ياعازف العُود صحّيت جفن الحزن من دقت اوتارك

٩

بعد صلاة المغرب
طلعت تدور امها ولاقتها قبال بابها /اخخييراً
وراحت لها بشووق لجل تضمها
ابتسمت وبادلتها /البيت من دونش خالي انا اشهد
ابوسهام /اي والله صدقت
سهام سلمت على ابوها .. /تعالوا تعالوا خوذوا لكم فنجال ونعوّد عند عايشة
دخلوا عندها وقهوتهم وتسوولف عليهم كن لها دهر ماشافتهم من ولهها عليهمم
كانت لحالها بينهم وكلن يتنافس بالدلال لها ولاغابت امها عندها ابوها ولا راح ابوها بقت امها
ولا اجتمعوا تطير زود
ام عايشة سألت سهام عقب ماراح ابوسهام للرياجيل /وشلون حاتم خطب عايشة ؟ متى ؟ ووشلوون واافققت !! انا خابرتها ماهيب معرسه عجزت اصدق .. وحاتم ياسهام حاتم ! وش جابه لها ووش جابها له !
سهام خفضت صوتها /شوفي ابقولك بس مصعب قايل لي .. يقول ان حاتم يبيها وانهبل يوم خطبها ولد عمها سعيد وعلى طول خطبها اكثر من مره ولا ترد وقد امه خطبتها من زمان
ام عايشة / ايه خابره خطبته لها من زمان بس !! قومي قومي نشوفهم
سهام قامت /ياحليلها تققوول العرس الين تجي امي عيت تعطيهم العلم .. يويلي عنها
ام عايشة ابتسمت وشالت اغراضها وراحت وسهام لحقتها
-
عايشة دخلت عليهم وكلهم رفعوا روسهم واللي مطيره عينها واللي معقده حواجبها /ووينش فيه .. ابتس تقطعت رجولنا ندورش
عايشة ضحكت /تمشيت شوي
زينة /والله هالضحكة المفلوجة من دخلتي .. مع حاتم ولا حاتم ؟
عايشة رفعت حواجبها مبتسمه /انتي ماتستحين انتي ؟
نهله ابتسمت على وجه عايشة
عايشة انتبهت لها /ويلي مازين هالضحكة عيديها اعنبوحيش ماشاءالله
نهله ضحكت /تسلمين
زينة سرحت بها / سبحاانه
ام عايشة دخلت ومعها ام عقاب
ام عقاب /اجل تجين ولا تقولين لي
ام عايشة ضحكت ودخلت وراها/ السلام عليكم
كلهم ردوا سلامها الا عايشة كانت لافه لها وتناظرها بصمت  وبعد دقيقة كامله وعايشة مانزلت عينها عن امها وبهمس /وعليكم السلام
ام عايشة وهي تحط عباتها /الله ياعايشة وصرتي عروس ومن قدش يعد اخذتي ابن الشيخ
عايشة بجمود تطالعها /وانا بنت شيخ كانش نسيتي .. هو الحظيظ
ام عايشة لفت لنهله عقب ماضحكت على كلام عايشة /اجل انتي نهله صح ؟
نهله ابتسمت وهزت راسها بهدوء /الله الله
ام عايشة بضيق /سمعت اللي صار الله يرحمهم يغفر لهم واحسن الله عزاش
نهله بلعت ريقها وابتسمت بصمتت ولفت ام عايشة على ام عقاب ... وجلسن يسولفن شوي وعايشة عيونها على نهله ..
مسكت يدها من بينهم وبين سوالفهم واشرت لها وتجي معها ..
طلعت وياها ويتمشون صوب الظلمه وابعدوا عن العرب وهي تشوف الحزن يتخفى تحت جفون عينها /عيونش فاضحها الحزن يانهيّل قولي لي ترى الحال من بعضه طلبتش لاتخلين في خاطرش شي
نهله غورقت عيونها من قالت نهيّل وتنهدت /ياويلي ياعايشه قبل يومين وهو قبالي ويضحك لجل ماحزن على امي واضحك له لجل مايحزن حزنين  وشلون كذيه وقدام عيني تاخذه المنيه وماحولي احدن انعيه
ولا بيدي اسوي له شي كذيه راحوا بلا مايقولون لي راحوا بلا علم ولا حس
مادريت الا ليمن صحيت ووانا ادعي اللي بالامس كله حلم ياربي حلم ياربي !
لكن مالقيت غير ام سيف ودموعها تبلل شيلتها لقوني نايمةٍ عليه على صدره عقب هكالبكاء وانا اطلبه تكفى يابوي طلبتك اصبر علي شوي يبرى جرح امي
وقمت البارح وهو يعاونّي على حزن امي واليوم من يعاوني عليه
من يبي يضمني ليمن بغت عيني تفضحني -حطت شيلتها على فمها تخفض صوت شهقتها-ومن يبي يضحكني مثل أبوي من .. والله واللي خلق هالعرب اني ادعي اني لارجعت الدار الاقيه يهلي ويرحب بي تهقين دعاي يستجاب !!! تهقين ابلقاه .. عايشة وعبرتها ضيّقت عليها مجرى نفَسها /ياعين ابوي انتي .. تبي تلاقينه .. تبي تلاقينه باأعلًى المنازل بالجنه بإذن ربي يبي يمر الوقت وتبي تعوّدين صدقيني ماهو رايح الالم .. لكن من كوده منتي موجسته ،
من كوده ماعاد يأثر بيش الحزن دوم يلازمش وخص لاجابوا طاريهم
لكن تبي تعوّدين عليه تبي تحبينه
وتنسين انه حزن هذا اللي اوجسه يانهيّل
هذا هو ...
نهله /انتي بقت لش امش .. تعاونش وتعينش من وانتي صغيّره اعتدتي عليها
ضحكت عايشة ولفت عليها وميلت راسها ولازالت تضحك ... عقب تنهدت /صدقيني يانهيّل ماله لزوم وجود الشخص حولك اذا منتب توجسه ولاهوب يوجس لك -ابتسمت من طرى عليها حاتم وكن ربي خلق هالادمي مُعجزة وكنه بلوةٍ حلوة من بلاوي الدنيا!-
لكن ربي يبي يبلاش باللي يعطيش ولا ياخذ
ويبيش ولو مابغيتيه ..
ويدورش ويسأل عنش ولو انتي مادريتي عنه ..
وان مالقيتيه بالدنيا العوض بالاخره ياوخيتي الدنيا كذيه فاقد ومفقود
نهله ابتسمت ودموعها على زوايا هالبسمه/ وشهو ذا معجزة ، مانيب مصدقه لين ياقف قدامي واشوف اللي قلتيه بعيني
عايشة ضحكت / ان شاء الله انش تبي تلاقينه ولاتستعجلين على رزقش كلشيّن مكتوب
نهله /ياحليلش ياعويش ويابخت حاتم بيش  عايشه ابتسمتت وضمتها /بس عاد لاعاد نشوف هالدميعات وكاد ان الشايبين مايرضونها
‏-
مرت كم ساعه
وجا اخر الليل
اخر الليل اللي اغلب العرب فيه نيام الا اللي دنياه مشقيته
اما بنعمة تعافيه او ببلوةٍ تعميه
ظهرت من البيت وداخلها خاطر ماتدري وشو اخذت خيل عايشه وطلعت على ظهره وصارت تمشي به
وصارت تمشى حول الجبل اللي يشهد بكل قصة حب للعرب
وكره وحزن وكل موقف كان الجبل اول حاضرٍ له
ووقفت مكانها وماهي الا صدفه وياحلوها من بين الصدف .. ضحكت وقربت له /ياحبني لربي حين يهبني هاللقى بلا ميعاد
عزام ميل راسه بإستغراب من كلامها وضحك ويوجس قلبه ينبض
ماهو النبض المعتاد .. النبض اللي يحتاجه عزام
النبض اللي يزعجه ويحييه من جديد وياخذه لعالم ماهو بعالمه
زينة وعت على خربطتها ونزلت من ظهر الخيل وهي تضحك بحياء من كلامها /لاتواخذني ياعزام الوكاد اني بديت اخرف
ضحك بصوت عالي /عادش شباب وش هو تخريفه
زينة بربكة /يعني الواحد نوب ينسى روحه ويهذري .. وش ذاللي معك !! عوود !
عزام طلعه /ايه بلاش اندهشتي .. لايغرّش
زينة جلست بالصخره وزانه وبحماس /يالله اشوف ورني
عزام قرب من وجهها وبسخريه وهو يضحك /امسكي روحش لاتذوب .. ماافرط بهالزول
سكتت ثواني وعيونها تكلم .. ضحكت ووجنتيها تعكس كلامها /يارجال لاتبالغ .. انا جبل مثل هاللي تسند ظهرك عليه .. وماخبرنا الجبل يذوب
عزام ضحك على ملامح وجهها وماوده الليل يخَلص .. عبر عن حالته بجمله مافهمتها زينه والوكاد انه هو اللي يذوب ويوجس حرّ جسمه/يالله يارب انا من طين !
-
ام سيف صحت فجأة من رقادها
فزت نهله اللي جفى عينها النوم ولفت عليها /بسم الله الرحمن الرحيم ، بلااش !؟
ام سيف حطت يدها على صدرها اللي يرتفع وينزل ويالله تلقط نفَسها وتعوذ من الشيطان
قامت نهله بسرعه وراحت ورى الخيمة وصبت لها من الزير مويه وهي راجعه تركض وقفت بمكانها من شافت سعُود كان واقف عند الباب ودخل بسرعه على امه وتنهدت ووقفت مكانها وبيدها المويه تحتريه يطلع ولا عليها شيلة ولا امداها تاخذ .
-
عزام بدأ يدق دقه حززيييينه بلا سبب .. من حزنها يوجس الهواء البارد يسكن ضلوعه ويكسرها بهدوء يشبه هدوء الليل وبكاءه اللي بلا صوت!
اما زينة تناظره وتسمعه والعود بين يدينه وعيونه اللي نوب على السماء ونوب يطالع العود
كشرت بضيق وطبطبت على كتفه وصحّته من سجّته /وجعني قلبي بسّك ماعاد بي حيل
عزام ارتبك وبإهتمام /ضاق خاطرش!
زينة هزت راسها وهي معقده حواجبها
ابتسم بهدوء ومد يده وماآوجس غير لين وجنها ونعومته على ابهامه وماقوى يطلقه /العذر والسموحه كدرنا خاطرش
ضحكت بخجل ولفت عنه / يابري حالي على هالليلة
عزام ضحك وهو يدق بهدوء/وشبها
زينة /سماء هالليلة كلها نجوم والقمر وزاني
عزام /الله الله ، لاتخجليني ماقوى عليش
زينة /اخجلك ؟
عزام ضحك / هههههههههههههههههههههههههههه غزلش ارحميني به هذا والله مااقواه ولا غيره هين
زينة عقدت حواجبها / وش هو اللي هين
عزام ياشر على راسها بسبابته / هذا
زينة ابتسمت ونور القمر ياخذ من خدها /عزام ، ابغي انشدك
عزام /سمي ..وارفعي صوتش يحولو ماينسمع
زينة رفعت راسها ومن عاينت عينه وتقوم علومها تخربط! سكتت ولازالت "تناظره"
ويكاد مخلوق داخلها صغيّر بحجمه .. لكن كبييييررر بناسه ومشاعره ... يكاد يطلع من مكانه والله أعلم انه طلع
عزام وهو يسرق هدوء عينها .. هدوء زينها وجمالها الصامت المُزعج بالنّسبه له
خذت عقله وخذت قلبه وخذت كل مايملك "وكل مايملك قلبه وعقله ونفسه" ! وبحته تفضح حاله /لبيه .. وش بغيتي !
زينة بعفوية هاديه /ياعزام .... وش تبيني اقول .. كل مابي يهرج
عيني صرّحت بي ! .. وقلبي يرتبش .. وعقلي نساني ومايذكر الا انت .. عقلي فقد عقله وذكرك ! .. ماعاد ابيني خذني ولاتعيشني بوهم وذكريات مالها نهاية .
-
ياليل وياسماء ويانجوم .. اشهـدي
ذالليل صاحت بالمشاعر  وصرحت بها
ابنشدك .. وعيونها الملعونه ماتهتدي
وشفاتها تبخل .. حسبي عليها ربها
قلت ارفعي يابنت لصوتش .. وأَركدي
أَركدي نارٍ من حرّها  غديت العب بها
نار شوق وغلا .. نار حبٍ صاينٍ مهتدي
وبعد ذالليل انا خمسة عشر ألف..احبها
-
صمت .. هدوء
كلام عيون .. عتاب عيوون .. ليه .. وين هالكلام من زمن يالبخيلة ؟ .. وين دوى هالخاطر وطبه ؟ .. توّش تجين وحيّ هالجية .. مازينها
ارحبي بقلبي واقلطي ولاغيرش محشوم .. ولا غيرش يملكه ..
عزام ابتسم وهو يناظرها وساكت
زينة عقدت حواجبها بخوف من طول صمته
عزام بدا يعلى صوت ضحكه .. حط كفوفه على وجهه وهو يضحك وكنه ماهو مصدق اللي سمعه منها .. وماجداه الا يوم انه قام يطالع عينها يبي يتوكد .. يبي يصدق قام من مكانه وعيونه على السماء ومسكر عيونه ... اخذ نفس وهمس وصوته يتقطّع وكنه يعَدي/ياربي مامداني ادعيك الا ودعوتي مستجابه.. يالله يارب تممها.. بأن زولها مايحل لغيري من العرب .. اكتبها لي يالله وعجّل بها
عزام لف عليها ووجهه يسولف بالفرح والسّعد ... وانفاسه تسابق ويا نبضه
وبهدوء عكس قلبه اللي يقلّب على الجمر وده لو يخمها وده لو يششممها ولو مره .. وده ياخذ منها شوي ويحطها بصدره /قوليها
زينة فتحت عينها بصدمه من ضحكة وفرحته .. وضحكت/ويش اقول
عزام سحبها من يدها ووقفها قباله وعينه بعينها وسكر عيونه /ابي اسمعها منش .. انهجي علي قوليها لاتذبحيني حي
زينة ضحكت وشدت على كفوفه /مدري وش ودك اقول .. لكن اللي ادري به ! ان ودي هالوقت يوقف ماعاد يرجع ولا يتقدم .. ودي بعيونك وبس ودي هالضحكة ماتفارقك دامني سببها
ولا جداه الا من عروق دمه ضمها .. وكوّد لانها اول نوبه ويمكن ماتحصل
دامه مايلام
دام عذره معه
دام ماله ومال العرب .. مايلام
خمها لين اوجس ضلوعه تضم ضلوعها
ووريحتها اللي كل مااخذ منها .. يضمى ويبي منها زود !
-
قبل نص ساعه
عند نهله وام سيف
نهله من سمعت صوت ام سيف يتقطّع
دخلت واخذت شيلتها وسعود معطيها ظهره
وقربت تمد لها الماء /سمي
اخذ سعود الماء واسقى امه لين رد نفسها
ام سيف /اوجس .. اوجس بكتمه وحلمت .. حلمت بحلم كايد وثقيل
سعود مسك يد امه بخوف/يمه بلاش .. وش حلمتي فيه
ام سيف تنهدت وناظرت نهله /حلمت بأمش وابيش يانهله
وعت نهله وتخووبلت وطاحت كاسة الماء من يدها ... خنقتها العبره ورفعت راسها لأم سيف وقربت لذراعها وتعلقت بهه وعيونها تبرق /امي !.. وابي .. وش حلمتي بهم ، وش يقولون .. تكفين قولي لاتخبين شيٍ علي طلبتش
ام سيف تناظرها وتناظر سعود اللي ابتعد اول ماقربت ... ورفع راسه اول ماظهرت نبرة العبرهه بحلقها /تعوذي من الشيطان يابنية .. ووالقطي نفسش وهدّي
نهله تناظر ام سيف ومتجالتهه وشفاهها تهتز وعبرتها على الباب اما عيونها تمسك الدمع بطرف رمشها لايطيح /طلبتش تكلمي وش يقولون بالحلم
ام سيف بركاده /خير خير ان شاءلله .. سمي بالله ونامي ماهنا شي
نهله وهي تقاوم بركان عيونها لايثور رفعت صوتها برجى/ لا لاا تكفينن قولي طلببتتشش لو ماهم بالحقيقه ياخاله اابييهم بالحلمم طلبتشش قوولييه
سعود عقد حواجبه وهو ساكت ويطالعها ويطالع امه اللي يالله تنفس /بسس قالت خير يابنت افهمي .. المرة يالله تنفس .. اركدي وكل خير يبي ياصلش
نهله لفت عليه ومايبان منها غير عيونها الغرقه .. وببحه تقطّعها /ووش الخير اللي يبي يجيني عقبهمم .. ووش يدريييك بهالوججعع هو انت مجرربه هو انت خاابرهه! .. انا اتقطع واسج كل دقيقه بهم  ابي ماانسااهم وانت تقول اركدي!..
لاتدفن الناار والجممرر بالترااب وتمنعها تنفّس وانت تجهلها وتجهل مابها .. سعود سكت ويحس وكنها بحر هادي
وبين الثانيه والدقيقه ثار وموجه اعدم العرب وباقي به بحور بعينها ماظهرتها
قامت بسرعة وطلعت وياصلهم صوتها من بعيد /انا عند عايشة
فز ولف وجا يبي يلحقها
لين مسكته ام سيف /خلها .. خلها ماتلام الله يلوم اللي يلومها .. الحرّ اللي بها ماحدن يسولف به من كوده
اثنين واغلى اثنين ياسعود راحوا وتركوها تقابل هالدنيا لحالها ولاحول لها ولا قوة غير ربها
سعود تنهد ولف على امه بهدوء/سمي وارقدي يايمه ، وانا بعد الفجر ابسير على عايشة اطمنش
ام سيف /الله يعين ، يالله اجل انت ارقد لك شوي لين الصلاة
طلع سعود واخذ معه كاسة الماء وقف وهو يطالعها شوي .. اخذ نفس وهو يلوم نفسه  بس ماكان منه الا انه يقولها ذالكلام مير هي ماتلام .. ووالدينها بعدهم مابرى
حط الكاس محله وراح انسدح عنا المشب وعيونه على السماء
والهواء يلفحه وعيونها ماتروح عن عيونه .. كل ماحط عينه على شي مايشوف غير عينها
والحزن يملاها وقلبه يتقطع يحس انه اذنب بس يوم شاف عينها
وكلمتها الاخيرة .. لاتدفنه بالتراب وتمنع الجمر يتنفس وانت تجهلهه وتجهل اللي به
تنهد وتعوذ من الشيطان وانقلب على جنبه الايمن وسكر عيونه لين غلب النوم ونام
-
"انتهى الحلم ! برد انا عزام وتردين زينة والى تلاقينا .. نبتدي بأحلامنا مواسم جديدة "
نرد لزينة وعزام اللي ملاهم الحب وفاض !
عزام وهو يحس اللي مر به كله حلم .. ماهو معقول بكم كلمة ضحك ويبي يضحك طول عمره لو يسمعها كل يومم /تو ماني اسعد العرب يازينة .. وش هالشح توش تقولينها ، تبي تعجلين بموتي
زينة /اقطع واخس عن هالطاري لاتجيببه
عزام ضحكت عينه /اجل لاتبخلين علي ، كل يوم ابيها مرة وحده بس مانيب طماع ولو ان طمعي كلّة بيش ..
ابتسمت ونزلت راسها .. وحسنها وهي خجلة يضمي مدينة /ماني ب بخيلة قول .. انا بالفعل يديني طويله
عزام وكنه فاق من سمع المؤذن يصيح و يأذن .. / وبس .. انتهى الحلم ! برد انا عزام وتردين زينة والى تلاقينا .. نبتدي بأحلامنا مواسم جديدة
زينةويالله تلقط نفسها /امنتك الله
وصدت بسرعة تبي تمشي صوب الخيل
عزام بهمس وهو يطالعها تقفي عنه / اخذيني .. امّنتش عليّ وصوني هالأمانه واحفظيها
-
دخلت وشافت عايشة ونهله متقابلين .. عقدت حواجبها وعيون نهله تضيم /بلاكم؟ بلاش نهله بلا عيونش كذيه انتي باكيه !
عايشة /خلاص يازينة خليها تريح .. انتي وينش به
زينة /ولاشي .. اتمشى بالخيل واتنفس شوي
عايشة طالعت عيونها وهزت راسها /زين يالله هالحين توضي وصلي وكلامنا لا اصبح الصبح
زينة هزت راسها وطلعت توضى ودرت ان عايشة حست بكذبها .. انسدحت نهله ورقدت بهدوءء بعد هوجااس طويييل صامت ودنت منها عايشة تلحفها
ولفت على زينة شافتها راقده .. تنهدت بتعب وراسها يوجعها من قل النوم .. او بالأصح من عَدمه .. طلعت ودخلت على ام عقاب شافتها منسدحه صوب المشب وغافيه .. والماء بالابريق
حطت عليه القهوة وخلتها تطبخ .. جلست عندها وتشمم ريحتهاا وتحس بأوكسجين من نوع آخر
اوكسجين منعش فرييد .. ريحة القهوة العربيّة .. اللي بهالوقت يتغير كل جو البادية بريحتها
كلّن يفنّ بقهوته وريحتها تفووح
صبت القهوة بالدله المنحوته وحطت عليها الهيل وزعفرانها وشويّ مسمار مثل مايحبها ابوعقاب وحطتها على جال الضو تطبخ على مهلها
وبدت السماء تنوّر والشمس تشرق ..
سمعت صوت يناديها ولاهو ببعيد
فزت من عرفت راعيه وبداخلها عتب علييه ../سعوود !! زين جيت
سعود ابتسم /الله ي هالنظره والعتب .. وين ارحب ويين حياك الله
عايشة ناظرته /ارحب ولو ان الشرهه تاصل ابوابك
سعود دخل ولمح ام عقاب ووقف ونزل راسه /السلام عليكم ورحمة الله وبركاته ياام عقاب .. ويش حالش
ام عقاب /وعليكم السلام حياك .. الحمدلله بخير وش حالك انت
سعود /الحمدلله بخير ، سلمتي
ام عقاب قامت /يالله اجل انا ابي اسوي فطور ابيش
طلعت ام عقاب و جلس قبال عايشة وهو ساكت .. وعايشة تصب له قهوة وتقرب له القدوع .. رفعت راسها له تطالعه .. ووجهه اول مرة تشوف عليه هالملامح
ضايق .. ويهوجس
بعد صمت .. تكلم بهدوء /وشلونها ؟
تنهدت وهي تذكر حالها اول ماجتها .. ساكته وعيونها تكلم ساكته
وغيم عيونها يمطر .. الين سحبت منها الكلام وعرفت اللي بها
تكلمت عايشة اخيراً /البنت ضايمه ياسعود .. ماخبرتك كذيه وش بلاك عليها
سعود رفع عيونه لعايشة ويحس انه معه حق و انه اذنب ! /يابنت الحلال انا مدري وش اللي صار .. كذيه فجأة فار دمي وامي يالله تلقط نفسها وهي متعلقه بها تبي تعرف الحلم ، وهي شوي وتختنق من عبرتها لا هي اللي اظهرتها ولا هي اللي بلعتها .. انا ادري اني غلطان بس بعد هي كبرتها وهي صغيرة .. ولانيب لايمها يشهد الله مالمتها من حر اللي تحسه الله يستر عليها .. -تكلم بضيق - يابيش انا من البارح مارقدت مغير تزاول لي عويناتها وكلها دموع وتصارخ بوجهي ، حتى اني سكت نسيت حروفي .. قومي شوفي حالها وخليها ترد معي وتعوذ من الشيطان
عايشة ضحكت / خلها البنت توها رقدت
سعود شرب فنجاله /اجل ويش يضحكش
عايشة تقلد صوته /مغير تزاول لي عويناتها وكلها دموع .. هههههههههههههههههههه ابتس لايكون طحت ومحدن سمى عليك
سعود عقد حواجبه من فهم عليها .. ناظر عايشه واخذ نفس /البنية امانه ياعايشة وهذا اللي موجعني قلبي عليه .. ماودي تضيق وهي تحت سقف ابو سيف .. لاعاد اسمع هالطاري
عايشة طالعته /وانت تدري بي امزح
سعود ابتسم /زين ردي اضحكي لجل ارضى عليش
عايشة ضحكت /وانا ابضحك لاني خابرةٍ انك اصلاً مازعلت
‏-
الصبح عقب ماشرقت الشمس
جاء وغد من وغدان البادية ونادى عايشة
قامت من الفطور وجت يمه /نعم وش بغيت ../رجّالش يبيش صوب الجبل
وراح يعدي صوب الوغدان
عقدت حواجبها وهي تضحك /رجّالي؟
سحبت شيلتها وراحت له
وصلت له وهو ملقيها ظهره /انت ماتقول مرتي تفطر تقهوى نايمة قايمه ، لجل اندهها ذالوقت
ضحك ولف عليها /ارحبي
عايشة ابتسمت/صبحك الله بالخير
حاتم /دام الصباح بدى بوجهش .. اجل صباحي خير
عايشة /ودام صبحي ووجهك اجتمعوا .. ب هو من خيرة صباحاتي
حاتم ضحك /غلبتيني بالغزل وانا شاعر .. قولي بعد على ويش تنوين ؟
عايشة دنت منه وعيونها بعيونه /حشاك الله ماغلبتك بهالبيت .. دامك اللي غالبني بالقصايد
ابتسم براااحه وحب وقبل جبينها /وهالحين .. متى تنوين العرس .. عجلي علي ياعويش ماعاد بي قوة
عايشة ذكرت ان امها جت وماعاد لها عذرٍ تعذّر به /ء مدري مافكرت
حاتم /اهلش هنا لجلنا وامش جت وكلن يحتري موعد العرس
عايشة تنهدت /اجل اليوم يبي ياصلك الرد من ابي بوعقاب
حاتم بيتكلم واقفت عنه تمشي  ابتسم ومشى صوب ابيه وراح يفطر وياهم
-
فزت من رقادها اللي ماعاد يهنا لها
قامت واخذت شيلتها وراحت صوب ام سيف تطمن عليها
دخلت ولاقت سعود منسدح ومسكر عيونه صوب النار المرمّده
فار دمها من شافته راقد ومريح وبغيض/اشتهي اخذ لي كومة هالرماد واحشي فمك فيها الين تظهر عيونك من محلها
سكرت  عيونها وتستغفر ومشت لأم سيف بالمطبخ
ابتسمت بهدوء ودنت تقبل راسها /صبحش الله بالخير
ام سيف لفت عليها /ياهلا ياهلا ببنيتي ، وشحالش الحين يمه
نهله /لا انا بخير الحمددلله ، خاله انا ودي اتعذر على اللي سويته البارح
ام سيف /بس يايمه اللي صار محدن يلومش عليه ، حتى سعود ضاق صدره ومن صلوا الفجر راح ينشد  عايشة عنش
ميلت فمها من بعد صمت وجلست تعاون ام سيف .. وتناظر ام سيف وكن بعيونها هرج
ام سيف انتبهت لها /ويش عندش .. تبغين شي ؟
نهله بتردد وضيقه /ماودش تقولين لي وش حلمتي به ؟
ام سيف سكتت شوي /تبي تعرفين بعدين يايمه ، هالحين روحي حطي هذا
ومدت لها الصينية .. مسكتها بخيبة تعمي عيونها .. وتُذيب روحها بهدوء .. دخلت على سعود اللي لازال منسدح
وقفت ثواني مكانها تأكد هو راقد ! .. مع ان عليها شيله بس ماتبي تشوفه
حطت الصينية بوسط الخيمة وجت تبي تطلع .. لفت عليه .... هزت راسها وتنهدت وهي تمشي تكمل نومها
-
المغرب ..
راحت عند عايشة عقب ماقالت لأم سيف ولقت قبالها البنات متجمعات يتقهوون
عايشة /يالله حيها .. وين خفقتي .. (خفقتي=أختفيتي)
نهله /رحت اعاون ام سيف ورقدت
عايشة / طيب هالحين مادام انكن متجمعات ابي شوركم
زينة /اسلمي
سهام /وش عندك
ام عايشة لفت عليها وتبي تعرف وش عندها
عايشة انتبهت لأمها وسكتت شوي .. /العرس
زينة /اايييهه؟!
عايشة /يعني .. متى تبونه
نهله رفعت حواجبها وتطالع عايشة بإستغراب / هو ! حنا نبي نعرس ولا انتي
زينة /ههههههههههههههههههههههههه هذي انهبلت
ام عايشة /انا برايي لاتستعجلون
لفت لأمها بصمت تطالعها .. لين نطقت ام عقاب /وش مايستعجلون .. وش قاصرهم .. كم له خاطبها يابنت الحلال شوفي لش وقت مناسب بعد اسبوع كذيه وخلصي اللي تبينه .. والمهر جاش
سهام /صح
عايشة ناظرت زينة .. زينة /انا اقول متى ماخلصتي شغلش قولي لهم متاه .. ام عقاب /كل شي جاهز والى بغت شي هذا السوق عندها
عايشة /بس بس .. غيروا السيرة
قاموا يسولفون وكلهن التهى بنفسه
وقامت من بينهم وبدا قلبها يضرب وانفاسها تقطع .. اخذتت نفسس اكثر من مره تريح به عمرها وتواسي نفسها ولقت ابوها ابوعقاب يلبش فروته ومعه عصاه يبي يطلع /ييبه
ابوعقاب رفع راسه لها /سمي
عايشة /سم الله عدوك .. بغيتك تخبر الجماعه وتخبر الشيخ وولده ان العرس بغيته بعد اسبوعين
ابتسم ومسك وجهها بكفوفه /الا يابعد حيي هالوجه .. لاتقاطعينا يابوي هيتي عليها كل ليلة
عايشة ضحكت /وش عاد عرسي باكر عقب اسبوعين يابوعقاب هذي مهلتك اشبع مني ترا فراقي صعيب
ابوعقاب ضحك بخفه /انا اشهد .. الله لايذوقنا ياه ، وابشري بالعلوم الطيبه .. يالله فمان الله
عايشة /ودعتك الله
اقفى عنها وبكل خطوة .. تقربها وتوكّد لحياة جديدة .. لا هي اللي تبيها .. ولا هي اللي ماتبيها
كل مابها يهوجس .. الا قليبها منعمي كل ماذكر ان حياته الباقية كلها ويا حاتم بإذن ربي
حتى وجهها الخايف .. كل ماطرى عليه الشخص اللي تبي تكتمل حياتها معه رد يضحك وهو حيل مبسُوط !
رفعت يدها ليسار صدرها وهي توجس دقاته .. دقاته اللي لعبت بها بغير اذنها
دقااته اللي تقودها ولا تخطي المسير .. اوجست به يددققق زوووددد
-
وبمكان ثاني بخيمة ابوراجح الشيخ ..
قام كلّن يبارك له ولأبوراجح
وضحكته اللي استاسعت اول مادخل ابوعقاب وهو يناظره
وخابر انه حامل معه خبر يبي يقضي صبره وهو صبره طوييل يبي هالخبر !
بعـد اسبوعين ... بعد اسبوعين ياحاتم مابقى شي
هالاسبوعين تبي تروح مثل هبايب هالبادية تهب وتقضي بثواني
-
" بـعـد يومـيـن "
المغرب .. فوق راس الجبل مشاعر ممزوجه .. مختلطه طيوف باقيه ولو اصحابها راحوا
روائح ساكنه ومشيّده البيوت .. واصحابها يغطون ويردون
سكت يدينه وعينها بعينه /تبي تمشي ؟ متى ؟
حاتم /ايه ابمشي الليلة .. ابي دعاش يرافقني
عايشة /وش عاد .. لو انك تبي تسافر شهور .. كلها كم يوم وترد .. صح ؟!
حاتم هز راسه /الله الله .. ثلاث ايام او اربع وراد لش كما البرق يسبق صوت الرعد وماء المطر
عايشة ابتسمت/ماكنها واجد اربع ايام ؟
حاتم /احسن .. اولهي علي شوي ، ماهو صحيح مغير انا اللي اوله
عايشة ضحكت بمكر وتطالعه/يعني الى من رحت منتب واله علي !! حاتم تنهد وعينه بعينها / الا .. الا .. يابري روحي عليش
-
مدت لها زبيل الاعشاب /هاه يازينة .. اخذي .. عطيها ام حاتم
زينة طيرت عيونها وحطت شعرها ورى اذونها والخجل مربكها /لاء .. لا لالا عطيها نهله توديها
ام عقاب ناظرتها /هو!! قومي عيب عليش البنية وش يعرفها
زينة قامت عندها بعفويه وهي تحرك يدينها بالنفي /ما اقدر ما اقدر افهميني .. رجلي منعسره
ام عقاب حطته بيدها /اقول عن كثر الهرج مابش الا العافيه قومي وديه من اصبحتي وانتي تطايرين
زينة عقدت حواجبها وهي تذكر قبل اربع ايام هي وعزام .. طقت راسها بخجل /ابررك ابركك يالخبله .. هالحين الرجال يقول هذي خفيفه ولا بلاها .. مير طبخن طبختيه يالرفلا اكليييه استاهل
نهله تناظرها /منهو
زينة لفت عليها /يوه .. نسيتش .. انسي انسي انا بروح اوديه
نهله قامت / ابجي معش اطلق رجيلاتي واشم هواء
بعد ماوصلوا .. وقفت تصوت لام حاتم وطلعت لها
زينة مدت لها الزبيل /هذاا من ام عقاب وتسلم عليش بعد .. ام حاتم /ايييه جزاها الله خيير
زينة بربكة /وياش ان شاء الله
ولفت على نهله ومسكت يدها / يالله مشينا
نهله مستغربه منها /تعالي تعالي نتمشى حول الخيول
زينة ناظرتها وهي تمشي .. وموجسه ان عزام هناك مشت وراها وخاطرها شين
خجلها غلبها كل ماتذكر ذيك الليلة .. عقبها ماقابلت حاتم وكن عقلها صحى
سكرت عيونها اول ماسمعت صوته ووقفت مكانها ونهله تكمل
عزام /زيينة
لازالت على حالها .. متجمدة
قرب منها وهزها /بنية!
فزت وناظرته /اي والله هذا انت
عزام /بلاش !
زينة ضحكت .. وكن الدم انسكب على وجنتيها وشوي ويتفجّر / مابي شي
عزام ابتسم /وش حالش
زينة /الحمدلله بخير وانت
عزام /الحمدلله بخير من شفتش .. يحول وينش عقب ذيك الليلة ماشفتش
زينة والود ودها تروح ورى الشجره وتاخذ نفس وترد له .. حست بنفسها يتقطع/بخير يعني موجوده .. ماهناش شغل وحوسه وبعد خابر عرس عايشة قرب وانشغلنا
عزام يطالعها /لايكون لعبتي علي وماغديتي تحبين..
سكرت فمه بكفوفها بخوف نهله تسمع وابتسمت بوجهه /الااا الااا انت وشبلااك .. عزام ضحك من قلب /هههههههههههههههههه بلاش انتي .. لا لا بالله وش فيش
زينة غطت وجهها بكفوفها بعفوية وبهمس /ياربيه ياعزام والله من ذيك الليلة ومااقوى اطلع من البيت
عزام /ليه!
زينة تناظره / ممسستتحيه
عزام رجع يضحك على عيونها /ههههههههههههههههههههههههههههههههههههههههههههه ياويلي
نهله ردت /زينة ؟!
زينة فزت ولفت عليها /هاه .. سمي
نهله مشت معها وهمست /اييييه اجل هذا هو
زينة عقدت حواجبها /منهو! لا لا مهب هو
نهله ضحكتت/ايه العبي على غيري منيب ورعه عندش تلعبين علي
‏-
مرت الليلة على خير .. ومشى حاتم وبصدره من الاشواق مالا يقاس
اشتاق لها ولهله وتجهيزاتهم وسوالفهم اللي ماتخلص عن عرسه
اشتاق لروووحه اللي تركها وراح .. اشتاق لنفسه اللي عيّت تجي ويّاه
ولسان حاله يشكي ويقول ؛
ودعتها الف وداع .. ورحت وخليتني عندها
شغّل مسجل سيارته لعلّه ينسيه شوي .. وفتح جواله لجل يلقى مكالمات من اخوياه
ومن فهد اللي ينوبه بالشغل رسايل ومكالمات
تنهد وكمل طريقة بسجة يحس بحلاوة طعمها بلسانه
-
حطت راسها عند زينة وهي تهوجس به .. مرت ساعة ونص .. وصل ولا ماوصل .. رقد .. ولا توه ؟؟! تنهدت وسكرت عيونها بمحاوله ترقد وتوقف تفكيرها شوي
يوم جديد
صحت زينة تلفت حولها ومالقت عايشة كالعادة
قامت لورى الخيمة وشافت عايشة منسدحه على الفرشه تحتها وتطالع السماء
تنهدت وقربت من الماء تغسل /انتي متى تبي تقطعين هالعادة ، اذا اعرستي وش يبي يسوي بيش حاتم الضعيف يلاحقش من مكان لمكان
عايشة سكرت عيونها وانقلبت على جنبها بإنزعاج
زينة /قومي نسوي القهوة
جت نهله بإبتسامه /مرحبا
زينة /ارحبيي
نهله لفت على عايشة /بلاها هذي !
زينة بهمس /خليها منتفها الوله الحبيب البارح عود للديرة
عايشة مسكت كومه تراب وحصى ورمتهم على زينة /اقول كلي تراب وش ولهه راسي مصدع
زينة عصبت وبعناد /ااييه من الوله مصدع
عايشة ناظرتها /زييينة
نهله /بس بس .. انا ابروح ازهب القهوة تعالي يازينة معي
زينة مشت معها وهي تناظر عايشة .. مثل الاطفاال
-
بمكان بعيد .. الديرة
وببالتحديد عند حاتم ببيته اللي نقدر نقول عنه قصر .. من ردت له الروح
ابتسمم وهو يتخيل عايشة عنده هنا .. غير كل شي لجلها .. الحديقة
والاثاث .. والخدم .. ونظفوا البيت كلللهه
وحط لها خيمة تشبه خيام البادية بمساحه فاضيه بالحديقه .. لجل ماتاله على الباديه .. جابها لها لين عندها
‏-
يوم جديد .. العصر
مشت ولا تدري وين وجهتها .. ولا وش تبي .. كملت طريقها بسجه وتهووجس
ماتدري وش اللي جاب هالطاري على بالها .. قام يتراودن لها الأسئله واحد ورى الثاني
تنهدت بضييييق .. وش جااب هالطاري يازينة .. وش اطراه .. يارب انا ماعاد لي قوة
معقول ماتطري عليهم سواياهم ؟ معقول ما عمرهم مرّوا .. ولا سلّموا مثل هالاغراب اللي يمرون
لاحس ولاخبر عنهم
يعني ضميرهم نايم مايصحى .. ولا عقب مانام ناموا معه ولا عادهم صحوا
يعني معقول ماطريت عليهم .. انا مادري وش اسميني
اخذتت نفسس طويييلل وعيونها تحرررّهاا
انا مثل هالجبل .. لاريح هزتني ولا ريحٍ غدى بي
ولا صوت يوحشني .. ولا جور يلعب بي
مثله جبل .. بلا سند .. ولا ... أحد
عقدت حواجبها اول مالمحت زولٍ مهب غريب عليها
زادت صدمتها وطيرت عيونها .. هالمكان مايعرفه الا قلّه ولا يجيييه احد
وان جاء عنده احد مر عليه مرور الكِرام /ابوسهام؟!!!
-
طلع من خيمة ابوراجح صوب فرس حاتم اللي موصيه عليه
اسقاه وعقب مسكه يتمشى به .. لاقى عايشة ونهله يتمشن .. عزام /السلام عليكم .. مسهن بالخير
عايشة ونهله/وعليكم السلام
عزام /وشحالكن .. وين زينة ماشوفها معكم
نهله طيرت عيونها من ذكرته وبهمس /ايييهه
عايشة لفت عليها بهمس /بلاش
نهله اشرت لها تسكت
عزام /بلاكن
عايشة /مادري وينها زينه .. زعله الظاهر
عزام رفع حواجبه /بلاها زعله
عايشة ضحكت /مدري يابن الحلال رح شفها لاتضيع هالبنت عقلها مهو معها
عزام استغرب .. وكمل طريقه بقصد انه يدورها
-
فز ولف ودقات قلبه تكان تنحفر على صخرةٍ رماها ربي من زمن .. لترسم حياة طفله ومكان عيشها
وكنها مثل ماشهدت ليل جت وهي طفل .. ودها بعد تشهد بالحقيقة
ودها بعد ترد تضم زينة لا ضاق عليها زمانها
يوم مانولدت ماشالها حضن امها .. شالتها هالصخره وساقها الله لها
رد عليها وانفاسه تقطع وكل مااابه منهاارر مع ان ماله ذنب ! لكن الدنيا تدور
والله مايخلي بخاطر عبده شيء .. /زء زيينه .. هءااه سمي ! بغيتي شي
زينة مستغربه شكله وهو جالس على الصخره وظهره منحني ويتحسسها .. وكنه مغلووب /وش جابك في ذا
ابوسهام وهو يحس كل شي بان وهو العكس !
‏-
عزام فر كل البادية بهالخيل اللي معه ولا شاف لها اثر .. لين قام يسأل رووحه وين ممكن تروح .. وين راحت خطاها ياربي
زاد خوفه عليها والشمس بدت الغروب .. كان شعُوره مبالغ فيه .. بس هذا هو البلاء الحلو المؤقت .
لاشعُورياً طرت عليه الصخره .. معقول ! لا هي وعدتني ووعدت عويش ماعاد تطب ذاك المكان
وبدى يمشي بالخيل .. وصل وشافها من بعيد .. تنهد براحه ممزوجه بغضب
وقف مكانه اول مالمح معها شخص عجز يتعرّف عليه !!
-
ابوسهام وهو يحس كل شي باان وهو العكس !/ انا .. انا هنا .. كنت جالس
زينة ناظرته بحيره وعيونها تحاول تفسر ملامح هالتوتر اللي به
صد عن عيونها .. وهو يتحسّب عليها .. على يومٍ عرفها به .. على يومٍ نسى به عمره واخذ ذنب كبره يضاعف كبر هالجبل .. ويشيله معه وين ماراح ويزيدد حمله كل ما كبرت زينة سنه !!
زينة وغاريتها على المكان ماسمحت لها تسكت /وش مخليك تجي هنا !
وهالمكان بالذات
معقول يعني ماعندك سبب !.. طال الصمت وهي تنتظر منه اجابه .. ولمحت بعيونه رجاء وكن في حلقه كلام!
بس اكتفى بقول / اعرفه اعرف هالمكان زييين .. ومافيه شي بلا سبب .. بس ماهو وقته
ارجفت جفونها وهي تطالعه يمشي مقفي عنها
زادت نبضات قلبها وتنفسها
تمالكت نفسها ولفت عليه وصوتها يبتح وهي تنااديه/ هييه .. ارجع قل وش عندك -انخفض صوتها برجاء وعيونها تغرق ولا هي قاويه تحدّر- طلبتككك
مشى عنها ولا لقى لها بال .. والود وده يرد لها
ويجلس وياها يفهمها ويطول وقتهم ويقولها كل مابصدره ويزيح هالهم عنهه
اللي زااااااد حمله عليه ولا عاد يقواه .. .
اختفى عزام عن طريق ابوسهام وشافه .. /هذا مهو ابوسهام! وش يسوي بذا !!؟
مشى لزينة بسرعه بخيل حاتم وروحه تبي تطلع ووالافكار تروووح وتجي بباله
وقف مكانه اول ماشاف حال زينة !
جالسه على الصخره ومنحني ظهرها ومستنده على يدينها
وتهووووجس
قرب لها وقلبه يخفق عليها .. مسك كتفها
ترررجف !! .. زاد خوفه وجلس جنبها ومسك وجهها ولفها له ويطالع !! زينة اول مااروحت ريحتهه رمت نفسها بحضنه
تركها براحتها .. وزادت غربته بدون دموع بدون صوت بدون شيء!
زينة بهمس /ان كان له وقت .. ف وقته لا يجي تكفون !
عزام بعد مدة .. انتظرها لين هدَت /ويش قال لش ، هو احزنش ! قولي لي ويمين ان تحرم عليه الجيه مثله مثل غيره
رفعت عيونها له .. وكنها صحت على نفسها .. يجيها شيء .. شعور .. افكار كثيير من تجي هالمكان .. او من تجيها هالسيره .. نوب تنهار ، ونوب تجمد مثل الجليد الصلب وداخله جمره تذيبه بالرّاحه
واخيراً تكلمت وعيونها بحاله يرثى لها
ماتدري هي تدمع ولا تلم دموعها عن العرب لايلومونها/ عء عزام احس انه يعرف شي .. دايم تصرفاته غريبه معي وهالمره يوم نشدته عن هالمكان وسبب جيته .. قال به سبب بس مهو وقته ، تهقى انه ي يعررف ؟!!
عزام /الله اعلم
رجع الصمت يلازمهم ومسك يدها يبعدها عن هالمكان
-
اليُوم الثالث بغياب حاتم .. الصبح والشمس تشرق
وتغطيها الغيُوم الثّقال .. والجو بارد .. وريحة هوى البادية ريحة الضو لا قامت تلتهب وريحة القهاوي
هذي هي البادية بهالوقت .. مابه مخلُوق بها مايحبه  بدوا يفضّون ساحة البادية ويشيلون الشجر الزايد ويجهزونها
اما عند بيت ابوعقاب
ام عايشة حطت الحطب / الا ياعايشة ماودش تجين عندي بالديرة كم يوم اخذش معي المشغل وادلعش شوي
عايشة وهي بالموت تحرّى زول حاتم وشلون هو لا جاء مايلقاها /لا
ام عقاب تخزها/ان كانش تحرّين حاتم يجي والوله واصلن حده .. ترى لو تعدين هالباب حشيت رجولش .. عرسش ماباقي عليه شي وانتي تطايرين من جبل لجبل
عايشة طيرت عيونها والخجل يصيبها لاجابوا طاريه /الله ..
ام عايشة /لاتكثرين هرج .. تعالي معي ونسيني وتونسي وابي اقص شعرش ولو تبين صبغناه ونسوي لش حمام تغدين تلقين
عايشة فر عقلها /ويش ! اقص شعري ! تقص رقبتي قبل اقصه
ام عايشة بهمس وتصدد /بدت علوم ابوها .. يابنت الحلال نقص طرفه بس مهو كله .. لجل يتواسى ويطول
ام عقاب /ايه روحي .. ابرك من جلستش هنا وتناشبيني .. عايشة دخلت براسها الفكره /زين زين .. يومين بس ونرد !
ام عايشة /ايه ايه 
دخلت عليهم زينة وتوها صاحيه وخاطرها شيين /صبحهم بالخير
كلهم ردوا عليها .. وعايشة حست عليها وصدت تكمل قهوتها
زينة سكرت عيونها بهدوء وجلست جنب ام عقاب وهي ساكته
عايشة وعيونها على القهوة وهي تطبخ وساجه /يمه
ام عقاب /لبيه
ام عايشة /نعم
ام عايشة لفت على امها ونزلت راسها .. عايشة لفت على ام عقاب /انا موافقة اروح بس بشرط
ام عقاب / وشهو !؟
زينة ناظرتها ودها تنشدها وين بس حيلها منهد
عايشة ناظرت زينة /زينة تجي معي
ام عايشة لفت على زينة
زينة عقدت حواجبها /وشو! وين
ام عايشة /عايشة تبي تجي معي .. ههههههه قلت لجل ادلعها شوي قبل العرس .. زينة لفت على عايشة /تبي تروحين ؟
عايشة اتسعت ضحكتها /ايه .. تقول تبي تقص شعري طررفه بس وعلوم سهاام ابسوييها كلها كلهاا وانتي تبي تجين معي
ام عايشة ضحكت على كلامها وناظرت ام عقاب
زينة ناظرتها وطرى عليها ابوسهام البارح /انا مانيب رايحةٍ لمكان
عايشة ناظرتها وتدري ان عندها علم .. ام عقاب / روحي يايمه استانسي ، كلها يومين وتردون
زينة /مالي مزاج والله
ام عايشة /انتي خابره عايشة يازينة بالحسر طاعت تجي نسنعها للعرس وماباقي عليه شي تعالي معنا عاونيني عليها وكلها يومين ونرد هها عاد بلا دلع
زينة وماودها تكلم زود / يصير خير
جابت عايشة القهوة لهن وبدوا يتقهوون
-
دخل البيت يصوت لأمه وماسمع لها رد ومشى يبي يطلع للخيمة المفتوحه اللي يرقد بها
وشم رييحة النار والقهوة .
سعود تنحنح واظهر صوت لجل تنتبه
ودخل وشاف امه منسدحه باخر الخيمة
ونهله داريه بوجوده من مناداته لامه بس من دخل عليها ارتبكت ومسكت الحطبه الحاره بدل الملقط وصرخت بألم .. نفضت يدها بمحاوله تبريدها
سعود قرب عندها وعينه عليها طول ماهو جالس /انتبهي يامره ماتشوفين الحطب من الملقط
اخذ تراب بارد وحطه على يدها وتحس يدها تننبض من الالم
اللي اصبحت ماتوجسه من دنى لها
سحبت يدها منه بحياء
سعود بهدوء /تألمش ؟
نهله نفضت يدها وشدت شيلتها عقب مافات الآوان وشاف وجهها كله اللي على كثر ماشافه .. اليوم مختلف
يحس انها امانه وسعُود ياسعُود راعي الأمانه
انشدوه عن معنى الأمانه ان كانكم تجهلونه ... انشدوه وش هي الامانه ياسعود
الامانه اللي بديتها على نفسك ونسيت نفسك لجلها .. الامانه ياآخوصقر
رفع دلة القهوة اول ماطاشت على النار
ويوجس حرها وصامل لين احطها على التراب
ومسكها بقطعه قماش وراح لامه بآخر الخيمة وهي تناظره بصمت
عقدت حواجبها وهي تشوفه يصحي امه بهدوء
سعود يهز امه /يمه يمه ، يمه
حست بضلوعها تكسّر وتنهار بدون صوت  وعيونها تنهار بدون توقّف طلعت من المجلس وراحت ورى الخيمة
وتمشي ولايردها لا هوا ولا ريح ولا نعى
تحس بضعف هد حالها وماعاد ترد نهله الاولية .. قبل ثواني انعاد قدام عينها مشهد موت امها " يمه .. يمه يمه يالله الفطور .. يممه ! ......."
حطت يدينها على وجهها تمنع هالذكرى تطري على بالها
والدمع اللي بلَلّ غطاها وفتح طرق الزهر ببستان خدينها المرويّة .. عند سعود جالس يتقهوى مع امه ومستغرب وين نهله !
ام سيف /اجل وين نهله ، شكلها راحت يم عايشه
سعود هز راسه / الله يحفظها
سعيد دخل والنوم عامي عينه /السلام عليكم
-
المغرب الكل متجمع ببيت ام عقاب .. ام حاتم وام عايشة وام سيف ونهله وزينة وعايشة وسهام وبعض من نسوان البادية ..
ام عايشة همست لعايشة /تولموا بكره الصبح نبي نمشي
عايشة تنهدت ولفت على زينة اللي وافقت بالحسر ..... /زين
-
ابو سيف لف على سعود قبل يظهرون لأبوراجح /ماقلت لك ، عندي لك علم ذكرني به بالليل
هز راسه ومشى مع ابوه وهو يهوجس بطيرٍ حر اغفى قلبيه وطار .
-
بالديره ، عند حاتم
دروا كل اللي عنده بالشركة والجيران بان عرسه قريّب ووين ماوجّه يلبى من يبارك له
وبعد صلاة العشاء
دخل بيته وجلس بدكة كلها زرع بحديقته ومعه فروته وتركى على المركى .. وقدامه شبة النار ولاف شماغه على راسه
ومعه كتاب شعر الغزل فتحه يقرا به ويقلب بالصفحات ابتسم وهو يقرا "عايشة" بين السطور
وكن الغزل كله يتغزل بها ٓ
زولك حبيبي لمحته بين الاسطر
يالله عسى تآتي وتسرع الجيه
سماي انا ان جيت تفز تمطر !
اقرب تعال بيني وبيني هنيّه ٓ
رفع راسه للسماء واخذ نفس طويييييلل وشلون الله ساقها لطريقه وحبها واصبح اقرب لها من روحها
وهالحين قريّب ! .. تبي تصير حلاله
سكر عيونه بهدوء ورجع فتحها وهو يطالع القمر وخابر ان عايشة هالوقت عينها على السماء
-
بنص الليل بعد ما صلى ابوسيف الوتر واستخار
قام وجلس بالخيمة ونادى سعود وسعيد كان جالس
ابوسيف /انا قبل مااقولك .. استخرت ولاحنا لاقين لك احسن من هالشّور
سعود استغرب /اسلم!
ابوسيف ناظره وناظر سعيد /نبي انا وامك نزوجك نهله بعد عرس عايشة وحاتم بأسبوع
سعود بعد صمت وكن هالعلم شل تفكيره وعارف ماقالوا الا ان به سبب / وش اللي خلاكم تبون!؟
ابوسيف /يا ابوك امك حلمت حلم ، نهله امانه ولزوم تعرس عليها والبنية ماعليها قصور ويكفي انها بنت جارنا من سنين
سعود حس بكتمه من طاري العرس .. وضاق خاطره ولا بيّن لأبيه /ابشر باللي تبيه
سعيد قام حب راسه وهو يضحك /الف مبروك ياعم
سعود ابتسم وطلع برا لجل يشم شوية هواء
-
بنفس الدار ..
ام سيف لنهله / سعود يبيش يانهيّل على سنة الله ورسوله .. وانا ابيش جنبي وحولي دوم وسعود لو ماهو ولدي واعرفه اني اشهد ان اطيب من قليبه مابه .. وانشدي عنه عايشة
نهله تناظرها والدهشة تملى عينها .. نزلت راسها بحياء وصدمه .. سعود!!!
سعود وش اللي خلاه يبيني ! .. مادخلت راسها فكرة ان سعود يبيها ويبي يعرس عليها وهي خابرته !/خاله! وش اللي خلا سعود يبيني بهالسرعه وانا اخبر سعود من عاده صغيّر
ام سيف /مدري يابنت الحلال .. مير فكري زين ترى سعود عجل .. نبي العرس بعد عرس عايشة باسبوع
نهله زاد خجلها وش بلاه عَجل ! وصدت عن ام سيف
وداخلها نغزات جديدة بيسار الصدر جاهلتها
-
بعد يوم كامل .. راحوا عايشة وزينة مع ام عايشة وسهام راحت معهم
باليوم الثاني ..العصر
ام عايشة /يالله البسن عبيكم .. لبسوا وراحوا لمشغل قريب من بيت ام عايشة
دخلوا وهم يشوفون وجيه جديدة غير عن اللي بالبادية
وجلست عايشة بكرسي وام عايشة وسهام واقفات جنبها وزينة جالسه وعيونها حايره بالمكان
جت الكوافيره ووقفت قبال عايشة وابتسمت / ماشالله ع العروس
عايشة طيرت عيونها ولفت على امها بهمس /هذي بلاها ، من علمها اني ابعرس
ام عايشة بهمس /اشش انا قايله لها
سهام بحماس /ايواا ، وش بتسوين لنا
الكوافيره بعد صمت /نقص اطراف الشعر .. وحمام .. وإزا بدك بدكير والحواجب حلوه .. بدكن شي تاني !؟
سهام لفت على عايشة / تبين بعد شي ؟
عايشة /لا
سهام /انا بقص شوي من شعري واشقر حواجبي وووباخذ حمام
ام عايشة لفت على زينة /هاه يازينة انتي وش بغيتي
زينة وعت /هاه ،
عايشة /سووا لها حمام معنا انا وسهام وقصي طرف شعرش مهو كله ، ووش بعد تبين
زينة /لا بس يكفي
الكوافيره /تمام يالله رح نبدا
نادت العاملات وكل وحده مسكت لها وحده وام عايشة بالاستراحه تقهوى
-
مرت اربع ايام على غياب حاتم واليوم الرابع .. كان مجهز روحه من البارح على انه يمشي بكره ، ركب سيارته وطلع من بيته وكله شووق فايقٍ حده
.
.
أسافر بوجهك وأعرف الدرب والعنوان
هو أجمل محطاتي ولا لي .. غنى عنه
.
.