احضني و نسيني قسوة الماضي

الجزء الاول

بسم الله الرحمن الرحيم
أحضني و نسيني قسوة الماضي
للكاتبة:ريلام
__
الشخصيات
ابوريان:(حسام) عمره 47 سنه و يشتغل ضابط برتبه عاليه.
أم ريان:(حنان) عمرها 40 سنه ،ربة بيت.
ريان:عمره 30 سنه ،رجل رياضي متفوق بدراسته و متخرج إدارة ماليه.
رفيف:بطلتنا عمرها 27 سنه، متخرجه بتفوق قسم إدارة اعمال ،مخطوبه حاليا لولد خالتها (احمد)
___
أبو فيصل: (خالد) أخو أبو ريان و عمره 45 سنه، تاجر معروف و أخلاقه تشهد له.
أم فيصل:(غاده) عمرها 41 سنه، تشتغل في التوجيه و طيبه جدا.
ابو فيصل ما عنده عيال ابداً.
___
أبو أحمد:(عمر) عمره 49 سنه،مدرس متقاعد، إنسان شايف نفسه يقول للناس شوفوا معي و انتوا لا،يحب عياله بس يمسك يده معهم.
أم أحمد:(عاليه) عمرها 43 سنه اخت أم ريان،ربة بيت،طيبه بس شديده شوي مع عيالها خصوصا البنات.
أحمد:عمره 31 سنه،ضابط و رتبته رئيس رقباء،في شغله الرجل اللي قوي و ما أحد قدي و في البيت شخص عادي جدا بس لا تعصبينه.
احلام:عمرها 26 سنه،متخرجه رياضيات و أكثر وحده قريبه من رفيف و من صغرهم مع بعض.
حلم:عمرها 16 سنه و دلوعة ابوها و لا يرفض لها طلب.
____
عائلة أم فرح
أبو فرح:( حسين) رجال طيب و عمره في الخمسين،دائما مشغول و نادرا يكون متواجد بالبيت.
أم فرح:(شاهره)أخت أبو أحمد شخص ينخاف منه ،فيها حقد و شريره تبي كل شي زين لبناتها و بنات الناس لا.
فرح: البنت الكبيره تكره حركات أمها و هي شخص ما تحب المشاكل ابدا بس اذا قالت لها أمها سوي تصير مثل التنويم المغناطيسي لها.
عندها ثلاث اخوات:هاجر و بيان وحلا.
__
عائلة أبو تركي
أبو تركي:(فيصل)عمره ٤٧ سنه و شغله خاص.
أم تركي:(مُنى) عمرها ٤٣ سنه و تمتلك مؤسسات خيريه.
تركي:عمره 30 سنه و يشتغل موظف في شركه كبيره.
__
عائلة أبو شهد
أبو شهد: ( حمد) عمره ٤٨ سنه و رجل أعمال كبير و معروف.
أم شهد:( مها) عمرها ٤١ سنه و تدير جمعيه نسائيه باشرافها.
شهد:27 سنه و متخرجه ادارة أعمال.
__
عائلة الجد حسين
أبو عبد العزيز:( حسين) عمره ٦٠ سنه، عنده ثلاث عيال:
الابن الاول:عبدالعزيز:متوفي
ولده:مشعل:30 سنه موظف كبير في شركه كبيره
الابن الثاني:محمد، عمره ٤٠ سنه.
بنته:وسن:28 سنه متخرجه ادارة أعمال.
البنت الثالثه:هيا:29سنه، مشرفه لغه عربيه.
__
عائلة حاتم
أم حاتم:متوفيه.
حاتم:29 سنه كاتب خواطر.
__
عائلة أبو يوسف
أبو يوسف:( سعد) عمره ٥٠ سنه، ضابط متقاعد.
أم يوسف:(ابتهال) عمرها ٤٥ سنه، ربة منزل.
يوسف:30 سنه ، عاطل عن العمل.
يارا:عمرها ٢٤ سنه, خريجة ثانوي.
( بعض الخواطر منقوله)
__
الجزء الاول
أعلن أبوريان فرحته و خطوبة بنته لحبيب قلبها اللي من زمان تتمنى تكون معه و يرتبط اسمها باسمه،(رفيف و أحمد) يا فرحة الأخوات لما شافوا عيالهم كيف كبروا وصاروا من نصيب بعضهم.
احلام تزغرط: ألف الصلاة والسلام عليك يا حبيب الله محمد، كلللللوش ألف مبروك يا روحي أنا.
رفيف بخجل:الله يبارك فيك.
حلم:يا حلاتها خطيبة اخوي.
رفيف بخجل:خلاص انكتموا يوووه منكم؟
احلام و حلم:هههههههه.
أم ريان:رفيف حبيبي كلمي ريان عند الباب.
رفيف وقفت:اوكيه، عن اذنكم صبايا.
احلام:خذي راحتك.
رفيف راحت للباب الفاصل بين الرجال و الحريم و نادت:ريان.
ريان طلع بوجهها:مبروك.
رفيف نطت:بسم الله الرحمن الرحيم، وضربت كتفه: وجع.
ريان ابتسم:اسف والله مو قصدي.
رفيف:حصل خير.
ريان بضحكه:كيف النفسيه؟
رفيف:عادي جداً.
ريان: اوكيه، اسمعي وش صار جوا عندنا.
رفيف باهتمام:اللهم اجعله خير.
ريان:ابوي ما طلب لك مهر.
رفيف بققت عيونها:ليه.
ريان رفع اكتافه:ما أدري، كلنا مصدومين حتى عمي أبو فيصل.
رفيف بضيق:وش معنى؟
ريان:سمعته يقول انه ولدنا و شارين رجال و ما ادري وش هو؟
رفيف تنهدت:الله يكتب اللي فيه الخير.
ريان:اللهم آمين، خلاص روحي جيت أعطيك المهم.
رفيف خزرته:بس ذا اللي عندك. 
ريان:تامرين باللي تبين بس أعطيك بالجوال.
رفيف:تمام.
____
عند الرجال
أبو ريان و أبو فيصل و أبو أحمد سوالف رجال كبار ،أما أحمد يناظر فيهم و هو ضايق صدره و يبي يطلع من المجلس.
ريان دقه بيده:ولد وش فيك؟
أحمد مكشر:ياخي ضايقةٍ نفسي.
ريان باستغراب:وش منه؟
أحمد:ما ادري بس ابي اطلع.
ريان: ابشر بعزك و ناظر في أبوه:أبو ريان.
ابو ريان التفت بابتسامه:لبيه.
ريان:لبيت حاج، بأطلع أنا و أحمد شوي نغير جو مع الشباب.
ابو ريان:وداعة الله وشوي شوي بالطريق.
ريان:إن شاء الله، مسك يد أحمد و طلعوا مع بعض.
___
بيت ثاني
ام فرح تدعي:الله لا يهنيه معها إي والله ،انا بناتي ما يملون عينك يا احمد أفندي ،طيب طيب والله لادعي عليك من اليوم لبكره جعلك ما تتهنى.
فرح بطفش:خلاص يمه.
أم فرح ضربتها:انكتمي انتي ،لعن ابو ابليسك هذا طولك و ما قدرتي تلفينه لك يا الهبلا، رفيف أصغر منك و جابت رأسه، ضربت افخاذها:اه يا حظي فيك انتي و اخواتك يا قرادة حظي فيكم.
فرح تمسح على يدها:و أنا وش دخلني هو يحبها و بعدين لا تنسين هي بنت خالته و أربعه و عشرين ساعه عند بعض.
أم فرح:حتى أنا عمته أخت أبوه وش معنى يعني؟
فرح:يمه بيتنا كله بنات مافي ولد ،وش بيقولون عليه الناس و هو داخل و خارج من عندنا.
أم فرح بعصبيه: انقلعي عن وجهي انتي و فلسفتك و صفقت بيدها:الله لا يجعلك تتهنين فيه يا رفيف يا بنت أمك و ابوك و يحرق قلبك مثل ما حرقتي قلبي.
فرح تنهدت و قامت من عند أمها.
____
بيت ابو ريان ،غرفة رفيف
قفلت مذكرتها و مططت يدينها:و هذي المذكره و خلصنا منها.
راحت و توضت و صلة الوتر و بعدها انسدحت و هي مبسوطه باليوم اللي مرت فيه.
(صباح جديد)
أم ريان بصدمه:ليه يا ابو ريان؟
أبو ريان:وش اللي ليه؟ هذا ولدنا و حنا عارفين تربيته.
أم ريان:ولدنا ما قلنا شي بس بنتك من حقها يكون عندها مهر زي البنات و من حقها يكون لها كسوة زواج وش اللي وافقت عالولد و رفضت يدفع مهر.
أبو ريان:بنتي و أنا ادفع كل تجهيزات زواجها الولد وش عليه.
أم ريان ضربت فخذها:هذا اللي بيجنني.
ابو ريان بحده:قفلي عالموضوع يا مره و لا تفتحينه مرره ثانيه.
أم ريان: بكيفك، لكن لو جات بنتك بعدين و قالت يبه زوجي ما يعطيني قروش انت السبب، و قامت من عنده.
____
بيت ابو احمد
أحمد بصدمه:بهالسرعه يبه.
ابو احمد:فمتى تبي؟ أحمد ربك ابوها مو طالب لا مهر ولاشي للبنت يعني سلعه مجانيه و أعطانا هديه.
أحمد تنهد:يبه البنت باقي تجهز نفسها الحين.
أبو أحمد:خلنا من هالكذب، و ابوها إذا قلت كلمه يسمعها مني على طول يعني خواتم بأيدينا.
أحمد مكشر:خايف يزعل خالي.
ابواحمد:اترك خالك عليي و بس.
أحمد بسمعا و طاعه:اللي يريحك يبه.
____
دخلت غرفتها و قفلت الباب و رفعت جوال أمها و بهمس:هلا حبيبي.
هو:هلا يا قلبي.
هي:ما عليش تأخرت عليك.
هو:لا عادي و لا يهمك كيفك انتي؟
هي ابتسمت:أنا الحمد لله بخير مشتاقه لك.
هو:و أنا أكثر، مبروك خطوبة حماده.
هي:الله يبارك بعمرك يا رب.
هو:عقبالنا.
هي:يارب.
و كملوا مكالمات يتغزلون ببعض.
____
بيت ابو ريان
رفيف بصدمه:بابا كيف بكره و أنا ما تجهزت للحين.
ابو ريان ببرود:عادي يا بابا بكره ما فيه إلا حفلة عقد للرجال و الحفله بعدها بشهر لو تبين.
رفيف تاففت:بكيفك ، و قامت من عنده متضايقه.
أم ريان تنهدت:متى بيجون ضيوفك؟
ابو ريان:بعد صلاة العصر.
ام ريان وقفت:خير ان شاء الله.
_____
(بيت ثاني و بإحدى الأحياء الفخمه)
هو بصراخ:يا يمه قلت لك ما ابيها ما ابي البنت.
الأم بعصبية:والله يا تركي لو ما تأخذ بنت عمتك لازعل منك.
تركي بقق عيونه:يا يمه يرحم لي أهلك وش فيها البنت من حلا قولي لي.
أم تركي بققت:استح على وجهك ذي بنت عمتك و عمتك من زمان ترفض العرسان عشانك.
تركي ببرود:و ليه خليها تتوكل و تزوج بنتها أنا متنازل عنها الله يكتب لها نصيب طيب.
أم تركي:إلى متى يمه أطلب منك انك تتزوج و تفرحني بشوفة احفادي إلى متى؟
تركي راح لها وباس يدها:إذا لقيت اللي يحبها قلبي و تستاهلني.
أم تركي بحنيه:الله يفرحني فيك يارب.
تركي يلتفت:وين ابوي؟
أم تركي بضحكه:بالشغل يعني وين بيكون؟
تركي:ما عليش يمه تحملي.
أم تركي:من يوم تزوجته و أنا صابره عليه و على شغله لو ما الجمعيه اللي أنا فيها كان قد انهبلت.
تركي مسح على راسها:بسم الله عليك لا تقولين كذا.
أم تركي بحزن:و هذا اللي فعلا صاير.
تركي يناظر في ساعته:يلا يالغاليه أنا عندي موعد مع الأخ مشعل و مواعده من أمس تبين شي.
أم تركي:الله معك حبيبي و سلم عليه.
تركي حب رأسها:أبشري، في أمان الله، و طلع.
____
(بيت ثاني و بإحدى الأحياء الفقيره)
بيت كان كل يوم الأب و الأم متناقرين قدام بنتهم الوحيده و اللي تتمنى لو بس يمر يوم من دون مشاكل.
هو يصرخ:الله ياخذ عمري من يوم عرفتك؟
هي:و انت بتفكر اني مبسوطه اوي معاك دي عيشتك عيشه تئرف.
هو:و اللي خلق لو ما تسكتين إني لاصكك كف ينسيك اسمك.
هي تعبت:طلئني يا محمد.
هو بنبرة سخريه:انتي طالق و بالثلاث.
هي:أحسن، اومي يا وسن غيري هدومك و قهزي نفسك.
وسن برفض:أنا ما ابي اروح معك باضل مع ابوي.
أم وسن:انتي عايزه تموتي مع الراجل ده.
وسن بتحدي:هو بالنسبه لك رجال بس بالنسبه لي ابويه.
ابو وسن بألم:اطلعي برا و اتركي بنتي لحالها.
أم وسن:طالعه ياخويه و بالسلامه انت و بنتك.
أم وسن اخذت اغراضها كلها و طلعت.
ابو وسن جلس بتعب.
وسن راحت له:بابا أخذت دواك.
ابو وسن:وين أخذه و الدوا مخلص من يومين.
وسن أوجعها قلبها عليه:طيب وش رايك اروح ابيع جوالي و ناخذ منه فلوس العلاج.
ابو وسن:لا يا بابا بكره أنا أروح المستشفى و أطلب منهم هالشي.
وسن بتعب:يا بابا كلنا نعرف أن الحبوب اللي صارفينها لك ما تتوفر الا بالصيدليه.
ابو وسن ابتسم بتعب و انسدح.
وسن تناظر ابوها بألم و نزلت دموعها  أخذت الجوال اللي في يد ابوها و راحت غرفتها و بكت بصمت ما ترتاح إلا تسمع صوت صديقتها اللي تطمنها بكلامها و دقت عليها:
"الو"
وسن ببكا:شهد لحقي علي ،باموت يا شهد ابوي طلق أمي و تركتنا و ابوي تعبان صار له يومين ما أخذ العلاج و تعبان قولي وش اسوي يا شهد، تكلمي يا شهد ليه ساكته.
"أنا مو شهد"
بققت عيونها و غطت فمها من الصدمه.
__
(في كوفي عام)
تركي و مشعل جالسين و سوالف و تبادل آراء و اختلاف لبعضها.
مشعل:انت الحين ليش ما تخطب بنت عمتك و امك نفسها تشوفك عريس.
تركي: إذا خطبت انت خطبتها.
مشعل: يا سلام و هذا منطق.
تركي: يا ناس ليه ما أحد يفهمني،أنا أكثر من مره اصدم في البنت و البنت ماهي اللي بمزاجي.
مشعل:و انت وش تبي؟
تركي بتريقه:شعرها طويييل و جسمها وسط بس يكون مائل للرشاقه و ابيها كلها دلع.
مشعل بقق عيونه:توصف ادميه و إلا خيل عربي.
تركي تنهد:يا ابن الحلال أنا أبي وحده إذا شفتها قلبي يحبها مو أحبها عشان شكلها.
مشعل بطفش:ايه فهمتك خلاص.
تركي صغر عيونه:أنا من يوم جلست معك و انت مو على بعضك.
مشعل كشر:و فيه غير عمي محمد.
تركي باستغراب:انت لقيته؟
مشعل:ايه و أول ما عرفني طردني.
تركي:إيه و ليه؟
مشعل:قلت لك من قبل جدي طرده من يوم تزوج اجنبيه و حلف ما عاد يقابل أهله أو يرجع للبيت.
تركي:كم عنده عيال؟
مشعل:عنده بنت وحده.
تركي:و تعرف اسمها؟
مشعل أشر بيده وهو يشرب قهوته:لا.
تركي:طيب ما تواصلت معه بالجوال أو بأي شيء ثاني.
مشعل: إلا والله بس،،،،، و سكت لما سمع صوت جواله يرن ،ناظر المتصل و عقد حواجبه و رد:الو.
و سمع صوت بنت تبكي و تترجى و في الاخير عرف أنها غلطانه و قال:أنا مو شهد.
_____
بيت ثاني
ماسكه عبايتها و تنادي:شهد، يا شهد.
شهد طلعت ببجامتها و بيدها كوب كوفي:يا نعم.
أم شهد:حبيبي أنا باروح عند صديقتي أم عُلا مسويه حفله لتخرج بنتها، تبين تجين معاي حياك.
شهد ابتسمت بسخرية:و مين أم عُلا.
أم شهد بطفش:وقت اسئله ماما، يلا روحي البسي و أنا انتظرك بالسياره لا تاخريني.
شهد تشرب كوفي:ما عليش ماما ماني رايحه ،روحي انتي صديقاتك ينتظرونك.
أم شهد بدون اهتمام:بكيفك.
شهد:بابا وين؟
أم شهد:بمكتبه أو بشغله وين يعني؟ يلا انتبهي لنفسك.
شهد ببحه:درب السلامه.
و كالعاده جلست بطلتي شهد عالدرج تناظر القصر اللي هي ساكنه فيه كل بنت تتمنى تكون مكانها من نعيم هي عايشه فيه و دلال و دلع، بس شهد كل ذا ما تبيه،وش تبين يا شهد؟
مسحت دموعها و طلعت لجناحها.
___
بيت ابو ريان
في غرفتها كانت تبكي و متضايقه، دق عليها الباب و جاوبت:مين؟
جاوبها من ورا الباب:ريان.
رفيف مسحت دموععها:تعاالل.
ريان فتح الباب و دخل لها:افا عروستنا زعلانه.
رفيف ساكته.
ريان جلس قبالها:وش فيك؟
رفيف بتعب:وش تتوقع فيني؟
ريان رفع اكتافه:ما اعرف؟
رفيف بقهر:ابوي ليش يسوي كل ذا قول لي؟
ريان يصرف:تلومينه بالله و هو فرحان ببنته.
رفيف بغصه: أنا احس مو فرحان أحس يبي الفكه.
ريان بهدوء:رفيف حبيبي وش هالكلام.
رفيف بدموع:تبي الصدق.
ريان:ابيه و لا أبي غيره.
رفيف:أنا مو مرتاحه لذا الزواجه.
ريان حط يده على فمها:رفيف لا تقولين كذا.
رفيف بعدت يده بهدوء:اقولها و أنا صادقه.
ريان ابتسم يطمنها:كل شي بيكون بيرفكت بس انتي ابعدي عنك ذا الأفكار و الوساوس.
رفيف تمسح وجهها:أنا حاسه ان أبوي ينلعب عليه.
ريان:و أنا احس لو تنامين يكون أحسن.
رفيف بضحكه:انام ،ضحكتني والله.
ريان وقف و طنشها:تصبحين على خير، و طلع.
أما رفيف راحت لمكتبها الصغير و أخذت قلمها و بدأت تسرد يومها بمذكرتها.
____
في أحد الأحياء البسيطه
كان يهرب منها و هي تصارخ وراه بالويل و هو يضحك و يهرب.
طلعت امهم من المطبخ على أصواتهم:يا رب رحمتك معي أطفال انا، يوسف يارا بسكم هبال ترا كبرتوا على ذا الحركات.
يارا وقفت بتعب:يمه هو بدأ.
يوسف يتنفس بقوه:وش اسوي لها أقول لها قومي سويلي كوفي تقول المطبخ عندك.
أم يوسف تنهدت:و انت أكثر من مره أقول لك إذا تبي شي تعال اطلبني أنا مو تقوم و تضارب اختك حرام عليك يوسف أنثى ذي.
يارا كشرت:و ذا يعرف وش معنى انثى الله يعين زوجته عليه.
يوسف كشر:زوجته! و مين قال لك إني باتزوج، و بابتسامه:إن شاء الله بعد معاليكم.
يارا شهقت:وجع ، إن شاء الله أنت.
ام يوسف بتعب:الله يصبرني عليكم.
يوسف يلتفت حوالين البيت:وين ابوي؟ غريبه ما طلع من صراخنا انا و سبونج بوب.
يارا بققت عيونها و رمته بالمنديل.
أم يوسف تنهدت:مسافر.
يوسف بصدمه:من جدك يمه.
يارا بهبال:لا من عمها.
يوسف ضربها براسها:بايخه زي وجهك.
يارا:اااي.
أم يوسف بعصبيه:صبرك يارب على عيالي.
يارا بزعل:و الله هو يا يمه.
أم يوسف وقفت:أروح انشب الغدا أحسن.
يارا لفت ليوسف:انت هيي كأن ابوي كثرت سفراته.
يوسف:إي والله، من يوم تقاعد و هو من بلد لبلد.
يارا:تتوقع انه من جد مثل ما قال آخر مره يستقر بمكان غير الرياض.
يوسف باختصار:كلام الليل يمحوه النهار.
يارا بتفكير:والله صادق.
يوسف:أتمنى من بعد سفراته ذي ما يصدمنا بشي و خصوصاً أمي.
يارا بققت عيونها:قصدك بودره.
يوسف ضرب كتفها:هبله انتي، وش ذا الكلام كيف عسكري متقاعد و يأخذ ذا الأشياء، مجنونه.
يارا تمسك كتفها:اسفه ،و بسرعه وقفت ومسكت شعره و شدته و انحاشت.
يوسف صرخ و توعد فيها و بدأت مطاردتهم مره ثانيه.
____
عند وسن و مشعل
وسن بلعثمه: أنا أنا اســ أنا آسفه ك كنت ابي شهد.
مشعل ابتسم لاشعوريا:لا عادي و لا يهمك.
وسن ببحه:يا ليت تنسى كلامي و لا كأنك سمعت شي.
مشعل يصرفها:تامرين و لا كأني سمعت شي.
وسن:و كمان احذف رقمي ترا أنا مو من النوع اللي يكلم شباب والله العظيم مو من ذا النوع.
مشعل بتعب:يا بنت الحلال و الله العظيم ما راح اكلمك و لا باقول شي.
وسن بارتياح:الله يخليك لأمك.
مشعل غمض عيونه بقوه.
وسن بهمس:مع السلامه.
مشعل بهدوء:مع السلامه و انتبهي لنفسك.
وسن ماتكلمت و قفلت.
مشعل قفل و رمى بالجوال.
تركي باستغراب:وش السالفه؟
مشعل مسح جبينه: وحده غلطانه.
تركي:طيب وش فيك قلب وجهك كذا.
مشعل:لا و لا شي ،ماتبي تمشي ترا عندنا دوام بكره.
تركي وقف: يلا توكلنا على الله.
و طلعوا اثنينهم.
____
عند شهد
اللي دايما تقضي وحدتها بجناحها بصحبة جوالها أو لاب توبها و تتفرج عالمسلسلات التركيه.
نور جوالها و انتبهت للاشعار اللي كان تويتر و أحد متابعينها مسوي ريتويت لتغريده، طنشته و رجعت تشوف اللاب توب بس انزعجت من صوت الازعاجات و صرخت: الله يعين عليك يا مضاوي (وحده من المتابعين) فتحت الموقع و ناظرت للكلام ابتسمت لما قرأت التغريدات و من بينها:
"لا تسألني عن الندى فلن يكون ارق من صوتك ولا تسألني عن وطني فقد اقمته بين يديك ولا تسألني عن اسمي فقد نسيته عندما رفضتني".
شهد ابتسمت و سوت فولو لصاحب الكلام و همست: مجهول بلا عنوان.
و فتحت صفحته بدأت تقرأ كلامه اللي حست فيه أنه شخص وحيد كأنه يمثلها، سوت له كومنت على تعليقاته بأن كلامه جميل و اعجبت بخواطره اللي اقشعر جسمها من محتواها.
انتبهت لتغريده كتبها
"لا أشتاق إليك لكن أشتاق للشخص الذي ظننتك هو".
و تغريده ثانيه تقول
" قد تكون بعيداً عن نظري لكنك لست بعيداً عن فكري"
"افتقاد شخص بعض الأحيان يجعل العالم يبدو خالياً"
ردت عليه:الحب هو الشوق لشخص عندما تبتعد عنه ، لكن بنفس الوقت تشعر بالدفء لأنه قريب في قلبك.
شهقت لما أرسلها:اتفق معك شهود، بس اللي تعب من الاشتياق لشخص مهم بحياته وش يسوي؟
شهد تنهدت و كتبت:يدعي ربه انه يجمع به في أقرب وقت.
مجهول بلا عنوان:إن شاء الله.
شهد ابتسمت و قفلت جوالها و رجعت تكمل مسلسلها.
___
يوم جديد،بيت ابوريان
ابو ريان من عند الباب:رفيف يا بابا.
رفيف جات:لبيه يبه.
ابو ريان بابتسامه:وقعي حبيبي.
رفيف أخذت نفس و مسكت القلم و جلست تناظر في الدفتر حست انه طراطيش كلام و بضياع:وين اوقع؟
ابو ريان:هنا يا بابا ،و نط لها بالمكان.
رفيف وقعت و أعطته القلم.
ابو ريان بابتسامه:مبروك يا روح بابا.
رفيف بغصه:يبارك فيك ،و دخلت.
ام ريان فتحت يدينها و حضنتها:مبروك يمه.
رفيف:الله يبارك فيك.
أم فيصل زغرطت و حضنت رفيف و باركت لها.
رفيف تركتهم و صعدت لغرفتها، دخلت و ناظرت في المرايه و ناظرت نفسها كيف خلاص بتنفجر بكي، سحبت نفس تمنع نفسها أنها تبكي.
ريان دق الباب و دخل:بنت.
رفيف ناظرته من دون كلمه.
ريان دخل عندها بخوف:بنت وش فيك؟
رفيف تاخذ نفس:ما ادري ريان أحس إن شي كابت علي.
ريان:تعوذي من الشيطان.
رفيف بصراخ:أعوذ بالله منه ألف، و تنفست براحه.
ريان:أحسن الحين.
رفيف هزت رأسها بايه.
ريان:ترا لازم كذا البدايه تخافين  لأنه أول مره تجلسون مع بعض.
رفيف ساكته.
ريان مسك يدها و سحبها:يلا تعالي عشان تدخلين له.
رفيف وقفت و راحت لمرايتها و حطت كحل و زادت بالروج شوي و طلعت مع ريان.
___
(عند أحمد )
جالس ينتظر و يهز رجله، و هو يتكلم في باله:حلوه لما كانت صغيره و يوم خطوبتنا ما اعجبتني، سمنت و بوجهها حبوب و شعرها بوي مو كنت مثل ما أنا متوقع، اففف يا احمد وش سويت؟
سمع صوت الباب و ناظر:ما عليش طولت عليك.
أحمد ابتسم:لا و لا يهمك.
ريان:رفيف ادخلي.
رفيف دخلت شويه و سحبها ريان معه لجوا و جلسها جنب أحمد.
أحمد ابتسم و مد يده:كيفك؟
رفيف بهمس:بخير.
ريان:سلمي عليه.
رفيف مدت يدها بسرعه و صافحته.
و جلس أحمد و ريان سوالف و رفيف تناظر فيهم.
ريان وقف:يلا اخليكم لوحدكم، و طلع.
أحمد التفت لرفيف:كيفك يا رفيف؟
رفيف بحيا:تمام.
أحمد تنهد:كم عمرك؟
رفيف:٢٧ سنه.
أحمد:العمر كله يارب.
رفيف:تسلم.
أحمد بطفش:ما تبين تناظرين فيني طيب.
رفيف ناظرته.
أحمد ابتسم:ما تبين تسألين وش احب وش أكره.
رفيف كانت بتجاوب بس قاطعها:ايه نسيت احلام اختي ما أخفت عليك شي معطيتك كل شي بالتمام ماشاء الله عليها.
رفيف تنهدت.
أحمد: وين تبين نقضي شهر العسل؟ طبعا إذا اعطوني اجازه لشهر قدام، بس اذا اعطوني اسبوعين لازم نكون قريب.
رفيف:براحتك.
أحمد: إذا قرب الزواج قدرنا نقرر صح.
رفيف هزت رأسها بايه و ابتسمت.
أحمد وقف: يلا عن اذنك أنا باروح، و رقم جوالك باخذه من أحلام و اشحن لك معي.
رفيف:جوالي بابا حاطه لي فاتوره، تسلم.
أحمد ضحك بنفسه:شفت أحمد افندي جوالها عام.
رفيف:أحمد أجلس اتعشا معنا.
احمد صد:لا ما يحتاج وقت ثاني.
رفيف:اللي يريحك.
أحمد:يلا مع السلامه.
رفيف:الله يحفظك.
أحمد طلع و رفيف تنهدت:بالله كيف يتكلمون الخلق، اللي اعرف..... سكتت و تنهدت و طلعت على طول حجرتها من دون ما أحد يعرف.
___
في مكان ثاني و تحديداً استراليا
كان واقف عند شباك شقته و بيده الكوفي اليومي اللي يفتتح ريقه فيه بكل صبح، و يشوف كيف الثلج ينزل على الأرض تنهد و رفع ايباده و يبتسم و هو يقرأ كلامها ،جلس عالكنبه و بدأ يكتب تغريده
"صباح جميل يغطيه بياض ثلجٍ و يسعد به كوب قهوه و مر الفراق عن الوطن"
ابتسم لما شافها كاتبه:بالسعوديه اقلبها مساء جميل.
هو كتب لها:فديت السعوديه و أهلها.
عقد حواجبه لما شاف الخاص و فتحه ابتسم و كتب بمزح:حتى بالخاص لاحقتني.
هي:اسفه بس انت عايش برا.
هو:ايه،من يوم ولادتي و أنا عايش باستراليا و لا عمري قد شفت السعوديه إلا بالتلفزيون.
هي:للليييه؟
هو:سالفه طويله.
هي:أنا اسفه ما كان قصدي ازيد عليك، بس من كثر ما حبيت تغريداتك اتمنى تكتب على طول و تغرد فيها لأنها جميله جداً.
هو:من ذوقك،حتى انتي كلامك أمس حبيته كثير.
هي:تسلم، عن اذنك باروح اتعشا😅.
هو:عوافي شهوده.
هي:يعافيك يا رب،باي.
هو:👋. ابتسم و حط الايباد على جنب و همس: شهد.
____
عند شهد
اللي كانت رايحه لوسن و مرت تاخذ عشاء معها من ماك، انتبهت لإشعار الجوال و لما شافت اسمه دخلت على طول و ضحكت:أي صباح، و سكتت يمكن هو يدرس برا و أرسلت له مساء.....
ابتسمت:اها إذا صح مو بالسعوديه، يا زين الجو عندهم، خل اكلمه خاص و بدأت ترسل له،شهقت لما شافت انه مغترب عن بلده ،انتبهت للقافتها و سكتت الحين عرفت ان تغريداته اللي يسطرها في صفحات التويتر لها معنى إنه مغترب، انتبهت أنها وصلت عند بيت وسن استأذنت منه و هي أخذت الأغراض و نزلت.
دقت ذاك الباب اللي بدأ يترهل من الصدأ.
فتحت لها وسن:بدري.
شهد دخلت:اسفه والله، و باست خدود وسن.
وسن:تفضلي.
شهد جلست بتعب:بشري كيف أبوك؟
وسن:طيب الحمد لله.
شهد:و انتي.
وسن:راضيه باللي كاتبه الله.
شهد تنهدت،و طلعت العشاء:جبت لك معي ماك.
وسن كشرت:شهد أكثر من مره أقول لك ما أحبه.
شهد:تاكلينه غصب.
وسن:أخذ البطاطس بس ذا ما أحبه.
شهد:كأنك ما اكلتي شي.
وسن وقفت:عن اذنك باروح اشوف ابوي و ارجع.
شهد:خذي راحتك.و فتحت جوالها و ابتسمت لما شافته كاتب
"أفتقد نفسي ، أبحث عنها فلا أجدها أمد لنفسي يداي فلا تلمسني أنادي عليها فلا تسمعني أقول لها متى تأتيني وتسعدني نعم أنت نفسي يا أيها البعيد عني ، فيا موجي ولم يبق سوانا أليس الحزن في عيني تراه فكن لي خير سند وبلغ عني الأحبة سلام واشتياقي ، اشتقت لك يا وطني".
شهد تنهدت: يا ترا وش قصتك يا مجهول.
"من تكلمين"
شهد شهقت بخوف.
__
بيت ابو احمد
عالجوال تكلم بسريه:حمودي للحين ما جاء.
هو:من حقه يا أحلامي خلاص أخذ البنت اللي يحبها.
احلام:الله يوفقه، سلمان حبيبي كيف خالتي؟
سلمان: بخير والله ،عند اختي سمر و مبسوطه.
احلام ابتسمت: ايه كلمنا اليوم خالي و قال أنها عندهم.
سلمان: ماخذه اخبار أمي من النسيب.
احلام:أمي تكلمت اليوم لابوي و سمعتها بالصدفه.
سلمان:حلوم اسمعي.
احلام:لبيه.
سلمان: جهزي نفسك لأننا بنجيكم قريب.
احلام دق قلبها:وش يعني؟
سلمان ضحك:كيف وش يعني؟ بنجيكم بعد زواج أحمد و نخطب عندكم.
احلام ساكته.
سلمان:حبيبي.
احلام:أسمعك.
سلمان بزعل:لا يكون ما تبين؟ ترا أنا ابيك و من زمان انتي تعرفين هالشي.
احلام:اعرف يا قلبي بس الحين باقي أنا ادرس.
سلمان:و إذا تدرسين يعني انا ما راح احرمك من هالشي ابدا.
احلام: خير ان شاء الله، سلمان بإقفل الحين و اكلمك بكره.
سلمان: طيب حبيبي انتبهي لنفسك.
احلام: إن شاء الله. و قفلت.
___
عند مشعل
جالس عالايباد يخلص شغل له، الجد كان يبي يكلمه و يناظر فيه و إذا ناظر فيه مشعل يصد ،هنا مشعل عرف أن جده معه كلام ،ترك اللي بيده:وش تبي تقول يا ابو عبدالعزيز.
الجد ببراءة:وش هو؟
مشعل يناظر بنص عين:مو عليي هالحركات.
الجد سكت و أخذ نفس.
مشعل:قل اسمعك.
الجد:كنت أبي أقول فيه أخبار عن عمك محمد و بنته.
مشعل ابتسم:لا تخاف يبه هو بخير و بنته بخير.
الجد فز قلبه:يعني شفته ،طيب قل لي وش أخباره كيف صاير؟ قل لي يا ابوي ترا شوقي له كل ماله يزيد أكثر و مغبون عليه من يوم طردته، و نزلت دموعه.
مشعل وقف بسرعه و راح له:يبه عشان خاطري الله يرضا عليك بلاش هالدموع الحين تجي عمتي هيا و تشوفك بها لشكل تقلب الدنيا علينا.
الجد يمسح دموعه:طيب قول لي وش قال لك؟
مشعل تنهد:قلت له كل شي انت وصيتني عليه، بس.
الجد: بس وش هو؟ تكلم.
مشعل بحزن:رفض يرجع يبه.
الجد عقد حواجبه:ليه رفض؟ انت قلت له إني ابيه يرجع.
مشعل هز رأسه بايه.
الجد بأمر:ما عليش ترجع بكره و تطلب منه هالشي و الا اقول لك انا باروح له و توديني له.
مشعل:يبه انت متأكد.
الجد:إن شاء الله.
____
عند شهد و وسن
شهد ناظرت:طيحتي قلبي يا ..... ،و سكتت.
وسن ابتسمت:آسفه و حقك علي.
شهد:صار خير، ناظرت فيها:شفتي لابوك؟
وسن و هي تاكل بطاطس:ايه نايم يجعله بعمري.
شهد:و أمك فيه أخبار عنها.
وسن كشرت:طلعت من هالباب و لا عاد عرفت وين هبت؟
شهد تنهدت:وسن، ترا حالة عمي ما ينسكت عليها.
وسن بتعب:وش تبين اسوي يا شهد من وين لي الفلوس عشان أوفر له فلوس العمليه.
شهد باندفاع:أنا باعطيك.
وسن:خيرك سابق.
شهد:ترا انتي اختي اللي ما جابوها امي و ابوي.
وسن سكتت بتردد و بصراحه:شهد ابوي رافض يسوي العمليه نهائي سواء كانت متوفره الفلوس او لا.
شهد تنهدت:الله يفرجها على أبوك يارب.
وسن:آمين.
شهد ابتسمت:إلا تعالي قولي لي، مين الرجال اللي سردي له قصة حياتك، و انفجرت تضحك.
وسن ابتسمت:تكفين لا تذكريني هههه كلما أتذكر اتفشل بيقول عني أكيد مجنونه.
شهد:يا إني انفجرت ضحك عليك لما قصيتي لي وووه من جد فشله.
وسن:هو صح فشله، بس حسيت كذا من صوته شي جميل ما أدري وش هو؟
شهد تناظرها باستغراب:خير انسه وين عشقتي الرجال من صوت بس.
وسن كشرت:انكتمي و ش عشقه الحين أنا قلت كذا ،لكن الحق علي اقص لك، و رمتها بالمنديل.
ناظروا في بعض بخوف، لما سمعوا صوت صرخة ابو وسن.
وسن:أبــوي ، و نطت لعنده و شهد لحقتها.
____
عند أحمد
اللي رجع البيت متأخر و كان مع أصحابه اكيد ،توجه لغرفة احلام و دق الباب و دخل.
احلام بابتسامه:حي هالطله.
أحمد:يحييك ،أبي رقم رفيف من عندك؟
احلام بققت عيونها:خير تبي رقمها من عندي ،ليه ما اخذته من عندها؟
أحمد بطفش:ما امداني أخذه، ممكن تعطيني؟
احلام:أرسله لك.
أحمد:لا أوصل الغرفه و انتي باقي ما أرسلتيه لي.
احلام:إن شاء الله.
وفعلا ثواني و أرسلت الرقم له.
أما أحمد وصله الرقم و خزنه ب(ريفو) و أرسل لها رساله:يا ليت ما أحد يدري من أهلي أو أهلك أني طلعت بدري من عندك، أحمد.
و قفل جواله و انسدح.
____
عند رفيف
كانت تطقطق عالجوال و انتبهت للرساله،فتحتها و صنمت ثواني ،تنهدت:خير ما أحد يعرف، ابو التخلف اللي انت عايش فيه.
و قفلت الجوال و انسدحت.
____
عند تركي
يكلم مشعل عالجوال:مشعل من جدك.
مشعل:أدري ما أنت مصدق للحين بس والله ذا اللي صاير.
تركي بحماس:و الله نفسي أحضر المسرحيه اللي بتصير.
مشعل ضحك:قسم بالله بيطلع فيلم هندي، تنهد:ربي رزق جدي بثلاث عيال واحد الله يرحمه و يغفر له و الثاني الله عالم بحاله و الثالثه معتكفه معنا عيت لا تروح و تشوف نصيبها، و أكثر شخص شفت غلاته بعيون جدي هو عمي محمد.
تركي:ربك يعين ، عمتك ما تدري ربي وين مخبي لها الخير و عمك الله يجمعكم فيه.
مشعل:اللهم آمين، وش رايك تروح تنام عشان وراك دوام.
تركي بطفش:مالي خلق والله اداوم.
مشعل:أقول داوم وش بيفكك من لسان ابوشهد.
تركي: مو منغبن عشان كذا.
مشعل:صح اشتغلنا عنده بواسطة اهالينا بس والله ما يقصر معنا كاننا عياله.
تركي:أي والله، يلاحبيبي اخليك.
مشعل:تصبح على خير.
تركي:و انت من اهله ،مع السلامه. و قفل.
__
عند وسن و شهد
وسن دخلت غرفة أبوها و راحت له و هزته:يبه فيك شي؟
ابو وسن ما يتحرك.
وسن تهزه:يبه فيك شي كلمني.
شهد واقفه عند الباب و حاطه يدها على قلبها:الله يستر.
وسن بدأ يعلى صوتها:يبه الله يخليك رد علي لا تتركني كذا يببببه.
شهد رفعت جوالها و كلمت الإسعاف و بعدها راحت لوسن تهديها.
____
صباح جديد....عند مشعل
نزل من بعد ما لبس شماغه و ثوبه و تسبح بعطره، و نزل.
الجد حسين:مشعل تأخرت وينك؟
مشعل:هذاني يبه جيتك، و باس رأسه.
هيا:مشيعيل وين بتروحون؟
مشعل خزرها:مشيعيل أجل، ما راح اقول لك، و لف لجده:يلا يبا مشينا.
هيا صرخت:مع نفسك يا السلم الكهربائي (قالت كذا لأنه طويل).
مشعل ابتسم و طلع مع الجد.
بعد ثواني وصلوا الحي و وقف مشعل عند الباب و ناظر لجده:يبه متأكد تبي تنزل.
الجد:و ليه انا جاي، و نزل.
مشعل طفى سيارته و نزل وراه، وقفوا عند الباب و دقوه ما كان فيه أحد و رجع دق الباب و ما فيه أحد طلع لهم.
الجد بنص عين:متأكد ان ذا البيت.
مشعل:ايه يبه هذا هو و أكثر من مره اجي و اشوفه واقف هنا.
الجد باستغراب:غريبه، لا يكون عرف أن حنا جايين و راح.
مشعل:يبه كيف بيعرف و احنا مو قايلين حتى لعمتي هيا.
الجد هز راسه بايه و رجع دق الباب، شوي طلع الجار: أمرني يبه.
الجد:السلام عليكم.
الجار تقدم له:عليكم السلام، أمرني.
الجد:مو ذا بيت محمد حسين آل،،،،،.
الجار:ايه يبه وصلت أمرني.
مشعل:موجود هو؟
الجار:لا والله مو موجود البارح تعب على بنته و نقلته المستشفى.
الجد بحزن:أي مستشفى قول الله يرضا عليك.
الجار باستغراب: مستشفى ال..... أعتقد لأنه دائماً يروحون هناك.
مشعل مد يده وصافحه:يعطيك العافيه أخوي.
الجار:الله يعافيك.
مشعل مسك جده:يلا يبه نمشي.
الجد بامر:عالمستشفى.
مشعل:من عيوني تامر أمر.
و ركبوا السياره و توجهوا عالمستشفى.
__
عند وسن و شهد
ابو شهد:تكفين يا وسن تعالى انتي مع شهد و ترتاحين كم ساعه وبعدها أنا أرجعك بنفسي.
وسن بتعب:تسلم يا عم بس انا ما اقدر اترك ابوي لحاله.
ابوشهد:أنا حلفت لك.
وسن:يا عم والله العظيم ما اقدر.
شهد:بابا خلاص لا تحاول ذي راكبه رأسها و ما راح تتحرك من هنا.
ابو شهد هز رأسه بيأس.
شهد:خلاص وسن أنا باروح انام و ارتاح و ارجع لك العصر، اوكيه.
وسن:شكراً كثير تعبتك معي.
شهد:لا تقولين كذا بازعل منك ترا.
وسن بابتسامة تعب:فديتك.
شهد:انتبهي لنفسك.
وسن: تمام.
ابو شهد: يلا يبه انتبهي لنفسك و لابوك و اي شي تبينه كلميني و ارسل السواق.
وسن:إن شاء الله عمي و تسلم ،و دخلت لابوها.
ابو شهد تنهد:الله يكون بعونها.
شهد بحزن:آمين.
أبو شهد كان بيمشي بس انتبه لمشعل و جده يمشون ناحيتهم من دون ما ينتبهون له و نادا:مشعل.
مشعل انتبه و ابتسم:هلا والله، و صافحه و الجد سلم عليه.
ابو شهد باهتمام:عسى ما شر انتوا بخير.
الجد بتصريفه:نزور واحد من المعارف هنا.
ابوشهد:الحمد لله على سلامته، و أخذتهم السوالف و شهد واقفه تنتظر ابوها و هي تعبانه و مواصله مع وسن.
ابوشهد:أنا استئذنكم و مشى.
الجد انتبه للغرفه:ذي غرفة عمك و دق الباب و دخل و مشعل وراه.
الجد شاف ولده و دق قلبه و راح له و هو كله ندم و عتب على اللي سواه بولده، الجد نزلت دموعه من دون ما يحس باس رأسه ويده و عيونه و يمسح على راسه:محمد حبيبي كلمني يبه، شوفني هنا جنبك فتح عيونك عشان اتطمن عليك، جيتك و أنا كلي أمل تسامحني عاللي سويته فيك.
لف الجد و مشعل لما سمعوا صوت وسن:عفوا ،مين انتوا؟
___
بسيارة ابو شهد
شهد عالجوال و مبتسمه كانت تناظر لآخر تغريده غردها:ياحبيباً ينشد المجهول مثلي يعشق الحب ويهوى ..فيك سر..آه منه ليتني في عالم الأسرار أحيا.
شهد أرسلت له خاص:مساءك جمال. و انتظرت يرد عليها، ابتسمت لما أرسل:و صباحك يا شهوده.
رد عليها كذا لانه بتوقيت السعوديه.
شهد ضحكت بخفه.
ابو شهد:وش فيك؟
شهد سكتت:و لا شي بس قريت نكته.
ابو شهد ابتسم:يا جعل هالضحكه ما تفارقك.
شهد تركت الجوال:بابا ممكن أقول لك شي.
ابو شهد:قولي يا روح بابا.
شهد تنهدت:ما نقدر نسافر أنا و أنت و ماما اي بلد بالإجازة.
ابو شهد ابتسم و مسك يدها و باسها:ادري يا بابا إنا مقصرين بحقك، بس والله العظيم ما القا حتى لنفسي وقت كلها بين الأوراق و الحواسب.
شهد بحزن:فاهمه بابا.
ابو شهد: ترا كل شي عندي إلا انك تكونين زعلانه.
شهد ابتسمت بتسليك:لا و لا يهمك.
ابو شهد ابتسم و باس يدها:اجمل بنت هي انتي و بس.
شهد ابتسمت و رجعت تناظر في الجوال.
_____
عند يوسف
فاتح اللاب توب و يناظر في مواقع الحجز تبع أبوه و كان قلبه يدق بقوه، أكثر سفره لدبي و بلدان من برا.
يوسف عقد حواجبه:الله العالم وش انت ناوي عليه يا ابو يوسف.
"يوسف"
يوسف لف بخوف: هـ،،،هلا يمه.
أم يوسف:وش تسوي بمكتب ابوك.
يوسف:لا سلامتك بس بغيت ادخل و اسجل بالوظائف اللي منزلينها.
أم يوسف:و وين جهازك؟ و ليه تستخدم جهاز أبوك؟
يوسف تنهد:يمه عيا جهازي ما يفتح الموقع.
أم يوسف مشت عليها التصريفه:طيب يمه ،لا تنسى تقفل الليت بعدك و الباب.
يوسف ابتسم:تامرين.
و بكل هدوء يوسف قفل لاب توب أبوه و خرج من المكتب.
___
عند رفيف
اللي صحت برنت جوالها و ناظرت و كان أحمد ردت بصوت كله نوم:الو.
أحمد:صح النوم.
رفيف تعدل سدحتها:هلا، صح بدنك.
أحمد:انتي كذا كل يوم.
رفيف:ما اصحى إلا الظهر.
أحمد:حاولي تعدلين نومك عشان اذا تزوجنا.
رفيف بطفش:خير خير.
أحمد:باجيك اليوم العصر و باسلم عليك.
رفيف:الله يحييك.
أحمد: يلا مع السلامه. و قفل.
رفيف كشرت:حتى كلمة حبيبي ما فيه، مالت عليك.
وقامت من سريرها و عالحمام.
___
عندي تركي
اللي جالس بمكتبه و ما عنده أي شغل، فتح لاب توبه و يكتب بمذكرته:عندما رايتها! نعم
تلك الفتاة التي سرقت قلبي و ذهبت به و أنا لا زلت في عمر السبع سنين، قلبي ذهب مع تلك الفتاه التي كانت ترتدي فستاناً وردي و شعرها الناعم الذي يصل إلى نصف ظهرها و بياض بشرتها الناعمه و خدودها المورده.
كنت بمستشفى ال،،،،، و بذلك الوقت كنت فرحاً بقدوم أخي الصغير الذي لا يزال في بطن أمي، رأيتها عندما أتت مع والدتها و هي تمشي بكل هدوء، نظرت الي و ابتسمت و بادلتها تلك الابتسامه، كنت أنظر إليها و هي تتصفح بكتاب كان بيدها و كان يحمل صور و قصة عن اميره كانت تدعى سندريلا، أتاني الفضول و ذهبت إليها لكي أرى الكتاب معها فأنا طفل أحب أن أرى قصص مصوره و جلست بجانبها و بدأت اسالها: ما اسمها؟ و لما لم تذهب سندريلا الى القصر؟ و فرحت كثيرا عندما علمت بأنها تزوجت بالأمير.
كانت تسأل كثيراً و كنت اجيبها و كان يحمل موضوع( ماهو فيلمك الكرتوني المفضل و من بطلك المفضل) كل هذا كنا نقوله في سننا الصغير.
نظرت إلى الرجل القادم و بيده ملف او ورقه لا أعلم و نادا بهيا وناظر في ابنته ونادا:يلا رفيف.
التفتت الي و ابتسمت:يلا باي و ودعت بيدها وذهبت مع والدها.
(رفيف) احببت ذلك الاسم الذي عاش بقلبي من طفولتي ،اعلم اني لازلت صغيرا لمثل هذه الأمور لكن لا أعلم لماذا؟ كنت ابتسم عندما تذكرني أمي بها،،،،كم اتمنى وأن أعيد تلك الايام لأرى فيها رفيف،
(رفيف أين انتي)؟
تركي تنهد بابتسامه و قفل اللاب توب.
___
المستشفى
وسن باستغراب: عفواً مين انتوا؟ وش تسوون هنا؟
الجد يناظرها بحزن:انتي بنت محمد.
وسن:ايه انا؟ مين انتوا؟
الجد ناظر في مشعل و راح لوسن و مسك وجهها: حبيبي أنا جدك.
وسن بققت عيونها:جدي.
الجد:ايه يبه انا جدك، و حضنها و بكى.
وسن ترمش أكثر من رمشه مو مستوعبه و بعدت عنه: بس جدي و أهل ابوي ماتوا من زمان.
الجد و مشعل انصدموا.
نادا باسمها بصوت مبحوح:وسن.
وسن فز قلبها و راحت له:لبيه يا روح وسن.
أبو وسن: و س ن.
وسن مسكت يده:أنا هنا جنبك يا روحها.
أبو وسن فتح عيونه بتعب:طلعيني من هنا؟
وسن:إن شاء الله.
الجد تقدم و حط يده على رأس ولده:محمد يبه.
أبو وسن لف للصوت و بقق عيونه مصدوم:ابوي.
الجد بحزن:يا روح أبوك و كل دنيته، الجد باس رأسه و بكى و محمد مسك يد أبوه و يبوسها و بكى.
وسن تناظر مصدومه و مشعل يناظرهم بحزن.
الجد:ارتاح حبيبي.
أبو وسن بدموع:أبي أجلس.
وسن نطت تسنده و مشعل ساعدها من الناحيه الثانيه و جلسوه.
محمد مسك يد ابوه و بتعب:يبه كيفك؟ و كيف صحتك؟ وحشتني بالحيل.
الجد بحزن:تعبان من بعدك يا بوي، حياتي من دونك و لا شي، تعبت بعد ما طلعت من البيت صرت اشوف طيفك بكل مكان،سامحني يا قلب أبوك، سامحني.
ابو وسن:الله يسامح الجميع يبه،أهم شي انك بخير و بصحه هذا اللي يهم.
و ناظر في وسن اللي تناظرهم بصمت و مسك يدها:يبه ذي بنتي وسن، ناظر لوسن:سلمي على جدك حبيبي.
وسن واقفه مكانها من دون حركه.
الجد مسك يدها و باسها:كيفك يا حبيبة جدك؟
وسن سحبت يدها و ناظرت في ابوها:مو جدي ميت من زمان وش لون رجع يعيش مره ثانيه؟
أبو وسن:أنا كذبت عليك و أنا آسف.
وسن:ليه طيب، ٢٧ سنه و أنا عايشه ان أهل ابوي ماتوا و الحين يطلع، و اشرت على جدها:ذا جدي.
أبو وسن كان بيتكلم، بس الجد قاطعه:و أنا جدك السالفة طويله.
وسن ببحه:اوكيه و أنا اسمعكم، و تنحنحت تعدل صوتها.
أبو وسن:قبل ما تجين انتي على هالدنيا أنا تزوجت أمك و جدك ما قبل بهالشي و طردني من البيت، و أنا ما عاد رجعت لهناك ابدأ عشت حياتي معك و مع أمك من دون ما أحد يعرف منكم أن عندي أهل و انتي خصوصا ما خبرتك عشان لا تزعلين على جدك أو تكرهينه.
وسن دموعها تنزل بصمت.
الجد:أنا آسف بس كنت مو بوعيي و قسم بالله من يوم عرفت ان أبوك مريض و انتي موجوده بهالدنيا حلفت ما اترككم و لا دور عليكم، و ناظر في مشعل اللي من يوم دخل ما قال كلمه:كل الشكر لله ثم لمشعل حبيبي اللي لقاكم، و ناظر في محمد:هذا مشعل ولد اخوك عبدالعزيز الله يرحمه.
محمد ابتسم بألم و فتح حضنه لولد أخوه و مشعل تقدم له بابتسامه و باس رأسه و حضنه:الحمد لله على سلامتك يا عم.
أبو وسن بعد عنه:الله يسلمك حبيبي ،كيفك ،ماشاء الله تبارك الله نسخة عبدالعزيز.
الجد هز رأسه بايه.
وسن ابتسمت بألم و وقفت و طلعت برا.
أبو وسن:المعذره يبه بس أنا ما قد كذبت عليها إلا هالمره ،كله عشان ما تشيل عليك.
الجد بتفهم:مع الوقت بتتعود.
أبو وسن بعد اللحاف عنه بيقوم.
الجد:وين تروح؟
أبو وسن:الحق بنتي.
مشعل:يا عم أجلس الله يهديك أنا باروح لها.
الجد:ايه يا بوي مشعل هنا و يروح لها، و لف لمشعل: الحق عليها يا مشعل.
مشعل: تامر أمر، و طلع ورا وسن.
___
مكان ثاني
كانت بالصاله و تقرأ مجله، جت لها الخدامه و حطت لها كوب العصير و راحت ،مع اندماجها بمحتوى ما تقرأه غم على عيونها و هي شهقت، همس في اذنها: وحشتيني موووت، و باس خدها بوسه طويله.
ابتسمت و بعدت يده و ناظرت فيه:الحمد لله عالسلامه.
جلس جنبها و حضنها من الجنب:الله يسلمك حبيبي.
باست خده و شبكت يدها بيده:طولت هالمره يا فيصل.
أخذ العصير عالطاوله و شرب منه شوي:و الله يا روح فيصل مشغول لراسي و ما صدقت انهم أفرجوا عني اليوم، و يلتفت:وين تروك؟
ابتسمت: اولا يعطيك العافيه،ثانيا تركي بشغله و ما يجي إلا الساعه 2.
أبو تركي:الله يكتب أجره،عالعموم باطلع ارتاح و إذا جاء خليه يجي لي بسرعه مشتاق له حييييل.
أم تركي بزعل:يعني بتصعد و تتركني و لا بعد مشتاق لولدك و أنا لا.
أبو تركي:افا أنا مو مشتاق لك توني قلت لك انك،،،،،و همس في اذنها:وحشتيني موووت.
أم تركي وقفت: تمام، باروح أجهز لك الحمام عشان تاخذ دش بارد.
أبو تركي وقف و مسك يدها:باروح معك، و إلا تفكرين انك بتهربين مني يعني.
أم تركي ابتسمت و مشت معه.
____
بالمستشفى
وقفت عند سور المستشفى و يطل عالحديقه تبع المستشفى و نزلت دموعه و تعاتب ابوها ليه انه خبى عليها، لفت لما سمعت صوته يقول لها:شكل العائله وارثه تخبيت الحقيقه منا يا الأحفاد.
وسن ابتسمت بسخرية و بصوت مبحوح:توك تعرف أن لك عم.
مشعل حرك رأسه بلا:قبل شهر عرفت و كنت مصدوم مثلك ان لي عم طول هالسنين.
وسن لفت تناظره:واحد واحد يعني.
مشعل ابتسم:تعادل.
وسن ابتسمت:أنا وسن و انت؟
مشعل:تشرفت فيك يابنت العم، أنا مشعل.
وسن:الشرف لي يا مشعل.
مشعل: تبين نرجع عشان عمي قلقان عليك.
وسن كشرت:شوي و نرجع عشان يكون هو وجدي لحاله و يكون أنا أستوعبت الصدمه.
مشعل:كوفي.
وسن حركت رأسها بلا:تسلم.
مشعل بمزح:يفوتك نص عمرك ترا.
وسن عقدت حواجبها:ما أحبه والله.
مشعل:طيب ما تبين شي ترا أنا ولد عمك مو غريب.
وسن ابتسمت:أبي مويه بس.
مشعل بعفوية:من عيوني.
وسن ناظرته بصدمه كيف يقول لها كذا، ما تعرف أن مشعل ذي كلمته المعتاده إذا أحد طلب منه شي.
و بعد ثواني جا و معه طلبها و مأخذ له شاهي و هي مويه، لان مشعل تذكر أن الكوفي بيسهره و هالشي قاله لوسن اللي ابتسمت له.
___
عند تركي
اللي دخل فيلتهم بوجه متعب بعد العمل، كان بيطلع لجناحه بس وقف و هو مبقق عيونه لما سمع صوت أبوه و لف و شافه مبتسم:هلا و غلا ،الله لا يحرمني من هالطله.
تركي ابتسم له و راح له و ضمه كأنه طفل:وحشتني يا الغالي ووووحححششستتننني.
أبو تركي باس رأسه و كتفه:و أنا بعد حبيبي.
تركي بعد عنه و دموعه بعيونه:و الله يبه ريحتك اللي ساكنه بهالبيت بس اللي اشمها و انت مو هنا.
أبو تركي بحنان:و الله يا أبوك من الشغل اللي ما يخلص و إلا أنت و أمك ببالي و كل ذا اعمله لكم انتوا.
تركي مسح دموعه لما سمع صوت امه:هلا يا روح ماما.
تركي وقف و باس راسها، و ناظر أبوه:عن اذنك باطلع أخذ شاور و انزل لكم.
أم تركي جلست:لا تتأخر حبيبي عشان بابا جوعان.
تركي تخصر:الحين مستعجله تحضرين عشان زوجك و لو أنا تقولين ما بنحضر إلا لما أشوفك.
أم تركي ابتسمت:و لا يهمك ما نحضر لين تجي.
أبو تركي بمزح:ايه ولدك و تدلعينه و أنا اللي توني واصل و ميت جوع سحبتي علي.
ام تركي بعصبيه:تراكم اتعبتوني يا اثنين .و قامت من عندهم معصبه.
انفجر ابو تركي و تركي ضحك عليها، دائما يحبون يرفعون ضغطها و يقارن كل واحد نفسه بالثاني.
تركي هو وحيد امه و أبوه يشوفونه الدنيا كلها.
___
عند رفيف
اللي لبست بنطلون جينز اسود و بلوزه احمر اكمامها نص و بوت احمر و حطت لها شويه فاونديشن و رسمت عيونها بكحل اسود و حطت قلوس.
انتبهت لجوالها اللي يدق يعلن وصول أحمد، تعطرت و نزلت له و فتحت باب المجلس لما أخذت نفس و دخل مبتسم و صافحها بس و سكتت، دخل أحمد هو يسأل عن حالها و أحوالها و هي ترد بشكل عادي مو خجل.
انتبهت لما طلع لها ميداليه على شكل قلب.
رفيف انصدمت و ناظرت فيها و بعدين ناظرته:و ش ذا؟
أحمد بابتسامه:لك.
رفيف سكتت و أخذتها:شكراً.
أحمد:وين ريان؟
رفيف:طلع مع صاحبه.
أحمد حرك راسه باوكيه.
رفيف وقفت:باخليك شوي و ارجع.
أحمد:خذي راحتك بس استعجلي عشان باقي اروح للعيال.
رفيف:تمام ، و طلعت من عنده.
____
المستشفى
رافضه أنها تروح مع جدها و تترك أبوها ، وأبوها يقول أنا ما فيني ألا العافيه، بس وسن عنيده.
___
عند رفيف
دخلت غرفتها و الغصه ناشبه بحلقها رمت بهديته عالطاوله و جلست و انفجرت تبكي، و بعد ثواني سكتت و بقهر تكلم نفسها:عيل أنا رخيصه عندك حتى تجيب لي ميداليه ابو ريالين ليييه؟ انا أكون زوجتك قبل ما اكون بنت خالتك، مابي منك هديه و لا أبي شي أبي بس شوية اهتمام و حب و نفس الحب اللي انا ابادله إياك يا ولد الخاله، و ابتسمت بسخريه:الله يسامحك بس.
و أخذت هديتها له و كان عطر رجالي من ماركة قوتشي و نزلت له.
____
عند وسن
وصلت مع جدها و مشعل لبيت جدها أو نقول لقصر جدها، انذهلت وسن من كبر البيت، كانت حديقه كككبببييره و نصها مزروع بعشب و فيه نافوره كبيره بيضاء و مسبح طويل والفيلا كانت من برا تجيب العافيه.
الجد فتح الباب:يلا حبيبي.
وسن بلعت ريقها و نزلت و قلبها يدق بقوه.
الجد:شرفتي بيتك يالغاليه.
وسن تناظره مبتسمه و مشت مع جدها و لما دخلت ذكرت الله و انسحرت بالمنظر من جوا(تخيلوه انتوا) دورين و كبير و واسع و الوان متناسقه و أثاث يفتح النفس.
هيا طلت من فوق و انتبهت للجد و مشعل و صرخت:يالله ان تحييهم.
الجد:تعالي يا هيا.
مشعل همس لوسن:هذي اهبل وحده في البيت.
وسن ابتسمت.
هيا:لبيه ،و انتبهت لوسن و بققت عيونها:من ذي؟
الجد:حزري.
هيا شهقت:لا تقول يبه.
الجد ابتسم:ايه هي.
هيا حطت يدها على فمها:ليه يا مشعل ما قلت لي يا خاين.
مشعل مبتسم:وش رايك بالمفاجاه.
هيا بعصبيه:مفاجأة وش هو؟ داخلين و بيدكم وحده ما تعرفونها و متزوجها حضرتك.
كلهم ناظروها بصدمه.
_____
عند رفيف
دخلت لأحمد و أعطته الهديه:تفضل.
أحمد اللي كان على جواله و ناظر فيها، عقد حواجبه:وش ذا؟
رفيف بابتسامه:هديه بسيطه.
احمد ابتسم:شكراً.
رفيف:العفو.
أحمد:أقول لك ترا زواجنا بعد شهرين.
رفيف بصدمه:ليه؟
أحمد:عندي دوره عسكريه بعد العيد و لازم أكون هناك الثلاثه شهور الجايه.
رفيف:طيب نخليها بعد ما ترجع.
أحمد: لا ،ابوي قال نتزوج قبل أحسن و بعدين يصير خير.
رفيف سكتت.
أحمد وقف:يلا انا ماشي.
رفيف بطنازه:بدري حبيبي.
أحمد ناظرها و بسخريه:من عمرك، يلا مع السلامه و طلع.
رفيف تنهدت:ما عليش رفيف اصبري كل شي بيتغير بعد الزواج.
قفلت انوار المجلس و طلعت.
___
عند شهد
اللي بحجرتها و تناظر الجوال مبتسمه و تقرأ ل"مجهول بلا عنوان"
عيونك آخر آمالي وليلي أطول من اليم
كيف آلقى كلامٍ عذب يوصف دافي إحساسي
عشقتك قبل ما أشوفك وشفتك صرت كلي حلم
آبي رمشك يغطيني وآبيك اقرب من أنفاسي.
أرسلت له خاص:شكلك طحت و ما أحد سما عليك.
المجهول:ليه؟
شهد:من اختيارك للاغنيه مجهول، قولي وش أسمها.
المجهول:شهد.
شهد بققت عيونها و أرسلت فيس:😳
المجهول: هههههه أناديك أنا.
شهد تنهدت:نعم.
المجهول:تعرفين واحد اسمه عبدالرحمن محمد آل،،،،.
شهد:اسمع فيه و ظنتي انه صديق لابوي من زمان، ليييه.
المجهول:دائما اشوف أخباره بمواقع التواصل الاجتماعي.
شهد:ايه شخص معروف بالرياض كلها و المملكه كمان، ممكن سؤال؟
المجهول:تفضلي.
شهد:أول شي والله العظيم ما أقول لأحد، بس ابي اعرف اسمك.
المجهول ابتسم و أرسلها اسمه فقط.
شهد ابتسمت:يا حلاة هالاسم والله يا لبيييه و همست:حاتم.
كتبت له:حلو اسمك ليه مو كاتبه.
حاتم:لأني مجهول بلا عنوان.
شهد فهمت قصده و سكتت.
حاتم:شهوده، انتي اجمل صديقه تعرفت عليها أحس من كلامك روح مرحه كذا و انبسط لما تكتبين لي كومنتاتك الجميله في صفحتي، لا تفكرين إني شخص كذاب أو يلعب لا والله اني أقول ذا الكلام من قلب لأني ما أرضاها على نفسي بالكذب.
شهد ابتسمت:كلماتك تخلي الواحد يتعلق فيك غصب و يحس انك شخص محترم.
حاتم:تسلمين أنا عارف ان ذابحك الفضول عشان تعرفين قصتي بس صدقيني بيجي يوم و احكيها لك.
شهد:براحتك، يلا لازم اقفل عشان باروح أصلي عن اذنك.
حاتم:الله معك 💗.
شهد تنهدت و حطت تليفونها على سريرها و راحت تصلي.
___
عند وسن.
مشعل بصدمه:عمتي وش زوجتي؟ ذي وسن بنت عمي محمد.
هيا بصدمه:وسن بنت محمد، محمد اخوي.
الجد:ايه اخوك.
هيا حضنتها و بكت و وسن حضنتها بحب و طاحت لثمتها اللي من يوم شافت جدها و مشعل ما فكتها: عمه هيا.
مشعل ابتسم لما شافها و كانت بنت جميله و كيوووت و بياضها بارز و خشمها مورد من كثر ما بكت.
هيا بعدت عنها و من بين دموعها:وين محمد؟
وسن تمسح دموعها:محمد بخير و عافيه.
الجد:محمد في المستشفى و بكره بيطلع و نجيبه هنا.
هيا:ليه وش فيه؟
الجد:تعبان شوي، الحين خذي وسن عندك و خليهم يجهزون لها جناحها و محمد يجهزون له جناحه بعد عشان بكره إذا طلع بس بالدور اللي هنا عشان الدرج لا يتعبه.
هيا بفرح:إن شاء الله ،و مسكت يد وسن و صعدتها لفوق.
الجد ناظر في مشعل:ما انت جوعان حبيبي.
مشعل بتعب:باموت من الجوع.
الجد ابتسم:الحين اخليهم يحطون الغدا و نادا:يا منييره.
منيره كبيرة الخدم جات له:نعم طال عمرك.
الجد:حضروا الغداء.
منيره: الغداء زاهب طال عمرك بس ننتظر تجلسون.
مشعل يمشي بسرعه:يبه انا باروح أكل.
الجد ضحك.
مشعل ابتسم له و ناظر في منيره: إذا ممكن تقولين لعمتي هيا تنزل عشان بدأنا ناكل.
منيره ابتسمت:تامر طال عمرك.
___
عند رفيف
أبو ريان يناظرها:أحمد يزورك.
رفيف:ايه جاني العصر.
أبو ريان:كلمك بشي؟
رفيف: قال الزواج يبه بعد شهرين.
أبو ريان:و انتي وش رايك؟
رفيف: ليش فيه لي يد بالموضوع.
أبو ريان:إذا تبين خليناه ياخره.
رفيف تناظر ابوها و تنهدت:يحطونها وقت ما يبون.
أم ريان:رفيف انتي متأكده، ترا بتاخذين وقت عشان تجهيزاتك.
رفيف وقفت:ما راح أكثر لأن كل شي بأكمله إذا سافرت.
أم ريان:براحتك.
أبو ريان طلع بطاقته و أعطى رفيف:تفضلي حبيبي و إذا لزمك كمان قولي لي عشان احول لك.
رفيف ابتسمت و راحت لابوها:جعلني ما انحرم منك.
و باست يده و رأسه.
أبو ريان:و لا منك يا روحي.
رفيف:عن اذنكم، و طلعت لغرفتها.
___
عند تركي
كان جالس بجناحه و يكتب بمذكراته عاللاب توب
" يمكن للإنسان أن يعيش بلا بصر، ولكنّه لا يمكن أن يعيش بلا أمل فالثقة بالله أزكى أمل، والتوكّل عليه أوفى عمل.
تذكر يا صديقي، إن الأمل شيء جيد، والأشياء الجيدة لا تموت أبداً فأجمل وأروع هندسة في العالم أن تبني جسراً من الأمل على نهر من اليأس".
____
عند رفيف
دخلت جناحها و حطت البطاقه على مكتبها اللي تعشق تجلس عليه و تبدأ تكتب بمذكراتها،
"الأمل هي تلك النافذة الصغيرة، التي مهما صغر حجمها، إلّا أنها تفتح آفاقاً واسعة في الحياة لا تيأس إذا تعثرت أقدامك، وسقطت في حفرة واسعة، فسوف تخرج منها وأنت أكثر تماسكاً وقوة، و إنّ الغروب لا يحول دون شروق جديد".
____
وقفت رفيف كتابه و تركي وقف كتابه، كل واحد يناظر اللي كتبه و هو في قمة الضيق، رفيف من زواجها اللي ما تعرف وش نهايته أو تركي اللي ما يشوف أبوه إلا بالشهر مره و هو من جد محتاجه، رجعت تخط اناملهم و كأنهم متفقين عالكلام رغم أن كل واحد منهم ببيت و ما يعرف شي عن الثاني بس اللي جواتهم أكبر من كذا " لوّن حياتك بألوان التفاؤل والسعادة والفرح، الحياة كلوحة تنتظر الألوان لتغدو أكثر جمالاً، نولد ولوحة حياتنا بيضاء نقيّة، منا من يحولها إلى الســــواد ومنا من يحافظ على نقائها و صفائها، إذا سمـاؤك يوماً تحجبت بالغيوم أغمض جفونك تبصر خلف الغيوم نجوم، والأرض حولك إذا ما توشحت بالثلوج، أغمض جفونك تبصر تحت الثلوج مروج، رغم وجود الشر هناك الخير، رغم وجود المشاكل هناك الحل، رغم وجود الفشل هناك النجاح، رغم قسوة الواقع هناك زهرة أمل"
كل واحد منهم ابتسم عالكلام اللي كاتبه أعطوا أنفسهم جرعة أمل و حياه ليوم جديد.
__
شهرين مرت على ابطالي،،،
رفيف: اللي عملت حفله صغيره و احتفلت فيها مع أحمد و اهله و لبسها الشبكه و اللي غص عليها بالحفله ان أحمد جلس معها نص ساعه فقط و بعدها طلع بحكم أن أهله ما أحد يقدر يوصلهم غيره، و رفيف كل ما لها تطنش هالموضوع بمزاجها لأنها تقنع نفسها أو تحاول تقنع نفسها انه بيتغير بعد الزواج، و هالشي احنا نتمناه يا رفيف.
جهزت لزواجها و مثل ما قالت ما أخذت لها ملابس كثير عشان اذا سافرت شهر العسل تتقضا لها مع أحمد.
___
وسن:اكيد تسألون عن حالها، حالها أجمل من قبل من بعد ما انتقلوا لعند جدها حست من جد أن وراها أحد يحبها وراها أهل و سند غير ابوها إذا صار له شي،اجمل شي بالدنيا صار لها هي عمتها هيا اللي كان سنها متقارب منها لكنها أصغر من مشعل بسنتين، بس هم اللي معطين جو بالبيت صراخ و مطارده و ضحك، يخلي الجد يبتسم غصب و محمد بخوف عليهم:لا تطيحون، لا تصارخون لا تدفون بعض.
و مشعل اللي ارتاح لشوفة نفسية جده و ابتسامته من بعد رجوع عمه محمد للبيت و هبال عمته هيا زاد مع وسن، حس نفسه سعيد جداً اكتملت الفرحه بيبتهم من بعد انتقال عمهم محمد لعندهم بالبيت.
___
تركي
انبسط كثير لمشعل لما عرف أن عمه رجع بالبيت و اللي نعرفه أن حياة تركي غامضه ما عمقنا فيها كثير ،كل اللي نعرفه أن وحيد أبوه و امه وحب بنت بصغره اسمها رفيف و انه يكره غياب أبوه بالبيت بس وش سر تركي اللي مخبيه و احنا ما نعرفه؟
___
شهد
اللي صار وقت فراغها مشغول جداً بدال ما يكون فاضي كان كل يومها محادثات مع حاتم اللي صار شغلها اليومي و اللي على نار تبي تعرف وش موضوعه وما ننسى كمان انه احنا نبي نعرف كمان ،انبسطت لوسن باللي صار لها و عرفت من أهل ابوها، بس اللي انبسطت فيه أكثر هو حاتم اللي كل مره تنتظر منه انه يكلمها.
كل هذا بنعرف عنه بالتدريج
___
عند رفيف
قبل يومين بزواجها و تحس أنها تعبانه و توهم نفسها بأنه تعب نفسي لا أكثر لأنها بتبدأ حياه جديده و بتبعد عن أهلها، راحت لابوها اللي كان يتفرج عالاخبار و جلست جنبه و سندت رأسها على كتفه.
أبو ريان ابتسم و حط رأسه على راسها و مسك خدها و بقق عيونه و ناظر فيها:رفيف.
رفيف بعدت بتعب:لبيه.
أبو ريان عقد حواجبه:وش فيك حبيبي ليه عيونك كذا وشكلك كذا تعبانه؟
رفيف ابتسمت:ما فيني إلا العافيه.
أبو ريان:لا والله ما فيك إلا التعب و المرض ونادا:يا ريان.
ريان جاء له:سم يبه.
أبو ريان: اختك تعبانه يبه ودها المستشفى يا أبوك.
ريان:و الله العظيم قلت لها من يومين و عيت.
أبو ريان: وش تعيي خذها يبه و شوف وش بيقولون لك، و طمني.
__
يتبع ———->