فبقى يتوسل وامي عصبت وحاجتني بغضب بلقيس تروحين اوياي لو تبقين ، وعمج يجي والي حجي اوياه حتى يعيد تربية ابنه الماعرف يربيه وعمتي سكته ماحجت شي واني الغبية كتلها ابقى ولا كأن الي انهانت كرامتي لا ومن طلعت امي وصلت اوياها لباب واني احرمص يوم الله عليج اسكتي لاتحجين شي العمي حتى افتهم جائز اني افتهمت الوضع غلط وسام مظلوم يوم مايرضيج تهجمين بيت بنتج علمود ضنون ، وامي ماجاوبتني وعافتني وطلعت ماحجت شي وبقيت وهل الفتر ة وسام وامه مدللني ويحرمصون الصار غلطه ولاتحجين لعمج ،واني الغبية صدگتهم لان مرات الطيبه من توصل حد تتحول غباء ومرت الايام واجه عمي ، واني عادي ولاكأنما شي صير ووسام وامها مراقبيني وخايفين احجي شي لعمي وافضحهم ،وخايفين من امي اكثر فأجاني حبيبتي وحياتي اروح اني اوياج لامج حتى نقنعه ماتحجي شي لابويه لان مريض وخاف يصيرله شي انت تقبلين عمج يصير بيه شي يتمرض ،ينجلط لاسامح الله اليوم حظري نفسج وطفل ونروح حبيبي ،ورحنه لاهلي واعتذر من امي ونزل على ايدها ورجلها يبوسهم ، ويحرمص كالتله ماارح احجي شي مو لخاطرك لخاطر بنتي ولخاطر ابوك لان مريض بس والله اذا شفت بنت خالتك اوسمعت واصله بيت بنتي ماتلوم انت وامك غير نفسكم افتهمت اولا ، وهاي الساقطه بنت خالتك اذا تخايلت بيت بنتي مو بس اوبوك اگلها لا والله حتى رجلها اوصلها واحجيله عن سوالف مرته حتى تتربى ، وصدك وضل يتعذر ويوعد وامي وانا الغبية مصدگة بعد هل الحادثه راح يخاف من ابوه ويتغير وصدك بعد طيبة مااجت ومرت الايام وصار عمر ابني سنه وسبع شهور وحبلت بابني الثاني لكن هل المره قررت ابقى عند بيت عمي وعمي ماقبل اروح لان مايفرك ابني يموت عليه ، ووسام عادي وكنت اتصور اتعدل حاله لكن الي ماكنت اعرفها وعرفتها بعدين هل الكلام صارت ماتجينه صح بس صار بحجه الدوام يروحلها للبيتها وحتى يبات عدها ورجلها بالشغل واني ياغافلين الكم ، جنس ادم عجيب امرهم سواء كان وسام اوغيره ،حالهم حال اليه.ود رب العالمين انطاهم المن وسلوى الطعام الطيب النازل من الجنه ،وهما يتركونه ويردون الثوم والعدس يتركون الشريفه الي صاينها بيوتهم ويدورن الخاينه ورخيصة ولا تگولون حب لان مستحيل الحب والخيانه يجتمعن بقلب واحد ، القلب الي يعرف الحب مايعرف يخون والي يخون عمره مايعرف يحب ومثل ما يقول الامام الشافعي رحمه الله
وَلاَ خَيْرَ فِي وِدّ امْرِئٍ مُتَلَوّنٍ
إِذَا الريحُ مَالَتْ مَالَ حَيْثُ تَمِيلُ
المهم وتمر الايام ويصير ابني الثاني ، واني كل هل الفترة اعتقد وسام انقطعت كل علاقته بيها بهل الفترة بددت تدخل وتنتشر تلفونات المحموله اني ،ماعندي تلفون وهو طول الليل يتراسل اويامن مااعرف ،كلت جائز جماعته الي بدوام ، بس طول الليل معقوله اشعدهم ، الا ان مرة نعس ونام واني بقيت مع ابني سهرنه واشوف التلفون يضوي رساله سحبته منها قريتها طلعت شكرا حبيبي وصلت الهديه مااعرف اشلون اشكرك ياقلبي مشتاقتلك واخر الرساله حبيبتك طيبه ، فأخذت رقم وخليته يمي ، وثاني يوم كتله اريد موبايل حتى اخابر امي اخواتي اشوف احوالهم فما گال لا صدك يومين وجابلي تلفون ، ورها رحت لاهلي زيارة وحجيت لاختي كالت هذا عندي خطج جديد راح نتصل ونسمع صوتها من طيبه البالنها لو غير وحده ورها نكسر الخط وصدك والله اتصلنه وطلعت هي طيبه بنت خالته يعني طول هل المده متواصل اوياها هنا صدك انقهرت ، منها يعني كان يكذب عليه طول ذيج الفترة
اني عايشة بوهم ، لكن كل هذا محد يعرف بس اختي ومن رجعت حجيت لنهى لان امي اذا احجيلها ماراح تسكت واطلع القديم وجديد اوياها ، وكل هذا واني متمسكه بيه على شنو ماادري ،واني كنت جبانه الى ابعد الحدود حتى من رجعت مافتحت اوياه الموضوع ولاحاجيته رغم اتاكدت هو بعده مع هاي طيبه كلها هذا خاف اخسره ، رغم هو كلشي يسوي حتى يخسرني ، الا ان امي عدها صديقتها عدهم منظمات تساعد النساء المطلقات المعنفات يعني يدخلونهم دورة حياكه خياطه تفصال فالمره رشحتنها اني وامي نعلم النساء الخياطه والحياكه وكان مكان هي المنظمه بلمنطقة الي بيها بيت هاي طيبه وهذا العرفته صدفة ، فبيوم اكعددت من الصبح وحظرت شغلاته وملابسه عاساس اليوم يلتحق ، وفعلا كمل وطلع عاساس ملتحق واني بيومه اني واخته رحت لان عندي دورة فابو سيارة ماكدر يدخل الشارع لان كانت الدنيا ماطره والطريق مسدود بلماي ماينعبر بس مشي فنزلنه اني واختي والله بنص الطريق صار مقابلينه بيت اشويه واختي ولج بلقيس شوفي ولج ذاك مو وسام صدك انتبهت طلع وسام بملابسه بجنطه داخل بيت كتله ولج خاف اني غلطانه وسام بدوام شجابه هنا واني اقدم رجل وارجع رجل بلكي مو هو اختي كالت والله هو امشي ولج ورها كتله لا كالت اسكتي ولا كلمة ، وصدك هاي اختي سباعيه دگت الباب فلشته بحيث جوارين طلعوا على صوت الدك وانفتح الباب طلعت طيبه وهذا البيت بيتها والافندي جاي عدها ورجلها ماموجود وللعلم صار عده ولد غير البنت وهذا متواصل اوياها هنا اختي فقددت صدك فضحتها فضيحه خلت الشارع كلها يتفرج عليهم وهو اجه لاختي ضربها ودفعها واني من صدمه الي شفتها ووگعت بالارض ماصحيت الا واني عند جيرانها مرآه جبيرة كالت خاله هذا صارلها اسنين يجيها من يطلع رجلها والمعجبني معقوله رجلها اعمى لهل الدرجه وهذا الكلام سمعته من الجوارين يصرف عليها وعلى جهالها لبس وهدايه وذهب وهي هاي اقاربكم اصلن سمعته بلمنطقه كلها فاشلة وكلها تعرفها موشريفه ، اشلون رجلج هيج راكض ورها كتله بنت خالته كالت واذا ، وصرت احسن هنا صدك حسيت شي بداخلي كرها وهنا قررت اخذ جهالي واروح لاهلي وبعد ماارجعله مااعرف فجأه استغنيت فرجعت للبيت وحجيت لامي كل الي صار كالت بلقيس اتصور هل الكلام حذرتج منها قبل لايصير بسنيين طويله كتلها يوم الوم مايفيد هذا الشخص بعد مااريده ، فبليل امي دزت على وسام وعمي واجه هو وعمي واجت امها اوياهم ونهى اتصلت كالت اني احبج مااكدر اجي اسمع حياتج تتدمر كدامي اعذريني بلقيس مااحضر هشي ،وبسبب وحده رخيصه مثل طيبه بس اخويه غبي وهذا كلها من ورها امي وبنات اختها واجو وكعدوا وحجتله امي الي صار كلها من اول العرس كلها من اول العرس لحد ماشفنها بيتها وعمي يسمع وهو مقهور من كملت امي ،التفت على مرته يساقطه تجيبين بنت اختج لبيتي واني بدوام انت وابنج الرذيل الخسيس واني ماموجود طول عمرج تسألين ليش اكره اختج هاي ولج من ولدتي وسام وانت عداهلج وتعرف كولش زين اني لوحدي بلبيت تجي رخيصه تعرض نفسها عليه وهي اختج وتكلي انت خسارة باختي السمينه الزرگة وبسطتها وطردتها بلبيت بيوم رجعتلكم كالتلكم اندعمت وهي كذابه ولج تعوفيين بنات اخويه شريفات علمود بنت اختج رخيصه ولك وانت لو جايني وكايل ابويه زوجني مره ثانيه والله مااحجي بس تركض ورها وحده رخيصه ليش ، هنا هو رد على ابوه اني احب طيبه وانت جبرتني على بلقيس واني عمري ماحبيتها ولا اجت ابالي للحظه اتزوجها ، وانت فرضتها عليه فرض مااحبها سمعتي بلقيس مااحبج ولا اريدج بحياتي انت كنتي عله بحياتي وهم يابه بعد مااتحملها خلص ، موهي تطلب طلاق اني اطلگه فگام عمي وضربه راشدي وطرده وحجه مع امي كال ابني غبي مايعرف يتصرف اختي بلقيس راح اشتريلها بيت باسمها ،الها ولجهالها واني اكعد اوياهم وبلقيس ابنيتي كلها ولا طلاك وهذا مصيرة يعرفها على حقيقتها ويرجعلج صدگيني. لخاطري تراجعي عن قرار الطلاق ومالج علاقة بكلام هل الغبي هذا عميته الله العالم شمسويتله لان هي وامها يعرفن دروب حتى شيطان مايعرفه ، وآني جهال ابني إذا تركوني اموت وانت عمو ماتقبلين عمج تكونيين السبب بمرضه وقهره .
يتبع في الجزء الخامس
