حبيبى نسر و ٣ نجوم #الجزء الثانى

#الفصل_السابع

بتقول منى بعياط و صريخ و هى بتزيح رامز من كتافه ألى كان بصصلها بصدمة من ألى سمعه
امشى يا رامز ،امشيييي كفاية لحد كدة كفاااااية ، لو مكنتش مريم عرفت نور مكنش حصل فينا كل داااا ، و دلوقتي معنديش استعداد اخسر امل ، امشييييي ، مش عايزة اشوفك تانى انت و اخوك امشيييييي .

و فعلاً بتزيح منى رامز برة الشقة و طبعاً بيحصله اخوه نور ألى كان مصدوم من كل كلمة سمعها ، فلاول مرة حد يرمى عليه اللوم بطريقة مباشرة على موت مريم و هما ميعرفوش ان اللوم نفسه متجسد فى صورة شبح بيطارد نور فى كل لحظة من وقت موت مريم حتى فى احلامه .

بتقفل منى الباب بقوة و بتسند راسها عليه و هى منهارة من العياط من كل ألى بتمر بيه .

بتقرب امل من منى ، و بتحط ايديها على كتف منى ألى بتلف و بتبصلها بانهيار ، و امل بتفتحلها دراعتها و بتاخدها فى حضنها و بتطبطب عليها و هى بتقولها بعياط
ليه خبيتى عليا كل ده ؟
ليه ؟
للدرجة دى مش بتعتبرينى فى غلاوة مريم الله يرحمها ، للدرجة دى وصلت انك تشيلى كل ده فى قلبك و تخبى عليا .

بترد عليها منى و هى فى حضنها و عمالة تعيط
سامحينى يا امل ، سامحيني ، مقدرتش اقولك ، خوفت ، خوفت تحسى بنفس ألى بحسه ، خوفت ثقتك بالناس تقل ، كنت بحاول اخليكى تحبى و تدى فرصة للى بيحبك يمكن الفكرة ألى فى دماغى تتغير و اشوفك فرحانة و عشان محسسكيش انى مش بثق فى الناس زى الاول و خاصتا الرجالة ، بس شكل ان عمرى ما هعرف اثق فى حد فيهم مرة تانى ، فينك يا مريم ، فينك ، وحشتنى اوى يا امل وحشتنى اوى ، لسة فاكرة اخر مرة شوفتها ، اااااه ، مش قادرة يا امل مش قادرة .

بتضم امل منى بقوة و هى باصة على صورة متعلقة على الحيطة و بتقول بانهيار
الله يرحمك يا مريم....

✨من الناحية التانية✨

عند نور و رامز وقت ما خرجوا من شقة امل

بيخرج رامز من عمارة امل و هو سرحان كأنه شخص تايه مش عارف هو حاسس بأيه ولا شايف او سامع ايه .

بيحصله اخوه نور و هو بينادى على رامز و بيمسكه من دراعه ، بس بيحوش رامز ايده و بيقوله بسرحان و هو مش باصصله حتى
سبنى يا نور ، انا عايز ابقا لوحدى .

بيشده نور من دراعه عشان يخلى اخوه يبصله و هو بيقوله
لا مش هسيبك فى الحالة دى ، ان......

بيحوش رامز دراعه و هو بيصرخ فى وش اخوه نور و بيقوله بانهيار
بقولك سبنيييييي ، سبنيييييي يا اخى ، سبنى زى ألى بحبها ما سبتنى ، زى ألى بتحبنى ما سبتنى ، زى ما مريم ما سبتتتتك .

مبيحسش رامز غير بضربة قوية فى وشه من اخوه نور ، ألى بيمسكه بعصبية من هدومه و هو بيقوله بوجع
مريم مسبتنيييييش ، انت فاااااهم ، مريم عمرهاااا ما سبتنى ولا حتى فى احلامى ، ليه انت كمان تعمل فيا كدة ، ليييييه ، يعنى مش عاااارف بلى انا حاسس بيه ، هااا ، مش ذنبيييي انك كسرت بقلب ألى بتحبك و انت عارف كدة كويس و كنت بتستعبط ، مش ذنبييي ان ألى بتحبها مش بتحبك و انها بقت بتروح لدكتور نفسى بسبب موت مريم ، و هى بتلومني انااااا على موتهاااا ، بتلومني انى عرفتهاااا ، انتوا كلكوووو شايفنى السبب فى موتها ، لييييييه (بيبعد عنه نور و هو بيقوله) اقولك ، انا السبب فى كل ده ، انا السبب في حصل و ألى بيحصل ، انا القاتل الحقيقي مش كريم ، انتوا عندكوا حق ، تصدق ، انا ألى ماشى مش انت .