စိတ်ရှည်ရှည်ဖြင့်စောင့်မျှော်နေတော့မည်။

ရိုးတံနီမှာလည်း မျက်ရည်စက်လက်နှင့်ဖွားမျက်နှာကိုကြည့်၍ ငိုချင်သည့်စိတ်ကို အလွန်ပင်ချူပ်ထိန်းထားရ၏။
ခပ်လှမ်းလှမ်း၌ ကျန်ရစ်ခဲ့သောဝါးအိမ်ကလေးနှင့်
ခြံစည်းရိုးလေးကို သမင်လည်ပြန်လှည့်ကြည့်ရင်း
မျက်လုံးထဲ၌ အသေအချာစွဲမြဲနေအောင်မှတ်သားပြီးမှ ခြေလှမ်းများကို အားအင်အပြည့်ဖြင့်ရှေ့ဆက်ခဲ့တော့သည်။

ရွာဈေးကြီးသို့ရောက်သောအခါ
သူသွားရောက်ရမည့်ဧကဝဏ်တောအုပ်ကို
လှည်းလမ်းကြောင်းပေါက်သည့်နေရာအထိလိုက်ပို့ပေးနိုင်မည့်နွားလှည်းတစ်စီးကို ငှါး၍ တောအုပ်အတွင်းသို့ စတင်၍ခရီးဆက်ခဲ့သည်။
ဧကဝဏ်တောအစပ်မှ သူအနှစ်သက်ဆုံးဖြစ်သည့်တောလမ်းကလေးသို့ရောက်လာသောအခါ ကုန်လွန်ခဲ့ပြီဖြစ်သည့်အချိန်များမှ တစ်သက်မမေ့နိုင်ဖွယ်အမှတ်တရများကိုလည်း သူ့မျက်လုံးထဲ၌ ပြန်လည်မြင်ယောင်လာမိ၏။