#اسكربت كامل 🥹♥️.
- عمو عمو تاخد عسلية!
مش بحبها.
- طيب ما تجرب تدوقها من إيد يتيم!
ما أنا لو بحبها هاكلها.
وبعدين بصيت لعيونه اللي كلها حكاوي وطلعت من جيبي عشرين جنيه وقولتله: " خد دول! "
وبعدين سيبته وروحت قعدت على تنده وحطيت إيدي على دماغي وافتكرت كل الكلام المؤذي اللي اتقالي بسبب وزني وشكلي، من أصعب المواقف اللي بتعلِم جوا القلب هي التنمر على الشكل والجسم والملامح والصحة!
عشان دي الحاجة الوحيدة اللي مش بإيدينا نغيرها.
ببص لاقيت الطفل بتاع العسلية جه ونزِّل إيدي من على وشي وقال: " تعرف إن ملامحك حلوة أوي ياعمو "
بصتيله باستغراب لإن ده أول واحد يقولي كدا وكمان ده طفل فمش هيعرف يجاملني!
بصيتله وقولتله: " أنا عمري ما حد قالي كدا "
أنا بقولك كدا ياعمو عشان ماما قالتلي قبل كدا إن الكلام الحلو بيطلع السما وكمان بيحلي الإنسان.
- إزاي ده؟
يعني لما أقولك شكلك حلو ثقتك في نفسك هتزيد وهتبدأ تهتم لحد ما تبقى أحسن، لو عندك مرض وحش نفسيتك هتتحسن وممكن العلاج يجيب نتيجة فتخف.
- ومين قالك الكلام ده؟
محدش قالي حاجة، بس ماما كان عندها السُكر وسمعت الدكتور وهو بيقولنا إن نسبته عالية وممكن تموت في أي وقت لو زعلت على طول، فكنت دايمًا بقولها يابختك ياماما دمك فيه سُكر وانتي السُكر نفسه.
كانت دايمًا بتضحك ومش بتزعل أبدًا لحد ما السُكر راح وفضلت ماما قطعة السُكر في حياتي ومسابتنيش وراحت لربنا زي بابا.
وكمان كنت بضحك ماما على طول عشان أخو بابا كان بيزعل مراته كل شوية وماتت من الزعل، أنا مش بحب أشوف حد زعلان عشان ميموتش، وكمان إحنا كلنا حلوين.
- أنت جميل أوي على فكرة.
تأثير الكلام الحلو هو اللي خلاك تشوفني جميل، بس ممكن يبقى شكلي حلو ومع ذلك متحبنش بسبب لساني.
- معاك حق الناس مع الكلام الحلو بتزهر وتحلو.
مشيت من المكان ده واشتركت في جيم، حبيت ملامحي ووثقت إن أي عيب بيتصلح بالعزيمة، وإن ربنا مبيخلقش حد بعيوب غير عشان تكون إبتلاء ولو الشخص اتعامل معاها صح هتبقى ميزة بتجذب ليه الناس النضيفة.
خسيت بشكل ملحوظ، ونزلت شغلي بدون كسوف، ملامحي اتغيرت ورجعت لحياتي الطبيعية.
روحت نفس المكان لاقيت نفس الطفل بس معرفنيش!
لاقيته جاي ناحيتي بابتسامته المعتادة وبيقولي:
" تاخد عسلية؟ "
هاخد عسلية ♥
الناس بتتغذى على الكلام الحلو ♥
الكلمة الحلوة زي السحر بتشفِي..
سليط اللسان تقع حسناته دون أن يشعر ويتفاجئ بصحيفته.
الكلمة الرقيقة تجعل الإنسان بخير ولو كان يُصارع أسوأ أيّامه، لأنها سماويّة.
"إليه يَصعد الكلم الطيّب". ♥🥹.
