ياديرة وسط الضلوع معمورة ..سكّانها بين القوافي والالحان

البارت العشرين

ونين بصراخ وضحك:ءءء لا وقف يحماررر بتموتني
بدر بضحك :تستاهلين ،،بسم الله عليتس اضحكي شوي ما يضرتس
............................................
فجأة دق الباب
ونين بانزعاج :اكيد انها المشعوذه جات
بدر قام بيفتح الباب: اصبري اشوف وش تبي المشعوذه ع قولتس
فتح الباب وشاف اصايل :نعم!
اصايل بتمثيل للبراءه:كنت انتظركم تحت وما جيتو ،كنت ابي اعرف وين غرفتي
ونين من ورا بدر :خذي لتس اي غرفه لانها فتره وتروحين
اصايل ما ردت ومشت
دخلو غرفتهم ودخلت ونين الحمام تبدل ملابسها( يكرم القارئ)
لبست بجامه دافيه ورجعت انسدحت
جاء بدر وانسدح جنبها
ونين ضحكت:احس جاتني نرجسيه الحين ودي تشبعها
بدر :سمي يادهر قلبي ورجعانه
انتي الي ما تكفيتس كلمة هلا
يا تنقال لتس ابن الذيب
لبيه ياعروق قلبي وسمي
ونين :اه قلبي ما يتحمل كمييهه اللطافه
بدر بضحك غمز لها: كيوت وعلومه غانمه ولا
ونين ضحكت وضمته :هيا ننام بكرا ينتظرنا دش من الهواش
بدر طفى الضوء الي جنبه ونامو باحضان بعض
_
في بيت الجد صهيب
الجد بغضب :من سمح لكم تخلونها تروح معه
وهو الخفيف لعبت عليه بكلمتين معسوله وخذاها معه ولا كأني حذرته هذلحين وش بيقولون عنا الناس !
فارس بتردد :يبه بنتي ما سوت غلط تبي مع رجلها
وانت الله يهداك عرّسته غصب عليه
الجد بحده :اص اص ولا كلمه خلوهم يجون وبس !
محمد بتهدئه للوضع:خلاص هدو يجماعه الموضوع بسيط وما يستاهل كل هالانفعال
الصمت سيطر ع المكان
فجاه نطق الجد :يلا كل واحد لفراشه
تفرقو وراحو غرفهم

انتهى اليوم بخيره وشره عليهم وابطالنا نايمين ولا يدرون وش الي ينتظرهم

الصباح عند ابطالنا
ونين صحت قبل بدر
راحت للحمام وتوضت وصلت بعدها قامت تاخذ لها شاور تريح اعصابها وتجهز نفسيتها لهوشة جدها
طلعت ولبست فستان احمر وخلت شعرها ع طبيعته ( شعرها ناعم ولا يحتاج استشوار)
مشت لحد السرير وجلست ع الطرف
باست عيونه :حبيبي ما ودك تقوم؟ ولا تنسى لازم نجهز نفسياتنا للهوشه الي بناخذها من جدي
بدر فتح عيونه ولف لها :ياحلو وجهتس وحلو الاحمر عليتس اشهد انتس موتن حمر
ونين ضحكت بخجل :مو وقت غزلك جدي بخيلي وجيهنا حمراء من التصفيق
بدر ضحك :اي والله انتس صادقه
راح وخذا له شاور وصلى وتعطر
ونين جابت العوده
بدر فتح شماغه وحطه ع اكتافها
ضلو يتأملون ببعض لين سكرت ونين عيونها بخجل
قرب بدر وسرق بوسه سريعه
جاهلين الي كانت تناظرهم بالخفى
سكّرت الباب بشويش لاجل ما يعرفون انها شافتهم
راحت وتجهزت بسرعه
اصايل بقهر: اذا ما اخليكم تنفرّون من بعض ما اكون اصايل
طلعت وجلست تنتظرهم بالصاله
نزلو مع الدرج وهم يضحكون
التفتو فجأة الا وهي قدامهم
ونين انصدمت وتنرفزت لكن ما قالت ولا شيء
مشو وتركوها جالسه لحالها
اما هي لبست بسرعه ومشت
ركبو السياره وكان الصمت يعم المكان
بعد فتره وجيزه وصلو بيت الجد صُهيب
الجد بغضب وبصراخ :محمد يامحمد وصمخ ان شاءالله
الجده بغضب :ابك تدعي ع ولدي وشفيك انت قالب عليهم ترا مالهم دخل بونين ورجلها!
امّا من ناحيه محمد كان يستقبل ونين وبدر
محمد بحنيّه :ياهلا بالي لهم الخافق يهلي ارحبو تراحيب المطر
ونين باست راسها ويده :من يرحب يبقى وله بالخافق مكانه ياعمي
بدر سوا نفس فعل ونين وجاء بيرد الا ويسمع صراخ جده
ونين بتوتر :واضح ان جدي معصب وبيسفل فينا
محمد بضحك:يوه لو تشوفون وجهه امس يوم درا انتس رحتي معه ،،، بعدها تذكر موضوع اصايل واستغرب وينها
محمد باستغراب :وينها زوجتك يابدر؟
بدر تلفت واستغرب من عدم وجودها قال بعدم اهتمام:مدري يمكن بالسياره
محمد راح يفتح الباب وانصدم ببكاها او بالاصح تمثيلها للبكاء
محمد ارتبك وهو ما يعرف يتصرف مع هالمواقف ابد :افا وانا عمتس وش فيتس يابنتي ؟
اصايل هزت راسها بـ مافي شي وكملت تبكي
ونين جات باستغراب :وشفيتس يالحيّه تبكين!
محمد استغرب من اسلوب ونين وهو ما تعود يشوف ونين تقل ادبها مع احد او ما تحترم مشاعره
محمد:عيب ياونين وش هالكلام
ونين بعدم اهتمام :عمي لا تلعب عليك بدموع التماسيح
اصايل بتمثيل للبكاء:شفت اسلوبها معي وهذا ولا شي ع الي سووه فيني بالبيت
محمد بحده:وش الي اسمعه ياونين انتي ورجلتس الي تقوله صحيح!
بدر :يوه بدينا ياعمي لاتغرك بدمعتين كلنا نعرف نبكي وننهار ونكذب
محمد زفر لثواني :الله يهديكم ،،،، يلا يابنتي نمشي للداخل وتسلمون ع جدي وتراضونه
اصايل ببكاء وانهيار كاذب :لا ما يكفي ليش ما تهتمون فيني عشاني يتيمه صح ! ولا عشان ما عندي سند
دام هذي اولها ينعاف تاليها وش عاد تبيني اسوي ! عيالكم الي مدللينهم جالسين يعنفوني بس عشاني تزوجت عشان اقدر ابدر نفسي وخواتي واصرف عليهم
وش الخطأ الي سويته !
ونين استعت عيونها من كذبها: لعن الله ذا الخشه يالملعونه وش سوينا لتس ! لا تكذبين ! تبين اعنفتس الحين عشان تفرقين بس التعنيف والتجاهل تعالي
شمرت اكمام فستانها وتقدمت بتضربها بس مسك بدر خصرها وهمس باذنها:شغلها عندي بالبيت انتي استني خليها
ونين هدت ع طول
محمد كان تحت تأثير الصدمه :نتفاهم بعدين ، حقتس علينا يابنتي وابد ما سويتي غلط الحين مسحي دموعتس وبعدين اوريتس فيهم
وطالع في بدر و ونين نظره يعرفونها احق المعرفه
اصايل مسحت دموعها وابتسمت لهم بخبث
ونين طالعتها بقهر وانقهرت اكثر ان محمد مو مصدقها
مسكت بدر ودخلو قبلهم
اصايل رفعت كم فستانها وورته ندبه قديمه بيدها لكن رقعتها بالميكب
اصايل بشهقه:شوف هذي هي الاثاار اذا مو مصدقني
محمد اشتعل غضب الدنيا كله فيه من شاف الندبه او الكدمه بمعنى آخر
ونين وبدر بعد ما دخلو جو بيبوسون راس الجد لكن صد عنهم
ونين بهدوء:جدي
الجد قاطعها بغضب :اسكتي ولا كلمه انا مو منعتس تروحين معه وشوله تروحين وانا قلت لتس لا !
ونين بنبره قريبه للبكاء:وشلون ما اروح معه ! زوجي هو شلون اخليه لها ما اتحمل احد يشاركني فيه! ما اتحمل مقدر والله كان لي قدر عندك وتغليني سامحني هالمره
ياجدي الزواج والله ان قلبي لو تطلعه ما تحصل الا رماد
احترق قلبي وانا اجي عرسه واسمع الناس يتهامسون عشانه تزو علي
يرضيك !
الجد بهدوء وبغبنه:كل ذا شايلته بقلبتس علي ولا كلمتيني
ونين ببكاء:وش اقولك يعني ، بذمتك تقولي الصدق لو كنت قد قلت له بتسوي الي قلته ! بتلغي الزواج عشاني !
الجد ما رد
ونين بعبره:لا صح! مستحيل ! انا داريه حتى لو ما تكلمت
الجد بتدارك للوضع:امشو اجلسو وانتي مسحي دموعتس لا تشوفها المره
ونين انغبنت وصدّت عنه
طلع الجد بدون لا يناظر فيها
بدر ضمها لصدره بقوه وباس راسها
بدر بهدوء:ماعليتس خليتس ساكته ولا تكلمينهم
ونين هزت راسها ولا تكلمت
مسحت دموعها وعدلت شكلها وطلعت
مشو للصاله وسلمو ع جدتهم والباقين
الجد :اصايل وانا جدتس روحي سوي لرجلتس شاهي
اصايل:ابشر ، وين المطبخ
ملاذ :انا ادلتس
قامت معها و ورتها المطبخ
اصايل بشر: الحين وقت اللعبه الصح
سويت الشاهي فجاه حطت مويه غريبه هي جايبتها
وطلعت وعطته لبدر
اصايل بتمثيل للبراءه:بالعافيه
ونين انقهرت من حركة جدها وشوي وتنفجر عليهم
ودها تصرخ وتفرغ الغضب الي بداخلها ع اي شخص
مكسوره حيل من جدها لهدرجه مالها خاطر عنده! لهالدرجه ما اهتم بكسرها ! ، مرهقه وحيييل من هالمعاناة !!
شرب من الشاهي بقرف وقال بمجامله:تسلم يدتس
اصايل بغنج:ههه ولو مابينا!
ونين تمووتت بداخلها ودها تحرق هالدنيا بما فيها!
جود وملاذ كانو حاسين في ونين لكن ما كان في يدينهم شي
نايف همس لنواف: كسرت خاطري الضعيفه
نواف :وانت صادق لكن وش بيدينا نسوي الود ودي انتف ملعونه الصير اصايلوه وارميها !
الجد بنظره حاده للبدر :اشرب اشرب الشاهي كله لا يبرد
بدر شربه دفعه وحده وقام لغرفته
ونين جلست شوي معهم وهي ساكته
فارس وقّف :ونين الفارس تعالي وانا ابوتس
ونين وقفت وطلعت معه غرفة ابوها وامها
فارس بحنيّه :وشفيها عروق قلبي ! مين مضايق هالوجه الزين ! ليكون رجلتس اذا هو خليني اتوطى ببطنه
ونين :لا يالفارس ليته بدر كان تصرفت انا وياه لكن جدي ! وش السوات معه ! واقف مع اصايل ويشوف اني انا الغلطانه لاني رحت مع بدر ! يبه ساعدني يايبه كسرني جدي تكلمت معه وبيّنت له موقفي لكن ما طاع!
فارس ضمها وهو مقهور حيل عليها:ماعليتس يابنتي جدتس كذا من يوم انخلقنا ! عاد انها خفت قسوته شوي
ونين طالعت في وجهه: اذا كذا اقسى من الحجر شلون زمان! ،،يبه اصايل مفتريه علينا ان حنا نعنفها ! يبه ما سوينا لها شي
طول الوقت متجاهلينها وبغرفتنا ما جينا صوبها ابد!
فارس :زين انتس علمتيني ترا جاني عمتس محمد وقالي بالسالفه كلها ولا رضيت اصدقتس لين اسمع العلم كله منتس انتي ! ولا ارضى من غيرتس ،ورته كدمه ع يدها وهو صدق
ونين اتسعت عيونها بذهول من الي سمعته : لا عاد مو لهالدرجه! قولي انك تمزح تكفى ! وعمي محمد صدقها! صح !؟عطانا ذيك النظره يوم جلست تنزل دموع التماسيح قدامه
فارس :لا تخافين وانتي بنت الفارس وانتي الونين وعنقود فارستس !.
ونين ضمته ولا تكلمت:الله يخليك لي ذخر
فارس:وياتس يالسكر المعقود !
ونين شدت ع حضنه وبكت
فارس تنهد :وراتس يابنتي من الصبح تبكين !
ترا دموع العين ماهي خفيه!
ونين بدموع:قلبي ناغزني مو مرتاحه
فارس :لا تخافين يابنتي ارتاحي مت بيصير الا الي كاتبه ربي !
ونين :والنعم بالله

_
عند بطلنا
كان يشعر بصداع فضيعع وشرب حبتين بنادول ولا فاد معه!
انسدح وطفى كل الانوار وكانت واصله معه من الصداع
دخلت ونين وفتحت النور !
بدر صرخ:طفيي النور طففيي!!
ونين خافت وطفته ع طول !
ونين :بسم الله شفيك!
بدر :اسكتي اسكتي مابي اسمع احد !
ونين سكتت وراحت تبدل ملابسها
طلعت وانسحدت جنبه وضمته هو ما بادلها وضل ساكت ... ونين تفهّمت رغبته بالهدوء وما قالت شي !
اما بالاسفل راحو غرفهم يقيّلون --> قيلوله

................................................

وانتهى البارت يحباني تعويض عن البارت الي ما نزلته لكم امس ! عطوني رأيكم فيه وهل تحسون ان صداع بدر شي طبيعي او لا! ❤️❤️❤️