جلس في المقعد المميز على الطائرة المتوجهة لألمانيا عندما وجدها تقترب منه وتسحره بصوتها الناعم ونظرات عيناها الحادة
" تشيكن ولا بيف؟ "
" بيف "
" محتاج حاجة تانية يا فندم؟ " تحدثت بابتسامة كعادة اية مضيفة طيران
" محتاج حاجة واحدة بس "
" اتفضل يا فندم "
" رقمك "
حمحمت " حضرتك عايز تطلب حاجة؟ "
ابتسم " عايز اطلب رقمك "
" عن اذن حضرتك " ابتسمت مجددا وذهبت للداخل وكعادتها فقد نجحت خطتها اللئيمة على جذب الشخصيات الهامة ذات النفوذ او على الأقل الأموال
جلست على الكرسي بالقرب من الطيار وهى تتفحص اظافرها لتنتظر الطباخ الذي يعد الطعام للمسافرين امسكت بالاطباق المميزة وذهبت لتضعها امامه
" اتفضل يا فندم "
" اسمي طارق يا زينة " تحدث بعدما نظر لتعريف هويتها المعلق على ملابسها
" اهلا وسهلا يا استاذ طارق..اتمنى الأكل يعجب حضرتك والضيافة ولو احتاجت اي حاجة اندهلي "
تنهد " قولتلك محتاج رقمك بس انتِ رافضة " ابتسم
حدثت نفسها " هتاخده يا حبيبي بس مش دلوقتي "
ابتسمت " رحلة سعيدة يا فندم " وتركته وعادت لتجلس اما هو فنظر اليها وهو يحك ذقنه ويتوعد لنفسه بأن يحصل على رقم هاتفها
على الصعيد الآخر كان يجلس هو بالحفل وينظر لتلك الفتاة صاحبة الملابس الباهظة بتمعن وهو يرتشف من الكأس بيده
" هى مين دي؟ " تحدث قاسم
" دي وعد درويش تبقى الأخت الوحيدة لرجل اعمال كبير صاحب سلسلة مطاعم Shrimp Palace دلوعة اخوها بقى اكمن بباهم ومامتهم ميتين "
حك ذقنه وابتسم وهو يترك الكأس واتجه اليها هى وصديقاتها
" قاسم " ابتسمت دعاء واقتربت منه لتصافحه
نظرت اليه وعد بابتسامة ونظر اليها هو ايضا بابتسامة
" ايه يا دودو مش هتعرفينا؟ "
ابتسمت " دي يا سيدي وعد البيست فريند بتاعتي..وده قاسم يبقى ابن شريك بابا في الشركة "
ابتسم وامسك بيدها ليقبلها " شكلك زي القمر يا وعد "
ضحكت برقة " ده من ذوقك "
" معاكي حد في الحفلة ولا لوحدك زيي؟ "
" لا لوحدي "
" ترقصي معايا؟ "
ابتسمت وقد اعجبت به ظاهريا " وليه لا "
امسك بيدها ونظر لدعاء " هخطفها منك يا دودو شوية "
