ကံကြမ္မာဖန်တတ်ပါ့လေ Book 2 [mm trans]

အခန်း(၃၉၄)

အခန်း (၃၉၄) : ရှုပ်ထွေးပွေလီ လေဟာနယ် ... ထာဝရ ဇာမဏီအရှင်မ

အာကာပြင်ကို ဖြတ်သန်းကာ သွားလာပြီးနောက် သူတို့နှစ်ယောက်က တခြားသော အံ့ဖွယ်မိုးကောင်းကင် အကြီးအကဲနှင့် တပည့်များအား အလျင်အမြန် တွေ့ဆုံလိုက်သည်။

အံ့ဖွယ်မိုးကောင်းကင် ပါရမီရှင်များပင် ရှိနေရုံသာမက တခြားအထွတ်အမြတ်မြေများမှ ဂိုဏ်းချုပ်များနှင့် ပင်မတပည့်များလည်း ထိုနေရာတွင် ရှိနေခဲ့သည်။

သူတို့ ရုတ်တရက် အပြင်သို့ ပို့ခံလိုက်ရသည့်အချိန်တွင် အစက သူတို့က ဂူဗိမာန်၏ စင်္ကြန်ပေါ်တွင် လေ့ကျင့်နေကြခြင်း ဖြစ်သည်။

ရွှေကျီး အငြိုးကြီးဝိညာဉ်ကိုးကောင်ကို ပြန်လည်ဝင်စားအောင် လုပ်ပြီးနောက် ရွှေကျီးနတ်ဧကရာဇ်၏ ရှည်ကြာစွာ တန်ဖိုးထားခဲ့ရသော ဆန္ဒတစ်ခုလည်း ပြည့်ဝသွားသည့်အတွက် ရှန်ထျန်းမှလွဲပြီး တခြားသော ကျင့်ကြံသူများကို သူ၏ ဂူဗိမာန်အပြင်ဘက်သို့ ပို့လိုက်သည်။

ထိုအခိုက်အတန့်မှစတင်ပြီး ဂူဗိမာန်က ရှန်ထျန်း၏ တစ်ဦးတည်းပိုင်ဆိုင်မှုဟု သတ်မှတ်ခံလိုက်ရသည်။

သူတို့ ထွက်သွားပြီး သိပ်မကြာခင်မှာပင် ဂူဗိမာန်က အထွတ်အထိပ်အဆင့် ဓားအရှိန်အဝါကြောင့် နှစ်ခြမ်းကွဲသွားကာ လုံးဝ ပြိုလဲသွားသည်။

ထိုအရာက ဂိုဏ်းချုပ်များစွာကို စိတ်ရှုပ်ထွေးပြီး နောင်တရစေသည်။ သို့သော် တစ်ချိန်တည်းမှာပဲ သူတို့က တိတ်တဆိတ် ကြောက်ရွံ့နေခဲ့ကြသည်။ သူတို့သာ အထဲမှာနေပါက သေသွားနိုင်သည်။ ထို့အပြင် ဂူဗိမာန်၏ ပြိုလဲမှုနှင့် ဖန်တီးထားသော ရှုပ်ထွေးသည့် အာကာပြင်ထဲတွင် ဝိဇ္ဇာတစ်ပါးပင် ကိုယ့်ကိုယ်ကို ကာကွယ်နိုင်မည်ဟု အာမမခံရဲပေ။

အတိဒုက္ခလွန် ဖြတ်ကျော်ခြင်း အဆင့်အောက်ရှိ ကျင့်ကြံသူများအနေဖြင့် ရှင်သန်နိုင်စွမ်း မရှိပေ။

" အံ့ဖွယ်မိုးကောင်းကင် ဂိုဏ်းချုပ်နဲ့ ကြာပြာကောင်းကင်အသျှင်တို့ ထွက်လာပြီ"