اعترافات امرأه شيطانه

اعترافات امرأه شيطانه

البارت الثاني

ليلان حكمت ......

مرت اخوي وعتني من سولفت وياي وصحتني من حلم
ما اكتمل خلتني ليلي كله افكر ما انام
واسولف ويه رويحتي مثل المخبله .....
ساعه اكول اني وين وهو وين ....هو ابن عز
وناس شبعانه ناس ترفه مرتبه .
وانه حي الله فلاحه بكيعان الوادم افلح وارعى
بحلالهم ومن السنه للسنه يلحكني نفنوف
جديد ....

الليل طويل والحسبات اطول ....وعركه بين
كلبي وعقلي عقلي الرافض وكلبي الولهان ...

وشيطان راسي اللي يوسوس بداخلي
نهضت من نومتي وقررت اتغير للاحسن
بلكي واترجه سعد يصير حلالي ....
اول شي سويته ...
صرت زينه ويه نسوان اخوتي
وصرت صديقتهن شغلتهن وحاجتهن
اساعدهن بيها.
حتى هنه لاحظن تغيري وبدن يتقربن مني
وصرت اطلب منهن ملابس ومكياج وعطر
وتعلمت منهن شلون اتزين وتعطر ...

وكلما اروح لبيت سعد اروح مرتبه
ومعدله ...حتى سعد انتبه عليه..
وصار يسمعني كلمات حلوه

اليوم حلوه
واليوم الكمر جديد
وشيخة الحديثات وغيرهن كلمات اول مره اسمعهن
يدخلن الكلب بسرعه ويفرحن الروح ...
يوم وره يوم سعد صار يتقرب مني ويسولف
وياي .....
ومرات يصخرني انظف حجرته (غرفته)
لو اغسل ثيابه ...

جنت افرح واركض مثل هب الريح اخدمه
واسوي اي شي يفرحه
حتى اكسب رضاته ووده ....
عدت الاشهر وعلاقتي بسعد صارت اقوى
واخته صارت اختي وتعاملني مثل قطعه من روحهه
اطب واطلع وتنطيني ملابس
واعرف كل زغيره وجبيره بيتهم واسرارهم
ما يامنون ببشر غير بس اني
يمكن اذا اكول صرت الامر الناهي بالبيت
محد يصدك .....

اذكر مره من المرات صاحتني ام سعد وكالتلي
بعد اسبوع عرس وسن اريدج تشدين حيلج
وتبدعين بالشغل والترتيب ....

ايييييه هناااا صارت لعبتي ....حتى اكسبهم اكثر
فريت البيت فر لعبت لعب تنظيف غرفة ام سعد
وغرفة وسن والصاله والمضيف والحجر كلها
نظفتها نزلت الغرضان ورتبتها ...

وحضرت ملابس وسن وبيوم عرسها حتى سبحتها
ورتبتها ولبستهه وجابوا وحده من معارفهم زوكتها
وعدلتها ....
ساعه ساعتين سمعنا صوت الهورنات مال الزوافيف
جايه والازلام ترمي بالتفك وبت الشيخ لابن الشيخ
جبناها ....
صدك زفه وعرس من العمر بس بنات الملوك يسوولهن هيج ...

خلصت الهلاهل والهوسات ولبسوها عباتها
وامهاتها راحن وياها وصفه البيت بس انه
وسعد وعمي ابو سعد.....

كعدت افتر بالبيت لوحدي واكول هم يجي يوم
وهذا الملك والحلال والهيبه تصير الي....
واتصفن ويه روحي ما فزيت الا على صوت
عمي ابوسعد ...
يكلي بويه حضريلي عشه
بعد الصلاه .....