🔅الحلقه 38 🔅
يلا صلوا على النبى 🙂
هجره المسلمين للحبشه (ج2)
الصحابه لازم يهاجروا ..قريش بتعذبهم اوى.. و يبدأ النبىﷺ يقول للصحابه: اذهبوا إلى الحبشة فإني أرجوا الله أن يجعل لكم فرجاً و مخرجا و إن بها ملك لا يظلم عنده أحد..ملك الحبشه -و يقال له"النجاشى"-،طيب حتخلى مين يسافر من الصحابه يا رسول الله..الضعفاء اللى بيتعذبوا وبس؟ لأ..سيدنا عثمان بن عفان مسلم و من قبيله كبيره و مش بيتعذب و مش محتاج يسافر و رغم كده الرسول حيبعته للحبشه و رملة بنت أبي سفيان "بنت سيد مكة" حتهاجر .
و رقية بنت محمد (بنت رسول الله) وعبد الرحمن بن عوف، جعفر بن أبي طالب ، و معاهم مجموعة من الفقراء و الضعفاء من الصحابه اللى بيتعذبوا.. و كله يقول : حاضر يا رسول الله حتى اللى شايف انه مش بيتأذى من قريش و مش محتاج انه يهاجر..لكن أدب الصحابه و طاعتهم للنبىﷺخلتهم يوافقوا و بدون أى جدال 🙂 ❤
طب ليه يا رسول الله حتخلى ناس تهاجر رغم أنها مش بتتأذى ؟ عشان يوصل 3 رسايل :
الأولى لقريش ..عشان قريش تشوف أن اللى بيسلم مش الضعفاء و الفقراء بس ..لأ.. كبراء القوم كمان و مش بس كده..ده رسول الله بيقول أنا أمرتهم يهاجروا رغم ان فى منهم ناس مش بيتعذيوا لكن سمعوا كلامى كمان و حيسيبوا أهلهم و حيهاجروا و ده طبعآ هز قريش جدا لأنهم حسوا بإن الإيمان بيقوى المسلمين و ان محمد بيتسمع كلامه بالحرف الواحد.
أما تانى رساله لضعفاء المسلمين ..النبى عليه الصلاة و السلام عايز يقولهم ان باعت ناس مهمه معاكم مش حغربكم بره مكه لوحدكم .. ده أنا حبعت بنتى رقية معاكم كمان:') ♡.. يا جمال سيدنا النبى ..
أما تالت رساله بقى للنجاشى ملك الحبشه.. النبى ﷺ عايز يفهمه أن أنا مش باعت لك الفقراء و الضعفاء عشان تعطف عليهم ..لأ..دول فيهم كبار القوم، فحافظ عليهم و أكرمهم.
طيب دلوقتى الهجرة الأولى للحبشة كانت 18 فرد فقط، و الهجرة الثانية حتبقى 82 فرد فالمجموع كله 100 صحابي و الصحابة الوقت ده كانوا 300،يعني 1/3 المجتمع المسلم هيهاجر للحبشه على رحلتين (هجرتين) و 1/3 ده كتييير ، طيب حتروح معاهم يا رسول الله ؟ لأ..النبي مش حيسافر.. طيب ليه ؟
عشان النبى مش حيرضى يمشى و يروح للأمان فى الحبشه و يسيب باقى المسلمين فى مكه لوحدهم ..صل الله على سيدنا محمد :') ❤ .
حتى بعد كده في الهجرة من مكة للمدينة زي ما حنشوف حيبقى النبى عليه الصلاه و السلام اخر واحد هيهاجر من مكة بعد ما يطمن على كل الصحابة الأول أنهم هاجروا للمدينة.
طيب دلوقتى حيهاجر عدد من المسلمين لأراضى الحبشة و قبل ما يمشوا نزلت سورة الكهف و سورة مريم، طيب ليه؟ أصل الكهف كلها بتحكي عن أصحاب الكهف اللي هاجروا "وَإِذِ اعْتَزَلْتُمُوهُمْ وَمَا يَعْبُدُونَ إِلَّا اللَّهَ فَأْوُوا إِلَى الْكَهْفِ يَنشُرْ لَكُمْ رَبُّكُم مِّن رَّحْمَتِهِ وَيُهَيِّئْ لَكُم مِّنْ أَمْرِكُم مِّرْفَقًا" كأن ربنا بيطمن الصحابه ♡ إن مش انتم اللي حتهاجروا بس..لأ متقلقوش..أصحاب الكهف كمان هاجروا من قبلكم.. اصل في تاريخ العرب أول قبيلة عربية تهاجر هيه المسلمين ففكره الهجره مش سهلة أبدآ عند العربي ، و بكده يطمنوا بقصة أصحاب الكهف.أما تاني سورة كانت سورة مريم.. طيب اشمعنا؟
حنعرف سوا الحلقة القادمة إن شاء الله <
#لو_عرفتموة
#حياتي_دعوة
