حبيبى نسر و ٣ نجوم #الجزء الثانى

#الفصل_الرابع

بيشيل رامز منى بعد ما اغمى عليها من الصدمة ، و بيجرى بيها فى الممر و هو بينادم على الممرضين و الدكاترة علشان حد يلحقها .

و فعلاً بيخدوها الممرضين على احدى الغرف و الدكتور بيدخل يكشف عليها بعد ما منع رامز و امل من الدخول طبعاً .

بتفضل امل قاعدة على الكرسى جنب الاوضة ألى فيها منى و هى منهارة من العياط من كل ألى حصل لاغز اصحابها .

بيقعد جنبها رامز ألى كان واقف قدام اوضة منى و هو متوتر و خايف يكون حصلها حاجة بسبب ألى سمعته و فى نفس الوقت خايف على امل ألى مبطلتش عياط من ساعة ما سمعت ألى قاله اخوه .

بيحاول رامز يواسى امل رغم كمية الوجع ألى حاسس بيه على اخوه بعد ما عرف من والده ان الدكتور قاله ان نور دخل فى حالة صدمة عصبية بسبب ألى عرفه ، و ان دا كان متوقع ، لان من الصعب جداً مريض عاش فى غيبوبة يتقبل فكرة ان ضاع من عمره كل دا ، و قاله انهم عطوه حقنة مهدئة و ان شاء الله هيفوق بكرة ، بس لازم منجبش سيرة اى حد عزيز عليه مات فى الفترة دى و إلا ممكن دا يرجعه لغيبوبة مرة تانية بسبب الصدمة . ( لكن الحقيقة ألى ميعرفهاش الدكتور أن نور بالفعل دخل فى غيبوبة بسبب انه مقدرش يتقبل فكرة ان حبيبته ماتت و دلوقتي جتله صدمة من فكرة ان ألى قتلها هرب بعد كل ده) .

كل دا قاله الدكتور لوالد و والدة نور فى الوقت ألى رامز كان بيجرى بمنى فى المستشفى عشان حد يلحقها .

بيتكلم رامز مع امل عشان يهديها و هو بيقولها بصوت مبحوح من الوجع
ان شاء الله هتقوم بالسلامة ، خلى إيمانك بربنا كبير ، مش انتى ألى زمان لما جيت بأخويا هنا المستشفى و دمه كان على لبسى قولتيلى كدة ، مش انتى ألى دائما كنتى تتصلى بيا كل يوم عشان تطمنى علينا و على اخويا و دايما كنتى تقوليلى انا واثقة فى ربنا انه هيقومه بالسلامة ، ايه ، نسيتى كلامك ولا ايه ، اهو ربنا قومه أخيراً بعد ما كنت فقدت الامل بس انتى كنتى بتدينى دايما الامل انه هيقوم ، انتى فعلاً امل ، اسم على مسمى ، عشان كنتى بدينى امل فى كل يوم أنه هيكون كويس ، و فعلاً مكدبتيش ، ( بياخد نفس عميق بوجع لان على الرغم من فرحة الجميع ان نور أخيرا فاق ، إلا أن ألى حصل فاق كل التوقعات ) انا هسيبك تهدى عبال ما اهروح اجبلك حاجة تشربيها عشان تهديكى و ارجع .

بينزل رامز كافيتريا المستشفى عشان يجيب حاجة لامل تشربها .

بيتصل رامز بوالده عبال ما ألى طلبه يجهز .

ايوة يا حبيبى ، وصلتوا البيت ؟

- فى الطريق يا رامز ، قولى اخبار البنت ألى اغمى عليها ايه ؟

لسة مفقتش و حتى الدكتور لسة مطلعش ، المهم انت اخبارك ايه و اخبار ماما ايه دلوقتي ؟

- والله يا رامز يا ابنى والدتك مش كويسة ، من ساعة ما شافت اخوك فى الحالة دى و هى مش مبطلة عياط ، دا كويس انك عرفت تقنعها تروح ترتاح و انت تفضل مع اخوك و البنات لحسن حالتها وحشة اوى ، المهم انت خلي بالك من البنات و اخوك و انا هروح مامتك و شوية و اجيلك .