# روايـة :سـقـف الـحـب -Ceiling Love
للكـاتبـة : sαℓeмα🔏❤️
ــــــــــــــــــــــــــــــــ
ثـاني يـوم ....🌻
يـوم الـجمـعه 💜
الـساعـه 12:30 م
كانت نسمه ف المطبخ مع امها ، تساعد فيها ع الغداء
جابر خش للمطبخ وهو ماسك سوريته وقال وهو معصب : نسمه ! مش قتلك حددي السوريه ...نبي نمشي بيها للجمعه
نسمه : حددتها !!
جابر عقد حواجبه وزاد تعصب : كيف حددتيها وهي قاعده معكرشه
نسمه بستعباط : اها معناها ماحددتهش !
جابر فنص وقدم بيضربها : تستهبلي انتي ؟!
نضال خش للمطبخ وهو مكشر : خليها ف حالها ....وقعمز ع الكرسي وهو يشرب ف قهوته
خش محمد وشاف لجابر : كنك تعيط انت ؟؟
جابر شير ع نسمه : الكلبه هذي قتلها حددي السوريه بنمشي بيها للجمعه ماحددتهش
محمد شاف لنسمه وقاله : سيب اختك....ولما تبي منها حاجه اطلبها بأحترام
جابر بغيض : ياباتي نبي نمشي بيها للجمعه توا
محمد : امشي حددها بروحك !
نسمه قربت من باتها وحضناته وهي تضحك وتشوف لجابر بستفزاز
جابر طلع من المطبخ وهو ينفتر ويخبط
ونسمه تشوف لباتها وتضحك
محمد قرص خدها وضحك : رايحه شريره انتي
نسمه ضحكت
فاطمه شيرت ع نسمه وقالت : هي الغلطانه
محمد هز راسه : اي عادي امعاها انا ظالمه ولا مظلومه
نسمه ضحكت بفرح
فاطمه شافت لنضال اللي يشرب ف قهوته ومش معاهم ،هايم ويفكر
قربت منه وقالت : نضال كنك مريض ؟! ....وحطت يدها ع جبهته
نضال تنهد : لا مافي شي ياأمي
نسمه اختفت الضحكه من وجهها وشافت لنضال وهي تذكر ف كلام عهد لما حكتلها الموقف اللي صار بينها وبين نضال
جت عينها ف عين نضال تلفتت للحوض ودارت روحها تلم ف الماعين
نضال حط الكوب اللي ف يده ع المرمره وقال : نعدي نوتي روحي للجمعه .....وطلع
رن نقال نسمه (عهد )
نسمه ردت : ايوا عهد
عهد : شن جوك
نسمه ابتسمت : تمام الحمدلله
عهد : بنقولك ماما مشت لحوش عمي هيا وبابا ورضوى واحمد عنده شغل ....تعالي كسدي امعايه وباتي
نسمه شافت لأمه وقالت : ماما عهد هلها مش قاعدين وتبيني انجيها ونبات عندها عادي ؟؟
فاطمه : وليش ماتخليها اتجي هيا وتتغدا امعانه وتبات عندك بدال ماقاعده بروحها ؟
نسمه حطت النقال ع وذنها بعدما سمعت عهد كلام فاطمه وقالت : شن رأيك ؟؟
عهد قالت بصوت واطي وإحراج : لالا مانبيش انجي عندكم ونتلاقى مع نضال من جديد !
نسمه بتفهم : امممم خلاص تمام ....شويه يطيب الغداء انقول لماما تحطلنه ونجيبه ونجيك
عهد ابتسمت : تماام ياقلبي ...وصكرت
فاطمه عقدت حواجبها : شن صار ؟؟.....ليش ماتبيش تجي ؟
نسمه قربت من امها وباستها : مريضه يامااما وكان اتجي هنا يقيدوها خوتي خلي انا نمشيلها ونقعدوا مع بعض احسن
فاطمه : به ! خلاص عدي
نسمه حضنت امها : انعدي اندوش ونوتي روحي لعندما انتي حطيتيلنه غداء من تطييبك العسل !
فاطمه هزت راسها وهي تضحك : مشطرك ف الدوه والكلام المعسل
نسمه ضحكت وطلعت تجري ،لقت خوتها وباتها ماشيين لصلاة الجمعه
ركبت لدراها خشت دوشت وطلعت دبشها كله وقلبت دارها عشان ف الاخير طلعت لبسه مريحه تمشي بيها لعهد
وكانت لبستها عباره عن سروال جينز اسود مع بلوزه صوف بالون البيج
وطلعت شنطة ظهر صغيره حطت فيها بيجامتها وحاجاتها عشان النوم
لبست جاكيتها السوده ووشاحها الاسود وكاويش ابيض وخذت شنطتها ونزلت تجري خشت للمطبخ ، لقت فاطمه موتيتلها تبسي ومغلفته
خذت نسمه التبسي وقالت لامها : انا مشيت !
فاطمه : ف امان الله
طلعت نسمه وتقابلت ف الجنان مع باتها وخوتها مروحين من الصلاه
نسمه طلعت تجري وهي حايسه ف شنطتها والتبسي والوشاح امتاعها
وشافت لجابر اللي بيصكر الباب وقالت : خليه مفتوح !
محمد شافلها بستغراب : وين ماشيه يابنت ؟!
نسمه وهي طالعه : ماشيه لعهد !!
خش محمد والشباب للحوش
محمد شاف لفاطمه : كنها نسمه مستعجله وماتغدتش امعانه؟!
فاطمه وهي ترتب ف الغداء : رنت عليها عهد قاللتلها تعالي اقعدي امعايه هلي مش قاعدين وانا مريضه
الكلام اللي قالته فاطمه كله سمعه نضال اللي واقف يسمع فيهم وقلبه وجعه لما عرف عهد مريضه زياده ع الوجع اللي هو حاس بيه
أنت تقرأ
Ceiling Love _ سـقـف الـحـب
Roman d'amourبيـني وبيـنك أبـحـرُ ومـدائـن لكـنـنا بـشعورنـا جيـران ❣️🫂 .
