اعترافات امرأه شيطانه

اعترافات امرأه شيطانه ..

البارت الخامس

ليلان حكمت .....

سعد جان معاند مايريد يسوي شي
والنسوان بالباب منتظرات النيشان وانه نايمه بكل برود اعصاب لان سعد اول وتالي راح يستر
روحه مو بس يسترني
ويدري بيه كول وفعل ......

وبسبته انه صرت قاسيه وما ارحم ...واسوي كلشي وما اتراجع عن مرادي ...
جرح ايده ولوثه الخركه وطلعها والنسوان
تهلهل ودخلن عليه بس هلهولتهن جانت بارده
مثل اللي ما عاجبتهن اني....

كومني حتى يسبحني اني بقيت متسمره بمكاني
ومعانده الا عمتي ام سعد تسبحني ...
طلعت النسوان وسدت الباب عمتي لفيت روحي بثيابي وكعدت ع الجربايه....
عمتي ام سعد ما تنفست بس تسبح بسبحتها
ولا كأنه ابنها معرس لا فرحه ولا هلهوله ولا حتى سالفه....

بعد شوي طلعت عمتي من الغرفه وانه درت وجهي ونمت ...
ما حسيت على نفسي الا ويه صيحت الله اكبر
فزيت ما شفت سعد يمي التفت يمنه يسره ماكو

رفعت راسي شفته نايم بالكاع نزلت حتى انام بصفه
وبديت العب بشعره وشفايفه
فز من نومته ودفعني كلش بقوه كتله ليش
كلي لا تكربين عليه تلعب نفسي منج ..

ضجت بداخلي وتحصرت حتى فرحة العمر
ما تهنيت بيها ولا فرحت مثل النسوان ...
يوم الصباحيه نسوان طابه نسوان طالعه
اللي مكشوله واللي تعيب واللي تكول شجاب هذا على هاي ...

الحجي ترس اذني صار اسمعه واحتفظ بي واحفظ وجوهن حتى ما انساهن ايام ويخلص العرس
وانتقم منهن ....
بيوم السبعه ...اجتي نسوان من كرايبهم اشكال الوان ما شايفتهن وجان من ضمنهن بنيه مثل الكمر
حلوه مصوره مرسومه رسم
ينطبق عليها كلام الله وصوركم فأحسن صوركم
العيون كل شويه لون
الوجه مديور ابيض والخدود ورديه....والخشم
قلم زغير والصوت يخدر
اكبر زلمه .....

متت قهر من شفتهه وشفت جمالهه ولبسهه
وتنغوصهه ودلعهه اخخخخخ يا ناري
شلون تطفه
واكثر شي شكني شك هو سعد شلون يباوعلها
ويباوع لكل تفاصيلها
وده يا كلها اكل بعيونه ..

ضحك وسوالف وياها وشقه وكل شويه يلزم ايدها
ويروح وراها وين ما تروح ...
ما اتحملت ترحصت من النسوان ودخلت حجرتي
وبقيت افتر رايحه جايه شسوي وشلون بيه
ما لكيت غير بحجة رايحه للحمام واصيحه ..

لبست عباتي وطلعت للحمام شفته بزاوية المطبخ
يسولف وياهه صحتله
سعد سعد وينك حبيبي هو التفت وخزرني
هي ترخصت منه وراحت ...
اجه عليه وصرخ بوجهي ...شتردين
من صخام شتردين ...

كتله شويه اثكل يالعريس لا تنسى روحك
وعفته وكعدت يم النسوان .....
شفتهه كاعده خزرتهه واشرتلها تعاي
كعدتهه بصفي ...
شاورتهه بأذنه وكتله لا تمدين ايدج لماعون
غيرج وتاكلين خاف يطلعلج عظم وتغصين يا حلوه
روح العبي بغير مكان ....