# روايـة :سـقـف الـحـب -Ceiling Love
للكـاتبـة : sαℓeмα🔏❤️
ــــــــــــــــــــــــــــــــ
الساعه 9:30 م💕
تعشت نسمه مع خوتها ، وخشت لدارها كالعاده وصكرت الباب بالمفتاح وخذت مذكرتها وفتحت باب البلكوني وزقبت منه لسطح العماره المقابلتهم ، وهنا كانت الصدمه
شافت حد مقعمز ع حاشية السطح ومنزل كرعيه لوطه ويشوف لوطه للمسافه اللي كانت تهز القلب من البعد امتاعهاا
نسمه عقدت حواجبها : شن ادير انت هنا ؟!
يوسف تلفت بصدمه وفجعه : انتي ؟.... شن جيبك؟!
نسمه شيرت ع قطعة السجاده اللي كانت حاطتها والطاوله وقالت : مكاني !
يوسف تلفت بجسمه قعمز بجنب وحط كراع جوه وكراعه الاخره قاعده ف الهواء وقال وهو معصب : تي لا مش معقول عاد حتي هنا لاحقتيني ....شن هضا !
نسمه بعياط : هضا مكاني انقولك ليه سنتين كل يوم انجي هنا انا
يوسف رد تلفت وعطاها بظهره قعد يدرجح ف كرعيه ف الهواء وهو يشوف لوطه
نسمه اتكت ع الصور اللي مقعمز عليه يوسف وقالت : تبي تنتحر ؟
يوسف رفع حاجبه : مش غادي مكانك امشي انطمري غادي واخطيني ....حتي الواحد جاي يتريح ع حاله لازم تزقبله
نسمه ضحكت : هكي تتريح انت مقعمز ع حاشيه ..علي ارتفاع ثلاث ادوار مسافه تهز القلب وعلي شعره اطيح تموت ؟!
يوسف تأفأف : عليك فال عقاب الليل
نسمه شافتله بستفزاز وسكتت
يوسف بنرفزه : امشي ع حالك ....شن تبي قاعده جنب خلقتي ؟؟
نسمه صبت ع روس صوابعها وهي تشوف لوطه وقالت : مش مكان بوك هوا ...نصبي وين مانبي
يوسف نفخ وسكت معش عرف شن يرد عليها
نسمه قعدت ساكته شويه وهي تشوف حواليها وبعدها شافت ليوسف ولانها كانت اتشوفله من الجنب انتبهت انه فيه اثر جرح ف خده وواخذ جزء من لحيته كان شكله جذاب وملفت ، قعدت نسمه تشوفله شويه وبعدها ماقدرتش تقاوم نفسها وقالت : من شنو هضا ؟! وشيرت ع خدها
يوسف دوب ماشافلها وبعدها شاف قدامه وقال : عركه
نسمه ضحكت بستفزاز وقالت : علم عليك
يوسف شافلها بنضره ....خلت نسمه بجد تخاف وتكتم باقي ضحكتها
سكتت نسمه شويه وبعدها باعدت من يوسف وهي تدندن
يوسف غمض عيونه وخذا نفس وقاللها : اسكتي
نسمه مابتش تعدل وكملت دندنه
يوسف عض ع لسانه وقال : واقسم بالله نعزقك من هنا نقتلك وماحد يندري عليك راه ....خطيني هالنهار الاسود
نسمه : مش نهار توا ليل☺
يوسف بنرفزه : واقسم بالله اكبر كذاب اللي سماك نسمه هضا... تي انتي اعصااار مش نسمه
نسمه : حيي نجيه ياربي اللي مازال حافظ اسمي
يوسف ارتبك من كلمة نسمه وسخن مع بعضه وقال بسرعه وتبرير : الاشكال اللي زيك تنتسى هيااا ؟
نسمه ماعتدلش عليه وقعمزت وخذت مذكرتها ولهت فيها ، وهو عطها بظهر ورد يشوف للسماء
فاتت نص ساعه 🕕
استغرب يوسف هدوء نسمه تلفت عليها وشافها تكتب ف المذكره امتاعها ومنسجمه
شافلها وهي منسجمه وكان اول مره يركز عليها ع شعرها وجسمها وملامحها وحتي للبسها اللي يزيد ف جمالها
باعد يوسف عيونه من عليها بسرعه
وقعد شويه وماتحملش هدوئها ورد تلفت بس المره هذي تلفت بجسمه ونزل من ع الصور وقرب من نسمه وقال : شن تكتبي ؟!
نسمه تقلد ف حركات يوسف : النهار الاسود خطاني ....شن تبي ف خلقتي ☺
يوسف : تصبحي ع خير ونزل
نسمه شافتله وهو نازل لعند اختفى من قدامها ،صبت بسرعه ع رووس صوابعها وتباوعت من الصور لعند شافت يوسف وهو طالع من العماره وقص الطريق ومشى لحوشهم
فتح الباب وتلفت وراه شاف لجهة العماره وشاف لنسمه اللي اتباوع فيه ، خش لحوشهم وهو يضحك عليها
ونسمه اول ماجت عينها ف عين يوسف طبست بسرعه ومشت لمكانها وهي تتمتم : تي شن دخلني بيه انا ؟!
وفتحت مذكرتها ع الروايـة اللي كانت تكتـب فيـها
# روايـة - غـريـبـي 🔥
الحـلقـة الثـانيـة .
أنت تقرأ
Ceiling Love _ سـقـف الـحـب
Romansبيـني وبيـنك أبـحـرُ ومـدائـن لكـنـنا بـشعورنـا جيـران ❣️🫂 .
