شوق فيصل

٦ - فيصل ..

{ ويرهقني اني مليء ..

بما لا استطيع الإعتـراف به .. ! 🤍

؛

قبل ما يقارب ٢٢ سنه ..

لابس بدلة تابعه لأحد المدارس الأهليه وفوقها جاكيت قطني خفيف ، شعر اسود مصفف بشكل كلاسيكي مرتب بملامح تتسم بدقة تفاصيلها وقامه اكثر من مثاليه بالنسبه لشخص بعمر الـ١٣ سنه ، تحيط فيه هاله مفعمه بالهدوء وملامح تعطي انطباع سريع بأنها تنتمي لشخص ذكي ورزين

رن جرس الفسحه وتسابقوا الطلاب برى المكان وهم يتمتمون ويتهامسون مع بعضهم بينما هو ظل جالس ورى طاولته بدون ما يتحرك او يفكر باغتنام فرصه للخروج من بين جدارن الفصل .. مركز نظره بأبعد نقطه بالجدار الي قدامه بمحاولة انه يشتت نفسه ويتجاهل الأفكار المزعجه الي قاعده تدور براسه بهاللحظه

بمجرد انه سمع صوت باب الصف يتسكر والهدوء يعم بالمكان رفع يده اليمين ومررها على طرف الطاوله قدامه وبدأ يدقدق عليها بشكل خفيف وعينه تتبع رجفة اصابعه .. وقفت حركته واخذ نفس خفيف رفع بعده يده الثانيه وكرر نفس الحركه وهالمره صاحب هالشيء صوت تمتمه خفيف بدء يطلع بشكل متذبذب من بين شفايفه ، وقفت حركة يده من جديد وتنهد بقوه بسبب فشله بالي قاعد يسويه

ضغط على شفته ونفض راسه بقوه رافض هالضعف ورجع يدقدق بأصابعه من جديد وهو يحاول يركز باللي يسويه بشكل اكبر لين بدى التشويش الي براسه يروح وبدت رجفة اصابعه تتلاشى وصارت حركتها اكثر انسيابيه وثانية بعد الثانية رجع يحرك شفايفه وبدء يتضح صوت اللحن الموسيقي من بين شفايفه بدال ذيك التمتمه وهنا بدأ يحس بالسكينه

غمض عينه وترك نفسه يتعمق ويغرق في عالم ثاني انتشله من سوداوية افكاره والتششت الي استحوذ عليه من دقايق لمكان أكثر هدوء وصفو وراحة .. استمر يعزف بأطراف اصابعه على مفاتيح البيانو الخيالي والمتمثل بحد الطاوله لعدة دقايق لحد ما انتهت المعزوفه الوهميه الي براسه ووقتها وقف حركته وهو يحس بإجهاد بسيط ، نزل راسه عالطاوله وغفى بهدوء بعد ثواني معدوده ..

ما حس بنفسه الا لما شعر بيدين تمسح على شعره وهنا رجع لأرض الواقع ، فز وكان على وشك انه يبعدها عنه بعدائيه لولا انه سمع الضحكة المألوفه على مسامعه وهنا تراجع عن حركته ووجه نظراته المنزعجه للشخص الي كان واقف قدامه والي كان لابس نفس الزي ، بشعر بني كثيف وجسم مستصح وملامح بشوشه رغم حدتها ، مرفع اكمامه وفاتح ازرته العلويه كإشارة للتمرد

لؤي : فصول انت نايم هنا وانا ادورك يالخاين ؟ ليش ما قلت لي اجي انام معك ؟
تعدل بجلسته وهو يقول بشيء من الانزعاج : غفيت بدون ما احس
لؤي وهو يسحب كرسي ويجلس فيه بشكل معاكس ومقابل للي قدامه : طيب من اول رن الجرس ليش ما طلعت جهة الكفتريا ؟