انا من احببتُكِ اولا

~ البارت السادس والعشرون ~

مـِنا وهيچي بعد ..
تلگاني مـِتباعد
وحتى لو تحبني بعد
حُب من طرف واحد
خاف أنتَ بارد چنت
اني أخس منك صِرت
يحسدني گام الثَلج
گد ما صرت بارِد .

هند : وين رايحه ؟

وتين : اريد اطلع اغسل هذني خلي اشغل المي

دُرة : خلي يولن هسه انتي توازيتي عليهن

وتين : ما احب هيج دشوفي واكع عليهن زاهي وزيت صايرات مطكعات هسه ؏ السريع اغسلهن وادخل وباجر الصبح عود دخلوهم

عاندتنا وطلعت واحنا ابويه محذرنا من يوم الي دكو بي بيتنا ما نطلع بره ابد خاف كلشي يصير بس ما اعرف شلون غفلنا عن وتين وخليناها تطلع وهي هم يمكن نست

المهم كملنا تنظيف المطبخ ودخلنا كعدنا بغرفة امي وابويه جان كاعد بالاستقبال هو ورضا وإبراهيم واجو يمه عمو صالح وسيف ومنذر يحجون بسالفة سَيف ووتين وإبراهيم

فجأة سمعنا صوت رمي بالضبط نفس هذاك اليوم عبالك البيت وكع ؏ راسنا من قوة الصوت كعدنا كلنا بزاوية الغرفة وابوية اجه يركض علينا واخواني الولد هم ، ما جنه منتبهين ابد لـ وتين كل ظنه هي دخلت ورانا للبيت بس ابويه سرعان ما لاحظ عدم وجودها

عاط بينا .. وتين وين اختكم وين ؟؟؟؟

حجيت بتعلثم : ب ببابا وتين طلعت ..

بعدني ممكمله كلامي ونسمع سَيف عاط بعلو صوته

سَيف : لج وتيييين باعيليي فتححي عييينج

طلع يركض وكلنا وراه طلعنا من باب المطبخ ونشوفها واكعه بحضن سَيف وسابحه بدمها

فائز : كرررررررررريم دك دكته الناقصه اليوم انعل ابهاااتكم

انخبص البيت خبص تخبلنا واحنا نشوف وتين بهالمنظر هذا بس سَيف ورضا ما انطو مجال بسرعه اخذوها وطلعو بيها وراح وياهم عقيل بس ابويه وعمو صالح ومنذر طلعوهم حجو وياهم ما اعرف شنو واحنا كاعدين جوه ممستوعبين الي صار

امي وأم عقيل لبسو عبيهم وطلعو يردون يرحون ورا وتين شافهم ابويه أخذهم وراح واحنا بقو يمنا عمو صالح وإبراهيم كعدو بالاستقبال ما اعرف شنو يحجون

كاعدين وميتين خوف والرجفه بينا منعرف اي شي عنها ونتصل بيهم محد يرد تخبلنا بالزايد حتى ما نكدر نروح ونسئلهم شنو صار بره وليش رجعو دكو بيتنا مره ثانيه كل الي جان شاغل بالنا وتين

بـ 2 بالليل تقريباً اجو ابويه وياه امي مهدود حيلهم
كمنا عليهم نركض نريد نعرف شصار

هُدى : هَـا ماما شلون وتين ليش نتصل ومحد يرد

الأم : تصوبت بچتفها

هند : وهسه شلونها

الأم : بعدها ولج ما صحت