ياديرة وسط الضلوع معمورة ..سكّانها بين القوافي والالحان

البارت الثاني والعشرين

ركبو بسياره فيها بدر و ونين والثانيه فيها جود وملاذ ومُهاب وكانو ملاذ وجود يتهاوشون مين تركب قدام
ملاذ :ياخي خليني اركب الحين دايم وانا ورا
جود :تعقبين انا الكبيره مع نفستس
ملاذ باستسلام :طيب وبالرجعه انا قدام
جود :تمام
ركبو وعم الصمت وطبعا راحو يمرون ودّ والجازي

-
في مكان جديد علينا بوسط الرياض
عنـد ال سلـطان
قصيـد تدندن بروقان:قولي وين القاه سلطان قلبي مقدر على فرقاه رحمتك ربي
دخل سلـطان المطبخ من وراها :يازوجة السلطان حني على الغلبان
قصيد ضحكت والتفت له :يابنت السلطان مو زوجته غلطان يالحبيب
سلطان تقدم وحاصرها عند درج المطبخ :لا ياحبيبة السلطان بالعاني اقولك زوجة السلطان الحين صرتي زوجتي ما نعترف ببنت سلطان وشرايك؟
قصيد ميّلت شفايفها :ما ندري احسني ما اقتنعت
شرايك بقصيد السلطان يكون احلى!
سلطان بخبث :اي سلطان؟
قصيد ابتسمت :ابوي طبعا !
سلطان باسها مبسمها وقال بسخريه:تمام
قصيد دفته :ورع شفيك انت لا يجي احد ويشوفنا
سلطان:واذا شافونا تراك زوجتي والزواج بس حفله يجونها الناس !
قصيد ضحكت بسخريه:اي واذا شافونا تخجل اكثر مني !
سلطان باسها مره ثانيه وطلع بسرعه وهو يضحك ع وجهها

_
تعـريف بشخصياتنا الحلوين
الجد عُدي متوفي هو وزوجته
عندهم ولدين
الابن الاول
سلـطان عمره ٤٩
زوجته هنادي عمرها ٤٤

ابنهم الاول ذيب عمره٣٠ متزوج وعنده ابن واحد عمره سنه اسمه هتان ،زوجته اسمها منى عمرها ٢٦

الابن الثاني ليث عمره ٢٣

واخر العنقود السكر المعقود اسمها قصيد عمرها ١٨
مملكة ع ولد عمها 

الابن الثاني للجد عدي
مشعل عمره ٤٥
زوجته المها عمرها ٣٩
سلطان عمره ٢٦ مسّمى ع عمه
عباير عمرها ٢٤ متزوجه زوجه اسمه جسّار

مواصفاتهم ما يحتاج اقولها بتتعرفون عليهم مع البارتات حبايبي
" بيت مشعل "
مها : يايمه الله يهديكم خلاص بلا هواش
سلطان مقيّد قصيد و عباير وهم يصارخون
عباير بصراخ :ياخي خلك مع مرتك انا متزوجه ما يصلح تلعب فيني زيها يمكن اكون حامل وجعع
قصيد ضربتها : عباير انتي طويله وش فايدة طولك الحين ؟؟
سلطان ضحك ع غباء قصيد:قصيدي وش دخل طولها الحين
قصيد :تقدر تصفقك وتشد شعرك بس هي غبيه
عباير ضربت راس قصيد:كلن ياخذ حقه بنفسه وش دخلني فيك
قصيد ناظرت سلطان ورمشت بعيونها ، سلطان ما قاوم نظراتها وفكها ع طول
قصيد ضربته وهربت وهي تضحك ،
المها:بشويش ع قليب ولدي يا قصيد
قصيد ضحكت :ياعمه ولدك خفيف وش اسوي له !
المها بضحكه خفيفه:والي يشوفك يقدر يثقل؟؟
قصيد تورد وجهها بخجل ،ضحك سلطان على تعابير وجهها :الله يسامحك يا امي خجلتي قصيد السلطان
قصيد دخلت بحضنه وحطت وجهها بصدره وهي شوي وتموت من الاحراج، ضحك سلطان وشالها وركض فيها
جات الخادمه وهي تنادي عليه :سولتان سولتان
ضحكو قصيد وسلطان ع نطقها لاسمه نزلها سلطان  :هاه وشفيك؟
الخادمه :بابا مشعل نادي انتا
قصيد كانت ميته ضحك ع كلامها ضحك سلطان من ضحكها :يكفي يا قصيد شوي شوي ع نفسك
قصيد وهي تضرب يده :مقدر مقدر تضحكك يا سولتان
ضحك سلطان من نطقها وتقليدها للخادمه :قصيدي بتصدعين هدي شوي
بعد فتره وجيزه من محاولات سلطان تهديء قصيد هدت وراحت بيتها مع ليث
بالسياره
ضحكت قصيد فجاة بعز الصمت
استغرب ليث ضحكها:وشفيك انهبلتي؟
قصيد ضحكت ولا قدرت ترد لين ضحك هو من ضحكها ومحاولاتها تتكلم ولا قدرت  بعد محاولات نطقت :اهخ ليثي ودي تسمع نطق الخادمه لسلطان موتتني ضحك
ليث :تقدرين تقلدينها ما تصعب عليك
قصيد ضحكت ودموعها تنزل :ركضت وهي تنادي سطان بصوت عالي سولتان سولتان اه موتتني مقدرت انت لو تشوف الموقف مع وقفت من الضحك
ليث بضحك :ما تدرين يمكنها تعرف تنطق اسمه لكن تدلعه
قصيد وهي عارفه انه يمزح :لا والله بعد سولتان ما يناظر بوجهها حتى ، المهم ابوي بالبيت؟
ليث :اي توه جاء
وصلو البيت ونزلت قصيد ركض: سولتانيي
ضحك سلطان ع نطقها وضمها :وشعندك انعديتي من عاملتهم
قصيد ضحكت:بعتمد هالاسم يضحك
سلطان :لا خليك ع سلطاني احسن
قصيد اشرت ع خشمها: على ذا الخشم !
سلطان باسه :عليه الشحم !
_
بالديره
وصلو للبر ونزلو وجهزو اغراض الشاهي وشبة النار
نادر:الجو جو اثنين
ملاذ ضمت ودّ:جو قصيد وشبه نار وشاهي ومن تحب ؟!
نادر :صح عليتس هذا الاساسيات
ونين جلست وغمزت له وهي شاكه في وضعه  :كلها متوفره الا من تحب يمكنّه بالجلسه وحن ما ندري يانادر
نادر توتر من نظرتها وشتت نظراته :لا طبعا ما احب بس اقولتس يعني
ونين :ايه ع اني متاكده من الي ببالي بس بحاول اصدقك
جازي :هوب ياجماعه علمونا تلمحون ع ايش؟
ونين ارسلت لها بوسه :سلامتس ياقلبي اذا تاكدت من الموضوع بعلمكم
ودّ كانت سرحانه ومو معهم ابد
فجاة سمعو اصوات النياق وشافو وحده وهي جايه البنات صارخو بفجعه وقامو العيال وهم مخروشين ما يدرون وش ذا لانها مو مبينه بس عيونها الي تلمع
نادر عرف ناقته ع طول وراح لها
نادر ضحك :هدو يجماعه هذي الناقه بس
ودّ قامت لعند ونين وخايفه :ونين تكفين وخروها عني
الجازي ضحكت من اختها:عندها فوبيا من النياق
نادر بملعنه قرب الناقه منها ونين صرخت وتمسكت هي بعد بالودّ :يمهه نادر وربي لو ما توخرها يانادر
نادر بضحكه خبيثه:وش بتسوين يعني ! لو اشوتس بشويش طرتي انتي وولدتس
( بتستغربون ان ونين تخاف من النياق ! لان كانت تروح للمزرعه جهة الخيول ولا تروح لجهه النياق لانها تخاف منها )
بدر بضحك قام وخذاها من نادر وع طول فزت ونين وركضت وراه :وربي لاوريك يانادر
بدر ودا الناقه بسرعه وهو يعرف محارشات نادر و ونين تنتهي يابقاتل يامقتول
نادر كان يضحك ولا همه ويهرب ونين خذت اقرب نعال ورمته عليه وجا براسه ورجع يركض وراها وانقلبت عليها
ركضت ونين لبدر وهي تضحك بنصر
بدر يخبي ونين وراه:تخسيي تقربها وهي حرم البدر
ولف ع ونين وضرب راسها بخفه:وانتي يالخبل بتصيرين ام وانتي باقي هبله !
ونين :ياخي شوفه هو الي بدا وانا ما اخلي حقي ابدا!
التفتو ع الي بالجلسه لقوهم ميتين ضحك ع اشكالهم
بعدها استوعب ودّ والجازي وقالو بنفس اللحظه:لحظه !
انتي حامل !
ونين ضربت جبينها بغباء :يوه خربت المفاجاه
البنات قامو وضموها :الله ياونين بتصيرين ام يالخبله
ونين ضحكت وبادلتهم بنفس الحضن
رجعو للجلسه بوضع طبيعي وشغلو اغنيه مو مهم نذكر اسمها !
وغنو بعدها جابو الدجاج وع اساس بيشوونه
كانت ع ودّ السلطه و الجازي تسوي رز
وجود تسوي القهوه والشاهي و ونين عليها الدجاج
ملاذ ترتب الجلسه وتغسل المواعين !
ونين نسيت من الدجاج الي ع النار وراحت تجلس وهي تحس بألم اسفل ظهرها
وجلست فتره شمت ريحة حريق قامت بسرعه للمطبخ الي بالخيمه :يوه نسيت الدجاج ع النارر
ركضت ولقت الدجاجه سودا من الحرق
ونين حطتها بصحن وهي ميته ضحك
ودتها لهم وحطتها ع الارض
مُهاب شهق وطالع ف الدجاجه:سودتي وجهنا عند الرجال يالرفلا
ونين :بدوري شرايك بالدجاجه
بدر طالع عيونها ومو عارف وش يقول :ءء لا حلوه ماشاءالله بعطيتس اجازه عشان ما تتعبين طول فتره حملتس
نايف طالع فيه وكتم ضحكته ع شكل بدر
نواف كان سارح وساكت طول فتره طلوعهم
ملاذ :نواف وين وصلت؟
نواف ناظر فيها بشرود:هاه؟
ضحكو على فهاوته
جود :شكله مغربلك الحب
نواف :والله غرابيل الله يعين
انصدمو من عدم مكابرته وانكاره للامر ،وعرفو صدق انه متغربل من الحب ع قولتهم
خلصو يومهم بخيره وشره ورجعو للبيت وبنفس الترتيب
رجعو ونين وبدر واصايل كمان معهم
-
الصباح
"بيت الجد صهيب "
راح نادر لملاذ الي كانت تسوي الشاهي :ملاذي بقولتس شي
ملاذ :لبيه؟
نادر حك راسه بتوتر:انا احب وحده وابي تساعديني تروحين لها وتجسيّن النبض واذا حسيتي انها عادي عندها بخطبها !
ملاذ بفرحه لاخوها :صدقق!! مين هي ؟؟
نادر :ودّ
ملاذ :زين ما اخترت البنت تجنن بسم الله عليها ولطيفه
نادر:طيب اسمعي روحي لأمي وقولي لها الموضوع كنتس انتي تبينها
::::::::::::::::::::::::::::::::::::::::::::
انتهى بارتنا لليوم يا اجمل ما خلق ربي
  ،، والختام ان شاءالله بيكون في بارت ٢٤
لان الروايه استنزفت كل طاقتي وبرجع بروايه احسن منها باذن الله
عطوني مهله وانزلكم اطول بارتين بالروايه والي حتكون الختام😔❤️❤️❤️❤️❤️
واكيدد ما تنسون تعطوني رأيكم بشخصياتنا الجديده !