اعترافات امرأه شيطانه

البارت الثالث

اعترافات امرأه شيطانه

ليلان حكمت

نار الشوك ونار اخوف اشتعلن شوكي لسعد
جيف بعد ما اكدر اشوفه ...
ونار بكلبي هو مختفي صار كم يوم وما اعرف وين
ونار الخوف لان قلة روحاتي عليهم ...

بسبة اخوتي صرت يوميه اطلع للزرع اسرح بالحلال
وما ارجع غير للعصر ...
حتى اكل ما اكل وتغيرت احوالي اسمع اخبار سعد
من الجهال يكولون شفناه تعده بالشارع
لو مرات نسوان الطرف اسمعهن يتغزلن بيه ويتحسرن عليه ....

كلشي اتحملته حتى عتاب عمتي ام سعد
من كالت انتي مقصره ويانا لا تمرين ولا تذكرين
واحنا تعودنا عليج ....
فكري احتار ودخت بزماني .....
سهيت عن الدنيا

احلامي ويقظتي كلها سعد اووووف العشك
جتال وصعب والشوك اصعب
ولادهى عشيكك كبالك بس انت محروم منه .

استمريت شهرين ونص ماشايفته
حتى من اروح بالبوكات لبيت ام سعد ما شوفه
لو نايم لو بالمضيف
صرت اتلصص مثل الحراميه على شوفته
وهو نايم وملي عيوني منه
واسال روحي ....هو هم يحبني مثل ما احبه
هم يشتاكلي
هم يتفكدني لو انه متوهمه .....

كلشي صار ضدي تجالبت عليه الدنيا وغدرهه
من اخوتي وظلمهم ونسوان اخوتي اللي لزمن عليه لزمه وصارت وليه عليه

بكلشي صارن يعيرن ويكولن سعد راح سعد اجه
والكلب كلما يسمع اسم سعد يحي من جديد
ترجعله الحياة ...

بليله من الليالي ...واني احلب بالهايشه
صارت مرت اخوي اسمعها تسولف
ويه مرت اخوي الثانيه وبحجة احاجيج يا بتي
واسمعج يا جنتي ...
ادكللها انتي مصدكه يباوعلج لو يكلبج انتي فاتج
القطار ورحتي
ابن ناس وابن عز ما ياخذ الا من ثوبه ....

حجيهن جان مكوار وهبد راسي وصحاني بنفس الوقت ...
خلاني ارجع لواعيتي واعيد حساباتي
انه لا من ثوبه ولا من كرايبه هالواحد لاهله
اكيد راح يجيبوله وحده من ثوبهم معدله
ومرتبه
وشبعانه من خير ابوهه مو من خير الناس ...

من ليلتها قررت انساه وحتى ما اخلي اهله لو هو يشوفون وجهي ....
ودعيت ربي يصير مثل الماي من يتبده بعد ما ينجمع
وارتاح وانام ليلي .....
عدت الايام وانه
والهويشات صرنا صديقات
اعزي نفسي من اكعد جوه الشجره
واواسيها واغني بصوت عالي كله نحيب
هذا الحلو كاتلني يا عمه ....

ايييييي ياعمه يا ام سعد اشتاكيتلج واشتاكيت لحجواتج والشوك غلاب بس انه معذور
انه مو من ثوبكم ....
وتاخذني الصفنه لغير دنيا وغير عالم
ما احس على حالي الا بنات يصيحن عليه
نرجع الدنيا ظلمت .....

ارجع للبيت تعبانه ومتيبسه وخدودي مجرحه الدمع
صرت من امشي ما امر على طريقهم
ولا اوصل لحذاهم
غيرت طريقي واذا صادف ومريت من دربهم
ركض ركض واغطي وجهي ....