# روايـة :سـقـف الـحـب -Ceiling Love
للكـاتبـة : sαℓeмα🔏❤️
ــــــــــــــــــــــــــــــــ
سيف طلع نقاله
ويوسف كذلك طلع نقاله وولعه وشافله وشاف لسيف بستغراب
سيف : كنك ؟
يوسف : مش نقالي
سيف قرب منه وشاف للنقال : كيف مش نقالك ؟!
يوسف يوري فيه : تي شوف ياراجل الخلفيه امتاع بنت والنقال ماقدرتش نفتح الرمز امتاعه
سيف بستغراب : من وين جاك هضا به ....امتاع منو ؟!
يوسف حط النقال ع المكتب وهو يفكر : تي شن عرفني انا ....من الشغل للحوش ومن الحوش للشغل اليوم ماطلعتش مكان ثاني بكل .....واللي محيرني كيف طب ف جيبي هضا ياراجل
سيف ضحك : اعوذ بالله سحر سحر !!
يوسف رفع حاجبه وهو مكشخ : مش وقت حناطه
ــــــــــــــــــــــــــــــــ
الساعه 10:30 م 💕
نسمه وعهد يشوفن للنقال ومستغربات
عهد : شن انديروا به ؟
نسمه خبطتها ع راسها : عليش جايبتك انا هنا بيش تفكري امعايه
عهد : هاكي نقالي ورني علي رقمك وخلاص وانشوفوا من يرد علينه .....وكان ماردش حد بكرا نمشوا للمدرسه واحكي لأبله جميله
نسمه خذت نقال عهد ورنت ع رقمها وقالت : تمام به
ــــــــــــــــــــــــــــــــ
قدام حوش سيف
كان مقعمز سيف ويوسف ويشوفوا للنقال
يوسف انتبه للنقال وقال : اهو يرن
سيف شاف الرقم وفنص وقال : رقم عهد !
يوسف عقد حواجبه : تي عهد من ياحسن انت ....شن دخل عهد ف الخوطه !!
سيف مركز ع النقال : تي والله هو
يوسف حط يده ع فم سيف وفتح الخط
يوسف : ايوا
جاها صوت نسمه وهي تلعلع : ردلي نقالي
يوسف حول يده من ع فم سيف وقال : باهي تو نرده لكي النقال الاجرب لكن نقالي انا وين ؟....وكيف طب عندي اصلا نقالك؟!
عهد تحكي لنسمه وقالت : حي عليك صورك قوليله مايفتحش النقال
سيف ميز صوت عهد ع طول وقال : عهد ؟!
عهد بصدمه: سيف ....هضا سيف
سيف خذا النقال من يوسف وقال : عهد فهميني شن صاير ؟
عهد : نسمه ريحت نقالها
نسمه بعياط : ماريحتش ....انا عطيته لأبله جميله!
يوسف عقد حواجبه وهو يفكر : ابله جميله ؟!......نقالك كان عند امي يعني !
نسمه : اها ولما جيت بناخذه منها عطتني الخارب امتاعك
يوسف بعياط : خارب ف عينك !!....وشاف لسيف وقال تفاهملي امعاها هذي خليها ترد النقال
سيف ابتسم : عهد
عهد خذت النقال من نسمه وقالت : نعم !
سيف : بكرا جيبيه النقال امعاك ولما تروحن من المدرسه تلقنه ف المكان اللي ديما انتلاقوا فيه
عهد : تمام به
نسمه بعياط : رد بالك من نقالي
يوسف خذا النقال من سيف وقال : تي باهي خلاص ...وصكر الخط
وشاف لسيف وهو متنرفز : مستفزه البنت هذ
سيف قعمز ف مكانه وهو ميت ضحك
ــــــــــــــــــــــــــــــــ
ثـاانـي يـوم.....💞
الساعه 1:30 م
طلعت عهد و نسمه من المدرسه ....ووصلن ف الشارع اللي بيتلاقن فيه مع سيف ويوسف
كانوا سيف ويوسف يراجوا فيهن ....يوسف امقعمز ف السياره امتاعه وسيف واقف ف جنب السياره
عهد شافت لسيف من بعيد وابتسمت
وسيف شافلها وقال بهمس : انــحـبـك♥
عهد ضحكت وشافت لنسمه اللي حامقه وعاقده حواجبها وماسكه نقال يوسف ف يدها
وصلن فيهم وشافت نسمه ليوسف اللي قاعد ف السياره وقالت : احترمنه شويه يايوسف باشا وانزل من السياره
يوسف نزل من السياره وقال : هاتي النقال
نسمه : انت عطيني نقالي الاول !
يوسف نفخ وشاف لسيف الهيام مع عهد وقال : تفاهم امعاها !!
سيف ابتسم وقال لنسمه : عطيه النقاال و فكينه من عناده يانسمه
نسمه شافت ليوسف برفعة حاجب وبعدها عزقت عليه النقال
يوسف مسك النقال اللي قريب طاح وشافلها : يابهيمه ... من حظك جيتي بنت بس كان هضا راه عرفت كيف انتفاهم امعاك
نسمه شقلبت عيونها وقالت : جيب نقالي هيا ....ومدت يدها
يوسف طلع نقالها من جيبه وخبطه ع يدها بالقوه
نسمه شافتله بغل من قوة الخبطه وقالت : يا ثور
وشافت لعهد وسيف اللي يضحكوا ومشت وسيبتهم
عهد لحقتها بسرعه وسيف شاف ليوسف اللي ركب للسياره وهو يخبط بغل وحمق
كملن البنات طريقهن للحوش ومشت عهد لحوشهم وكملت نسمه باقي الطريق بروحها
خشت لشارعهم وشافت شاب واقف قدام حوشهم ...وكل ماتقرب كان يزيد يبان عليها لعند ف الاخير عرفت انه "زكريا" صاحب خوها نضال
نسمه نفخت وهي تقول ف خاطرها " عليك براده يااخي صبح ليل عشيه قايله ديما لاصق عندنه "
وصلت نسمه لباب حوشهم وحطت يدها ف جيبها بتطلع المفتاح
زكريا وهو مبتسم : نسمه صاح ؟!
نسمه شافتله وهزت راسها
زكريا وهو يشوفلها ويفصفص فيها : انا زكريا صاحب نضال
نسمه ببتسامه صفراء : نعرفك ...ماهو ديما قاعد هنا انت
زكريا ابتسم ع جنب وهو يشوفلها بأعجاب وقال: نضال قاعد ؟
نسمه كشخت : تشوف فيه كيف مروحه يعني مانعرفش من اللي ف الحوش ومن اللي بره منه .....وفتحت الباب وخشت وصكراته وراها
زكريا مسح ع لحيته وهو رافع حاجبه ومبتسم وقال : اخخخ كبرت وزادت حلاوه ....وضحك وهو يطلع ف نقاله وقال : ولسانها طول
أنت تقرأ
Ceiling Love _ سـقـف الـحـب
عاطفيةبيـني وبيـنك أبـحـرُ ومـدائـن لكـنـنا بـشعورنـا جيـران ❣️🫂 .
