[ Unicode]
"မကြာခင် ဘွဲ့ကြိုသင်တန်းအားလုံးရဲ့ အတန်းတင်စာမေးပွဲတွေစတော့မှာ ဖြစ်တဲ့အတွက်
ဌာနတိုင်းက စာမေးပွဲအတွက် ပြင်ဆင်သင့်တာမှန်သမျှပြင်ဆင်ပြီးကြပြီလို့ မျှော်လင့်ပါတယ် "
ပါချုပ်ဆရာမကြီးရဲ့စကားအဆုံး အစည်းအဝေးတက်ရောက်သူများမှ တစ်ညီတစ်ညာတည်း ခေါင်းညိတ်တုံ့ပြန်ကြသည် ။ ကျောင်းသားဦးရေများသည့် ဟန်နွန်းတက္ကသိုလ်မှာ စာမေးပွဲဖြေဆိုမည့်ကာလအတွင်း၌ ကျောင်းသားများအတွက် လိုအပ်ချက်တစ်စုံတစ်ရာမရှိရလေအောင် တာဝန်ရှိလူကြီးများက ဘက်စုံထောင့်စုံနီးပါးမှ ပြင်ဆင်ဆောင်ရွက်ပြီးသည့် အခြေအနေ ။
အပြီးမသတ်နိုင်သေးသော အကြောင်းအရာတချို့ကိုပါ အမြင်ချင်းဖလှယ် တင်ပြဆွေးနွေးနေကြသည်မို့ လုပ်ငန်းညှိနှိုင်းအစည်းအဝေးက ပုံမှန်ထက် အချိန်အနည်းငယ်လင့်သွားသည် ။
" အဏုဇီဝက ပါမောက္ခဌာနမှူးအန်း ၊ စက်မှုအင်ဂျင်နီယာဌာနက ပရော်ဖက်ဆာချွဲ နဲ့ စီးပွားစီမံက ပရော်ဖက်ဆာရှင်းမ်ရယ် နောက်ပြီး နိုင်ငံခြားဘာသာက ပရော်ဖက်ဆာဂျောင်တို့ကို teachers short- term exchange program အတွက် ပေကျင်းစေလွှတ်ဖို့ လျာထားတယ် ။ သွားဖို့အဆင်ပြေမပြေ စဉ်းစားထားကြပါ ။ ဒါပေမယ့် ကျွန်မအနေနဲ့တော့ ဒီခရီးစဉ်ကို ဘယ်သူ့ကိုမှ မငြင်းပယ်စေချင်ဘူး ...နှစ်နိုင်ငံအစိုးရရဲ့ ဆွေးနွေးသဘောတူညီမှုအရ ဟန်နွန်းကို အရေးတယူကမ်းလှမ်းလာတာမို့ "
JICA projectတစ်ခု မနေ့တစ်နေ့ကမှ ပြီးသွား၍
သက်ပြင်းယဲ့ယဲ့ချမယ်ကြံတုန်း ပါချုပ်ရဲ့မသိမသာဖိအားပေးသံစွတ်သည့် တာဝန်ပေါ်လာ၍ ပြုစုလက်စစာတမ်းတွေကိုင်ရင်း ချက်ချင်းပင် လက်ခံရတော့မလိုလို ။ မည်သူမျှ သတိမထားမိစေရန် လေပူတချို့ မှုတ်ထုတ်ရင်း အစည်းအဝေးခန်းထဲမှ ပါမောက္ခတွေရဲ့ တစ်ယောက်တစ်ပေါက်ဆွေးနွေးသံတွေကို ငြိမ်လျက်နားထောင်နေလိုက်သည် ။
" ပရော်ဖက်ဆာရှင်းမ်ရော ဘယ်လိုသဘောရလဲ "
အိုက်စပ်စပ်ဖြစ်လာတာမို့ ရေတစ်ခွက်မော့သောက်
မည့်ဆဲဆဲ စကားဝိုင်းထဲသို့ သိသိသာသာဆွဲသွင်းလာသော ပါမောက္ခတစ်ဦးကြောင့် အခြားသူများ၏ အာရုံကပါ သူ့ထံရောက်လာသည် ။ သူ့အဖြေကို မျှော်လင့်နေကြသော အကြည့်တို့ကြောင့် ကိုင်လက်စ ရေခွက်ကို စားပွဲပေါ် အသာပြန်ချထားလိုက်ရ၏ ။
