# روايـة :سـقـف الـحـب -Ceiling Love
للكـاتبـة : sαℓeмα🔏❤️
ــــــــــــــــــــــــــــــــ
الساعه 4:00 ص 💕
حول سيف يده اللي كان حاطها ع عيونه وشاف ليوسف اللي راقد ع الكرسي ف جنبه ، تنهد وخذا نقاله وبدأ يكتب ف رسالة لعهد
كانت عهد ف هالوقت تتمنى ف النوم يجيها ويرحمها من اللي هيا فيه ، وتشوف للروشن وسارحه
فجأه رن نقالها بنغمة رسالة
فتحت عهد رسالة سيف وقعدت تقرأ فيها " عارف اني عصبت عليك وهزبتك وجرحتك بس كله لمصلحتك والله ....كنت خايف يشوفك حد من الجيران ويعرف باتك ولا خوك بالقصه ...عهد راه انا طحت قدام روشن دارك مش حاجه ساهله راه تخيلي حد شافني او شافك لذلك انا معش نخطم من جنب حوشكم اصلاً لعندما ع الاقل نخطبك رسمي ...مش متحمل فكرة انه مرات تطلع عليك دوه مش مزبوطه او باتك او خوك يمد يده عليك بسببي "
حضنت عهد نقالها وهي مبتسمه صاح ف الرساله هذي ماكانش فيها ولا كلمه رومانسيه ولا سيف تغزل فيها
بس كانت الرساله ف قمة الغزل بنسبه لعهد ، حست انه سيف بجد خايف عليها ، وانه مهتم بيها وخايف ع سمعتها .
ورقدت عهد ليلتها وهي حاضنه نقالها ومبتسمه .
ــــــــــــــــــــــــــــــــ
ثـانـي يـوم 🍃
-طلع سيف من المستشفى لانه اصابته ماكانتش خطيره .
-ومشن يومين عاديات وبدون اي احداث
-يوسف كان اليومين زايد عليه ضغط الشغل ؛ لانه واخذ شغله وشغل سيف اللي قاعد ف اجازه .
-عهد وسيف امورهم عسل ولوز واتفقوا انه تتأجل الخطبه لعندما سيف تتحسن صحته ، وعرف بات عهد وخوها احمد انه سيف بيتقدم لعهد وكانوا موافقين وماعندهمش أي مشكله .
-ونسمه كانت لاهيه ف قرايتها وبس
ــــــــــــــــــــــــــــــــ
السـاعـة 9:30 م 💕
روح يوسف و درس سيارته ، وكان بيخش للحوش وبعدها تلفت وراه وشاف للعماره
وماحسش بنفسه الا وهو ماشيـلها
ركب الدروج بتعب وتذمر ، ولما وصل ف اخر درجه شاف نسمه اللي متكمشه ف التركينه وتبكي بالعبره وملامحها تدل ع كمية الرعب اللي حاسه بيها ، وفي جنبها حاجاتها متبعثرات
يوسف عقد حواجبه بستغراب وخوف وقال : شن فيه ؟؟
نسمه انتبهت لوجود يوسف شافتله وهي مش قادره تحكي من كثر البكاء
يوسف قرب منها : نسمه كنك ؟!
نسمه تشوف قدامها برعب وشيرتله بيدها
يوسف تلفت وماشاف شي وين ماشيرت نسمه تعصب وقاللها : احكي شنو ف بسرعه ؟!
نسمه غطت وجهها بيدها وهي تبكي وقالت بلعثمه : ببـ بشـبوا
يوسف فنص فيها : هضا كله عشان بشبوا ؟؟!
نسمه تبكي ومغطيه وجهها وقالت بصوت مليان رعب : نخااف منه
يوسف مسح ع وجهه وهو يحاول يستوعب الموضوع قلبه قريب طاح لما شافها كيف تبكي ...وبعدها يطلع هضا كله عشان حشره ؟!!
نسمه حولت يدها من ع وجهها وشافت البشبوا مقرب جهتها عيطت وهي تسحب ف يوسف من جاكيته ، وحطت راسها ع صدره وهي ماسكه فيه وتبكي : يوسف ارجوك ماتخليشي يلمسني اقتله ...اقتله !!
يوسف سخن مع بعضه ووجهه قعد الوان الوان من قرب نسمه
باعدها وهو يبلع ف ريقه بصدمه وقال : تمام تمام !!
وفعلاً قتله يوسف وبعده كيف ماطلبت نسمه
وقعد يشوف لحالتها ومستغرب كمية الخوف اللي خايفته من الحاجه التافه هذي !
يوسف طبس ف جنبها وقال بضحكه : طلعتي عيله!!
نسمه مسحت دموعها وقالت بغضب : مانيش عيله
يوسف ابتسم : لالا خلاص ماتحاوليش هيبتك ضاعت تخافي من بشبوا واديري ف روحك واعره عليه
نسمه رشفت خشمها وهي تباعد ف شعرها ومبتسمه : نخاف منه لدرجة الموت ...لو ماجيتش توا مش عارفه شن كان رح يصير فيه !!
يوسف يشوف لملامح وجهها وبالسيف قدر يمنع نفسه ومايمدش يده ويمسحلها باقي اثار دموعها او يلمس شعراتها الناعمه
شافلها وهو مبتسم وقال : ليش تخافي منه ؟؟
نسمه تنهدت : زمان لما كنت صغيره كـ...
يوسف يشوفلها وهو يحاول يمسك ضحكته
نسمه ضحكت وغمضت عيونها بتذمر : يوووسف !!
يوسف ضحك: باه خلاص اه .... ع اساس انك كبيره توا ؟؟
نسمه شقلبت عيونها : المهم .....كنت قاعده ف الحوش بروحي وراقده وحسيت بحاجه تمشي عليه ...وقالت بأشمئزاز ..وكان بشبوا
يوسف : اممم
وصبا وقال : خليك هنا شويه ونجي
نسمه شافتله بستغراب وهزت راسها بالموافقه
نزل يوسف وهو متوجه لمحل قريب منهم ، وتتكرر ف راسه اللحظه اللي حضناته فيها نسمه
بينما نسمه اللي كانت تنظم ف حاجاتها اللي بعثرتها من الفجعه والخوف ، اذكرت كيف مسكت ف يوسف وحضناته من الخوف امتاعها عضت ع شاربها وهي مبتسمه وتهز ف راسها يمين ويسار ع العمله اللي دارتها
أنت تقرأ
Ceiling Love _ سـقـف الـحـب
Romanceبيـني وبيـنك أبـحـرُ ومـدائـن لكـنـنا بـشعورنـا جيـران ❣️🫂 .
