شوق فيصل

٧ - بعثرة ..

{ أحب جُذورك ..

لا الزهور التي يراها الجميع 🤍

؛

بعد مرور ثلاث ايام من الأحداث السابقه ..

كان جالس بالشرفه المطله على بهو الفندق يكلم بدر والسيجارة بفمه ، نطق بصوت مبحوح بشده : والله فيصل باقي نايم 
بدر باستغراب : يعني ما راح تطلعون معنا اليوم بعد ؟
نزل عينه للآثار الي بمعصمه وهمهم باختصار بدون ما يعطي أي تفاصيل : لا روحوا انتوا احنا بنقعد هاليومين بالفندق

زعل بدر وقال وهو يتحلطم : وش هالنذاله يعني يوم جينا حلت لكم القعده والا خذت مقلب بنفسك وبدينا بحركات العرسان من الحين ؟
التفت سند وتكى بجسمه على حافة البلكونه بحيث اعطى ظهره للشارع وهو يرفع راسه وينفث الدخان من فمه لفوق وابتسم : حركات العرسان بعيده عن شواربك يا ورع وعلى فكره تراني ما نسيت ان هذي ثاني مره تخطط معهم من وراي بدون علمي

بدر قلب عيونه : تسمى مفاجأه إلى متى وانا اعلم فيك ؟ بعدين لا تسوي فيها يعنني مب عاجبك ان الرجال ميت عليك لذي الدرجه
رمى سيجارته بالارض ودعس عليها قبل ما يدخل ويسكر باب البلكونه وراه وهو يقول بزعاطه : مو شغلك .. اترك عنك اللقافه وروح استمتع انت والداشر حقك على انفراد دام عندكم فرصه ترى مو كل يوم بيسفرك هنا

بدر : ما يهمني المكان وبستمتع معه وين ما كان لأني مو ناكر جميل ولا متغلي مثل بعض الناس
سند فهم النغزه وقال : طيب شرايك تضف وجهك ؟
ضحك بدر وقال : ههههاي طيب بضف بس لا تنسى المباراة بكرا مو تسحب بعد ترى ما صدقنا نحصل تذاكر

جلس سند على كنب الصاله وهو يقول باستغراب : أي مباراة انت ووجهك ؟
بدر سكت شوي وبعدها قال بشك وهو يحك شعره : هاه ؟ وش .. ما عطاك فيصل شيء أمس لما رجعتوا الفندق ؟
سند عقد جبينه وهو يقول بشك : لا .. شيء مثل وش ؟!

سكت بدر مره ثانيه وبعدها قال بدراما : اااخ يا ملاعين منتوا كفوا هدايا شكلكم بديتوا الفراش على هديتنا !! هات التذاكر بس برجع ابيعها بالسوق السوداء واخذ فلوسها اصرف لي !
سند : وش تذاكره يا كلب ؟! بتختصر وتقول والا اروح لفيصل اخليه يخر لي كل شيء الحين ؟

بدر بانفعال : يالبزر المباراة الي صجيتنا عليها شرينا لك تذاكرها عشان نسكتك بس ماش المحنه عندكم بالمرتبه الأولى منتوا لم الهدايا هالوقت !
سند تغيرت تعابير وجهه لملامح فرح ورد بصدمه : احلفففف ؟! قدرت تحصل تذاكر ؟!!!

بدر توه استوعب انه خرب المفاجأه وقال بتمتمه : اييه المفروض مفاجأه بس .. اوكي هذانا قلنا لك
سند صفر وقال بحماس : صدق انك عبيط لكن علي الحرام انك كفووو واطلق من يفاجيء !! ايه ذا الشيء الي يبرد الخاطر مو زواج وخرابيط مال امها داعي !