أنت إم الماضي

24

بلقيس: صارلي سبوع عند اهلي اتصالحنة انة امي وابوي ورجعت المياه الى مجاريهة وية اهلي تقريباً لان چنت اتفتدة النقاشات باي شي ايخص حمد او زواجي عزمتني خالة سليمة اكثر من مرة مالي خلگ اروح ما طلعت من البيت  ابد ايجوز لان تعودت هناك ما اطلع...
أمة حمد ولا اجة ولا سأل وانة حيل  نقهر.. و الندم هذا اكثر شعور حسيتة لان  من بينتلة  اهتمامي بي  شاف روحة علية ... على العموم خلي عسا لا اجة انة مرتاحة عند اهلي رجعت لغرفتي وانام على جربايتي الي ليهسة عايفيهة على حطتهة... چان عندي ألم بطني حيل ايذيني فگاعدة بالغرفة اغلب الوقت لو جوة چنت متمددة وحسبة تاخذني وحسبة اجيبني دخل علي وسام

- الله بالخير.. بلقيس ليش گاعدة بحدچ اكو احد مضوجچ
- الله يساعدك... لا محد مضوجني بس عندي اشوي ألم.. رجعتو كلكم؟
- اي حتة ابوي رجع.. امشي اخذچ للدكتور .
- لا ما يحتتج اشوي مغص وايروح.
-متاكدة عليج الله.
- اگلك البارحة حجيت وية امك علمود موضوع هاي البنية الي تريد تخطبخة .
- اي؟
- الي فهمتة منهة هية ما معترضة بس ابوي معترض...
- هذا الشي مو جديد كلنة ندري.
- الي ما تدري شنو سبب الرفض مال بابة.
- لان وياي بالجامعة وما ايريد وحدة مو من ثوبنة... ومن هاي الخرابيط.
- لا وسام كلكم هيج حسبالكم  من گتلولي ما اقتنعت وامي هم كالتي نفس الشي گتلهة مستحيل هذا السبب وضغطت عليهة وحجيتهة السبب ابوك ايريد ايزوجك فاطمة بنت عمو عزام والموضوع  حاجين الاثنين بي وابوي مستحي منه..
- شنو شنو انة لعبة بيد ابوي لو جاهل ومالي حچاية بلقيس انتي تحجين صدك؟
- وسام اهدة لا اتخليني اندم لان حجيتلك خلي الموضوع علي انة احلة الك.
- لو تنگلب السمة على الگاع ما ازوج بت عزام.
- وسام لا اصيح جاي اگلك خلي الموضوع علي انة احله.
- ابوج قافل انتي اشلون تقنعي؟
- مراح اقنع انوك راح الغي الموضوع من يم بيت عزام بعد ما ايضل عذر لبوك اشوفة انسب حل.
- قصدچ تحچين ويه حمد؟
- اي افهمة الموضوع على طريقتي  حمد متفهم احسن من ابو.
- شنو تگليلة؟
- لا تخاف اگله ما احجي على البنية شي ايضر سمعتهة يمهم افتهم مخاوفك.
- تتوقعين الموضوع ينحل؟
- اي لام فاطمة يجون عليهة هواي خطابة اخلي حمد يقنعهم بواحد ونفض الموضوع.
- وين الله واصير چارة لعلتي.
- وسام لا تتوقع حل سريع وفترة قصيرة فأصبر وانت راح اطلعك منهة مثل الشعرة من العجين.
- اگدر اسألج سؤال؟
- لا لا  تسأل اذا شي ايخصني ما اريد افتح اي موضوع.
- على راحتج..

طلع وسام وسد الباب و انضافت حسبة جديد ... شلون احل موضوع  وسام وانة وية حمد مثل الغربة  من گلة بابة اريد بلقيس تروح وياي ما حجة اي شي وحاة سلامة الي بس لان يمهم... يارب شنو الغيرة معقولة علمود سبب تافه سوة هيج مشكلة... اوف احس بفراغ من ما اشوفهة..
وراح اسبوعين  وحمد ماكو مالة صوت وبدت علامات الاستفهام تبين عند اهلي.. انة ما انطي مجاي اي احد يفتح وياي اي موضوع واتصرف كانو شي ما صاير وما بينتلهم  الهم انة ضايجة  او مقهورة بس داخلي نار مشتعلة على الرغم من علمي بحمد جاي ايأدبني ومتعمد هيج ايسوي بس مشتاقتله اشلون هنت علي هلگد ايعوني مو ايحبني  معقولة نساني ٢١ يوم ما يدري بهوة داري  المشكلة تفكيري كلة بي....