حبيبى نسر و ٣ نجوم #الجزء الثانى

#الفصل_التاسع

بنسمع صوت جرس بيرن ، و بنشوف رامز و هو بيفتح الباب و بيقول للواقف
نعم ؟

مش ده بيت الظابط نور كامل ؟

رامز بخضة
ايوة ، و انا اخوه ، فى حاجة ؟
نور حصله حاجة ؟

لا لا ، نور بخير الحمدلله ، متقلقش ، دا انا بس كنت عايزه فى كلمتين على انفراد .

لا هو الحقيقة مش موجود دلوقتي ، لسة نازل ، اصل عنده سفرية شغل ، هو حضرتك كنت عايزه فى ايه و انا ابلغه ؟

بتعدى والدة رامز من وراه و هى بتسأله
مين على الباب يا رامز ؟
(بتاخد بالها من ألى واقف على الباب و بتقول بفرح) ايه ده ، مينا ازيك ؟

بيرد بابتسامة
انا بخير نشكر ربنا ، انتى عاملة ايه يا امى ، اخبار صحتك ايه ؟

انا بخير الحمدلله يا حبيبى ، واقف ليه اتفضل اتفضل .

لا لا يا ماما ملوش لزوم ، ابقا اجى لنور فى وقت تانى لما يكون موجود .

لا ابدا ، هو ده ينفع ، صدقنى هزعل منك ، دا انا اديلى كتير مشوفتكش ، (بتبص لرامز و بتقوله) يلا يا رامز دخل الظابط مينا عبال ما ادخل اعمله حاجة يشربها .

و فعلاً بيدخل الظابط مينا بعد إلحاح والدة رامز عليه .

بيقعد رامز مع مينا و بيقوله
معلش يا حضرة الظابط على وقفتك على الباب ، مكونتش اعرف ان حضرتك زميل نور .

مش زميله بس ، دا ياما كلنا مع بعض عيش و ملح ، و انا كمان ألى كنت موجود فى ... (بيوطى راسه بحزن و هو بيقول) فى الحادثة ألى حصلتله ، يمكن مخدتش بالك وقتها ، انا عارف ان الموضوع كان صعب قد ايه ، بس الحمدلله ان نور بخير دلوقتي .

والله يا استاذ مينا ولا احسن ولا حاجة ، عايز اقولك ان موت مريم الله يرحمها مدمر نفسيتنا كلنا و بالاخص نور طبعاً ، بس نعمل ايه ، الحمدلله على كل شيء ، دى إرادة ربنا و احنا مش هنعترض .

ما هو ده الموضوع ألى كنت جاى اتكلم فيه مع نور .

رامز بتعجب
موضوع ايه ؟

بيعدى الوقت و بنشوف موبايل بينور على مسدج مبعوتة من حد و مكتوب فيها
عايزة اقابلك .....

✨الساعة 9:17pm✨

بيفضل قاعد بيبص فى ساعته و هو بينفخ من الزهق و بيقول فى نفسه
اوووف ، ايه كل التأخير ده ، اومال هى بعتالى و قيلالى عايزة اقابلك ليه لما هى سيبانى كل ده ، لا لا انا مش هفضل ملطوع كده ، انا هقوم اشوفها فين .

بيخرج من المكان حيث اليافطة ألى مكتوب عليها
"Hospital cafeteria"
"كافيتريا المستشفى"

بيدخل المستشفى و بيسأل فى الريسبشن عليها و بيقولوله هى فى الدور الكام .