انت اغلى الناس ومن لي في غلاك؟

النهايه

خلوني اقلكم اهم الاحداث اللي صارت الفتره اللي فاتت .. حمدان قدر يكسب رضا يدته واهله خلال فتره قصيره ورجعت علاقته وياهم عاديه مثل قبل .. راشد وحامد الى الان رافضين فكره الزواج .. ولله الحمد حامد وايد تحسنت حالته صار يقدر يمشي مسافات قصيره بمساعدة العكاز .. حميد الله رزقه ببنتين وولد ومهره تزوجت وزوجها ابداً مب مقصر وياها معززنها ولو انه على قد حاله بس ماكان يخلي شي في خاطر مهره ومهره كانت وايد مرتاحه معاه وابداً ماندمت انها قبلته ويابت منه ولد وسموه خليفه على ابوها وحالياً هي حامل في شهورها الاخير .. شيخه قبل سنه خذها سهيل ولد عمها سلطان وكان زواجهم عن حب .. حمد وشما عصافير الحب تزوجو بعد ماتخرجت شما من الجامعه وكلهم كانو ينتظرون هالزواج على امل ان شما تعقل ولكن خاب املهم لانها يوم تزوجت يننت وياها حمد .. شما حملت مرتين وكل مره يطيح الجنين في الشهور الاولى فنصحوها تدور علاج والحمدلله تعالجت والحين حامل في الشهر السابع .. روضه وعبدالله من خلصو دراسه كل شهرين مسافرين ابداً مايصكون لين ما الله رزقهم بـ فاطمه قلت سفراتهم .. مريم تعلقت في عمر وحبته حب من طرف واحد تقدملها اكثر من شخص وكانت ترفض لين تقدملها خادم ولد خالها وفي هالفتره سمعت ان عمر خطب له وحده من اختيار يدتها فاخره حست قلبها خلاص مات وماقدرت ترفض خادم لان امها اصرت عليها توافق ووافقت وتزوجو رغم ان خادم كان وايد يحبها ويدور رضاها لاكن مريم ماكانت حاسه بهالحب كان قلبها عند عمر مر على زواجها سنتين والى الان ماتفكر الا بعمر .. عبيد ومزنه تزوجو وسكنو في بيت بوعبيد ويابو سلمان الي سموه على يده .. مايد حالياً في الصف التاسع نقله حامد من مدرسته القديمه لمدرسه خاصه بسبب بعض الطلاب والمعلمين المتنمرين ووايد ارتاح في مدرسته اليديده وتغيرت شخصيته .. اما حمده من تزوجت تركت دراستها وسافرت ويا سيف امريكا عشان علاجه تحملت وايد اشياء عشان سيف ووقفت وياه في اصعب المواقف وفي اضعف حالاته حبته رغم امراضه وابداً ماتخلت عنده بعد مرور سنه كامله لهم في امريكا قدمت حمده اوراقها في جامعه من الجامعات وكملت دراستها على حسابها الى ان تخرجت وتفاجأت بحملها في اخر فصل دراسي لها .. حمدان من اول ماسافرو سافر معاهم هو وبنته وقعد عندهم ثلاث سنين ونص وبعدها اضطر يرجع البلاد عشان يسجل بنته حمده في الروضه وحتى بعد مادخلت حمده الروضه صار يزورهم في الاجازات وابداً ماقصر وياهم ساعدهم في وايد امور

****

سيف .. لانه في المرحلة الثانيه من مرض سرطان الرئه بدو معاه بالعلاج الجراحي وبعد الجراحه استخدمو معاه العلاج الاشعاعي وماكان يقدر يتحمله فاضطرو بالتدريج يستخدمون معاه العلاج الكيميائي وكان بصعوبه يتقبله .. معروف ان مرض سرطان الرئه مرض مميت وقالوله الاطباء مقارنة بتحاليله احتمال بقاءه على قيد الحياة يتراوح مابين 8 شهور الى 3 سنين اذا استمر بالعلاج ولكن ارادة ربه كانت اقوى والحمدلله كمل خمس سنين مستمر بالعلاج وحالته تتحسن يوم عن يوم .. نرجع للحاضر .. دخلت حمده غرفة الولاده وحمدان قاعد في غرفة الانتظار وبنته راقده في حضنه تأملها بحزن وهي غرقانه في نومها وتذكر تفاصيل اليوم اللي انولدت فيه حمده وكيف كان من اصعب الايام اللي مر بها .. مر الوقت ببطئ وطول هالوقت حمدان يدعي لحمده بكل خوف انها تقوم بالسلامه .. ومع شروق الشمس اشرقت الدنيا بقدوم المولود اليديد و دق حمدان على سيف يبشره وبعد ساعه وصل سيف ودخلو مع بعض عند حمده .. اول مادخلو عدلت حمده يلستها وابتسمتلهم بتعب تحمدولها على السلامه وحمدان حط بنته اللي راقده عليه عالكرسي وحط ايده على ظهره متألم .. اما سيف تقرب من حمده وحب راسها بحنان وخذ منها الولد ..
طلع حمدان تلفونه يوثق الاحداث وتصورو وقومو حمده بنت حمدان عشان يتصورون صوره جماعيه .. الفرحه ماكانت واسعتنهم وخاصة حمدان كان طاير من الفرحه وكأن اللي انولد اليوم ولده .. طبعاً هم من زمان مختارين اسم البيبي وسموه احمد على يدهم .. اذن سيف في اذن ولده وشوي وطلعو حمدان وبنته عشان حمده تاخذ راحتها ويا سيف وبعد دقايق طلع سيف من الغرفه وشاف حمدان وبنته قاعدين عالكرسي وراح لهم .. سيف ماقدر يطول كان لازم يرد المستشفى لانه حاس بتعب فحضن حمدان كانه يودعه وحمدان استغرب
ضحك حمدان : ناقص حنان ؟ وين بروح انا دوم عندك
ابتسم سيف وحب راس بنت حمدان : انا برد المستشفى .. احمد و امه امااانه عندك
حمدان. يرتب ع كتف سيف : لا توصي حريص
وطلع سيف