أنت إم الماضي

38

بلقيس : احس عند ابوي هواي سوالف بس المكان والزمان ما يسمح خلصت الزفة والرجعنه كلمن لبيته ابوي راح يم الزلم وانه رجعت يم النسوان جنت بالمطبخ اوجه بالنسوان علمود صب العشة طبعاً انه رحت للبيت بدلت لان اكو دخلت زلم وانه ملابسي مايرضه بيهم حمد

- ها بلقيس خلص العشة ؟
- عمة بس جاي انصب .
- ام حمد : چا وين الملطمات ليش بحدچ؟
- ما ادري بس ماكو مشكلة انه مو بحدي .
- انه اعلمهن الملطمات يتمرگصن وعايفاتج بحدچ.
- عمه عوفيهن عرس اخوهن وخولة رادت اساعدني بس ما خليتهة خفت عليهة .
- وهذا حيدر يمچ ؟
- اي گاعد يمي من مساع

ضحكت وراحت خلصنه صب عشة ردت اروح لبيتي ما قبلت ام حمد اله اتعشة انه ما ارد ابقة لان الوجوه ثگيلة علية بس علمود عمتي گعدت بصفهة وبصفي حيدر گاعد اوكل بي

فتنه : چانتي ما كفاچ اخذتي اخوي من مرته راحتي انوب اخذتي ابنهة منهة .
- ام حمد : فتنه زقنبي وگومي .

سويت روحي ما اسمع وبقيت اوكل بحيدر واباوع على خولة الي احسهة اتأثرت بحجي فتنه وكانهة تريد تخسر ابنهة صاحت علي

- حيدر تعال جاري انه اوكلك.

هوة جلب بية ما قبل .. رادت تگوم انه گمت من السفرة وشلته وانطيته الهة اترخصت وسلمت على العروس الي بسملة بعدنه بالبداية تخز بيهة وحاقدة سمعت صوت زفه الزلم جايبين منصور گالت عمتي اجو گومن ودت مرت اخوجن لغرفتهة
رحو همة وانة طلعت من باب المطبخ طلعت امشي على كيف واتحسر لو انه ما مدخلة بعركت حمد ومنصور بذلك اليوم چان عندي بنية وبگد حيدر اباوع للسمه والدمعة بعيني .. يارب لا تحرمني من الخلفة .
وصلت لبيتي دخلت ذبيت حجابي وشغلت الصوبة سمعت الباب اندگ بس الدگه خفيفة استغربت منو لفيت حجابي وطلعت اصيح منو
محد يرد خفت منو هذا بس اسمع صوت بجي جاهل فتحتة والگة حيدر
يبجي
- ولك انت اشجابك هسة ايسوني بايگتك
- احبچ.
- بعد روحي تعال امشي اوديك لمامة .

شلته ورحت بية والگة خولة ادور علية من شافتني شايلته اجت علي واخذته وضلت صيح

- چا انتي ما كفاج حمد هسة درتي على بزري .
- صلي على محمد شبيج خولة .
- ما تستحين على روحج انه مرفرح گلبي علية حسبالي صاير بي شي وانتي ماخذتة..
- ما اخذته انه رحت لبيتي وهوة اجة وراي من شفته جبته الج انوب فوگهة.
- فتنه: خية خولة لا تلوميهة ما تحس بيج عبن صارت عاجر (عقيمة) وما تخلف بعد ما تعرف لوعت البزر .
- بلقيس: فتنه من الصبح لهسة انه متحملة مغثتج احترمي نفسج من تحجين وياي لا اخلج فرجة لأمت محمد .
- فاطمة : خية ستهدي بالرحمن منا ناس وعالم
- بلقيس: انه رايحة عود انتي لزمي ابنج عدل وانتي يا فتنه اذا مرة ثانية اتجاوزتي اروح واگل لحمد وهوة يعرف شلون ايدبچ الواضح عندج نقص تربية.

طلعت فاير دمي هاي الخايسة تشمت بية وهاي خوله عشتو اعاملهة عدل اگول خطية انه اعلمچن امشي شايطة دخلت للبيت وحمد بوجهي