شوق فيصل

١٢ - فاصِل ..

{ أبتديتك حب مايعرف غياب ،

وانتهيتك جرح ما يعرف يطيب 🤍 ..

؛

تزامناً مع الأحداث الأخيره بمكان ثاني
الساعه ٤:١٠ م

طلع سند من غرفته وهو مكشر وواضح اخلاقه صفر ، مشى للصاله وشاف السفره مفروشه عالأرض والغدا جاهز .. سالم وفيصل الصغير متربعين وياكلون ، رفع عينه لما شاف أمه تطلع من المطبخ ومعها صحن سلطه ونطق وهو يحك بطنه : وين أبوي ما يبي ؟

قربت حوريه الي كان واضح عليها انها منزعجه وجلست معهم عالأرض وقالت : لا ما يبي .. يالله اجلس وكل لقمتك
سند طالع بالسفره وقال باستغراب : مسويه برياني وما يبي ؟ ليش الشمس شارقه من المغرب ؟!!

حوريه رفعت عينها لسند وقالت بزعل : يقول ما عاد تنفع له هالأكلات
زفر سند وجلس وهو يقول : لا عاد تجوعينا وتخلينا ننتظره اجل ، مره ثانيه ارفعي له بلحاله

سالم عزز : ترا يحق له يهتم بصحته شوف جسمه شلون صار أرتب
حوريه وهي تحط رز بصحن فيصل نطقت بغيره : وذا الي حارق قلبي يا خوفي شايف له شوفه وهي الي مغيرته علينا
خز سند سالم : انت دامك ما تعرف تتكلم ليتك تسكت

قلب سالم عينه وكملوا أكلهم بهدوء وبعد دقايق طلع جمعان من غرفة النوم وهم متجهم وكلهم طالعوا فيه باستغراب لأنه باقي ببدلة الدوام وظلوا ساكتين لين نطق فيصل وهو يضحك ببراءه : ههههه انا الي حطيت لك النمله تحت المخده انننن

تقدم جمعان وحاس شعر فيصل وهو يقول : ما تتوب انت عن حركاتك ؟
فيصل بحماس : هذا برانك جديد تعلمته في الأمس !

جمعان عقد جبينه وطالع بسالم : وش برنكه ذا بعد ؟؟
سالم بتوضيح : يقصد مقلب نفس مقاطع اليوتيوب يعني

جمعان همهم وحول نظرته لسند وبعدها استقر تركيزه على حوريه ونطق بدون مقدمات : طيب ترا انا بطلع صار عندنا شغل اضافي بالشركه واتصلوا فيني .. يمكن ما اجي الا متأخر فلا تحسبيني معكم بالعشا

حوريه نزلت ملعقتها ببطء وقالت : وش هالشغل الي كل ما عجزوا عنه ما لقوا غيرك وانت كله طاق الصدر لهم ؟
جمعان رفع حاجب : طاق الصدر ؟ يعني انا بدور الغثا لنفسي والا وش ؟ ترا هذا رزقك ورزق عيالك اذا انتي ناسيه

طالعت حوريه بسند وقامت لغرفتها بعد ما قالت : الحمدلله
نفض سند الأكل من يده وقال وهو يلتفت على ابوه ويناظره بنظراته الحاده : ترا ما قالت لك شيء غلط ! وش الشغل الي يطلع لك فجأه والشركه اصلاً تسكر الساعه ٤ ؟!

جمعان رمق سند بنظره وقال : تحقق معي انت؟ مليون مره اقول خلك بنفسك ولا تتدخل بيني وبين أمك
مشى جمعان وطلع برا الشقه بمزاج متعكر بينما ظل سند ساكت لفتره طويله وهو يهز رجله وبعدها طالع بسالم وقال فجأه : وين شقة خويك الي قلت لي عليها ؟