# روايـة :سـقـف الـحـب -Ceiling Love
للكـاتبـة : sαℓeмα🔏❤️
ــــــــــــــــــــــــــــــــ
الساعه 9:22 م 💕
خشت نسمه لسطح العماره من البلكونه ، وشاافت يوسف
مقعمز ع الصور ويدرجح ف كرعيه ويشوف للسماء
نسمه : ماشاء الله قعدت تسبق فيه ع المكان
يوسف تلفت بنزعاج ، كشر وجهه وقال : شن تبي انتي بالزبط ؟!
نسمه قربت منه وقالت بستفزاز : نبي نفهم انت عليش تتلصق وجاي هنا ؟!
يوسف وهو يشوف للسماء : جاي هنا لانه مكان مش ملك بوك وماتقدريش تلزيني منه
نسمه رفعت حاجبها : والله حلال فيك اندفك توا انجيبك عرم
يوسف وهو ع نفس الوضع ضحك ع كلام نسمه
نسمه عقدت حواجبها : شن يضحك فيك ؟
يوسف توسعت ابتسامته وقال : انتي
نسمه تعصبت وماعرفتش شن ترد عليه
سكتت وصبت ع روس صوابعها وهي تحاول تشوف لوطه ، حطت يديها ع الصور ورفعت نفسها بيديها و كرعيها قعدن ف الهواء وطلت براسها لوطه
ف لحظه تزحلقت يد نسمه واختل توازنها ، وجا ثقلها من قدام وكانت بطيح .. لو انه يوسف مالحقش عليها ف اخر لحظه ومسكها من تيشرتها ...وسحبها لداخل السطح
وقفت نسمه ع كرعيها وهي مرعوبه وتشوف ليوسف اللي نزل من ع الصور وهو مازال ماسكها
كانت نسمه تاخذ ف النفس بسيف وهي تشوف لتحت العماره واتخيل ف شن كان مصيرها لو انها طاحت
يوسف مازال ماسك فيها وهو يستوعب ف الموقف وقلبه يدق بسرعه خياليه ... لانه لو نسمه طاحت كانت انتهت من دون تفكير كانت حتموت من المسافه الشاهقه اللي كانت حطيح منها
يوسف وخر من ع نسمه وضحك وهو مازال متلخبط من الموقف اللي صار : قبل تبي اطيحيني جت ع راسك
نسمه وخرت ع الساس قعمزت وهي حاطه يدها ع قلبها وتلهث وضحكت ع كلام يوسف
يوسف قرب منها بخوف : انتي تمام ؟؟
نسمه هزت راسها وقالت : شكراً ....كنت حنموت لو مش انت مسكتني يوسف قعمز مقابلها وقال : العفو اكيد مش حنشوفك اطيحي ونخليك ....وضحك ..مانكرهكش للدرجه هذي انا
نسمه ضحكت : تكرهني يعني ؟!
يوسف ضحك وهو يشوف للجهه الثانيه : شويه
نسمه ضحكت وسكتت
سكتوا لدقائق 🕕
وبعدها نسمه قالت : كم مواليدك يا يوسف؟!
يوسف شافلها بنتباه : 1992 ....وغمزلها طلعتي حتي انتي حافظه اسمي !!
نسمه ضحكت بإحراج : نعرفه من عهد و سيف اسمك
يوسف هز راسه وابتسم : اممم ....وانتي كم مواليدك ؟!
نسمه شافت للجهه اللي جنبها وقالت وهي تعض ف شفايفها : مواليد 2003 ...مفروض ف الكليه لكن سقطت ف سنه ومازال قاعده ف المدرسه ...نقرا ف المدرسه اللي ماسكتها امك ... وانت
يوسف ضحك : وانا شنو ؟!
نسمه شيرت بيدها : قرايتك !!
يوسف ضحك وضم يديه : لا لا انا مش شوري القرايه بكل ... وقفت قرايه وخشيت للكلية العسكريه وتخرجت وتوا قاعد نشتغل
نسمه هزت راسها وقالت بتمتمه : اممم ...هما هكي اصلا اللي ف العسكريه ديما فيهم الطقه و مش مكملين قرايتهم
يوسف رفع حاجبه : نعم !
نسمه ضحكت : ولا شي
يوسف شافلها شويه وبعدها ضحك وقال : بس رسمي كلامك راه ....جديات ف منهم هكي
نسمه ضحكت : شفت
يوسف هز راسه وطلع نقاله اللي يرن " عائشه"
يوسف وقف من مكانه ورد عليها : ايوه
عائشه : اسمع يوسف بايته موده راه... ماتبيش تروح
يوسف : تي شن تبي بايته الزح ....الواحد حتي ف حوشه مايتريحش !!
عائشه : شن تبيني اندير نلزها؟!
يوسف بنفتره : ببه به خلاص وسكر الخط
تلفت يوسف وشاف نسمه اللي مركزه ف الدفتر امتاعها
يوسف نفخ وقعمز ف مكانه
نسمه ضحكت وشافتله : شكلك ناعس !
يوسف : بكل
نسمه : وليش ماتمشي ترقد ؟
يوسف تأفأف : بنت خالتي قاعده ف الحوش
نسمه كشرت : ان شاء الله موده ؟!
يوسف هز راسه
نسمه : وووه مثقل دمها
يوسف شافلها وهو متفاجأ من كلامها
نسمه خافت من نظرت يوسف جمدت ف مكانها وهي تشوفله
يوسف ضحك : لسانك بيودرك انتي ....افطني لروحك
نسمه هزت راسها بعبط وسكتت
يوسف شاف للسماء : بس جديات هي دمها ثقيل
نسمه تحمست ف الكلام وقالت : وبارده !!
يوسف هز راسه : ماصار شي من مسكت اللسان ؟!
نسمه حطت يدها ع فمها
يوسف ناض : تصبحي ع خير
نسمه ابتسمت : وانت من اهل الخير
نزل يوسف ونسمه قعدت تتبع فيه بعيونها لعند اختفى
ــــــــــــــــــــــــــــــــ
أنت تقرأ
Ceiling Love _ سـقـف الـحـب
Romanceبيـني وبيـنك أبـحـرُ ومـدائـن لكـنـنا بـشعورنـا جيـران ❣️🫂 .
