[ Unicode ]
နှစ်လကျော်သုံးလနီးပါး အချိန်ပေးလိုက်ရသည့်
သုတေသနစီမံကိန်းကြီး အောင်မြင်စွာပြီးစီးကြောင်း အထိမ်းအမှတ်အဖြစ် ပရောဂျက်တွင်ပါဝင်ခဲ့ကြသော ဂျပန်ကိုယ်စားလှယ်အဖွဲ့နှင့်
ဟန်နွန်းမှဝန်ထမ်းများ၏ မိတ်ဆုံစားပွဲကို ဟော်တယ်တစ်ခု၌ ကျင်းပဖြစ်သည် ။
ဤသုတေသနအပေါ် စိတ်ရောလူပါနှစ်မြုပ်ထားသည့် သုံးလတာအချိန်ကာလဟာ လျင်လျင်မြန်မြန်ပင် ကုန်ဆုံးသွားခဲ့၏ ။
ယခုအချိန်မှာ သူကျေးဇူးအတင်ချင်ဆုံးဟာ သူ့အဖွဲ့သားတွေကိုသာ ။ သုံးလတာကာလအတွင်း သူ့ဦးဆောင်မှုနောက် မငြီးမငြူလိုက်၍ ဟိန်းဟောက်ခြင်းအမှုပြုမိခဲ့လျှင်တောင် အပြုံးတစ်ချက်မပျက် ကြိုးစားပေးခဲ့ကြသည် ။
သုတေသနကို တစ်ချက်ကလေးတောင် အတိမ်းအစောင်းမခံနိုင်သူမို့ သူ့တိကျပြတ်သားခြင်းများအောက်မှာ အမှားအယွင်းနည်းနိုင်သမျှနည်းအောင် ကူညီပေးခဲ့ကြသည်မလား ။
" JICAက ဟန်နွန်းနဲ့ ဟိုးအရင်ကတည်းက အတူတွဲလုပ်ဖူးတယ်ဆိုပေမယ့် ပရော်ဖက်ဆာရှင်းမ်နဲ့တော့ ဒါပထမဆုံးပရောဂျက်ပဲနော် ၊ အချိန်တိုတိုနဲ့ အောင်အောင်မြင်မြင်ပြီးသွားတာ ပရော်ဖက်ဆာရှင်းမ်ရဲ့ လုပ်ငန်းပိုင်း ကျွမ်းကျင်ထက်မြတ်မှုတွေကြောင့်ပါ "
" ကျွန်တော့်တစ်ဦးတည်းကြောင့်တော့ မဟုတ်ပါဘူး ...အဓိက,က ကျွန်တော့်အဖွဲ့သားတွေ ကြိုးစားအားထုတ်ပေးကြလို့ ခရီးလမ်းတစ်လျှောက် အဆင်ပြေခဲ့ရတာပါ ၊ ပြီးတော့ လူကြီးမင်းတို့ဖက်ကလည်း ငွေကြေးပိုင်းဆိုင်ရာ ကူညီထောက်ပံ့မှုတွေ အများကြီးပေးခဲ့တယ်မလား "
" ဘာပဲဖြစ်ဖြစ်ဗျာ ပရော်ဖက်ဆာရှင်းမ်နဲ့ နောက်
ပရောဂျက်တွေမှာလည်း ထပ်တွေ့ချင်ပါသေးတယ် "
" ကျွန်တော်လည်း မျှော်လင့်နေပါတယ်ဗျာ "
" ဒါဖြင့် ကျွန်တော်တို့တစ်တွေ ခွက်ချင်းတိုက်လိုက်ကြရအောင် ၊ သုတေသန အောင်မြင်ခြင်းအတွက် အားလုံးပဲ ချီးယားစ် "
" ချီးယားစ် "
သူ၏ နောက်ထပ်အောင်မြင်မှုတစ်ခုအတွက် ရှန်ပိန်တစ်ခွက်ကို ကျေနပ်စွာကိုင်မြှောက်လို့ အပြုံးနုနုဖြင့် ခွက်ချင်းတိုက်လိုက်၏ ။
ရှန်ပိန်ခွက်ကို လက်ညိုးနှင့်လက်မကြား အသာ
ညှပ်ကိုင်၍ ရှန်ပိန်၏ ပြင်းရှရှအရသာကို တစ်ငုံချင်းစီ တစိမ့်စိမ့်ခံစားနေမိသည် ။
အပေါ်ထည်ကုတ်ရှည်ကို ထိုင်ခုံနောက်မှီပေါ် ချိတ်ဆွဲထားတာမို့ ဆင်စွယ်ရောင်လည်ပိတ်အင်္ကျီနှင့် အမျိုးသားငယ်ဟာ သိပ်ကြော့ရှင်းနေသည် ။
လုပ်ငန်းခွင်မှာ သေချာဖြီးလိမ်း၍ နောက်သို့လှန်တင်ထားတတ်သော ဆံနွယ်နက်တွေကို ယခုမူ နဖူးပြင်ပေါ် တစ်ဝက်ချလို့ထားသည် ။
အပြုံးအရယ်ရှားသူဟာ ယနေ့မှာ နှုတ်ခမ်းအစွန်းဖျားနှစ်ဖက်ကော့တက်လို့ အပြုံးတချို့ကိုကြဲချတော့ လုပ်ဖော်ကိုင်ဖက်တွေက အထူးအဆန်းကြည့်လာကြ၏ ။ လက်ထောက်ကထိက ကင်မ်အွန်ယောင်းကတောင်မှ " ပရော်ဖက်ဆာရှင်းမ်ပြုံးတာ ဒီနေ့မှတွေ့ဖူးတော့တယ် " ဆိုပဲ ။
