ما مليت من الهجر انا مليت ...

البارت الثالث

فينا نصدق حب الطفوله لاكن العادات والتقاليد فوق كل شيء من فينا ما حب او ما راح يحب كل شخص مرت بحياته قصة حب سواء كانت حلوه او لا سواء اجتمعوا او لا وهل القدر بيجمع بين المحبين ؟

في نفس اليوم جا عم ترف واهله للديره خلونا ناخذ تعريف بسيط عنهم
ابو ساير خلف عمره ٥٩ سنه رجال همه سمعته بين الناس ولا يهمه قلب عياله دام السمعه فيها
ام ساير عمرها ٥٦ سنه نوعاً ما نقول عنها عصبيه
ساير ولدهم الكبير الي حاجزين له ترف عمره ٢٩ سنه همه نفسه ولا همه غيره اذا بقى شيء ياخذه غصب عن الكل
ميلاف عمرها ٢٥ سنه عكس اهلها تماماً بنتعرف على شخصيتها بالروايه
يوسف عمره ٢٠ سنه اصغر عيال ابو ساير عكس اخوه تماماً مع الحق
____________________________

في الصباح صحوا البنات وترف صحت بعد نوبه بكاء بعد مادرت ان نواف عرف عن زواجها او نقدر نقول حجزها لولد عمها وهي تفكر هل راح تصير من نصيب نواف او ساير الي ما تطيقه لاكن مو متأكد من حب نواف لها بس تتذكر اسلوبه معها وهي صغيره الين تغطت عنه وراحوا الرياض

وصلوا عمها واهله لبيتهم واستقبلوهم
ابو ترف : يالله انك تحييهم يهلا ومرحبا
ابو ساير : الله يبقيك يابو ترف وشخباركم
ابو ترف : بخير جعلك تسلم اقلطوا تفضلوا البيت بيتكم
وجلسوا بعد ما سألوا عن الحال والاحوال دخلوا عليهم البنات يسلمون وهم متغطين
ابو ساير : يا مرحبا ببناتي شخباركم
ترف وابتهال وجوري : بخير الحمدلله
ابو ساير : ها يا ترف عسى جهزتي نفسك بكرا كتب الكتاب وبعده الزواج
ترف بينها وبين نفسها جعلك الماحي انت وولدك : تقول ان شاء الله ياعمي
ساير : شخبارك ترف
ناضرت له بنص عين : بخير
وراحوا البنات لداخل والرجال يتفقون على الملكه

في بيت ابو مصلح عند البنات
جوزاء : اي جو اليوم كلمتني ابتهال تعزمنا بكرا ملكت ترف
جوري : تدرون احسها ما تبيه
جمانه : يا ام الاحاسيس كويتي ثوب مؤيد
جوري وهي اقول تركض: الله يذكرك بالشهاده الحين يجي يتوطى ببطني
ام مصلح : الله يهديها بس هالبنت مجنونه
جوزاء : بس والله الجلسه بدونها مو حلوه
جمانه : وش راح تلبسون بكرا
جوري من بعيد : جوزاء ابيييييي فسسستاانتسسس الموف تكفيييييننن
جوزاء : وصمخ ان شاء الله ترا اسمع خلاص خذيه
جمانه : جوازتي
جوزاء : بسوي لتس مكياج اسكتي
جمانه وهي تبوس خد جوزاء : احب الناس الي تفهم
جوهم العيال سلمان : ماشاء الله في حب واعترافات عسى ماشر لنا نصيب
جمانه : بكرا ملكة ترف وجوزاء بتسوي لي مكياج
سلمان انصدم وناظر نواف الي كان يلعب بالسبحه ويفكر
نواف : مانسيتك وانت تطري كل لحظه
يانصيب الغير ليتك نصيبي
حظ غيري يوم غيري قام حظه
ولا انا حظي بـ انك بس حبيبي
(ملاحظه القصايد نصهم من كتاباتي ونصهم منقوله)
الكل انصدم من قصيدته وقالت ام مصلح : تحب ترف ؟
نواف : كنت الحين لا
جوزاء : كيف كنت والحين لا؟
نواف : قبل لا تتزوج غيري كنت احبها والحين هي وعدوي واحد
جوري جت مدرعمه : تبيني اخرب زواجها ابد جاهزه لعيونك
نواف وهو يضحك ضحكة كلنا نعرفها : هههه ليت وياليت الليت تنفع كنت انتظرها ترجع وابي تبرير واحد على اختفائها والحين والله لو تبكي دم ما اهتميت
سلمان : نواف انت صادق؟
الكل انصدم من اعتراف نواف والكل مذهول وراح نواف والكل قام يسوي له شغله
سلمان وهو يسحب نواف : صاحي انت وش الي قلته داخل
نواف وبقلبه الف كلام وكلام : يا اخوي وش اسوي اروح اخرب زواجها يمكن هي تبيه وما تبيني وش اسوي
سلمان : نواف نرسل جوري لها تسألها
نواف بتنهيده : اه يا اخوي بس ليتك تعرف وش بقلبي
وجلس سلمان جنبه : عارف ياخوك جعله بضلوعي عنك
نواف : ودي اروح اقول لها تكفين لا توافقين انا ابيك لي ابيك حلالي ابيك زوجتي ابيك ام عيالي بس انتهى كل شيء بكرا راح تكون على ذمة رجال غيري سلمان احبها ابيها شسوي يا اخوك علمني قولي اي شيء واقول لك تم على خشمي بس ابيها تعبت من بعدها تعبت رسمت احلامي معها حتى عيالي اخترت اسمائهم انتظرها توافق عليهم واذا ما تبي  الاسماء ذي نغيرهم
سلمان وهو حزين على اخوه ضمه وهو يمسح على ظهره : استهدي بالله لو كان خيراً لبقى بعدين يمكن هي بعد تحبك لا تنسى يوم كنا صغار كنتوا مع بعض حيل ما تفارقون
نواف بقلبه كلام كثير بس وش يفيد قال : كنا انت قلتها كنا صغار الحين كبرنا
سلمان : ادحر الشيطان وقوم ما ينفع كذا
وراحوا المجلس وجتهم جوري : سلام يا قوم قريش
سلمان وهو يحذفها بالفاين : بعينتس قوم قريش وش تبين
جوري : ابد ابي الاستاذ نواف
نواف : شتبين يا جوري
جوري وهي تناضر سلمان : سالفه من راسي ل راسك يا اخوي
قام نواف معها : ها وش تبين
جوري : وش فيك يقلبي تبي ترف اجيبها لك والله
نواف وهو يمسك يدها : اذا تقدرين ما اقول لا
جوري : والله انها لك ومو لاحد غيرك هي سالفه وقت بس
نواف بأبتسامه : ومتى يخلص هالوقت مليت انا
جوري : انتظر ما بعد الصبر الا الفرج
وراحت جوري داخل ونواف طلع للمحل ولحقه سلمان