بلاي ي جابر بعناد روس الرجال

بارت 29

ابو صقر : موافقه بس بعد ماتخلص الثانويه
ابو خالد : تم تامر امر
خالد بهالحضه ذي حس انه وصل السما من الفرحه والسعاده بالوقت ذا الدنيا ماهي سايعته ابد لف على جابر وهو يحاول يمسك ضحكته وبعد دقايق من الكلام بين الكبار والعيال كان قاعدين طلعو برا
وبدو يحضنون خالد ويباركون على الموافقه
نايف : عاد يويلك تزعل اختي
خالد : ازعلك انت عادي ماهي مشكله
نايف ضحك : ي حيوان
خالد لف عليه بطرف عين وصد
نايف لف على صقر وهو يضحك وصقر فهم عليه انه يبي يروح يحارش وعد وجا بيروح نايف لاكن سحبه صقر من تيشيرته : اهجد لا بالعقال
عند البنات
وعد دخلت وجلست جنب روابي وهي للحين متوتره
روابي لفت عليها بهمس : وش بتس ؟
وعد علمتها بالي صار
روابي شهقت وهي تعدل جلستها : صددددققق
وعد قرصتها لما الكل لف عليهم : الله ياخذ بليستس زين
سعاد : وش بلاكن ؟!
وعد : واا شي عمه بس كنا نسولف وذي شهقت
ام جابر : مو زين يبنتي تشهقين كذا سمي بالله
روابي : اسفه يمه
قامت وسحبت وعد معها بدون محد يحس ان وراهم شي
روابي : اييي قولييي شلون وش قلتي وش صار و..
وعد قاطعتها : بسم الله هدي هدي عشان اعرف اجاوب
روابي : اي هديت جوابي ؟
وعد بدت تجاوب على اسألة روابي ولفو بخوف على صوت نايف
نايف الي توه جا : اوووهه العروسه هنا
وعد توترت وجت تنحاش بس مسكها نايف : تعالي افا وعوود اعرف شي احارشها به واتركها مايصير ؟
وعد : نايف اذلف عن وجهي
نايف : اووه خلاص اجل كنت بعلمتس بطريقه ذربه بس انتي تبين الدفاشه اسمعيني ابوي رفض قال معاندي بنات للزواح وان شاءالله مايأثر على اخوتنا و...
وقف كلامه من سمع وعد تقول بصدمه : ايش ؟
ووجهها كان بحالة صدمه هنا ماقدر يمسك نفسه وقعد يضحك ضحك هستيري وروابي شبكة معه بضحك ووعد عصبت وضربتهم قوه ومشت
نايف وهو يتنحنح قال : الفال لتس
روابي وقفت ضحك ومشت بسرعه ورجع نايف يضحك بقوه انه احرجها وهمس بقلبه : اي والله الفال لي ولتس بس لتس مع غيري مستحيل
سالم خرعه من ورا
نايف شهق : ووعمى يعميك ان شاءالله
سالم : وش عنده جابر ؟
نايف وهو توه يستوعب ان كلة عمى هي الكلمه الي يقولها دايم جابر : ههههه ودي اعرف انت وشلون بتصير اب ؟!
سالم : يحلها ربك انا نفسي مو عارف وشلون بصير اب واهاوش عيالي اذا مادرسو واسوي هيبه
نايف: مالك عين تهاوشهم وانت بكبرك مافلحة بدراسه وماعديت الثنوي الا من ورا عصا عمي
سالم : عادي عادي الحياه حلوه ياما انمحطت منها المهم انت تعال وش عندك تضحك مع جنونك
نايف : جنوني انت وش دخلك ؟
سالم : سؤال وجيه بس بتجاوب غصب
نايف : كنت احارش اختي اسأله ثانيه قصر عمرك ؟
سالم : انا قصر عمري تقدر تعيش من دوني ! انا اجاوب بدالك لا طبعاً من يسهر معك ؟ من يسوي مصايب معك ؟ من يتذكر الطفوله معك ؟ من يونسك ؟ والسؤال الوجيه من سبب سعادتك !
نايف : الصدق انت سبب ساعدتي والله ي وليفي وانا مقدر اعيش بدونك ابد يمكن لسمح الله صار لك شي الحقك بنفس اليوم
سالم : يبعد حيي والله
عند ابو جواهر
جواهر : صدق ومتى ؟
سوسن : اليوم وبيقعدون عندي ثلاث ايام تجين ؟
جواهر : مدري بشوف وارد لتس
سوسن : تمام ردي لي خبر
جواهر قفلت من سوسن وراحت عند ابوها لقته قاعد يشوف الاخبار بالتلفزيون جلست جنبه
جواهر : يبه
ابو جواهر : هلا
جواهر : ضايق خلقي تطلع معاي للمول ؟
ابو جواهر : والله يبنتي ماحب هالاماكن اطلعي مع صديقاتتس
جواهر ابتسمت انها وصلت مبتغاها من الطلب وقالت بحزن : صديقاتي مجتمعين عند سوسن ببيتها وبينامون عندها قالو لي اجي عندهم قلت اكيد انت بترفض
ابو جواهر : اي مايصير تروحين عندهم يبنتي وبعدين ابوها واخوانها واهلها كلهم هناك
جواهر : لا اخوانها وابوها وامها واخواتها كلهم راحو جده بيقعدون هناك اسبوع
ابو جواهر : سوسن ابوها صاحب محلات **
جواهر : اي هو عادي اروح عندهم تكفيو ثلاث ايام طفشت بالبيت
ابو جواهر : امس وانتي طالعه وقبله كل يوم تطلعين
جواهر : ماعليه هالمرا بس تكفىىى
ابو جواهر : طيب تمرحين عندهم هالكم يوم بس مو تجين مرا ثانيه تبين تروحين عند صديقاتتس تنامين
جواهر فزت بفرح وهي تحضن ابوها : كفوو والله ابو جواهر
وراحت تتصل على سوسن تقول لها وتجهز شنطتها وتبدل لبسها وتتمكيج وتتضبط
" تقديم للأحداث عرف الكل عن خطوبة وعد و خالد الساعه 11 باليل بعد مانام الكل "
تجمعو البنات والعيال نفس قعدتهم المعتاده بس المرا ذي بدون وعد الي كانت نعسانه ونامت او بالاصح ماتبي تطلع وتسمع كلام من نايف
سلمى وهي تركض عندهم ومعها الشنطه الي حاطه بها كل الفعاليات الي بتسويهم : بنبدا نلعب اسم حيوان نبات جماد بلاد بس يويلكم تغشون او اقول وقفو محد يوقف
الكل : تم
سلمى وزعت دفاتر واقلام على الكل والي رفضو يلعبون عشانهم مايعرفون نوف المها ساره رغد حلا
سلمى : انا بختار حرف ر
وبدو الكل يكتبون ماهي 5 ثواني الا خالد يقول لهم يوقفون
خالد بصراخ : سياااف يغشاش وقف لا بالعقال الحين
سياف : وقفت يلا قل وش كتبت
خالد تنحنح : اسم ريما حيوان رنا نبات رمان جماد ريموت بلاد روسيا
جابر : انا كتبت معك ترا كلهم
خالد : وش كتبت
جابر : اسم ريم حيوان رنا نبات رز جماد رف ( درج ) بلاد رفحاء
نايف : انا نقاطي 30 اسم روابي حيوان راكون نبات رطب
روابي بضحك : زين تذكرت اسمي احسن من بعض ناس
جابر : نسيتك بكبرك ههههههههههههه
روابي : حيواااننن
نايف : ماعليك انا كتبته
وسمعو باقي العيال الي كاتبين 3 والي 2 والي ماكتب اصلاً
وجا دور البنات
سلمى : رغد نبات نبات ريحان بلاد روسيا
وبدو يسمعون باقي البنات وبعد ماخلصو لعب اسم حيوان نبات
سلمى : جبت اونو للبنات وشده للعيال عشان تلعبون بلوت
سياف ضحك : اييي ذي الالعاب الزينه عطيني عطيني اكسر راسهم
سالم وهو يعدل جلسته بحماس : والله لكسر راسكم انا عاد البلوت محد يتحداني بها
خالد وهو ياخذها من سياف : تعالو نشوف من يكسر راس الثاني
وجلسو العيال بجهه والبنات بجهه
وفجأه بنص العب صارخو العيال بحماس والبنات خافو من الصراخ
وكان كل شوي يرجعون يصارخون لين ماطلع ابو خالد بالعصا وهو معصب : يعلكمم بالي ماني بقااايييللل ورعااااننن انتممم ورعااان ؟؟؟؟
توجه عندهم وهو ناوي يخلي العصا تلعب على ضهورهم وانحاوشو كلهم واخذو لهم كم ضربه وفي بعضهم الي سلم من الضرب