اعترافات امرأه شيطانه

اعترافات امرأه شيطانه ...

البارت الرابع ....

ليلان حكمت .....

سعد مارجع بعد الشهر الواعدني بي
وانه بلعت الموس وساكته
وخايفه ...
شسويت بحالي وشلون ضحك عليه..
وشصار بيه ...
فكري ياخذني ويوديني معقوله ذاك الحب
والغزل والشعر كله جذب
بس راد ياخذ غايته مني ...ضحك واخذ مراده
وانهزم .
اووووف شلون مصيبه شمرت روحي بيها
الخوف ذبحني لا تبين بطني
واخوتي يذبحون بلايه رحمه وبالسكته
ويطمون عاري وانه مثل ذيج
اللي لا حظت برجيلها ولا بسيد علي...

دخلت الحمام بطني تلوع سديت الباب
ونزعت هدمتي وباوعت على بطني
شفت شويه بارزه ومبوطه ...
شويه اجذب روحي
وشويه اكولن لا بينت عملتج يا بدره

خشت فكره براسي اروح العمتي ام سعد واسولفلها
اذا ما بين هاليومين خلي تشوفلي صرفة حال
دباره جا هو سوه سوايته وشرد ....
يطلع منها....
واذا ما شافتلي حل اروح اسولف لخوتي
وشيصير خله يصير اقلها من اموت يموت هو وياي
ما اموت وحدي ....
وره يومين شفته يمشي بكاعهم ويسولف ويه
واحد من خدامهم ...

ركضت عليه وجفته...
كتله شنهي شو داير وجهك ولا جنك تعرفنه ...
...هنا هو اشر على خادمه خلاه يروح ...
....شتردين شعندج..
...شنو شعندي سويت سوايتك وشردت شبعت مني
وشمرتني ...
.....السويته انتي راضيه بي وموافقه..
...اي ما انكر بس تعال اركع سالفتك
وتزوجني تره اذا كبرت بطني ما اموت وحدي يا بن الحلال ...
.....انتي تهدديني ...ولج ....ومنو يكول هذا اللي بطنج ابني ...
.....هااا جا منو فتح الظرف وخله الحبر يجري
جا منو نام بحضني ....
جا منو بشماغه مسح النيشان...
....والنيشان انشمر بالشط وروحي منا ولا تشمرين
بلاج عليه شمدريني مثل سلمتيني حالج
يجوز سلمتي لغيري ...
.....صارت هيج ...سهله يا سعد انه رايحه وبيني وبينك اهلك واخوتي ....

درت وجهي والغضب والنار والشرار يطافر من عيوني كونك تنكرت من فعلتك الفاينه وتريدني
اموتن وحدي لا والله دكيت صدري وكلت انه مو بدره اذا ما خليتك تعقد عليه الليله الا افضحك
وانعل والديك .....

مشيت بسرعه وهو وراي يمشي وتعمدت ما خليته يلحكني
دخلت بيتهم وصحت ...وينج يا عمه
وينج يالتخافين الله انه داخله على الله وعليج وبصوت عالي كلش
...تلكتني ام سعد ....كولي ابشري وانه امج
.....شلون ابشر  وابنج صخم وجهي
....صاحت يمه وشكت ثوبهه كالت شنهي
شلون صارت احجي ولا تجذبين ..
....بالزرع يخالتي يوميه يجيني
ويتغزل بيه وخدرني لحد ما سلمته روحي وعشمني
ياخذني ....قطعت كلامي وكالت
......وهسه انتي حبله ...
.....اي وابنج تنكر من سالفته وانه اصيح والطم
واملخ بروحي لان اريد اخوتي يفزعون على صوتي
دخل سعد وامه لزمته وكالتله احجي
انت كاسر ركبة بت العالم
تنكر ودفرني ....
طفرت وره امه ولزمت ذيال ثوبهه واصيح
يا ناس يا عالم اذا دروا اخوتي شلون بيه ابنكم وانه ننذبح