احضني و نسيني قسوة الماضي

الجزء السادس

الجزء السادس
____
شهد بضحكه:لا ما شاء الله طلع الكلام.
رفيف وقفت:بنات أنا بارجع لأني تركت جوالي هناك و خايف يدق ريان و أنا بعيد.
وسن:اوكيه لاحقينك.
رفيف مشت و تركتهم و هي تفكر و تقول بنفسها: القشة في البحر يحركها التيار والغصن على الشجرة تحركه الريح والإنسان وحده.. هو الذي تحركه الإرادة.
حتى أعظم حيتان البحر ليس لديها أي قوة في الصحراء.
كل صخرة هي حرف وكل بحيرة هي عبارة وكل مدينة هي وقفة، فوق كل مقطع وفوق كل صفحة لي هناك دائماً شيء من ظلال السحب أو زبد البحر.
الرجل هو البحر والمرأة هي البحيرة فالبحر تزيّنه اللآلئ والبحيرة تزينها مناظرها الشاعرية الجميلة و الحياة فيض من الذكريات تصب في بحر النسيان، أمّا الموت فهو الحقيقة الراسخة و كل السواقي تنتهي إلى البحر.
تنهدت و انتبهت أنها وصلت و شافت العيال يشعلون الحطب و يضحكون و لفت رأسها و شافت تركي يناظر جواله و مبتسم.
تركي حس بأحد جاي ناحيته لف و شافها، ابتسم:تعالي رفيف باوريك شي.
رفيف ابتسمت له و جلست جنبه:وش هو؟
تركي مد لها الجوال:شوفي ذا ابوي.
رفيف ابتسمت و مسكة يد تركي اللي حامله الجوال:ماشاء الله ،شبهك تركي.
تركي:أنا أشبه له قصدك.
رفيف ضحكت بخفه:كلها مثل بعض.
تركي اختار صوره ثانيه:و ذي أمي.
رفيف بدلع:يا حياتي تجنن.
تركي يناظر لها:أنتي اللي عيونك تشوف الناس تجنن.
رفيف ابتسمت و أخذت جوالها و فتحته بسرعه و فتحت عالاستديو:شوف ذا أبو ريان.
تركي مسك جوالها و عقد حواجبه:شكله ما يمزح ابد.
رفيف ضحكت:والله قلبه طيب حرام عليك حبوووه بابا.
تركي ابتسم:تصدقين يشبه ريان!
رفيف رفعة حواجبها:صدق.
تركي:والله، ناظري الخشم و جبهته بعد بس عيونه مو مثله.
رفيف:أنا عيوني طلعت لبابا و ريان لماما.
تركي:انتي ما تشبهين أحد انتي غيييير.
رفيف بخجل: تسلم كلك ذوق.
مشعل جاي لهم:تركي ما ودك تقوم و تساعدنا.
تركي بابتسامه:يا ليت بس نسيت يدي وش صايبها.
مشعل خزره و جلس:وين الصبايا؟
رفيف:الحين بيجون، وقفت:عن اذنكم، و مشت بهدوء.
تركي همس لمشعل:انت دائما أوقاتك غلط.
مشعل رفع حاجب:بدال ما تشكرني تقول هالكلام.
تركي كشر و وقف:عن اذنك باروح اتجهز لصلاة المغرب.
مشعل:تقبل الله.
____
السعوديه
فتح الباب بهدوء و دخل ابتسم لما شاف كل شي على نفس ماهو صرخ: يبه.... يمه.... أنا رجعت.
أم ريان طلعت من المطبخ و بفرح:هلا حبيبي هلا و غلا.
ريان ركض لها و حضنها:وحشتيني يالغاليه.
أم ريان:و أنا أكثر حبيبي الله لا يحرمني من هالعيون و هالطله, و باست خده.
أبو ريان من وراه و بابتسامه:هلا يا بوي.
ريان لف له و ابتسم و راح باس رأسه و يده:وش لونك يبه؟
ابوريان بفرح:الحمدلله حبيبي انت كيفك و كيف رفيف؟
ريان:مبسوووطه.
أم ريان بحزن:رفضت تجي معك.
ريان تنهد:يمه كيف تبينها تجي و هي عندها دراسه.
ابوريان:فديت قلبها.
ريان:تراني ميت من الجوع.
أم ريان:من عيوني الحين أحضر و ناكل كلنا.
ابوريان:عجلي يا أم ريان.
أم ريان هرولت:إن شاء الله.
ابو ريان ضرب فخذ ريان:حي الله ابوحسام.
ريان ابتسم:الله يبقيك يبه.
و كملوا سوالف عن الجامعه و المعهد و أصدقاء رفيف و مين هم؟
__
أستراليا
عند شلتنا اللي تعشوا و بعدها جلسوا و سولفوا و بأمر من شهد خلتهم يعملون دائرة و يلعبون و الله يستر من هاللعبه.
شهد:الحين ذا الورق مكتوب فيه اسم الكل و كل شخص يطلع له اسم الثاني يرجع يسأله أي سؤال بسسس بحدود.
تركي:تمام و إن شاء الله يطلع لي اسمك.
يوسف بنذاله:و أنا أبي يطلع لي اسمها.
شهد بحلقت عيونها:يمممه منكم يا اثنين.
رفيف جات لهم و هي مبسوطه و جلست بين وسن و يارا:شباب ريان وصل و يسلم عليكم كلكم.
الكل:الله يسلمك، الحمدلله، الحمد لله على سلامته.
رفيف:الله يسلم الجميع و بحماس:وش بتلعبون؟
شهد هزت السله و أعطت مشعل:اختار ورقه.
مشعل أخذ ورقه و فتح و ابتسم بخبث:شهد.
شهد بغبنه:يا ويلي.
مشعل:وش اسالك؟ اممم،لو خدعتك وسن بيوم من الايام بتسامحيها؟
شهد:و ما بغيت تشككني إلا بصديقتي.
وسن:قال لو وانتي بس ردي عليه.
شهد:اولا الله لا يجيب الزعل بيننا ثانيا على حسب الموضوع.
مشعل ابتسم:تمام.
شهد سحبت ورقه و ابتسمت:رفيف.
رفيف:تفضلي.
شهد بنص عين:غني.
رفيف بزعل:لا شهد مو كذا.
شهد رفعت يدها ببراءة:هذي القوانين.
رفيف أخذت نفس و ناظرت فيها:يا ويلك لو سكتوني و هجوا.
شهد:هههه يلا بس.
رفيف بدأت تغني:انت أكثر شي بالدنيا ابيه و انت،،،،،،، و غنت الين وصلت لروح روووح و سكتت و برجفه:روح روووح بكره أيامك تجيبك تعلمك من هو حبيبك وقتها أنا باسيبك و أخذ بحقي و اروح.
الكل رفع يده و صفق لها، حتى هو اللي حس بكل نغمة الم حزن و قهر و ندم غنتها و عرف ان رفيف فيه ماضي قاسي هي تعيشه و بعدها تعيشه صفق لها و ابتسم لها لما ناظرته.
يوسف:كل ذا يطلع منك يا المطفوقه.
رفيف بابتسامه:سبرايز.
يوسف:يا لبيه بس.
تركي بغيره:خير أخ يوسف.
يوسف ابتسم:وش فيك؟ ترا جارتي و اختي بعد امزح معها وقت ما ابي.
تركي خزره:العبي رفيف.
رفيف ابتسمت و أخذت ورقه.
شهد:الاسم اللي فيها توجهين له إي شي تبين سؤال أمر أي شي تبين؟
رفيف:اوكيه و فتحت الاسم و ابتسمت:
مشعل.
مشعل ببرود:اسالي اللي تبين.
رفيف:اوكيه هو سؤال بسيط، مين مثلك الأعلى بالحياه؟ و ليه؟
مشعل تنهد:جدي، لأن مالي من بعد الله سبحانه أحد بهالدنيا غيره.
رفيف:الله يخليه لك؟
وسن و مشعل:آمين.
شهد:يلا مشعل.
مشعل:أعطوا وسن تختار عني.
وسن:يا رب يطلع مني سؤال عالاقل، سحبت ورقه و قرات الاسم مبتسمه:حاتم.
حاتم:هلا.
وسن بتفكير:امممم، ما ادري وش أسألك؟
حاتم:عادي إي شي حتى لو تتعلق بحياتي الخاصه.
وسن ابتسمت:وش أكثر شي تتمناه و تتمنى أن الله يحققه لك؟
حاتم ابتسم:إني اشوف ابوي.
وسن ابتسمت بحزن:الله يحقق لك هالشي.
الكل:امين.
حاتم اختار ورقه و فتحها اتسعت ابتسامته:يوسف.
يوسف صرخ:لا لا تكفى.
حاتم ضحك بخفه:حياتك بين يديني.
يوسف غطى وجهه:تكفى لا.
حاتم:كيف تتمنى تكون شريكة حياتك؟
يوسف يمزح:تشبه لك.
انفجروا ضحك.
حاتم:بلا حركات قول الصدق.
يوسف:اااا،الصدق والله تكون واحده مروقه طول اليوم يعني تبتسم تاكل الجو, اااا تشبه رفيف بس مو بهبالها اللي قبل لا مثل الحين.
رفيف بثقه:أنا وحده و ما فيه منها ثنتين.
صرخوا كلهم لثقتها و كلامها.
تركي بضيق:أقول بسرعه اخبص الاوراق و اختار.
يوسف:وش فيك قفلت فجأه؟
تركي بطفش:بسرعه.
وسن لمشعل:وحشتني هيا حسيت من كلام يوسف أنها تشبه لها و لهبالها.
مشعل ابتسم و هز راسه بايه.
يوسف خبص أوراق و اختار و ابتسم:رفيف.
رفيف غطت وجهها.
يوسف:كيف وعيتي على نفسك و اعترفتي بأنك بنوته.
تركي بصراخ:يوسف وش ذا السؤال؟
يوسف باستغراب:وش فيك؟سؤال عادي.
رفيف ببرود:تركي عادي هو ما قال شي.
تركي:وش اللي ما قال شي.
رفيف:ممكن تسمع طيب.
تركي تنهد و مسح وجهه.
رفيف بهدوء:لما كنت ادرس بالمتوسط كنت بنت مشاغبه جداً و كنت اطلع بحارتنا العب كوره مع العيال و اتصفقهم واحد واحد.
مشعل عقد حواجبه:بلطقيه.
رفيف ابتسمت:تماماً ،المهم كبرت و حرمني بابا إني اطلع الشارع و ألعب مع الأولاد لأني ختمتها بشق رأس واحد من العيال و أنا من الأساس اكررررهه، هزاني و قال خلاص مكان المراه بيتها، تعبت نفسيا بذاك الأيام خصوصا أن ما كان عندي صديقات أو ما أحب يكون لي صديقات و تصير سوالف بنات و كذا لأن أنا كنت اشوف نفسي بوي،عملت كارثه بهذاك اليوم و ضحكت:قصيت شعري بوي رميت كل ملابسي اللي تدل عالانوثه صرت اشتري بلوفرات و بناطيل و كابات يعني تقدرون تقولون غيرتها جزئياً.
يوسف بهدوء:وش اللي خلاك تصحين؟
رفيف ابتسمت:نفسي اللي خلتني اصحى من غفلة هالدنيا، غيرت نفسي بنفسي بدأت توضح عندي الصوره انه أنا أنثى و الصفات اللي موجوده فيني أنثى يعني عرفت ان الله خلق الذكر ذكر و الأنثى أنثى و كل هذا كنت أنا معميه عنه بس الحمد لله على كل حال.
شهد بشطحه:دخنتي.
رفيف بحلقت عيونها:لا عاد مو لذا الدرجه.
شهد ضحكت:اوكيه يلا رفيف.
رفيف أبتسمت:ما عليش يارا تختار عني.
يارا سحبت ورقه و ابتسمت:تركي.
تركي ابتسم.
يارا بتفكير بريء:ااا، عدم زواجك إلى الحين هو بسبب وحده حبيتها و ما كانت لك أو خانتك؟
تركي ابتسم و سكت.
يارا:اسفه عالسؤال؟
تركي:لا سؤالك حلو، بس ماله اجابه غير أن الزواج ماله عمر محدد أو يعني مو فارضينه بعمر معين،
ثانياً:انا ما قد حبيت إلا و أنا بزر و بس.
رفيف ابتسمت.
يارا:اوكيه.
شهد:دورك يا تركي.
تركي:باسال سؤال عام للكل.
شهد:قول.
تركي:كل واحد يقول كلام أو رأي عن الحب، نبدأ بحرم مشعل.
وسن:الحب... هو اللعبة الوحيدة التي يشترك فيها اثنان ويكسبان فيها معاً أو يخسران معاً.
تركي:يوسف.
يوسف:الحب كالمعدة القوية يهضم أي طعام وأي كلام.
حاتم ناظر له:ما تفكر إلا ببطنك.
تركي ابتسم:يارا.
يارا بتفكير:الحب،،،، مآعرف ! بسّ.
حب كثير گثر القلوب الطآهرة بالمسآجد .. ومثل : البراءة ، " في عيون الطفولة " !
مشعل باعجاب:يا سلااااام.
تركي:تكلم استاذ مشعل دامك تمدح.
مشعل بثقه:في الحب خطابات نبعث بها وأخرى نمزقها وأجمل الخطابات هي التي لا نكتبها.
وسن بهمس:فديتك.
رفيف ناظرت لها و ابتسمت.
تركي:شهد.
شهد بضيق:ما ادري وش اقول.
تركي:عادي إي شي يعتبره خاطرك عن الحب.
شهد بلعت ريقها:الحب..و بالم: حب يغيب وصاحبه ما بعد غاب.. وحب يدوم وصاحبه في غيابه وحب يذوب خافقً ما بعد ذاب وحب يداوي صاحبه من عذابه وحب حياته كلها لوم وعتاب وحب حقيقي ما يضرك عتابه وحب بلا معنى وحب بلا أسباب يبدأ غريب وينتهي في غرابه.
حاتم تنهد و تذكر حبه مع شهد وبابتسامه:أحببتها وحُبها قد تَمَلَّكَني.. فأصبحتُ لديها رهناً ولقلبها سجيناً مُلكُ يديهِ حبٌ وحيدْ، كنتي وستبقي حبيبتي حتى وإن لم تكونين  أنتي نصيبي  فأنا أحبك وسأبقى أحبك.. وإن مِتي في قلبي سيخلد حبّك، بك عرفت للحياة مَعنى فكنتي أنتي أجمل معنى فيها وبحبـك أشـرقت شمسي وغدت حياتي كلها مضيئة بحبك.
تركي ابتسم لهم و ناظر في رفيف.
رفيف كانت تسمع لكلام كل واحد فيهم و رأيه بالحب، انتبهت لتركي و هو يناظر فيها و عرفت ان وصل لها الدور و بتنهيده:ما عندي كلام عن هالشي.
تركي بجمود: الكل تكلم و انتي بتتكلمين عنه.
رفيف ناظرت فيه بنظرات عتب،قوه ما تدري بس طلع منها هالكلام:الحب أسخف شي بهالدنيا و ما اعتقد ان من جد فيه شي اسمه حب لأنه،،،، كذب هالكلام كله.
الكل يناظرون لها ساكتين.
تركي يناظر لها:أحبك.
رفيف انصدمت.
تركي أخذ نفس:بهمس النفوس وبلغة العيون أردد (أحبك).. ينبض القلب باسمك وأنفاسي تردّد حُبك، وتتساوى الفصول برحيلك وتزهر الورود بمجيئك.. يا من أسرني وفي مراكبه قيّدني وبغرامه سلبني.
مشعل يصرف:الللللله عللللليييك، قول ان بعد ما خليتنا نتكلم تبي انت تختمها بشي جميل.
وسن عرفت بترقيعات مشعل:ماشاء الله مو جديد عليه الكلام الحلو.
مشعل ناظر فيها و همست له:ارقع لخويك.
رفيف وقفت:تصبحون على خير.
الكل:تلاقين الخير.
تركي كان يناظر لها وين تروح؟ و شافها داخله البيت.
تركي تنهد و وقف:تصبحون على خير.
مشعل بباله:وش بيهبب ذا بس الله يستر.
شهد طلعت اونو:نلعب اونو.
مشعل:ايه وزعي للكل.
__
عند رفيف
اللي دخلت الغرفه و سندت ظهرها عالباب و تكلم نفسها:لا لا يا تركي حرام عليك، ما ابيك تحبني لا و الله ما اقدر أحبك والله، و نزلت دموعها و مسحتها لما سمعت الباب يدق و بعدت عنه و ببحه:مين؟
انفتح الباب و دخل:رفيف.
رفيف دق قلبها:وش تبي؟
تركي تنهد:أنا جيت عشان اللي صار تحت.
رفيف بغصه:قول لي انك ما تقصد شي من اللي صار تحت.
تركي مسك يدها و بهدوء:رفيف أنا...
رفيف بترجي:اترجاك قولها قول اسف.
تركي بهدوء:أحبك والله.
رفيف شهقت وحطت يدها على فمه تسكته:لا لا تكفى، والله ما استاهلك والله، و نزلت دموعها وبكت.
تركي بلع ريقه و بعد يدها عن فمه.
رفيف تزحلقت عالباب و غطت وجهها و بكت و تركي نزل لمستواها و همس:رفيف وش مخبيه؟
رفيف تبكي.
تركي:صدقيني ما راح أخبر أحد و لا ازعل بس وقفي لا تبكين.
رفيف ناظرت فيه و من بين دموعها:ما راح تفهم والله ما راح تفهم روح تركي روح.
تركي يناظر فيها و يبلع غصته و قرب منها و باس دمعتها اللي على خدها اليمين و مسح بابهامه خدها اليسار.
رفيف كتمت شهقتها لما قرب منها و غمضة عيونها لما باس خدها و مسح على خدها،ما حست إلا وهو يهمس في اذنها:خليهم يدرون إني أحبك وش بيقولون غير حبايب و أحلف لهم إني أحبك مثل ما هم شايفين، أنا وإياك نختلف عن أي أحد بهالدنيا كل اللي يهم أن قلبي ينبض باسمك و حبك و راح أضل أحبك لآخر يوم بحياتي حتى لو ما كنتي تبيني راح تكونين أنتي حبي الوحيد.
رفيف بنفس الهمس:بس تركي بس عليك الله يكفي.
تركي بعد و رفع رأسها له و ناظرت فيه، ابتسم لها و باس جبينها و ناظر فيها:تأكدي أني احترمك قبل ما أحبك.
رفيف بتعب:رووووح تركي.
تركي وقف:باروح بس عشان خاطري ما ابي اشوف دموعك وقفي بكا.
رفيف مسحت دموعها و وقفت عشان بس تبيه يطلع و فتحت الباب من دون أي كلمه.
تركي تنهد و طلع و نط لما انقفل الباب وراه بقوه، راح لغرفته من دون ما يرجع لها و يخانقها عاللي سوته لأنه عارف إنها منهاره بس ليش إنها رافضه حبه و صار يسأل نفسه لييييه؟
دخل غرفته و شاف حاتم منسدح و يلعب بجواله و كلمه:توك تجي؟
حاتم بعد جوالها:ايه و انت وين كنت؟
تركي:قريب ، و فصح تيشرته و أخذ منشفته من الدولاب و دخل يأخذ شاور.
حاتم:الله يعينك يا تركي ، و رجع يتصفح التويتر و بعد ما خلصه قفل جواله و انتبه لتركي طالع و لاف منشفته على خصره.
حاتم ابتسم:نعيماً.
تركي ببرود:الله ينعم عليك.
حاتم سكت و تكلم عشان يغير موود تركي:العيال لما صورونا اليوم وين قالوا يرسلون الصور؟
تركي:اكيد سناب.
حاتم أخذ جواله و فتح سنابه و انتبه لاسم يوسف و مشعل و ابتسم:ايه لقيتها و انفجر يضحك من صوره يوسف مصورها.
تركي:اكيد يوسف مستهبل ببعض الصور.
حاتم:جددداً، و يرجع يضحك.
تركي بضحكه:الله يخس ابليسه.
حاتم:مشعل صوره رايقه.
تركي أخذ أيباده:أنا تحت بالليفينغ رووم.
حاتم:as you wish.
تركي طلع و حاتم كمل يناظر في الصور مبتسم، حط يده على اسمها(شهدي) يبي يشوف وين قضت الويكند هالاسبوع ،ابتسم لما شافها مصوره كوب قهوه و كاتبه:صباحكم ويكيند.
و بعدها مصوره البحر و صوره ثانيه للبحر و مسويه حبتين ابتسم و همس:مجنونه.
عقد حواجبه لما شافها مصوره فيديو:البحر يفتح النفس اليوم يمكن عشاني زرته، لا تقولون ماخذه بنفسك مقلب مالت عليكم و هذا بيتنا بعد و صورته بس قطع التصوير و كان يحمل.
حاتم بشك:كأني قد سمعت هالصوت أو مألوف لي و تنهد:الله اعلم.
و تحمل الفيديو و كانت مصوره البيت:شوفوا ذا بيتنا و المسبح بعد ووووو....
هنا حاتم انصدم.
__
عند تركي
نزل لتحت و شاف البيت مظلم،فتح باب غرفة المعيشه و جلس و فتح الايباد و بدأ يكتب و من جواته ملخبط:وما بينَ حُبٍ وحُب .. أُحبكِ أنتِ ..
وما بين واحدةٍ ودعتني ..
وواحدةٍ سوف تأتي ..
أُفتِش عنكِ هنا وهناك ..
كأنَّ الزمانَ الوحيدَ زمانكِ أنتِ ..
كأنَّ جميع الوعود تصبُّ بعينيكِ أنتِ
فكيفَ أُفسّرُ هذا الشعور الذي يعتريني صباحَ مساء ..
وكيفَ تمُرينَ بالبالِ، مثلَ الحمامةِ ..
حينَ أكُونُ بحضرة أحلى النساء؟
وقف عن الكتابه مو عارف وش يكتب؟
___
عند شهد
دخلت و انتبهت لرفيف اللي منسدحه و لامه نفسها و لما قربت منها شافت كيف وجهها ذبلان من البكا و نايمه بتعب.
شهد تنهدت:يا بعد عمري و اخذت غطا ثاني و غطتها بهدوء.
أما شهد راحت بدلت و انسدحت و هي متضايقه حيل على صديقتها، وقفت و طلعت عالبلكون و كان فيه نسمة هواء خلاها تزفر زفره قويه و فجأه سمعت صوت بكا، صوت احد يشهق ببكاه و كأن أحد مجروح جرح كبير.
شهد خافت تكون رفيف و دخلت لها بسرعه و شافتها نايمه، ماجا ببالها غير وسن و طلعت لغرفة وسن و يارا و دقت الباب و فتح لها يوسف، شهد بحلقت عيونها:يوسف.
يوسف ابتسم:هلا وش بغيتي؟
شهد بشك:غلطت بالغرفه.
يوسف ضحك بخفه:مشعل أخذ وسن لغرفتنا و أنا جيت انام مع يارا.
شهد عضت شفايفها:الله يخسه.
يوسف بهمس:بيني و بينك ذا من حقه انه يكون مع زوجته.
شهد ابتسمت:خلاص يوسف المعذره و تصبح على خير.
يوسف ابتسم:و انتي من أهله يا عسل، دخل و قفل الباب.
شهد نزلت بسرعه و انتبهت لتركي جالس عالايباد و حاله مقلوب الوجه.
شهد ما قدرت تروح و تسأله وش فيك؟ طلعت على طول للحوش و وقفت عالباب و مشت و طلت براسها و شافت حاتم ساند ظهره و رأسه منزله على ركبتيه و يشهق، دق قلبها و مشت له بهدوء و نزلت لمستواه و نادت:حاتم.
__
عند حاتم
نزل من بعد ما عرف أن شهد صديقته هي حبيبة قلبه اللي تركها و يا محاسن الصدف اللي التقوا ببعض و صاروا أصحاب،بلع غصته و هو يسمع الموج كأنه يضرب بقلبه يتمنى انه حلم يتمنى انه تشابه اسم بس لا ذي شهدي ،و اللي ثبت أكثر اخر صوره صورتها للشباب مبتسمين بايتسامه حلوه و كاتبه (أعز اخوان)
حس بدمعه تنزل على خده،ذي وش دمعته يا حاتم؟
دمعة فرح... دمعة حزن...دمعة وهم...دمعة دمعة ،ما ادري وش هي بالضبط؟
سند نفسه عالجدار و جلس و لوهله تذكر اللي كان بينه هو و شهد تذكر سوالفها مزحها رجتها له بالتويتر  و كل شي و فجأه قطع عنه اعشان سبب سخيف و هو أن ابو شهد يصير صديق ابوحاتم و هنا عرف أن الخطأ منه و انه بعدها عنه بالقوه بعد ما القلبين تعلقوا ببعض و حبوا بعض و انفجر يبكي، و يلوم نفسه على كل شي.
حس بأحد يتقدم له و كتم شهقته و شخص بصره لما سمع صوت شهد تناديه بصوتها الهادي:حاتم.
حاتم تنهد و رفع راسه من دون كلام.
شهد انصدمت:ولد وش فيك؟
حاتم ساكت.
شهد بترجي:عشان خاطري حاتم تكلم.
حاتم ببحه:مافيه شي شهدي روحي نامي.
شهد في بالها:شهدي و بابتسامه:تخبي على شهد صديقتك افا بس.
حاتم بحزن:صدقيني ما تبين تعرفين؟
شهد ابتسمت:انت تعرف فيني عرق لقافه و لازم اعرف و الحين تكلم و لك وعد مني ما أقول لأحد.
حاتم كان يناظر فيها و ساكت.
شهد برفعة حاجب:حاتم أنا وعدتك.
حاتم تنهد:و ما تزعلين علي.
شهد بتسليك عشان تعرف السالفه:ابداً.
حاتم:اوكيه ،و ناظر فيها و وقف و وقفها معاه و شهد تناظره.
حاتم:أنا آسف.
حاتم مسك رأسها و باسها بشفايفها بحب باسها و هو راضي بكل اللي يسويه و لا همه أي أحد يشوفهم بالصدفه ،باسها و هو يتمنى يقول لها أنا حاتم اللي حبيتيه و يعترف لها بكل شي، بعد عنها و ناظر في عيونها و همس:تصبحين على خير.
شهد اللي بحلقت عيونها فيه و استسلمت له تبي تبعد عنه مو قادره حاسه بشعور انه ما تبي تبعد عنه و حست بحاتم يبعد عنها و ناظرت بعيونه و بلعت ريقها بصعوبه و انتبهت لما همس لها و بيمشي ،مسكت يده و قالت:لحظه حاتم.
حاتم ناظر فيها:امريني.
شهد بضيق:امانه وش مضايقك؟
حاتم ابتسم:صدقيني مو متضايق، بس ذي دموع فرح عشان،،،، و سكت.
شهد ساكته و تناظر له.
حاتم:تصبحين على خير و باس جبينها.
شهد همست:و انت من أهله.
و ناظرت له حتى اختفى من قدامها و تنهدت بقوه و مسكت رأسها:يا ربي وش صاير لهم اليوم؟
و تصنمت مكانها لما استوعبت وش صار قبل دقايق.
__
صباح جديد لشلتنا
نزل تركي و هو مو عارف وش بيصير و كيف بيقابلها بعد اللي صار أمس و كيف راح تكون وجهت نظرها له ،ابتسم لما شاف الكل:صباحكم جميل.
مشعل بطنازه:هلا بروميو.
تركي ابتسم:هلا بك.
وسن بفرح:الجو جميل اليوم.
تركي:جدددداً.
مشعل:تتوقع أنها بتمطر اليوم.
حاتم:لا ما اعتقد لأن النشره الجويه تقول الجو غائم اليوم.
تركي يناظر لهم واحد واحد و بتفكير:باقي أحد نايم؟
يارا: لا كلنا صحينا بدري.
وسن:اذا كان عالهبلتين فهم عالبحر ،فطروا بدري و قبلنا بعد.
يوسف باستغراب:غريبه منهم هالحركه أول مره يصير كذا.
مشعل:و ليه مكبرينها خلوهم على راحتهم اجاااازه.
يارا بضحكه:صح.
يوسف:بكيفهم والله بس احب لمتنا سوا أحس كذا كأننا عائله.
يارا:ممكن نبدأ نفطر.
وسن:ايه وش تنتظرون؟ ّو ناظرت لتركي و حاتم اللي كل واحد جالس معهم بس البال بمكان ثاني.
وسن تكلم تركي:تروك كلمت خالتي قريب.
تركي انتبه لها و تنهد:ايه كلمتها أمس و تسلم عالكل.
وسن ابتسمت:الله يسلمك.
يارا:من كثر ما تسولف عنها أبي اشوفها.
تركي ابتسم:يا ملح الكل انتي، من عيوني اخليك تشوفينها قرييب.
يارا:عادي إذا شفتها احضنها.
تركي:فداك كلها.
يارا:تسلم.
و بدأوا ياكلون و تكثر السوالف و ناس يسولفون مره و بالهم يوديهم لبعيد مره.
____
عند الصبايا
اللي مقابلين البحر و سوالف،شهد قصت  لرفيف كل كلمه و حرف صار لها مع حاتم و كان ردة فعل رفيف....
"هههههههههههه"
شهد بضيق:ايه اضحكي وش عليك نايمه في العسل.
رفيف مكمله ضحك.
شهد:خلاص رفيف يعني بدال ما تقولين لي شي ينسيني تضحكين.
رفيف تمسح دموعها:اااه ما عليش والله ،صح الموضوع ما فيه شي يضحك بس مت عالوصف ههههه.
شهد بزعل:أنا الغلطانه احكيك، و بحزن:طيب رفيف كيف بأناظر له بعد اللي صار.
رفيف رفعت اكتافها:عادي و لا كأن شي صار، و بكذب:حتى أنا بناظر لتركي و اسولف معه و لا كأن شي صار.
شهد بصراحه:عالاقل تركي احلى من السلقه اللي معك أنا ما أعرف كيف وافقتي عليه.
رفيف بغبنه:و الله مو ذا اللي وافق(تاشر على عقلها) انه ذا اللي وافق(تأشر على قلبها).
شهد:و شكل ذي (و أشرت على عيون رفيف) هي اللي ما شافت زين.
رفيف تنهدت:انفكينا منه و الحمد لله.
شهد وقفت:أقول امشي معي حسيت إني عطشت.
رفيف:أي والله، و وقفت مع شهد و مشوا و رن جوال رفيف و شافته ريان وردت:هلا بغلا الدنيا كلها.
ريان ابتسم:هلا حبيبتي كيفك؟
رفيف عقدت حواجبها:تمام الحمد لله كأن صوتك برا.
ريان:ايه انا بالقصر الحين.
رفيف لانت ملامحها:اييه العرس الليله صح.
ريان يصرف:يا شيخه كأني جاي على وجهي.
رفيف بهدوء:ما عليش ريان عشان أمي و ابوي.
ريان ابتسم: فديتهم،على فكره يسلمون عليك و مشتاقين لك.
رفيف ابتسمت:الله يسلمك و يسلمهم،امانه ريان بوسات لخدهم.
ريان:إن شاء الله، سلمي عالكل.
رفيف وصلت للشله اللي جالسين بعد الفطور برا و وسطهم عصيرات بارده و جلست:الله يسلمك حبيبي، شباب صبايا ريان يسلم عليكم.
الكل:الله يسلمك ،وصل السلام، وحشتنا يا وحش.
ريان:ترا رحلتي بعد الزواج على طول.
رفيف:اوكيه انتبه لنفسك و توصل بالسلامه.
ريان:إن شاء الله، يلا في أمان الله. و قفل.
رفيف قفلت و تنهدت.
وسن:رفيف و شهد الغداء عليكم.
ناظروا لوسن ساكتين.
وسن:لا تناظرون لي كذا.
شهد بهدوء:اسفه والله ما اعرف اطبخ.
رفيف بهدوء:وش تبون طيب.
تركي:اي شي، المهم شي يخلينا نشبع طول اليوم لين الليل عشان نتعشا خفيف.
حاتم:رفيف عادي كبسه سعوديه.
رفيف ابتسمت:ما قد ذقتها.
حاتم بحزن:لا أمنيتي اذوقها والله.
رفيف:تصوتون عالكبسه.
الكل:ايه ،أي ما عندي مشكله.
رفيف:اوكيه ،باخليكم تاكلون اصابعكم وراها.
وسن:بتجرمين فينا يعني.
حاتم:خليها تجرم فينا أهم شي ناكل، رفيف إي غرض ناقص اكتبيه من بدري عشان أوصي عليه البواب.
رفيف انتبهت:نحتاج دجاج بس فيه بطريقه الشريعه الاسلاميه.
حاتم ابتسم:ايه موجود و ترا البواب و الخادمه مسلمين فلا تخافون يعني جايبين لنا كل شي بالحلال.
رفيف وقفت:يلا شهود نروح نشوف إذا فيه شي ناقص علينا.
شهد وقفت و راحت معها من دون أي كلمه.
مشعل يناظر السما:من وين شارقه الشمس اليوم.
وسن:ليه وش صاير؟
مشعل:تسأليني عن صديقتك.
وسن:قصدك شهد.
مشعل هز راسه بايه.
وسن:الله اعلم.
حاتم ابتسم على كلامهم، و تذكر كل ما ناظرت له تنزل عينها أو تلعب بجوالها.
__
بعد الظهر
رفيف حضرت الغداء و جهزت طاوله تجنن، كانت الوانها بين السماوي و الأبيض المناديل بالملاعق بالصحون و الاكواب الزجاجيه الشفافه.
رفيف:يلا شباب،تفضلوا.
الشباب جوا كلهم و انبهروا اولاً بشكل الطاوله ثانياً بريحة الكبسه،جلسوا كلهم و رفيف راحت عنهم و فتحت الباب و ابتسمت:hi، دخلت:فيه ضيوف.
ناظروها باستغراب وش ضيوفه هالوقت؟
رفيف دخلت و دخل بعدها آدم و ليندا اللي هم البواب و الشغاله.
حاتم ابتسم:welcome.
رفيف:please,sit down.
جلسوا آدم و ليندا و بدأوا يأكلون معهم و يسولفون معهم.
الكل انبسط بتصرف رفيف و عزومتها لهم خلاهم يتعرفون عليهم و خلاهم يعرفون أن بالدين الإسلامي كلناااا وااااااحد.
بعد الغداء فيه اللي طلع يرتاح و اللي مقابل جهازه و اللي يلعب بلاي ستيشن.
يارا تذكرت:حاتم
حاتم يلعب بلاي ستيشن:نعم يارا.
يارا بدلع: انت وعدتني تركبني الجت كي.
حاتم:و أنا عند وعدي.
يارا:متى نروح طيب.
حاتم:خمس دقائق و نروح.
يوسف بحماس:حاتم ألعب زين و خل يارا.
تركي باستغراب:يارا وين البنات؟
يارا لفت له بابتسامه:رفيف برا و شهد بالمطبخ تحوس و وسن مع مشعل.
تركي وقف و راح لها و شافها جالسه عالطاولات و تناظر جوالها و باين على ملامحها أنها بتنفجر تبكي.
عند رفيف اللي جالسه من بعد الغدا برا عشان ما تشوف تركي بعد أمس، طلعت جوالها و فتحت سناب و بدأت تتفرج وقفت على سناب حلم و بدأت تشوف صور صالة الأفراح و طريقة الاستقبال و التحضير و رقص البنات و تمدح مبروك أحمد و فرح الله يهنيكم ببعض و الشي اللي صدمها أنها مصوره فيديو لزفة فرح و كان أحمد اللي يشعر فيها و يتغزل فيها و بعدها زفه لأحمد و جنبه ابوه و أبو فرح و مبتسمين ،ابتسمت بسخريه و قالت:ابتسامة شخص مزيف.
و بعدها فيديو أحمد وقف قدامها و باس جبينها حضنها و صار صوت صراخ البنات و التصفير.
و الفيديو اللي بعده كان أحمد حاضنها له و يرقص معها و بجرأه باسها بفمها.
كل ذا كان سهم و أنصاب بقلب رفيف خلاها ترمي الجوال بقوه و تقوم و تروح ناحية البحر و توقف قدامه و تصرخ بقوه و الم.
صرخت بألم و نزلت دموعها و كانت بشبه الركوع و تبكي.
تركي اللي شهد على كل شي راح لها بسرعه و بخوف:رفيف وش فيه؟
رفيف تبكي.
تركي وقفها و ناظر في عيونها:رفيف أنا اكلمك و أقول لك وش فيه؟
رفيف ببكا:الله يأخذه الكلب الله ياخذه، و تبكي.
تركي عقد حواجبه و من دون اي كلمه مسك كتوفها و هزها:رفيف مين ذا خبريني و وش سوا لك؟
رفيف صرخت بوجهه:اكرهه اكررهه.
تركي حس نفسه ضايع ما يعرف وش السالفه حضنها له عشان يهدى فيها و شد عليها و اللي ماكان متوقعه ان رفيف لفت يديها بين رقبته و رفعت رأسها لكتفه و شدته لها و تبكي.
__
عند شهد
اللي كانت بالمطبخ تقطع التشيز كيك اللي مسويته و هي مبسوطه.
أخذت الصحن اللي فيه ثلاث قطع لحاتم و يوسف و تركي.
شهد:تفضلوا و إن شاء الله يعجبكم، و ناظرت في يارا:وين تركي؟
يارا:ما ادري كان هنا و طلع.
شهد:طيب وزعي ذا و أنا باروح اعطي آدم و ليندا حصتهم.
يارا:اوكيه.
شهد بتطلع للباب بس وقفت لما سمعته يقول:شهدي.
ناظرت فيه:نعم.
حاتم:ما عليش حبيبي قفلي التكييف معك.
شهد أخذت الريموت و قفلته:كذا تمام استاذ حاتم.
حاتم ابتسم:تسلمي لي.
يوسف:لا تواخذينه تراه عشان الهزيمه متغير حاله.
شهد ابتسمت لهم و راحت و وقفت عند الزجاج المطل و انصدمت لما شافت تركي حاضن رفيف.
طلعت لهم بسرعه و شافت تركي شايلها و مخبيه رأسها في صدره.
شهد:وش فيه؟
تركي:افتحي الباب.
شهد فتحت الباب  و تركي دخل و صعد الدرج بهدوء.
شهد قفلت الباب و لحقته و قبل ما توصل شافت تركي واقف و يحاول يفتح الباب و تنهدت و راحت تفتح الباب.
تركي دخل و حطها على سريرها و جلس جنبها و رفيف سندت رأسها و تنهدت.
شهد تخصرت:وش صاير لك؟
تركي بهدوء:أجلي اسالتك لبعدين و روحي جهزي أغراضها.
شهد بققت عيونها:وين بتروح؟
تركي سكت.
رفيف ببحه:اتركيها شهد أنا باجهزها و انتي روحي كملي اغراضك.
تركي بهدوء:متأكده تبين ترجعين الليله.
رفيف هزت رأسها بايه.
تركي وقف:مثل ما تبين؟ و طلع.
شهد راحت لها:قولي وش صار؟
رفيف رجعت تبكي و شهد خافت:تركي وش مسوي لك علميني.
رفيف سكتت و مسحت دموعها:مو تركي والله مو تركي و بدأت تقص لها اللي صار.
شهد بعصبيه:الله يلعنه وش لك فيه؟ طنشي امه و أبوه خلاص الولد مع السلامه راح ليه تشغلين نفسك فيه لييييه؟ و تناظر:وين جوالك؟
رفيف بزعل:تحت.
شهد:اطلع الحين و ارجع و قسم بالله لو أرجع و انتي كذا باقي ذبحتك، و طلعت.
رفيف بضحكه:حيوانه، و قامت تجهز اغراضها.
عند شهد
اللي نزلت بسرعه و تدور مكان جوال رفيف و تفتش هنا وهنا،.سمعت صوت من وراها:تدورين على ذا.
شهد لفت له:ايه و راحت له و مدت يدها:شكــ....
قاطعها لما سحب الجوال من يدها:ما راح أعطيك الين تقولين لي اللي صاير.
شهد بعصبيه:ترا مو وقتك الحين عطني الجوال عشان اروح و اخلص على عمري.
حط الجوال بجيبه:و أنا كلمه و مو راجع عنها.
شهد تخصرت:ما ادري وش شافت فيه بس عطني الجوال يا تركي يرحم امك.
تركي بهدوء:و أنا قلت لك أبي تفسير للي صار كله.
شهد جلست:اوكيه دامك معزم،بس اتمنى ان نظرة الحب اللي انت تناظرها لها ما تتبدل بشي ثاني.
تركي عقد حواجبه:وش قصدك؟
شهد غمضت عيونها و اخذت نفس:تركي لازم تعرف هالشي، رفيف من قبل لا تجي هنا و سكتت.
تركي:كملي ليه وقفتي؟
شهد بلعت ريقها:رفيف كانت تحب ولد خالتها اللي زواجه الليله و هو حب واحده ثانيه و تزوجها و عشان كذا هي انهارت.
تركي تنهد و مسح شعره:الحمدلله دامها كذا، أنا فكري راح بعيد و بعيد مره.
شهد:بايش فكرت بالضبط؟
تركي:يعني مثل هالسوالف صور و فيديوهات و خرابيط.
شهد:لا بسم الله عليها البنت عاقله، بس اللي صار اليوم كله ضغط عليها مسكينه و إلا ترا تسب وتشتم فيه.
تركي:دام كذا خذي جوالها ،و مد لها الجوال.
شهد أخذته و ابتسمت:تسلم،تركي قول آمين.
تركي رفع حاجب:ليه؟
شهد بحلقت عيونها:استغفر الله.
تركي:أنا ما ادري بتدعين علي او لي عشان كذا اسأل.
شهد بابتسامه:الله يرزقك ما تتمنى.
تركي:اااااميييييييين.
شهد ضحكت و طلعت.
و تركي تنهد وسند رأسه عالكرسي و رفع تيشرته و شمه ،ابتسم لما عرف أن ذي ريحة عطرها ،وقف و طلع لغرفته و أخذ أيباده و كتب:رائحة الحبيب ترد الروح كما نلمس ذلك في أشعار العاشقين وقصص المحبين..
والمحب... رجلاً كان أو امرأة، يعرف رائحة محبوبه.. تلك الرائحة المميزة.. ويشمها من بعيد.. ويحس بقدوم السعادة وأجمل الوعود..
فكلُّ ما في الحبيب.. محبوب.. اسمه.. صوته.. رائحته.. محضره.. ذكره.. داره وأهله.. فالحب جوهر بسيط لا يتجزأ.. ولكنه على بساطته يملأ القلب كله..
ورائحة الحبيب تقع في القلب بسرعة البرق.. إنها ليست مجرد رائحة زكية يشمها الأنف فيرتاح، ولكنها رائحة مسحورة تنفذ إلى القلب مباشرة.. وتوحي بسعادات غامرة.. وتنشر ذكريات الحب والحبيب ومالها من مواقف ساحرة.
ابتسم و قفل أيياده و حط كل شي بشنطته و نزل لحاتم و العيال و قال انه بيمشي و قالهم بموضوع رفيف أنها تعبانه و بنروح معها.
و تفهموا العيال وضعها و قالوا حتى هم بيرجعون بالليل.
بالطريق
كان سكووت اللهم شهد تكلمت و طلبت منه يشغل المسجل و تركي يخطف لرفيف نظره يتطمن عليها، وصلهم تركي بعد ما طلب من شهد تنتبه لرفيف.
__
أحداثنا بعد شهر و نص.....عند رفيف و شهد
رفيف اللي حطت الصحن وكان فيه كوبين كابتشينو و صحن فيه بساكيت من ماركات مختلفه.
رفيف انتبهت لسرحان شهد:بنت وين اقلعتي؟
شهد تناظر الفراغ:هنا حول استراليا.
رفيف ضحكت:والله ما ادري انتي و هالراس، تفضلي، و مدت لها الكوب.
شهد أخذته و تنهدت:تسلم يدك و شربت منه:اممم جميل، أبي طريقته.
رفيف:أعطيك الطريقه بعدين، المهم وش تفكرين فيه؟
شهد:والله أكذب عليك إذا قلت كنت أفكر في وسن و وضعها هالايام.
رفيف:الحمدلله يعني مو أنا لحالي اللي ملاحظه هالشي.
شهد:الكل يقول مو انتي بس،حتى مشعل مو عارف وش مغيرها؟ و دامك فتحتي هالسالفه حتى انتي ملاحظين برودك ناحية تركي.
رفيف بحلقت بعيونها:وش جاب سيرته الحين ،بعدين تعالي تتوقعين وسن فيها بيبي.
شهد سكتت و حطت يدها تحت ذقنها:ما اعتقد لأنها قالت ما راح يكون فيه حمل إلا بعد ما تخلص دراسه.
رفيف:و مشعل وش رأيه بهالشي؟
شهد رفعت اكتافها:الله اعلم.
رفيف سرحت شوي و بحماس ضربت كتف شهد:وش رايك نكلمها الحين و نطلب منها تجهز عشان نأخذها للسوق.
شهد: فكره مو بطاله،بس مين بيودينا؟
رفيف سكتت:صح رايان عليه اختبار، سواقك طيب.
شهد:وسن ما تحب تركب معه.
رفيف وقفت:إذا صرنا هناك يحلها ألف حلال و راحت ناحية غرفة رايان و دخلت عليه استأذنت و راحت تبدل ملابسها بسرعه.
__
عند وسن
اللي كانت جالسه بغرفة النوم و تناظر بالفراغ، زفرة زفره قويه و ناظرت اللي بيدها و هي تشوفه خطين و في بالها:أنا حامل وأنا ما ابيه، بس بعض الاختبارات المنزليه كذب.
قفلت عيونها و هي تحس بدمعتها الحاره تنزل على خدها البارد، نطت لما سمعت صوت الباب و اخذت الاختبار الي بيدها و رمته بالزباله و انتوا بكرامه و اخذت حجابها و وصلت للباب:مين؟
"أنا شهد افتحي الباب"
وسن ابتسمت و فتحت الباب و دخلوا رفيف و شهد"غونايدن"
وسن بابتسامه باهته:ياهلا تو ما نور البيت.
شهد:بوجودك، يلا حبيبتي الهمه بدلي ملابسك و يلا عشان تروحين معنا السوق.
وسن بتكشيره:تكفون صبايا مالي خلق شي.
رفيف تخصرت:و مين قال ناخذ رايك، روحي بدلي و امشي معنا.
شهد:حتى مشعل كلمناه و أعطانا الامر بخطفك.
وسن ابتسمت:إذا معزمين اوكيه باروح ابدل و نمشي.
رفيف بامر:يلا بسرعه.
وسن ابتسمت و راحت تبدل ملابسها و بخلال خمس دقائق رجعت و معها الشنطه و الجوال باذنها تكلم مشعل.
طلعوا الصبايا و ركبوا مع سواق شهد من دون ما تتكلم وسن اللي كانت مكشره و تسأل مشعل عن الشخص اللي هو معه:اوكيه حبيبي، أول ما يطلع تطمني عليه،باي، و ناظرت في البنات:تخيلوا تركي بغرفة العمليات.
رفيف و شهد بنفس الهمس:وش هو؟
وسن بحزن:والله ذا اللي صار.
رفيف:وش عمليته؟
شهد بخوف:لا يكون تعرض لعصابه و طعنوه بالسكين.
وسن:لا بسم الله عليه.
رفيف ضربت كتفها:شغل افلام هو.
وسن:يقول مشعل من قبل يومين و هو موعاجبه يصرخ و يان من الم ناحية بطنه و لما شدت عليه البارح أخذوه امه و أبوه وقالوا لازم عملية زائده.
شهد:و توه دخل قبل شوي.
وسن:ايه الله يرفع عنه يا رب و يشفيه.
شهد و رفيف:آمين.
شهد تنهدت:قلنا نفرح بالويكند و طلعت لنا ذا الشغله.
وسن:الحمد لله جت على كذا مو اكبر.
شهد:اي والله الحمد لله على كل حال.
و ناظروا في رفيف اللي تناظر الشباك بضياع.
وسن طلبت من شهد أنها ما تكلمها و تتركها لحالها.
رفيف لفت بسرعه:مشعل ما قال لك متى يخلصون؟
وسن:لا والله ما قال لي اي كلمه بس اللي اعرفه ان الزائده ما تاخذ أكثر من ساعه و شوي.
رفيف:يعني بكره نروح كلنا نزوره.
شهد:إذا سمحوا أنا أول وحده تروح.
رفيف ابتسمت لها و لفت للشباك.
__
بالمستشفى
أبو تركي و امه و مشعل كانوا برا ينتظرون خروجه من العمليه و ام تركي تبكي و تدعي له يطلع ولدها بالسلامه.
مشعل بحنيه:خالتي وحدي الله،إن شاء الله ما فيه إلا العافيه كلها ساعة زمن و بيطلع شغلتها مو كايده.
أبو تركي:مشعل معه حق ثواني و هو حولنا إن شاء الله.
أم تركي ببكا:جعله بعمري أنا،فيني و لا فيه.
أبو تركي:بعدوينك إن شاء الله، و بهمس:تفكرين إني باقدر استغنا عنك يا حبي.
ام تركي مسحت دموعها:مو وقته هالكلام فيصل.
أبو تركي ابتسم:ادري والله بس اللي يسمعك الحين يقول انه ولدك مو ولدي انا بعد.
مشعل:خالتي تبين اجيب لك شي تاكلينه.
أم تركي بحزن:إذا طلع تركي بالسلامه أكلت.
أبو تركي:إن شاء الله.
مشعل ابتسم لهم و تنهد و جلس ينتظر.
__
عند ريان
اللي وصله رسالة يوسف و يخبره عن تركي،نط من السرير و طلع ليوسف بشقته و رن الجرس بازعاج.
"جااااايه"
ابتسم ريان لما عرف صوتها و فتحت الباب بقوه:نعم جارنا العزيز، أي خدمه؟
ريان ببرود:نادي لي يوسف.
يارا تناظره من فوق لتحت:أتمنى ما عاد ترجع تدق مثل قبل شوي.
ريان:اخلصي علي بسرعه.
يارا كشرت:نفسيه ،يييوسسسف كلم ناس يبونك عند الباب.
ريان كشر:قولي ريان مو ناس.
يارا أشرت على رأسها:بكيفي أقول اللي ابيه.
ريان:وش هالنفس الشينه يا كافي.
"هلا ريان،تفضل"
ريان ابتسم ليوسف:هلا بك ، و صافحه و دخل.
يوسف:سوي لنا شاهي يارا.
يارا:ممكن انت تسوي لأني باذاكر.
يوسف ناظر لها بزعل.
ريان:مو جاي اشرب شي بس صدق خبر تركي.
يوسف:ايه الخبر من مشعل.
ريان:أهم شي انه بخير.
يوسف:عملية زائده شغلتها بسيطه ان شاء الله.
ريان وقف:الله يقومه بالسلامه.
يوسف:آمين، وين رايح بدري؟
ريان ابتسم:باقي وراي مذاكره.
يوسف رد له الابتسامه:الله يوفقك، و المعذره ما ضيفناك شي.
ريان:ازعل منك والله و بذمتك انك ما تقول ليارا أي كلمه عشاني.
يوسف اتسعت ابتسامته:و انت للحين تدافع عنها.
ريان:ايه و اناكفها بعد ههههه ،يلا عن اذنك.
يوسف:الله معك، و طلع رايان.
__
بالسوق
البنات كانوا يلفون المول من أوله لاخره و آخر شي دخلوا محل أطفال.
رفيف:أنا شخص لازم يدخل هالمحل.
شهد بحب:ااااه كيوت.
وسن بضيق:بنات وش لنا هنا عشان ندخل.
رفيف بدلع:تعالي شوفي جمال الوردي.
شهد:اااه،،،يا رب ارزق كل محروم.
رفيف:آمين.
وسن بلعت ريقها و تنهدت و من دون شعور حطت يدها على بطنها و ابتسمت و اختفت ابتسامتها بسرعه و طلعت من المحل.
__
بالمستشفى
طلع تركي من غرفة العمليات و نقلوه لغرفة خاصه و هو باقي مخدر.
دخلت أمه و جلست جنبه و مسحت شعره و مشعل كان واقف من الناحيه الثانيه و يناظر له مبتسم، أما ابو تركي فكان مع الدكتور اللي كان مسؤول عن حالة تركي الصحيه.
أم تركي تهمس لمشعل:باقي نايم.
مشعل مبتسم:ايه اكيد بعد البنج.
أم تركي:الحمدلله على كل حال،و تمسك يده و تبوسه.
مشعل طلع جواله و صوره و أرسلها للقروب:شباب و صبايا ،تركي طلع من غرفة العمليات و هو بخير، نقدر نزوره بكره إن شاء الله.
و نزل جواله:خالتي أنا بامشي، امااانه إذ محتاجين شي كلميني و أنا اجيك.
أم تركي بصوت منخفض:تسلم حبيبي ما قصرت.
مشعل ابتسم:يلا فمان الله.
أم تركي:الله معك.
مشعل طلع و سلم على ابو تركي و استئذن منه و طلع.
__
عالساعه 10
كانت رفيف عالواتس و كانت تتصفح الرسائل و دخلت على اسم تركي بالخاص تبي ترسل له،،،ما تدري كيف بترسل و هي كانت طول الفتره اللي فاتت تكلمه ببرود و ما تعطيه أي اهتمام، كانت تقول بخاطرها:كل ذا اسويه عشان ما انصدم بحياتي مره ثانيه يكفي اللي صار لي من قبل.
فز قلبها لما شافته متصل و بسرعه أرسلت:تركي.
"نعم"
بلعت ريقها ،كلمه وحده خلتها تضيق من رده البارد، كانت إذا نادته يا لبيه ،امريني بس هالمره رد ناشف نننعم.
أخذت نفس:كيفك؟ و الحمدلله على سلامتك ما تشوف شر.
"الله يسلمك و الشر مايجيك"
رفيف تبي تطول معه بالكلام:كيفك الحين أحسن.
"الحمدلله أنا بخير" و طلع من الواتس.
رفيف بحلقت عيونها و كانت تبي ترسل له أنا آسفه عاللي صار و حقك علي و تشرح له بكل شي،بس!
رفيف داست على قلبها و لا عملت ذا كله و ما همها إذا كان زعلان أو ما يبي يكلمها أصلًا هذا اللي أنا ابيه و حطت جوالها و نامت ليوم جديد و طويل.
__
عند وسن
اللي كانت بالصاله و لامه نفسها و تناظر الفراغ، تنهدت و حطت يدها على بطنها و بلعت ريقها و صارت تمرر يدها على بطنها بهدوء و ابتسمت.
"وسن وش مصحيك"
وسن فزت:بسم الله من وين طلعت؟
مشعل راح و جلس جنبها:وش مضايقك حبيبي؟
وسن بحزن:و لا شي بس تعرف بدأ مواعيد الاختبارات تقرب و شايله هم.
مشعل ابتسم و حضنها:ترا سكوتي لك و على وضعك ذا بمزاجي.
وسن تنهدت:حبيبي ما فيني إلا العافيه.
مشعل مسك وجهها:اوكيه،ممكن تقومين الحين عشان ننام.
وسن بعدت يده و وقفت:و مثل كل مره أنا اسبقك، و تسارعت خطواتها للغرفه و مشى مشعل وراها و هو يقول:لا تركضين.
وسن وقفت:ليه؟
مشعل ابتسم:عشان لا يصير لك شي.
وسن ابتسمت:اوكيه.
وسن دخلت بالفراش و عدلت الساعه و انسدحت،ابتسمت لما حست بيد مشعل تلعب بشعرها.
مشعل تنهد:وسن.
وسن:همم.
مشعل:الى الحين ما تبين نجيب نونو إلا بعد الدراسه.
وسن فتحت عيونها:وش جاب هالطاري.
مشعل:اعتبريه سؤال لا أكثر.
وسن سكتت فتره و بهدوء:إرادة الله فوق كل إراده،إذا أعطانا الحين أو بكره أو بعد سنه فأنا ما راح ازعل ابد بالعكس أحمده و أشكره على كل شي.
مشعل ابتسم و باس رأسها:تصبحين على خير.
وسن:و انت من أهله حبيبي.
__
صباح جديد،،،بالمستشفى
أم تركي:حبيبي ما يصير ما تاكل.
تركي بتكشيره:مالي نفس والله.
أبو تركي بحنيه:بس شوي.
تركي بزعل:قلت لكم ما ابي،و بعدين انا مو صغير بأكل بنفسي.
أم تركي تركت كل شي بيدها و تناظر فيه.
أبو تركي:الحين حبيبي وراك مكشر و ضايق خلقك.
تركي بنبره صوت عاليه:أبي اطلع البيت.
أبو تركي:تطلع و انت باقي تعبان يعني صحتك ما تهمك.
تركي بانفعال:يبه انت تعرف أكره المستشفيات و لو بيدي كان من بعد العمليه و أنا بالبيت.
أبو تركي أشر على عيونه:من عيوني ما يصير خاطرك إلا طيب يابو فيصل.
تركي ابتسم و لام نفسه وش دخل أبوه و امه يحط حرّته فيهم و هم ما يقصرون معه بكل شي،،،ناظر في امه:و انتي يا روح تركي.
أم تركي بزعل:وش فيني؟
تركي:ترا ادلع عليك، عادي يعني إذا ممكن تاكليني تراني بزرك الوحيد.
أم تركي بفرح:فديته هالبزر، وبدأت تأكله بنفسها.
__
بعد ثلاثه أيام....عند رفيف
اللي غيرت لبسها و شكلها أكثر من مره و متردده أنها تروح تزوره بس كلمة ريان لها غيرت كل شي الا وهي (زيارة المريض واجب) ما قدرت ترفض طلب ريان، قررت أنها تلبس بلوزه نص كم بنفسجي و بنطلون ابيض مع شوز ابيض و بالطو موف طويل وشعرها خلته منثور وجزء منه على جنب و حطت مسكره و قلوس و آخر شي حطت مسك و اخذت شنطتها الظهر و طلعت المستشفى من دون ريان لأنه كلمها و قال يتأخر شوي لأنه حب يراجع مع أحد الأساتذة مادة بيختبرها و طلب منها تروح قبله.
__
عند تركي
اللي زاروه أصحابه و صارت الغرفه مليانه ورد من ألوان و اشكال و روائح جميله، و الحلو هو صداقة هالشله مع بعض اللي شافوا انهم أكثر من أخوه بعد ما تركوا اهاليهم و عاشوا بالغربه.
أبو تركي باعجاب: والله يا تركي اصحابك و النعم فيهم.
الكل:ما عليك زود، تسلم يا عم.
تركي بفخر:ذولا اللي يومي ما يكتمل إلا فيهم.
أم تركي:والله ما الومك لو ما تبي ترجع البيت.
تركي انتبه ليارا اللي تناظر امه بابتسامه و تذكر أنها يتيمة أم، ابتسم:ماما شوفي أحسن واحد فيهم كلهم يارا و بس.
أم تركي بدلع:يا حلاتها.
يارا ابتسمت بخجل.
أبو تركي أشر على شهد:إذا انتي بنت حمد.
شهد ابتسمت:ايه أنا شهد.
أبو تركي كمل:مشعل و زوجته من العائله طبعاً وحاتم سبق و تعرفنا عليه وأنت أكيد يوسف.
يوسف بابتسامة:اصير لك اللي تبي.
أبو تركي:يعني غلط.
يوسف:لا صح أنا يوسف.
أبو تركي ابتسم:الله يحفظكم.
__
بجهه ثانيه من المستشفى
كانت تمشي و بيدها بوكس ورد ولونه مثل ملابسها و كانت ترن على جوال شهد و العيال و ما كان فيه رد، استسلمت و راحت للرسيبشن و طلبت رقم غرفة تركي و توجهت للغرفه و هي خايفه من اللقاء بعد محادثتها أمس.
__
غرفة تركي
الى كانت السوالف ضاجه بالغرفه و فجأه هدت بالهمس من شخص للثاني
شهد تهمس لوسن:رفيف بتجي؟
وسن رفعت اكتافها:ما أدري ما كلمتها؟
شهد تنهدت:أنا اتمنى لو تجي وتعمل الواجب هنا و لا تروح البيت إذا ما تبي تشوفه.
وسن:نكلمها بعدين و نقول لها.
أبو تركي همس لتركي:أي وحده من هالبنات اللي أخذت عقلك؟
تركي بحلق عيونه:وقته الحين يا ابوي.
أبو تركي:عادي أبي اشوف ذوقك.
تركي ابتسم:ما هم من اللي بالغرفه احتمال ما بتجي.
أبو تركي كشر:أبي اشوفها قبل أمك.
تركي ضحك و صرخ بخفه من الم العمليه.
ابوتركي بخوف: ارتاح حبيبي.
انفتح الباب بقوه و فزوا كلهم على فتحة الباب.
رفيف وبصوت كله لوم وعصبيه:لااا بعد سولفوا و حطوا رجل على رجل و أنا اللي صار لي ساعه أدق على جوالاتكم و ما فيه أحد معطيني وجه و لااا بعد تسمون نفسكم أصحاب.
يناظرونها بسكوت.
رفيف قفلت الباب و بعصبيه:المشكله جايه لوحدي لو ريان معي ما سألت عنكم؟
سكتت بفهاوه لما سمعت صوت يقول لها:تعالي و أنا أوريك فيهم.
رفيف غطت فمها.
و الشله ضحكوا عليها.
رفيف ما شافت اللي كانوا خلف الحاجز و اللي هم ابو تركي و ام تركي و تركي.
شهد بضحكه:تعالي وش فيك مسمره مكانك تعالي.
رفيف تنهدت و قربت بهدوء و انصعقت لما شافت أم تركي واقفه و مبتسمه و بصوت كله حب رحبت فيها أم تركي و حضنتها:هلا و غلا حبيبتي.
رفيف بخجل:هلا بك خالتي.
أبو تركي من وراها:تعالى يا ابوي حياك، و بمزح:تعالي و خبريني من اللي مزعلك عشان يأخذ جزاته.
رفيف ناظرت لهم:أعلم عليكم.
أبو تركي ضحك عليهم.
شهد الي كانت جنب تركي وقفت:تعالي رفيف و فسحت لها المكان وتورطت لأنها ما حصلت غير جنب حاتم اللي ابتسم لها.
رفيف قربت من تركي و هي مبتسمه و مدت يدها تصافحه:الحمدلله عالسلامه، و هذا أول مره رفيف تصافح فيها رجال.
تركي مد يده ببرود:الله يسلمك.
رفيف حطت هديتها جنبه عالسرير.
أم تركي:ليه تعبتي نفسك حبيبي.
رفيف ابتسمت لها:و لو خالتي ما فيه تعب و ناظرت له:يستاهل تركي و بعدين كذا تخوفنا عليك.
تركي بلع ريقه و بلعثمه: و ،،، أنا وش يعرفني يعني إني باتعب.
يوسف:أهم شي انك قمت لنا بالسلامه.
يارا بابتسامه:هذا اللي يهم، و انتبهت أن صوتها توه يطلع و غطت فمها.
أم تركي:فديتها اللي خايفه على تركي.
يارا غطت وجهها من الخجل ورا يوسف.
تركي بضحكه:حرام عليك يمه احرجتيها.
رفيف ناظرت في شهد اللي جالسه جنب حاتم و ما تعرف ليه تضايقت من كلام أم تركي ليارا.
وسن وقفت و بهمس:مشعل أنا باروح للتواليت.
مشعل:اجي معك.
وسن باستغراب:وش يجيبك؟
مشعل ابتسم:قصدي عشان لاتتوهين بس.
وسن:لا أن شاء الله، باتصل فيك إذا ما قدرت ارجع.
مشعل:اوكيه،انتبهي لنفسك و لا تركضين.
وسن:تامر من عيوني، و طلعت بصمت.
توجهت لتحت و راحت للرسيبشن و طلبت بالانجليزي:أريد أن أقوم بعمل اختبار حمل.
الموظف:اذهبي لآخر الرواق و الغرفه التي تأتي على يسارك هناك تقومي بعمل الاختبار.
وسن:شكرا جزيلاً و راحت وسن و دخلت الغرفه بعد ما استئذنت و طلبت منهم اللي تبغا و بسرعه عملوا لها تحاليل وطلبوا منها خمس دقائق انتظار.
و بعد ما دقت ساعة الصفر استلمت وسن النتيجه و قلبها يدق ألف و فتحت النتيجه و انصدمت.
وسن فتحت الظرف و انصدمت بمشعل اللي طلع و كأنه يدور عليها خبت الظرف بسرعه بشنطتها و راحت له.
مشعل انتبه لها:هلا وينك حبيبي؟
وسن بكذب:يالله لقيت الحمام.
مشعل:يلا نرجع.
وسن:مشعل خلاص خلنا نمشي عشان تركي يرتاح.
مشعل تنهد:والله اهله اللي لازم يرتاحون.
وسن:قصدك تبي تجلس معه؟
مشعل:لا بس باكلم حاتم و اشوف له.
وسن ابتسمت:اكيد ما بيرفض.
مشعل يناظر جواله:هذا الولد احترمه كثيير.
وسن ابتسمت و نزلت رأسها و مسكت شنطتها بقوه.
__
بغرفة تركي
رفيف عشان تمشي الوقت صارت تسولف مع شهد و كلما ناظرت في تركي كان هو كمان يشغل نفسه و يسولف مع العيال.
يوسف وقف:يلا عن اذنكم.
أم تركي:وين رايحين حبايبي؟
يوسف:خلاص خالتي بنمشي الامتحانات عالابواب و يارا كمان لازم تذاكر.
أم تركي:الله يوفقكم حبيبي وشدوا حيلكم.
يوسف:الله يسمع منك ،يلا تروك قدامك العافيه.
تركي بابتسامة:الله يعافيك يا رب.
يارا بدلع:باي خالتي ،باي تركي.
تركي رفع يده:باي يا عسل.
رفيف تناظر شهد و ترفع حواجبها فوق.
شهد اللي انتبهت استغربت و بصوت مسموع:وش فيك مع ذا النظره.
رفيف سبت شهد في نفسها و بابتسامه:اي نظره؟
أبو تركي:شي مضايقك يا ابوي.
رفيف لفت له:لا ما فيه شي ياعم، و ناظرت في تركي و ابتسمت.
تركي ببرود:ريان للحين ما وصل.
رفيف ناظرت ساعتها:قال نص ساعه و بيوصل.
حاتم دخل عليهم:عمي و خالتي، أنا باروح أوصل شهد للبيت و أروح بيتي و أخذ ملابس و الليله باكون مرافق لتركي و من دون احتجاج.
شهد:أي والله حاتم من أمس خالتي و عمي ما ناموا.
أم تركي برفض:ما أحد بيجلس مع ولدي غيري.
أبو تركي:أنا أقول دام حاتم الله يجزاه خير تطوع نروح احنا نرتاح و بكره نجي نأخذه.
تركي:عشان خاطري يمه روحي ارتاحي و أنا الحمدلله بخير ما فيني إلا العافيه و حاتم بيكون جنبي.
أم تركي تنهدت:طيب وش لون قلبي يطاوعني اتركك.
شهد:بسيطه خالتي ،احلمي كأن الليله زواجه و ينتهي الموضوع.
ضحكوا على تعليقها.
أم تركي:يييووووه كان ودي لو الليله زواجه و ناظرت في رفيف:و الله يوم المنى و السعد اشوف عروسته جنبه.
رفيف بابتسامه تسليكيه:إن شاء الله تفرحين فيه قريب.
ام تركي:أن شاء الله و نفرح فيك و في البنات.
أبو تركي:امين بس بعد ما يأخذون الماجستير.
رفيف و كانها حصلت مخرج:فديتك يا عمي هذا اللي فاهمنا صح.
شهد:إذا باتزوج بأخذ واحد متفهم مثلك.
أم تركي بدلع:هو واحد و نادر و ما فيه مثله.
شهد:يا لبيه بس ،غارت خالتي.
حاتم:يلا شهدي تأخرنا.
تركي ببراءه:شهد ترا أنا أشبه ابوي.
شهد:انت سكر بس مشكلة انك تشتغل مع ابوي و بتطفش مني من كثر ما يسألك عني و بعدين انت تستاهل اللي تحبك و تغار عليك مو واحده بارده.
و قالت اخر كلمه بقصد.
تركي ابتسم:هذي اللي فاهمتني.
حاتم يسحبها:يلا بلا كثرة حكي اخرتينا.
شهد:باي تروك، باي ريوفي.
رفيف اعطتها نظرة الوعد بعدين.
وشهد طلعت تضحك.
أم تركي و أبو تركي جهزوا اغراضهم و تأكدوا من كل شي و طلعوا بعد ما سلموا على رفيف و تطمنوا على تركي.
فجأه رفيف استوعبت إنها لحالها مع تركي وقفت و راحت تناظر المنظر من الشباك و تأمل أنها تشوف رايان جاي ناحيتهم ،لفت تشوف لتركي و كان يلعب بالورد اللي جابته و مبتسم تبي تكسر الصمت راحت ناحيته و جلست جنبه عالسرير و تنهدت:اوكيه مستر تركي، حكيني كيف تحس نفسك الحين؟
تركي بابتسامة سخريه:ليه يهمك؟
رفيف بزعل:اكيد يهمني مو أصحاب.
تركي يناظر للورد و يلعب فيها.
رفيف بصراحه:تركي الأيام اللي راحت صدي لك لأني كنت خجلانه من نفسي أناظر لك بعد اللي صار بالشاليه.
تركي بزعل:وجعتني كثير طريقتك، حتى العيال كنتي تكلمينهم عاااادي و أنا ببرود كأنهم هم اللي يعرفون عنك كل شي و مهتمين فيك مو أنا اللي تركت كل شي وراي و وقفت معك، إذا تفكرين أن حضنك سبب لي ازعاج بالنسبه لي كان اجمل شي.
رفيف بلعت ريقها:تركي أنا قلت لك من قبل إني،،،،، و سكتت.
تركي مسك يدها:حكيني عن الأمك اللي قبل قولي لي كل شي انتي تهميني.
رفيف نزلت دموعها:ما أبي انبش الماضي تبعي يا تركي أنا ما صدقت أقفله.
تركي ضغط على يدها:إذا كان حبك لولد خالتك فانسيه و عيشي لحياتك رفيف.
رفيف ببكا:تألمت حيل منه، تألمت و تعذبت معه تركي كان مرتدي قناع مزيف ،صدي لك و لغيره بسببه هو اللي خلاني أعدم الثقه بجنس آدم نهائي خلاهم بالنسبه لي أعداء، عشان كذا أنا اقول لك انت تستاهل أحسن مني.
تركي بخوف:امانه رفيف خبريني وش سوا فيك و خلاك تصدين عن الكل وأنا واحد منهم.
رفيف ناظرت فيه بدموع و نزلت رأسها:خايفه هالشي ينفرك مني و تكرهني.
تركي دق قلبه:ليه؟ و سكت مد يده و رفع رأسها: حبيبي قولي و ريحي قلبي.
رفيف مسحت دموعها:أصلًا حتى لو ما تكلمت الحين بتعرف بعدين مني أو من شخص ثاني، أخذت نفس:تركي أنا مطــ....
قاطعها صوت دق الباب و سكتت ،وقفت و راحت تفتح الباب و كان ريان اللي واقف بابتسامه.
رفيف:هلا.
ريان اختفت ابتسامته:وش فيك؟
رفيف:و لا شي ادخل.
ريان دخل و قفل الباب و راح لتركي اللي كان يناظر ناحية الباب و ابتسم لما شاف ريان.
ريان:سلااامات حبيب قلبي.
تركي ضحك بخفه:الله يسلمك
جلس جنبه و سأل عن حاله و رفيف واقفه ورا الحاجز تبكي بصمت، تعبت من كثر ما تخبي عليه إذا دار بينهم حديث لازم أنها تضعف و تبكي كرهت مشاعرها و حزنها و ماضيها و كل شي حولها.